Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Mbashiada mba Yehova Mba sha Tar Kuma Ingyegh Nena?

Mbashiada mba Yehova Mba sha Tar Kuma Ingyegh Nena?

Ibaver i Tomshiren u ken Inyom * i 2015

Ingyegh ki Mbashiada mba Yehova sha tar cii ka

8,457,107

Atôônanongo a ve nga

120,053

Mbashiada mba Yehova mba pasen kwagh ken ityar

240

Ka ne ôr ior enev ingyegh nena?

Ka ior mba ve pasen loho u dedoo u Tartor u Aôndo ken hanma uwer la tseegh ka se wa ve ken ingyegh ki mba Mbashiada mba Yehova ye. (Mateu 24:14) Ka i lu mba ve er batisema ve hingir Mbashiada, kua mba ve lu a er batisema ga kpa ve kom u pasen kwagh shi ve lu eren tom u pasen kwagh la tseegh.

Ka i gba u or a na inyaregh ve nana nyôr nongo wen yee?

Ei. Ka sha u nan kwagh or ka nan kuma u lun Orshiada shin eren ma tom shin lun sha ma ian ken nongo wase ga. (Aerenakaa 8:​18-20) Jighilii yô, uiyua mba zuan a mi la, ior kpishi mba ve ne se la mba pasen ayol a ve ga. Hanma Orshiada yô, ka nan tôô shighe u nan man agee a nan kua akaa agen a nan lu a mi yô, nan na sha ci u tom u pasen kwagh u i eren sha tar cii la, sha ishima i nan man er mbamlu mba nan ve ne nan ian la.​—⁠2 Mbakorinte 9:⁠7.

Ka ne fa ingyegh ki mbapasenkwagh mba ve gbe inya ga la nena?

Hanma uwer yô, Mbashiada ka ve na ibaver i tom u pasen kwagh u ve er hen tiônnongo, shin nongo u Kristu u ve lu her la yô. Mba kighir or ér nana na ibaver ne ga.

Hanma or hen nongo u Kristu yô, ka i nyôr a ibaver i nan shin takerada, maa i kohol ingyegh ki mba ve ne ibaver la cii, i tindi a mi shin afishi a branci u Mbashiada u a nengen sha tom u pasen kwagh hen tar la cii yô. Afishi ne di a kohol ingyegh ki mbapasenkwagh mba ken atôônanongo a hen haregh shin tar ve la cii, a tindi a mi shin afishi a ase a shin itine, a a nengen sha tom u pasen kwagh sha tar cii la.

Ken mbee u hanma inyom i tomshiren wase yô, * ka i er ayenge i zua a ingyegh ki Mbashiada ki seer, ken hanma tar. Maa i kohol ingyegh ki sha ityar ityar la cii, i zua a ingyegh ki Mbashiada mba ve lu sha tar jimin cii. Ibaver i tom u pasen kwagh i ken hanma tar, i i zough a mi ken inyom la, kua akaa a ior ve zough a mi ken tom ve u pasen kwagh la cii, ka i kohol i gber ken takerada u i yer ér Yearbook of Jehovah’s Witnesses la, vindi vindi. Ibaver ne ka i taver se asema, di vough er imba ibaver la yange i taver Mbakristu mba sha ayange a mbaapostoli la asema nahan.​—⁠Aerenakaa 2:41; 4:4; 15:⁠3.

Ka ne wa mba ve lu ken nongo wen kpa ve pasen kwagh ga la ken ingyegh yeneghe?

Shin er se we amba la ken ingyegh ki Mbashiada ga nahan kpa, ka se ngohol ve ken mbamkombo asev. Ve kpishi ka ve za mkombo u umbur ku u Kristu, u i eren ken hanma inyom la, man kwagh u ka i er ve i fa ingyegh vev yô, ka i tôô ingyegh ki mba ve ze mkombo u umbur ku u Kristu sha tar la cii, i pande sha ingyegh ki Mbashiada kpôô kpôô, maa i zua a ingyegh vev. Ken inyom i 2017 la, ingyegh ki mba ve za mkombo u umbur ku u Kristu la lu iorov 20,175,477.

Ior kpishi mba ve ze mbamkombo asev ga la mba zuan a mtsera ken Bibilo i se henen a ior sha uya vev gbilin la. Ken inyom i 2017 la, ior mba yange se henen Bibilo a ve hanma uwer yô lu iorov 10,071,524, mbagenev yange i henen kwagh a ve ityov imôngo hen shighe môm, nahan i tôô ve cii ér i hen Bibilo a or môm.

Er nan ve ingyegh ki Mbashiada ki ken sensôs u gomoti ka ki hemba ngeen a ki ne lu a mi sha ave?

Mbatomov mba gomoti mba ve tôôn ingyegh ki sensôs la ka ve pinen ior iniongo i kwaghaôndo i ve lu ker la ve ve fa ingyegh ki ior mba ve lu ken kwaghaôndo shon ye. U tesen ikyav yô, gbaatom u a nengen sha kwagh u sensôs ken tar u America la kaa ér, ka a ngeren sensôs yô, i “pinen ior, aluer or nenge ér nan ngu ken ma kwaghaôndo yô,” nahan hanma kwaghaôndo cii ka i fa ingyegh ki ior mba ve lu ker la sha “iyenge i mba ve nenge ér mba ken kwaghaôndo shon yô, mba fe sha iyengeior i kwaghaôndo la a lu a mi sha ave ga.” Kpa se yô, ka mba ve pasen ior kwagh shi ve ne ibaver i kwaghpasen ve la tseegh ka se ôr ve iyenge ve se fa ingyegh ki Mbashiada mba Yehova ye, se mba ôron iyenge i mba ve kaan di tsô ér ve mba Mbashiada la ga.

^ par. 2 Inyom i tomshiren wase ka i hii Setemba 1 zan zan i bee sha werayange u ken kalenda u inyom i dondon, Agusutu 31.

^ par. 16 U tesen ikyav yô, tomshiren wase u ken inyom i 2015 la, yange u hii ken Setemba 1, inyom i 2014, zan zan kure ken Agusutu 31, inyom i 2015.