Aver yem sha atineakaa

Me Er Nan Ve Me Hingir Orshiada u Yehova?

Me Er Nan Ve Me Hingir Orshiada u Yehova?

Yesu yange pase akaa a i gbe u or a er ve nana hingir Orshiada u Yehova la, i nger a ken Mateu 28:​19,20. Ijiir ne ter akaa a or a eren ve nana hingir orhenen u Yesu yô. Akaa shon wa u lamen shin eren shiada sha kwagh u Yehova.

Kwagh u hiihii: Fa kwagh u Bibilo i tese yô. Yesu yange wa mbadondon un tom ér ve gema ior ve hingir mbahenen shi ve tesen ve. (Mateu 28:​19, 20) Bibilo pase akaa a i gbe u u er ve a saan we iyol shi uma wou una lu u a inja yô, man ka atesen a Yesu Kristu aa i nger ker la je a hembe pasen se akaa ne ye. (2 Timoteu 3:​16, 17) Ken tom u henen Bibilo a ior gbilin u se eren ne, doo se u wasen we ser fa kwagh u Bibilo i tese yô.​​—⁠Mateu 10:​7, 8; 1 Mbatesalonika 2:13..

Kwagh u sha uhar: Eren kwagh u u lu henen la. Yesu yange kaa ér gba u mba ve lu henen ityesen na la vea ‘kuran akaa a un we ve kwagh sha mi cii.’ (Mateu 28:20) Kwagh ne tese ér gba u u henen Bibilo er ka takerada nahan di tsô ga, a gba u de Bibilo ia gema mhen wou kua ieren you sha gbenda u vesen. (Aerenakaa 10:42; Mbaefese 4:​22-29; Mbaheberu 10:​24, 25) Mba i sar ve u kuran shin dondon akaawan a Yesu la ka vea henen Bibilo yô, kwagh la a mgbegha ve ve tsua a ishima ve ér vea dondo un, nahan ve tsegha ayol a ve sha ci u Yehova Aôndo.​—⁠Mateu 16:⁠24.

Kwagh u sha utar: Er batisema. (Mateu 28:19) Bibilo tôô batisema u eren kar sha u iin or. (Nenge Mbaromanu 6:​2-4.) Batisema ka ikyav i tesen ér uma wou u tse la hingir kpenegh, nahan u hii uma u he. Nahan ka wea eren batisema yô, u ngu tesen ken igbar wer u er akaa a ahar a hiihii a Yesu yange kaa la u bee, shi u ngu zamber a Aôndo wer a wase u u lu a imo i wang ken ishima.​—⁠Mbaheberu 9:14; 1 Peteru 3:⁠21.

A er nan ve me fa mer m kuma u a erem batisema?

Lam a mbatamen mba ken tiônnongo, sha er vea fa aluer u kav kwagh u i gbe u u er, shi u ngu dondon kwagh u u hen la, shi u tsegha iyol you sha ci u Aôndo a ishima you yô.​—⁠Aerenakaa 20:28; 1 Peteru 5:​1-3.

Mbayev mba mbamaren vev ve lu Mbashiada kpa saa vea er akaa atar a i ter sha heen nee?

Een. Se mba yesen mbayev asev “sha mkôôm man kwaghwan u Ter,” er Bibilo i kaa ér se eren nahan. (Mbaefese 6:⁠4) Nahan kpa, ka vea nguren kaven kwagh yô, i gba u vea tsua ayol a ve u henen kwagh u Bibilo i tese la, shi ngohol ityesen shon, shi dondon i, cii man vea kuma u a er ve batisema ye. (Mbaromanu 12:⁠2) Kohol cii yô, gba u hanma or nana tsua a ishima i nan u civir Aôndo.​—⁠Mbaromanu 14:12; Mbagalatia 6:⁠5.