Aver yem sha atineakaa

Ka An Yange Nan Hii Nongo Wene?

Ka An Yange Nan Hii Nongo Wene?

Nongo u Mbashiada mba Yehova mba sha shighe wase ne hii ken kwavanyom u sha 1870 la. Sha shighe la annongo u mbahenen Bibilo mba ve lu ikyua a gar u Pittsburgh, ken kpentar u Pennsylvania ken tar u Amerika yô, hii u timen ken Bibilo vighe vighe. Ve kar atesen a ucôôci sha akaa a Bibilo i tese jim jim la. Ve hii u ngeren akaa a ve hen la shi gberen a ken ityakerada man upipambaabaver man magazin u í yer hegen ér Iyoukura—U Yôôn Tartor u Yehova la.

Orgen i yilan un er Charles Taze Russell, un kpa lu môm ken annongo u mbahenen Bibilo sha gbashima mban. Shin er Russell hemen tom u tesen ior Bibilo shi lu or u hiihii u kengese Iyoukura nahan kpa, a hii a hii kwaghaôndo u he ga. Awashima u Russell man mba i yilan ve sha ayange la ér Mbahenen Bibilo la yô, lu u samber a atesen a Yesu Kristu shi dondon aeren a tiônnongo u Kristu u sha ayange a mbaapostoli la. Er lu Yesu hii Kwaghaôndo u Mbakristu yô, se tôô ser ka un je yange ver nongo wase ye.—Mbakolose 1:18-20.