Aver yem sha atineakaa

Mbashiada mba Yehova

Tsua Zwa Tiv

Abon u Ufoto mba i Tee hen Warwick Yô, u sha 3 (Hii Uwer u Janawari Zan Zan Aipor 2015)

Abon u Ufoto mba i Tee hen Warwick Yô, u sha 3 (Hii Uwer u Janawari Zan Zan Aipor 2015)

Ken abon u foto ne, u fatyô u nengen tom u i seer eren hen afishi a shin itine a he, a Mbashiada mba Yehova, hii ken uwer u Janawari zan zan Aipor 2015 yô.

Ka ayou a i hila bee tom sha mi hen iyaagh ki afishi a tamen a hen Warwick la i tese heen ye. Hii sha ityou vegher u ken imese la yem ken iyan:

  1. Iyou i Mbasôron Akaahendan

  2. Ijiir i Veren Akaahendan a Mbavannya

  3. Iyou i Mbasôron Akaa man Ijiir i Veren Akaahendan a Tsombor u Betel

  4. Iyou i Tsan i sha Uhar

  5. Iyou i Tsan i sha Unyiin

  6. Iyou i Tsan i sha Utar

  7. Iyou i Tsan i Hiihii

  8. Afishi man Iyou i Mbaeren Akaa a sha Ci u Tsombor u Betel

Janawari 2, 2015​—Iyou i Mbasôron Akaahendan

Harold Corkern, Anmgbian u a wasen Kômatii u Mbahemenev mba Shin Itine U a Nengen sha Kwagh u Gberen Ityakerada la tom yô, ngu nan kwaghôron u lun a itinekwagh ér “Er Kwagh u U Lu a Tahav mbu Eren Un La,” ka kwaghôron u a dugh ken Bibilo yô. Anmgbianev ka ve shi van hen Warwick va nan akaaôron a taver mbatomov asema.

Janawari 14, 2015​—Afishi man Iyou i Mbaeren Akaa a sha Ci u Tsombor u Betel

Ka a va lu shighe u wuhegh yô, tampolin u pupuu ne a na wuhe u kera kôr mbatomov ga, nahan kwagh la a wase ve u eren tom ve been sha shighe. Iyou ne ngi a ruum u tsombor u Betel cii ua teman kwaghyan her yô, shi iyouci kpa ngi ker, kua ijiir i yôron man ijiir i kiren akondo.

Janawari 16, 2015​—Iyou i Tsan i sha Unyiin

Mbaeren tom usu mba samber ikyorusu vea wa sha iyou. Ikyorusu i i hila we sha ayou a tsan ker la zom cii yô, lihe kuma angahar 40,000. Yange i hii tom u samber a usu u latriki ken iyaagh ki hen Warwick kin shighe u i yam ijiir ne la je, shi tom ne ua za hemen zan zan a kar maan iyaagh kin been.

Janawari 16, 2015​—Iyou i Tsan i Hiihii

Ortom ngu varen tsar sha kpar u sha kpoyou u sha, u i we un a dugh ken won yô, sha u a nôngo a shighe icigh sha mi ki kia yange mdorom ma a nyôr ker ga yô. Ka i shighe icigh ki i yer ér polymethyl methacrylate (PMMA) la sha ukpar mba i we sha kpoyou u masen sha ve dugh ken won la. Icigh kin ka ki samber fese er ka zar kwagh nahan. Kwagh ne ka a na yô, mdorom ma fatyô u nyôron ken ukpar mbara nulugh ve ga.

Janawari 23, 2015​—Iyou i Tsan i Hiihii

Ter ugen vea wan na u kwase mba wan ikyorusu i samber a usu ken ayou a tsan la cii.

Febewari 6, 2015​—Iyou i Mbasôron Akaahendan

Mbatomov mba ijen i ker ve yô za ahumbe a atetan, mba za yan kwagh hen ijiir i i hila er sha ci ve i teman yan kwagh her yô. Hanma iyange ka i na mbatomov kwaghyan hen ijiir ne atetan i hemba mkam 2,000.

Febewari 12, 2015​—Iyou i Mbasôron Akaa man Ijiir i Veren Akaahendan a Tsombor u Betel

Mbamaankwagh mba kangen myôm ma a haa kônkere sha mi ve, a wa vande u iyou i mbasôron akaa ne a taver gbang yô.

Febewari 12, 2015​—Iyou i Tsan i sha Utar

Uwashika mba mbayev mba kiriki ve nger sha u wuese mbatomov yô. Ior kpishi ka ve na ayol a ve u va eren tom hen ijiir ne sha anshighe kpuaa. Jighilii yô, hanma kasua mbatomov mba hev mba kuman 500 nahan ka ve va nyôr hen ijiir ne. Ken uwer u Febewari la, iorov mba kuman er 2,500 nahan lu yaren tom u maan iyaagh ki hen Warwick ne hanma iyange.

Febewari 24, 2015​—Iyaagh ki hen Warwick la

Tom u i hila er hen iyaagh kin la hemba ngeen a tom u u shi her yô. Hii ken uwer u Janawari zan zan uwer u Aipor, 2015 la, i maa ayou a tsan la i kure shi i tim mtôm ma maan Afishi man Iyou i Mbaeren Akaa sha Ci u Tsombor u Betel la i bee. Hen shighe la, mbatomov shi hii u haan kônkere sha aan a wan ihinda man uwindou sha Iyou i Mbasôron Akaa la, shi ve lu maan igbenda i moughon hen ayou a tsan agen yemen hen agen, shi ve lu sôron dam u shin ber u a lu her, i yer ér Sterling Forest Lake (Blue Lake) la.

Febewari 25, 2015​—Afishi man Iyou i Mbaeren Akaa a sha Ci u Tsombor u Betel

Foto u tesen ijiir i a va maa utsembe mba unden sha gôgôyou u taven ne tese er ijiir shon i hii shin inya zan zan i za dugh sha ityough yô. Yange i va a ikyômpeni igen i maan kwagh va maa ajiir a unden sha ayou a lun a ukpo utaan, er i ngin nahan. Mbashiada di na ayol a ve, va haa kônkere sha aan a wan ihinda man uwindou la.

Febewari 26, 2015​—Iyou i Mbasôron Akaa man Ijiir i Veren Akaahendan a Tsombor u Betel

Mbamaankwagh lu kangen myôm sha u nôngon wan vande sha kpoyou u hiihii, sha iyange i wuhe u ker kpishi yô. Hii uwer u Janawari zan zan Maaci, senou ka a haa hen Warwick, a ta igyume hen inya i tav sha je i kuma angahar anyiin man kwagh. Yange mbatomov mba kember senou sha shebul lu kember un sha ajiir a i lu eren tom la fele fele, arum gema lu a i wa akaa her a nan mtsee yô, nahan mbatomov za nyôron her sha u zuan a mtsee.

Maaci 12, 2015​—Ijiir i Veren Akaahendan a Mbavannya

Ka i cir zinki sha haav mbu u i kuva sha myôm ma i vande zoron ma sha ave a ikyômpeni yô. Ken mbee u uwer u Aipor la nahan, i kuva haav i cir sha ayou a tsan ker la nôngo u been. Ken atô u uwer u Jun nahan lu u a mase cirin haav sha Iyou i Tsan i sha Uhar la.

Maaci 18, 2015​—Iyou i Mbasôron Akaa man Ijiir i Veren Akaahendan a Tsombor u Betel

I tema shin mashin u taven u i yer ér tower crane la, i ver ishigh ken Iyou i Tsan i sha Uhar la, ve i tee foto ne ye.

Maaci 18, 2015​—Iyou i Mbasôron Akaa man Ijiir i Veren Akaahendan a Tsombor u Betel

Mbatomov mbawan ugôngormbamngerev mba nengen ken akaakperan a sha kwagh u tom ve hen Ijiir i Veren Akaahendan a Tsombor u Betel la. Akaakperan a i lumun u ér i dondo a sha u eren tom u maan iyaagh kin jimin cii been la hemba 3,400.

Maaci 23, 2015​—Afishi man Iyou i Mbaeren Akaa sha Ci u Tsombor u Betel

Mbatomov tile shin mashin u tôôn or kenden a mi sha aôndo, u i yer ér boom lift la, mba cirin tampolin sha imaagh kira ér mndorom ma de nyer ga. Ka i shi tsaase mbatomov hen ijiir ne sha u nengen ér ve fa u eren tom a umashin mba tôôn or kenden a mi sha aôndo mban tsembelee, kua ikyav mbi tomov mbigenev kpaa, sha er vea vihi iyol ga yô. Ka i yila kweior i tese ve er vea er tom a umashin mba tôôn or kenden a mi sha aôndo, mba i yer ér boom lift man scissor lift la ve, vea vihi iyol ga yô, shi i tese ve u palegh gbeev, man u eren akaa agen kpishi hen ijiirtom ne, kua u eren tom a mbaanar mba cirin sha ahenga man ikyor, kua akav a tesen or u nan lu eren tom a mashin la u fan ihiar i karen shi palegh aikyôr la cii.

Maaci 30, 2015​—Iyaagh ki hen Warwick la

I tile i na ishigh shin ityôtar, vegher u ayou a tsan a lu la ve, i tee foto ne ye. Ken mbee u uwer u Aipor la, i lu eren tom u samber a usu ken Iyou i Tsan Hiihii man i sha Uhar kua i sha Unyiin la kpoghuloo, shi i lu wan kaa a eren tom sha tahav mbu usuv kpaa yue yue, er foto ne a tese nahan. Iyou i Tsan i sha Utar (i due ken foto ne ga) la di i hii a hii u kôngor kpekpe, tan penta shi varen utail (tiles).

Aipor 15, 2015​—Iyou i Tsan i sha Uhar

Nomsombaiorov uhar tile shin mashin u a tee ve a kende a mi sha yô, mba shighen penta sha kpekpe u ken won, ka penta u una wase mndorom ma a nyôr ken atô iyou ga yô. Ka i tôô shighe u kuman iwer ihiar nahan ve i ta penta ne sha iyou i tsan ker i môm i bee ye.

Aipor 27, 2015​—Afishi man Iyou i Mbaeren Akaa a sha Ci u Tsombor u Betel

Mbaamaankwagh mba maan kpekpe a akam a i hembe awen a sha uwo i te a mi yô. Iyou ne ia lu a ijiir i dughun ikyav mbi i yam ken won i ve a mi yô, shi a eren akaa agen kposo kposo ker sha ci u iwasen i tsombor u Betel.

Aipor 30, 2015​—Iyaagh ki hen Warwick la

I va a or u zenden shin mnger, a va hungwa shin ber u Blue Lake la, a musan zwa u gôngôrmnger u tse a wa u he. Hegen ne, aluer ura nôô je er tar a yôhôr nahan kpa, a tuur ihyôwe sha kômputa kwa môm tsô maa mngerem ma a pande shin ber ne, ma a kera sar avenge ga.