Aver yem sha atineakaa

Akaa a Ior mba Yange Ve Er Tom Vea Mbashiada mba Yehova hen Warwick la Nenge a Mi Yô

Akaa a Ior mba Yange Ve Er Tom Vea Mbashiada mba Yehova hen Warwick la Nenge a Mi Yô

Yange kpiligh ior kpishi iyol u nengen er mbatomov mba ve lu maan kwagh hen Warwick la lu ior mba ve tsua ayol a ve u eren tom la sha inyar ga yô. Kômpeni ugen yange u lu va wan uinjin mba unden sha ayou a sha aôndo, nahan orvesen u kômpeni la kaa a ortom ugen u a lu Orshiada u Yehova yô, wener: “Mbanongo wen mba eren tom je kpiligh iyol. Ior kpishi nyian mba tôôn shighe ve mba eren tom gbilin nahan ga.”

Zum orvesen la kua mbagenev ungwa ér ior mba ve eren tom u maan afishi a shin itine a Mbashiada mba Yehova hen Warwick, ken New York la kpishi lu mba ve tsua a ishima ve u eren u gbilin yô, sha hiihii la lu ve er ka Mbashiada mba hen ijiir la ka ve va yar tom shon sha iyange i Sati nahan. Mba va hoghol a mbatomov mba hen ijiir ne yô, kpiligh ve iyol kpishi u fan er i lu ior mba ve mough sha ajiir kposo kposo ken tar u Amerika, ve undu ityom ve, ve va eren tom la gbilin, shi mbagenev ve er u iwer shin anyom imôngo je yô.

Ken mbee u inyom i 2015 la, Mbashiada mba yange ve va er tom hen ijiir ne gbilin la, hila kuma iyenge er 23,000 nahan. Ve lu eren u vea mbatomov mba shin Bethel u ken tar u Amerika la. Shi mbamaan kwagh mba kuman er 750 nahan, mba ve lu Mbashiada mba Yehova ga yô, wase u eren tom la sha er a bee u sha shighe u i ver la yô. Er mbatomov mba ken inya mban lu eren tom a Mbashiada mba Yehova ikyooso ikyooso yô, mbagenev kpishi ken a ve nenge a akaa a doon ve tsung.

Ieren i Kundu Kundu i Anmgbianev

Orvesen u kômpeni ugen u eren windou shi varen akaa sha kpekpe yange nger ér: “Hanma or hen kômpeni wase u nan lu eren tom hen ijiir ne cii yô, kpiligh nan iyol a ieren i kundu kundu i ior mba ve zough kwagh a ve ne ve lu a mi la. Se mbagenev kpishi ka kwagh u a ne ve i doom u eren tom ne je la.”

Yange kômpeni ugen tindi ior va wase tom u maan ayou a tsan ker. Mba been tom ve yô, mbatomov mba kômpeni la mbagenev utar venda ér vea kera yem ga, vea za hemen u eren tom hen Warwick. Nahan ve de tom vea kômpeni la, ve hide ve nyôr tom vea kômpeni ugen, u yange u lu eren tom hen ijiir ne her yô.

Aeren a Orkristu, a Mbashiada mba Yehova tese la yange na yô, mbatomov mbagenev kpa gema eren kwagh er ve nahan. Kômpeni ugen yange u va wa atôayough hen Warwick. Nahan ortom u kômpeni la ugen er tom hen ijiir ne iwer ngi kar kpuaa yô, kwase na nenge nom na gema inja, hingir u eren kwagh shi lamen hen ya kundu kundu. Kwase la kaa ér, “Ka a er kwagh je i bee un ga!”

“Mbashiada mba Kasev Vea Lu Yaren”

Mbashiada mba Yehova mba yange ve yaren tom hen ijiir ne la, mbagenev kpishi lu kasev. Kasev mban mbagenev lu nahan ubôôsu, mbagenev lu esen ayou, mbagenev di lu eren ityom i ken afishi. Shi mbagenev lu tesen ahia a karen, mbagenev di lu eren tom a umato kua uinjin mba vesen. Kasev mbawan ikyorusu kpa lu, kua mbavaren akaa sha kpekpe, man mbawan ugôngor mba buav, man mba haan kônkele. Yange ve er tom sha gbashima.

Orgen u lu eren tom u manden ayou hen ijiir ne, u lu Orshiada ga yô, yange a nenge Mbashiada ve va hungwa ubôôsu, maa noov man kasev mbagenev ve kôr ave ve gba yemen u za eren tom. Kwagh ne kpiligh un iyol. Shi yange a nenge kasev mbara ve eren tom u maan ijiir ne sha gbashima. A kaa ér: “U nenge a ve sha hiihii yô, u hen wer ve dondo noov vev mba gbe van tsô. Kpa ka vea kôr tom ave yô, ve er i wanger inya! M er tom hen ajiir a maan kwagh hen New York City cii, kpa mayange m ngu a nenge imba kwagh ne ga.”

Hii ken mbee u inyom i 2014 pelegh ken inyom i 2015 la, yange wuhe kôr keghelee je doo ga. Nahan i lu u u kôr ityough ga yô, u lu ken iyou, u cihi u yar u za er tom ken wuhe la pepe zan zan aikighe ga. Orshiada ugen u yange er tom vea mba nengen sha tom u maan kwagh yô, iti na ér Jeremy, a kaa ér: “Orvesen u kômpeni ugen u wan atôayough, yange una nenge ér kpernan wuhe ua kôr kpishi yô, shighe ugen a pinem ér, ‘Kasev mban kper vea lu yarenee?’

“ ‘M kaa a na mer: ‘Een.’

“ ‘Shi a pine ér: ‘Kua mba ka ve tile ken won ve tesen ahia a karen la kpaa?’

“ ‘Shi m kaa mer: ‘Een.’

“Shighe a karen yô, a kaa a mo ér un ôr a ior nav ér gba u vea yar sha ci u Mbashiada mba kasev je kpa kper mba yaren!”

Mbanahan Ubôôsu Yange Ve Nahan Saan Saan

Mbanahan ubôôsu yange ve hemba iorov 35. Lu nomso man kasev mba yange i haya ubôôsu vev, ve lu tôôn mba ve na ayol a ve u wasen tom la sha ajiir a ve a tsan, van a ve hen ijiirtom sha shighe u yaren, shi kuran ve yemen a ve sha ajiir a ve sha shighe u kurun tom yô.

Kwagen la, deraba ugen za u kuran ior. Ior mba nyer shin bôôsu cii yô, a gema a kenger ve, a kaa ér: ‘Ka mea tôô ne Mbashiada shin mato nahan i doom je. Nea lumun yô, lam nen a orvesen wam sha Intanet, ôr un nen a nam ian me tôôn ne hanma shighe cii. M zua a mfe kpishi sha kwagh u Bibilo hen a ven. Yange m lu a zua kwagh a ven ga la, m fa iti i Aôndo ga, shi m fa mer tar ngu va hingir paradiso kpaa ga. Hegen ne, ku kera cier mo iyol ga. Kwagh u m zough a mi ne kpiligh mo iyol kpishi. Me zua a memyol yô, ne nenge a mo ken Iyou i Tartor.

Kwaseshiada ugen iti na ér Damiana, yange er tom hen Warwick. Nahan a kaa ér: “Iyange igen la, se mba nyer shin bôôsu cii yô, deraba wase la kaa ér un soo u ôron se kwagh. A kaa ér, iyenge i Mbashiada mba sha ajiir kposo kposo hen New York, mba un tôô ve sha mato u yaren man u kurun cii, kohol kuma iorov 4,000. Shi a kaa ér, ‘Ior cii ka ve lu a anza agen a sôôn iyol, kpa ne Mbashiada yô, ka ne sôr mbamshi enev, shi ne eren tom ken mzough. Nahan doo.’ Shi a kaa ér ka i doo un u lamen a vese.

“Ôron kwagh la been yô, Kwaseshiada ugen shin bôôsu kende pine un ér, ‘Ka sea waan atsam nahan i doo u wee?’

“A lumun a ahan zwa, a kaa ér, ‘Een! Se hii nen sha icam namba 134, ne nenge nena?’ ” *