Wepaly är-aýal nikasyny ömürlik hasaplaýar, bir-birine hiç haçan müňkürlik etmeýär. Olar hatda kyn günde-de biri-birini taşlamajakdygyna ynanyp ýaşaýar.

Käbir är-aýallar il-günüň, dogan-garyndaşlarynyň gepinden çekinip aýrylyşmaýar. Ýöne wepaly bolmak ýanýoldaşyň bilen bialaç ýaşamagy aňlatmaýar. Är-aýal bir-birini ýürekden söýmeli we hormat goýmaly.

MUKADDES KITAPDAKY MASLAHAT: «Äri hem aýalyny taşlamasyn» (1 Korinfliler 7:11).

«Ýanýoldaşyňy söýseň, düşünişmezlik bolanda gaharlanyp oturmaýaň. Bagyşlamagy we ötünç soramagy kiçilik bilmeýäň. Kynçylyk ýüze çyksa derrew aýrylyşjak bolmaýaň» (Maksat) *.

Är-aýal wepaly bolmasa, maşgalada düşünişmezlik dörände: «Şuňa sataşmadyk bolsam, gowy bolardy. Onuň bilen ýaşar ýaly däl-ä!» diýip, aýrylyşmaga bahana gözläp başlaýar.

«Häzir köpler: „Aý, oňuşmasak, aýrylyşaýarys“ diýen pikir bilen durmuş gurýarlar. Şeýle niýet bilen durmuş gurýanlar hiç haçan ýanýoldaşyna wepaly bolup bilmezler» (Jahan).

ÖZÜŇIZI BARLAŇ

Dawa-jenjel bolanda...

• şu adam bilen toý edenime ökünýänmi?

• başga biri bilen toý eden bolsam has gowy bolardy diýýänmi?

• ol hijem gadyrymy bilmeýär, aýrylyşyp dynaýyn-la diýýänmi?

Eger sizde-de şeýle pikirler döreýän bolsa, heniz giç bolmanka wepaly är ýa-da aýal bolmaga jan ediň.

GEPLEŞIŇ

• Biri-birimizden näme üçin sowaşýarys?

• Bir-birimizi öňkimiz ýaly söýüp, wepaly bolmak üçin näme edeli?

MASLAHAT

• Söýgi hatjagazyny ýazyň

• Iş ýeriňizde, telefonyňyzda ýanýoldaşyňyzyň suratyny goýuň

• Her gün jaň ediň ýa-da SMS ýazyň

MUKADDES KITAPDAKY MASLAHAT: «Hudaýyň goşanyny ynsan aýyrmasyn» (Matta 19:6).