Aver yem sha atineakaa

Mbashiada mba Yehova

Tsua Zwa Tiv

Er Nan Ve Mbashiada mba Yehova Ve Bughun Zwa sha Hanma Kwagh u I Ôr sha a Ve Dang Ga?

Er Nan Ve Mbashiada mba Yehova Ve Bughun Zwa sha Hanma Kwagh u I Ôr sha a Ve Dang Ga?

Mbashiada mba Yehova mba dondon kwaghwan u Bibilo ve ve bughun zwa sha hanma kwagh u i ôr sha iyol ve dang ga ye. U tesen ikyav yô, injakwagh igen ken Bibilo kaa ér: “Or u nan kôôm orpuunakaa yô, nan ngu van a ihyeen sha iyol i nan.” (Anzaakaa 9:7, 8; 26:4) Se mba den ser akaa a mimi ga a ior ve ôr sha a vese la a za se iyol se hingir u eren ayôôso a ve ga, kpa ka se ver ishima sha u eren ishima i Aôndo.—Pasalmi 119:69.

Nahan kpa, “shighe u huan ving” ngu, kua “shighe u lamen.” (Orpasenkwagh 3:7) Ka se lam a ior mba lun a ishima i mimi mba i sar ve u fan mimi yô, kpa ka se palegh anyimanakaa a gbilinigh. Sha nahan yô, se mba dondon ityesen man ikyav i Yesu kua Mbakristu mba sha ayange a mbaapostoli la.

  • Yesu yange bugh zwa shighe u i wa un akaa iyol sha ishigh ki Pilatu la ga. (Mateu 27:11-14; 1 Peteru 2:21-23) Shi zum u i lu lamen sha Yesu dang ér a wa hua sha kwaghyan man msôrom la kpa, a bugh zwa ga. Yange de ér ior ve nenge ieren na man vea fa or u un lu la jighilii ye, sha u zuan sha kwaghwan ne: “Mfe zua a ishô sha aeren a na.” (Mateu 11:19) Nahan kpa, kwagen la Yesu ôr kwagh paase paase a ior mba lamen sha a na dang, zum u gba u una er nahan yô.—Mateu 15:1-3; Marku 3:22-30.

    Yesu tese mbadondon un ér shighe u i lu wan ve akaa iyol kpa iyol i de kpen ve ga. A kaa ér: “Saan ne iyol zum u ka a heen ne, a tôvon ne a ican, man a teren ne sha hanma inja i ifer sha aie, sha ci Wam yô.” (Mateu 5:11, 12) Nahan kpa, Yesu shi kaa ér zum u akaa a i we mbadondon un iyol la a bugh ve gbenda u eren shiada sha kwagh na yô, una kure ityendezwa na ne, a kaa ér: “Mo Me na ne zwa man mfe u mba ve hendan kwagh a ven cii vea fatyô u vendan ga, u nyiman kpaa ga yô.”—Luka 21:12-15.

  • Apostoli Paulu yange wa Mbakristu kwagh ér ve palegh u gban anyiman sha agbilinakaa vea mbahendan a ve. A kaa ér anyimanakaa a ngara nahan “nga a inja ga, ka gbilin tsô.”—Titu 3:9; Mbaromanu 16:17, 18.

  • Apostoli Peteru yange taver Mbakristu ishima ér ve pase jighjigh u nan ve zum u i gbe hange hange yô. (1 Peteru 3:15) Nahan kpa, yange fa er i hembe doon u eren kwagh ne sha ieren, a u ôron sha zwa yô. A nger ér: “Ka u né eren dedoo man né cir abumeaior zwa sha lanegh vegh ye.”—1 Peteru 2:12-15.