IKINULONG ANG MGA KAPATID | “Determinado Akong Huwag Biguin si Jehova Kailanman”

I-PLAY

Noong Setyembre 19, 2025, hinatulan ng Proletarskiy District Court of Saransk si Brother Ivan Neverov ng pagkabilanggo nang pitong taon at anim na taon at anim na buwan naman kay Brother Mikhail Shevchuk. Mula sa korte, dinala agad sila sa bilangguan.

Profile

Ivan Neverov

Ipinanganak: 1986 (Mineralnye Vody, Stavropol Territory)

Nabautismuhan: 1998

Maikling Impormasyon: Nagtatrabaho sa konstruksiyon. Ikinasal kay Tatyana noong 2014

Kaso: Pag-oorganisa ng mga relihiyosong pagpupulong ng mga Saksi ni Jehova

Nabilanggo nang halos dalawa’t kalahating buwan kahit hindi pa nalilitis at sinundan pa ng tatlong-buwang house arrest

Sentensiya: Pitong taon sa bilangguan

Personal na mga Komento

Kaninong halimbawa ang talagang nakapagpalakas ng loob mo?

Lagi akong napapatibay sa lakas ng loob ng mga kapatid. Nakikita nila na iniimbestigahan, nire-raid, inaaresto, nililitis sa korte, at nabibilanggo ang mga kapatid na personal nilang kakilala. Pero hindi sila natatakot at hindi nila sinusubukang tumakas sa pag-uusig. Patuloy pa rin silang naglilingkod kay Jehova nang tapat. Sa kabila ng mga panganib, pumupunta sila sa korte at sinusuportahan kami. Talagang nakapagpapalakas iyon sa akin at gusto ko silang tularan. Proud akong maging bahagi ng isang espirituwal na pamilya na talagang tapat sa isa’t isa. Itinuturing kong isang pribilehiyo na maglingkod kay Jehova kasama nila.

Mikhail Shevchuk

Ipinanganak: 1986 (Goryachevodsky, Stavropol Territory)

Nabautismuhan: 2000

Maikling Impormasyon: Nagtrabaho sa pagawaan ng muwebles. Ikinasal kay Yaroslavna noong 2013

Ang nakababatang kapatid ni Mikhail na si Aleksandr ay nakulong dahil sa kaniyang pananampalataya at pinalaya noong Nobyembre 3, 2023

Kaso: Pag-oorganisa ng mga relihiyosong pagpupulong ng mga Saksi ni Jehova

Nabilanggo nang halos dalawa’t kalahating buwan kahit hindi pa nalilitis at sinundan pa ng tatlong-buwang house arrest

Sentensiya: Anim na taon at anim na buwan sa bilangguan

Personal na mga Komento

Paano ka nakinabang sa halimbawa ng pananampalataya ng pamilya mo?

Dalawa sa aking mga lolo sa tuhod ang ibinilanggo noong 1940’s at ipinadala sa Siberia. Nakulong naman ang dalawang lolo ko dahil sa kanilang pananampalataya noong 1960’s at 1970’s. Noong huling bahagi ng 1970’s, nakulong din ang tatay ko dahil sa pagtangging magsundalo. Kahit naranasan nila ang mahirap na sitwasyong ito at napalayo sa pamilya, wala ni isa sa kanila ang nagkuwento ng sama ng loob o pagsisisi. Sa halip, positibo ang mga kuwento nila. Ikinukuwento nila kung paano sila inalagaan ni Jehova noon at ang kamangha-manghang mga bagay na ginawa ni Jehova para tulungan silang manatiling tapat at makapagtiis. Nang magsimula ulit ang pag-uusig, tinawagan ako ng lolo ko at sinabi niya, “Pa’no ba ’yan, kayo naman.” Maraming taon akong naghanda para sa sandaling ito, at determinado akong huwag biguin si Jehova kailanman.

Pinahahalagahan natin ang maraming halimbawa ng lakas ng loob at pagtitiis na makikita sa tapat na mga lingkod ni Jehova. At determinado tayong ‘tularan ang kanilang pananampalataya.’—Hebreo 13:7.

Tingnan Din

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.