Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Mbashiada mba Yehova Ka Ior mba Suen Tar u Mbayudaa?

Mbashiada mba Yehova Ka Ior mba Suen Tar u Mbayudaa?

Ei, ka mba suen tar u Mbayuda ga. Mbashiada mba Yehova ka Mbakristu mba ve har atesen a ve cii sha Bibilo yô. Shin er ukwaghaôndo mbagenev ve tesen ér mkohol u kohol Mbayuda mba ken Palesetina la ka mkur u kwaghôron u profeti u ken Ruamabera nahan kpa, Mbashiada mba Yehova yô mba a mnenge ne ga. Ve na jighjigh ér yange i tsengaôron kwagh u hemen u tar ne ua va er la jighilii ken Ruamabera ga. Sha kpôô yô, Bibilo kende a ma gomoti sha hemba ugen, shin ikyurior igen sha hemba igen ga. Magazin u Mbashiada mba Yehova ve gberen, i yer ér Iyoukura la pase wang ér: “Kwagh môm ngu ken Bibilo u a tese ér gba u a kohol Mbayuda mba sha iyol ga.”

Takerada u i yer ér the Encyclopedia Britannica la pase kwagh u kohol Mbayuda la kaa ér ka “Mbayuda mba ve lu a awashima u zuan a tar ve ken Palesetina shi suen u yô.” Mhii u awashima ne har sha iniôngon i kwaghaôndo man i mbapatii cii. Mbashiada mba Yehova mba pasen kwagh u kohol Mbayuda ga, shi mba te ikyaa a pati u a sugh nongo ne ken ijime la kpaa ga.

Nongo u Mbashiada mba Yehova cii har sha kwaghaôndo nahan mba we ave sha kwagh u patii, u a kou inôngon i kohol Mbayuda la ga. Mte u Mbashiada mba Yehova ve tan ikyaa a ma pati ga ne kera ka kwagh u he ga man ken ityar i gen je yô, i tôv ve a ican sha ci u ve venda u tan ikyaa a ma gomoti yum. Se mba a vangertiôr ser, ma tartor u uumace môm ua fatyô u van a bem sha tar ga, saa Tartor u Aôndo tseegh.

Kwagh u tseer tseer u i fe Mbashiada mba Yehova a mi hanma ijiir i ve lu cii yô, mba dondon atindi a gomoti. Mba taver gomoti ityough shin mba nyer iyol ken num nôngon ga.