HULYO 31, 2025
RUSSIA

Itaas: Valeriy Khmil, Sergey Kretov, Tatyana Morlang, at Nataliya Perekatiy

Ibaba: Aleksandr Podolin, Aleksandr Popras, Yevgeniy Reshetnikov, at Svetlana Vyrezkova

‘Ang mga Halimbawa ng Pananampalataya ay Nagbibigay ng Kaluwalhatian sa Pangalan ni Jehova’

I-PLAY

Noong Hulyo 28, 2025, hinatulan ng Gryazi City Court of the Lipetsk Region sina Brother Valeriy Khmil, Sergey Kretov, Aleksandr Podolin, Aleksandr Popras, at Yevgeniy Reshetnikov, at sina Sister Tatyana Morlang, Nataliya Perekatiy, at Svetlana Vyrezkova. Nagpataw ang hukuman ng mga multa mula 250,000 ruble ($3,073 U.S.) hanggang 550,000 ruble ($6,761 U.S.).

Profile

Valeriy Khmil

Ipinanganak: 1982 (Kolpashevo, Tomsk Region)

Nabautismuhan: 2008

Maikling Impormasyon: Nagtatrabaho bilang warehouse manager. Ikinasal kay Kira noong 2007. Mayroon silang dalawang anak na babae at isang anak na lalaki.

Kaso: Pangangasiwa sa mga relihiyosong pagpupulong ng mga Saksi ni Jehova sa pamamagitan ng videoconference

Sentensiya: Pinagmulta ng 400,000 ruble ($4,917 U.S.)

Personal na mga Komento

Ano ang natutuhan mo tungkol kay Jehova sa panahong ito ng pagsubok?

Kulang ang mga salita para ilarawan ang pagiging mapagmalasakit na Ama ni Jehova. Marami sa atin ang dumaranas ng mga pagsubok, pero bawat isa sa atin ay nakakatanggap ng eksaktong tulong na kailangan natin para makapagtiis. Kilalang-kilala ni Jehova ang pamilya niya at mahal niya tayong lahat. Lalo akong nakumbinsi na hindi kailanman papabayaan ni Jehova ang mga tapat sa kaniya dahil kitang-kita ko kung paano niya ako tinulungan.

Sergey Kretov

Ipinanganak: 1978 (Grozny, Chechen Republic)

Nabautismuhan: 1997

Maikling Impormasyon: Nagtrabaho sa pabrika. Ikinasal kay Marina noong 2004. May isa silang anak na babae

Kaso: Pangangasiwa sa mga relihiyosong pagpupulong ng mga Saksi ni Jehova sa pamamagitan ng videoconference

Sentensiya: Pinagmulta ng 300,000 ruble ($3,688 U.S.)

Personal na mga Komento

Ano ang tumutulong sa iyo para mapanatili ang pagtitiwala mo kay Jehova?

Talagang napapalakas ako ng sinasabi sa Awit 73:25: “May iba pa ba sa langit na tutulong sa akin? At bukod sa iyo ay wala na akong iba pang kailangan sa lupa.” Gusto tayong takutin ni Satanas. Pero hangga’t kasama ko si Jehova, wala akong dapat katakutan. Alam kong magiging maayos din ang lahat. Ang kailangan ko lang gawin, manatiling kalmado at magtiwala kay Jehova.

Tatyana Morlang

Ipinanganak: 1957 (Gryazi)

Nabautismuhan: 2018

Maikling Impormasyon: Isang ahente bago magretiro. Ikinasal kay Viktor noong 1982. Mayroon silang isang anak na lalaki at isang anak na babae

Kaso: Pagdalo sa mga relihiyosong pagpupulong ng mga Saksi ni Jehova

Sentensiya: Pinagmulta ng 250,000 ruble ($3,073 U.S.)

Personal na mga Komento

Ano ang nakakatulong sa iyo para malabanan ang negatibong mga damdamin?

Kapag nag-aalala ako o pinanghihinaan ng loob, iniisip ko ang Kawikaan 16:3: “Ipagkatiwala mo kay Jehova ang anumang gagawin mo, at magtatagumpay ang iyong mga plano.” Dahil ipinagkatiwala ko na kay Jehova ang sarili ko, nararanasan ko ang pangangalaga niya, paggabay, at maibiging suporta, na tumutulong sa akin na malabanan ang mga negatibong damdamin. Alam ko rin na ipinapanalangin ng mga kapatid sa buong mundo ang mga katulad ko na pinag-uusig. Talagang nakakatulong sa akin ang mga panalanging ito na makapagtiis at maging masaya sa bawat araw.

Nataliya Perekatiy

Ipinanganak: 1953 (Dachi Village, Yaroslavl Region)

Nabautismuhan: 1992

Maikling Impormasyon: Nabiyuda noong 1993. May dalawang anak na lalaki at isang anak na babae

Kaso: Pagdalo sa mga relihiyosong pagpupulong ng mga Saksi ni Jehova

Sentensiya: Pinagmulta ng 250,000 ruble ($3,073 U.S.)

Personal na mga Komento

May partikular bang talata sa Bibliya na nagbigay sa iyo ng lakas?

Sa 2 Corinto 12:10, sinasabi: “Kaya nalulugod ako sa mga kahinaan, insulto, panahon ng pangangailangan, at pag-uusig at problema alang-alang kay Kristo. Dahil kung kailan ako mahina, saka naman ako malakas.” May mga pagkakataon na pakiramdam ko, kasinliit at kasinghina ako ng isang sisiw, na nagtatago sa ilalim ng mga pakpak ni Jehova. Pero habang patuloy akong natututo na lubos na magtiwala sa kaniya, lagi niyang pinapatunayan na siya ang pinakamaaasahan kong Kaibigan. Lagi siyang nasa tabi ko at pinapatibay akong huwag sumuko. Dahil dito, lumalakas ako at hindi na ako masyadong natatakot.

Aleksandr Podolin

Ipinanganak: 1970 (Lipetsk Region)

Nabautismuhan: 2009

Maikling Impormasyon: Nagtrabaho bilang mekaniko sa riles ng tren. Ikinasal kay Svetlana noong 2014

Kaso: Pangangasiwa sa mga relihiyosong pagpupulong ng mga Saksi ni Jehova sa pamamagitan ng videoconference

Sentensiya: Pinagmulta ng 450,000 ruble ($5,532 U.S.)

Personal na mga Komento

Bakit ka nagtitiwala na pagpapalain ka ni Jehova?

Isinulat ni David sa Awit 37:4: “Magkaroon ka ng masidhing kasiyahan kay Jehova, at ibibigay niya sa iyo ang mga kahilingan ng puso mo.” Sigurado ako na hangga’t pinapanatili ko ang malapit na kaugnayan ko kay Jehova, diringgin at sasagutin niya ang mga panalangin ko. Kahit gaano pa kalala ang sitwasyon, alam kong susuportahan niya ako. At alam ko ding permanente niyang aalisin ang lahat ng pagdurusa sa mundo sa hinaharap.

Aleksandr Popras

Ipinanganak: 1967 (Bratsk, Irkutsk Region)

Nabautismuhan: 1994

Maikling Impormasyon: Nagtrabaho sa isang service station. Pinakasalan si Yelena noong 1989. Mayroon silang isang anak na babae, isang anak na lalaki, at apat na apong lalaki

Kaso: Pangangasiwa sa mga relihiyosong pagpupulong ng mga Saksi ni Jehova sa pamamagitan ng videoconference

Sentensiya: Pinagmulta ng 550,000 ruble ($6,761 U.S.)

Personal na mga Komento

Ano ang nakakatulong sa iyo na magkaroon ng tamang pananaw sa pag-uusig?

Napapatibay ako sa pagtitiis ng mga kapatid sa iba’t ibang bahagi ng Russia. Naaalala ko sa kanila ang 1 Pedro 2:12, sinasabi doon: “Panatilihin ninyo ang inyong mabuting paggawi sa mga bansa, para kapag inakusahan nila kayong gumagawa ng masama, maging saksi sila sa mga ginagawa ninyong mabuti, at bilang resulta, luwalhatiin nila ang Diyos sa araw ng pagsisiyasat niya.” Ang lahat ng halimbawang ito ng pananampalataya ay nagbibigay ng kaluwalhatian sa pangalan ni Jehova at nagpapaalala sa akin na hindi ako nag-iisa. Nagtitiwala ako na sa tulong ng Diyos, makakapagtiis tayong lahat nang magkakasama.

Svetlana Vyrezkova

Ipinanganak: 1971 (Turkmenistan)

Nabautismuhan: 2001

Maikling Impormasyon: Nagtrabaho sa isang salon. Nagpakasal kay Oleg noong 1999. Mayroon silang dalawang anak na babae

Kaso: Pagdalo sa mga relihiyosong pagpupulong ng mga Saksi ni Jehova

Dalawang araw na nanatili sa isang temporary detention facility

Sentensiya: Pinagmulta ng 250,000 ruble ($3,073 U.S.)

Personal na mga Komento

Ano ang tumulong sa iyo na makapagtiis habang nasa temporary detention center?

Napanatag ako noong pag-isipan ko ang Isaias 41:9, sinabi ni Jehova doon: “Ikaw ay lingkod ko; pinili kita; hindi kita itinakwil.” Habang nakaupo ako sa selda, naramdaman kong kasama ko si Jehova sa buong panahon iyon. Tinulungan niya akong maging kalmado at payapa. Gusto kong gawin ang buong makakaya ko para mapasaya siya.

Habang nagpapatuloy ang pag-uusig sa mga kapatid natin sa Russia at Crimea, nagtitiwala tayo na patuloy silang bibigyan ni Jehova ng kanlungan sa kaniyang “walang hanggang mga bisig.”—Deuteronomio 33:27.

Tingnan Din

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.