Ken inyom i 2014 la, Mbahemenev mba Shin Itine mba Mbashiada mba Yehova tese er a er tom u he u samber a loho u Bibilo sha ajiir a ken Imbusutarimese a a gbe ica a ugeri mba vesen, ken veghertar u Yuropa man veghertar u North America la yô. (Aerenakaa 1:8) Sha hiihii la, i hemba veren ishima u eren tom ne sha ajiir agen hen kpentar u Alaska, ken tar u Amerika, man hen tiôntar u Lapland, ken tar u Finland, kua hen haregh u Nunavut man uharegh mba Northwest, ken tar u Kanada.

Mbashiada mba Yehova vande zenden sha ajiir ne pase kwagh anyom kpishi cii i va masen hiin tom ne ye. Nahan kpa, Mbashiada yange vea za u za pasen kwagh sha ajiir ne yô, ve tsa kpishi ga tsô ve cin ve hide, man ashighe kpishi iniôngon ve i saa sha u nan ior ityakerada i pasen Bibilo tseegh.

Kpa hegen ne, hanma tar ken Imbusutarimese u afishi a branci a lu her a lu nengen sha tom u Mbashiada mba Yehova ve eren sha ajiir a gban ica a ugeri mba vesen la ka a tsua uharegh, nahan a lôhô mba eren tom u pasen kwagh hanma shighe (upania) ve za pase kwagh her. Ka vea za tsa kpishi ga yô, i lu iwer itiar. Ka vea zua a ior kpishi sha ajiir ne mba ve soo u henen Bibilo yô, ve tsa i hemba nahan, je shi ve eren mbamkombo mba hanma or a fatyô u nyôron a ve imôngo yô.

Nahan kpa, se mba tagher a mbamtaver mbagenev ken Imbusutarimese, mba se lu a vande tagher a mi ga yô. Yange i tindi upania uhar hen geri u Barrow, ken kpentar u Alaska. U môm mough ken imbusutarimese i kpentar u California, ugen la di mough ken kpentar u Georgia, ken tar u Amerika, ve yem ken Alaska ye. Kwa u hiihii u inyom av ve hen Barrow la, wuhe kôr hen ijiir la je vaa kar! Nahan kpa, er ve nyôr hen geri ne la, ken atô u iwer kpuaa tseegh ve pase kwagh nôngo u tseren sha uya mba hen geri shon cii, shi ve hii u henen Bibilo a iorov unyiin, môm ken mba ve lu henen Bibilo a ve la lu gumor u i yer un ér John yô. Un vea shiôr na mba henen takerada u Bibilo Tese Ér Nyi Jimi? la, shi ka a pasen azende a na kua mba a eren tom ijiir i môm a ve la kwagh u a lu henen la. Shi ngu a ôr ivur Bibilo i sha iyange ken takerada u U Timen ken Ruamabera Ayange Ayange, u i ver sha Intanet la. Ngu a ôr u sha appilication u i yer ér JW Library la ken hanseeti na.

Gbenda ngu u karen sha mi zan hen geri u Rankin Inlet, u a lu hen haregh u Nunavut, ken tar u Kanada la ga. Nahan upania mbauhar mban yange ve za her sha agirgi a pulugh ve za hii u henen Bibilo a iorov imôngo. Orgen yange nenge vidio i Ka Nyi i Eren hen Iyou i Tartor la been yô, pine se shighe u se va maa Iyou i Tartor hen ijiir na la yô. Shi kaa ér, “Mea lu hen ijiir ne zan zan shighe u ne va maa i la yô, me zaan mbamkombo enev.”

Upania mbagenev mba yange i tindi ve hen anijiir u i yer ér Savukoski, ken tar u Finland, ape iyenge i iyar asua i hembe iyenge i ior kwa pue la, kaa ér wuhe ka u kôr hen ijiir ne kpishi. Nahan kpa ve kaa ér yange ve za nyôr hen ijiir ne sha shighe u vough. Sha ci u nyi? Ve kaa ér, “Se pase kwagh hen haregh la cii se tser. I kaha igbenda i zan hen angarev mba kiriki man agar a lun ken toho ica fiinii la tsembelee. Er wuhe ka u kôr kpishi yô, ior mba hembe lun hen uya vev.”

Iniôngon yase i pasen mimi u Bibilo sha ajiir a gban ica a ugeri mba vesen la na ior kpishi mba ve lu hen vegher u ken Imbusutarimese la fa kwagh u tom wase ne hegen. Zum u upania uhar za pase torkwase u nengen sha geri u vesen ugen ken kpentar u Alaska kwagh yô, kwase ne nger kwagh u yange lam sha mi vea upania mbara cii ver sha Intanet hen ijiir i ior kpishi vea nenge a mi yô, shi ver foto u trak u Kanyi i Lu Tartor u Aôndo la kpa her.

Hen angeri u Haines, ken kpentar u Alaska, ape upania uhar zua a iorov 8 mba van mbamkombo mba ve eren hen iyou i koson ityakerada la di, yange ipipaabaver igen her due a ibaver ér iorov mba ve dugh ken kpentar u Texas man North Carolina, ken tar u Amerika yô, va hen geri ne, mba zenden pasen ior asange asange Bibilo sha uya vev. Ibaver la mase kuren ér: “Wea soo u seer fan yô, za sha Intanet hen ijiir i jw.org la.”