Aver yem sha atineakaa

Mba Pasen Loho u Dedoo ken Ijô i ken Tar u Ireland man Tar u Britain La

Mba Pasen Loho u Dedoo ken Ijô i ken Tar u Ireland man Tar u Britain La

Mbashiada mba Yehova mba nôngon kpoghuloo ér vea zua a ior mba ken tar u Ireland man tar u Britain, * mba ve lamen ken ijô ve kpôô kpôô la, vea pase ve kwagh ken ijô shon. Dugh zwa Buter sha yô, mbagenev ken ityar la mba lamen zwa Irish man zwa Scottish Gaelic kua zwa Welsh.

Ken uwer u Setemba, inyom i 2012 la, se ver akaa hen ijiir yase i sha Intanet i jw.org, i yange i sôr i er ne ken ijô kpishi, kua zwa Irish man Welsh kpaa. Shi ken uwer u Agusutu, inyom i 2014 la, i ver akaa hen ijiir ne ken zwa Scottish Gealic kpaa. Shi se mba gberen ityakerada kposo kposo i pasen ior Bibilo ken ijô ne. Ior mba lamen ijô ne nenge tom ne nahan ve er nena?

Pastô u côôci igen yange ngohol trak ugen u pasen Bibilo ken zwa Scottish Gaelic, ôr her ave ave sha ikyenge, maa gba vaan. Er nan ve yange loho la kôr un ken ishima yumu? Yange kpiligh un iyol er i gema loho la ken zwa na wang yô, nahan a pine ér: “Ka an nan gem kwagh ne? I gema kôr inya!”

Ken uwer u i hii veren ityakerada sha jw.org ken zwa Scottish Gaelic la je, ior mba kuman 750 nahan za hen ijiir ne.

Tica ugen hen National University of Ireland, Galway, yange kaa a Orshiada ugen ér kwagh gba un sha kwagh u kwaghaôndo ga. Nahan kpa, yange va fe ér una fatyô u zuan a antakerada u Kanyi i Lu Loho u Bibilo? la ken zwa u Irish yô, a kaa ér i va un a kôpi môm. Yange kaa ér un nenge ér doo u hanma or ma nan lu a ityakerada i pasen Bibilo ken zwa u i yese nan ker la, shi wuese Mbashiada mba Yehova sha tom u gberen ityakerada u ve er ve, mba lamen zwa Irish ve zough a takerada ken zwa ve la.

Kwase u been iyol ugen yange wuese antakerada ugen u pasen Bibilo ken zwa Welsh, u i na un yô, kaa ér: “Sha mimi yô, nea nem antakerada ne u ken zwa Buter la yô, ma m ngohol ga, kpa doom kpishi er ne nem u ken zwa wam yô.”

Ken uwer u Agusutu, inyom i 2014 la, se seer veren akaa kpishi a ken zwa Welsh hen ijiir i jw.org la. Kwagh er kpiligh iyol yô, ken uwer u u bee la, ingyegh ki mba ôron ityakerada yase sha Intanet ken zwa Welsh seer hemba kwa har.

“Se Mba Lamen Zwa Môm”

Zum u Yesu pase mbahenen nav mbagenev uhar akaa ken Ruamabera yô, saan ve iyol je ve kaa ér: “Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?” (Luka 24:32) Ka a pase ior mimi u Bibilo ken zwa ve wang yô, ashighe kpishi loho la u hemba kôron ve ken ishima.

Orgen ken tar u Wales, mba yer iti na ér Emyr, yange vôso Kwaseshiada kpa mayange lumun u kohol kwase na ken mcivir u Yehova ga. Kpa gema ya ijende vea Orshiada u i yer un ér Russell yô. Emyr pase kwagh u yange na ve gema inja yô, a kaa ér: “Yange m soo mer me hii u henen Bibilo kpoghuloo zum u Russell va hen a mo a takerada u Bibilo Tese Ér Nyi Jimi? * la yô. Yange nam kôpi u takerada shon, maa kaa a mo ér, ‘Takerada ne ka u ken zwa Welsh. M soo mer se hii u timen ker imôngo hegen je.’” Hii nan ve kwagh u Russell ôr a Emyr kpoo ne yange doo Emyr yumu? Emyr kaa ér: “U fa, se mba lamen zwa môm, shi se mba ityô i môm, shi se cii se fa aeren a ityô yase.” Er Emyr lu henen Bibilo ken zwa na u Welsh la yô, ishima lu ‘yeghen un a yegh,’ sha ci u yange kav kwagh u i lu pasen un la wang.

Mbashiada mba Yehova vea za hemen u wasen ior u henen kwagh u Aôndo ken ijô i i yese ve a mi, i ka vea ungwa ve i doo ve yum la.

^ par. 2 Ka tar u Ingila man tar u Scotland kua tar u Wales i zom cii i yer ér Tar u Britain ye.

^ par. 11 Takerada u henen Bibilo a mi, u Mbashiada mba Yehova ve gber yô.