Aver yem sha atineakaa

Mbashiada mba Yehova

Tsua Zwa Tiv

BIBILO GEM IOR

M Zua Vea Terem ken Masejime

M Zua Vea Terem ken Masejime
  • I MAR UN KEN INYOM I: 1954

  • TAR NA: Philippines

  • INJAOR I YANGE LU YÔ: Yange lu iyongo a ter na u vihi tu kpishi la

YIASE YAM

Ior kpishi ka ve za ve za nenge ijiir i mngerem ka ma toron ikyua a geri u a Pagsanjan ken tar u Philippines la. Ka hen ape terem, Nardo Leron vese ken ican je la. Er terem nenge anyighe man ifer i i lu zan hemen ken gomoti kua ken dasenda man hen ijiirtom na la yô, ishima vihi un kpishi.

Yange mbamaren av er tom kpoghuloo sha er vea yese se mbayev anigheni mba ve mar la yô. Ashighe agen yange ve lu hen ya ga shighe a lihe, ve lu sha iwo ve nengen sha ishule. Ashighe kpishi yange i gba u mo vea anngôm u vesen Rodelio se lu kuren mbamgbe asev ayol a ase, nahan ashighe kpishi se lu ijen. Er se lu mbayev nahan kpa, se lu a ian i numben cuku tseegh. Yange sea nyôron anyom ataankarahar je, se hii u eren tom ken sule; se kuran akeve. Yange se zende sha igbenda i sha uwo, man igbende ne i i vihi kpishi. Yange ikyav mbin mbia yuhwa a gande u kôron tôôn yô, se kpelan a kpela mbi hen inya.

Terem yange a gbidye se kpishi, kpa yange i hemba vihin se shighe u a lu gbidyen ngô wase yô. Se nôngo ser se yange un, kpa se lu a kwagh u eren sha kwagh la ga. Mo vea Rodelio yange se zua zwa ser se vese yô, se wua ter wase. Yange sarem u lun a ter u se doo nan ishima yô!

Yange m va vôr a ipila i terem la shi ishima vihim ker, nahan shighe u m lu anyom 14 la, m undu ya. Yange m tsa sha godobi shighe kar, maa m va hii u man ikya. Shighe kar yô, m va hingir or u nahan tso, m tôôn ior mba zenden nengen ijiir m zaan a ve hen pe mngerem toron la.

Anyom nga kar kpuaa yô, m hii u zan yunivasiti ken geri u Manila. Kpa yange m hide m yem ken eniel u Pagsanjan sha wikeende u za eren tom, nahan m luun a shighe u henen kwagh kpishi ga. Uma yange taver mo, shi m lu a awashima ken uma ga, ikya kpa kera panden ishimanyian yam ga. Maa m hii u man mcimbim ma garen ityough ker er methamphetamines man kokein kua heroin nahan. Mcimbim ma man kua dang u eren ka ve zaan ikyooso ikyooso. M lu a inyaregh ga shi m lu yan ican, shi hanma ijiir i mea gema yô, m nenge a ieren i mimi ga. Yange m kôr gomoti ihyom shi m na un ibo sha akaa ne. M pine Aôndo mer, “Er nan uma a lu nahana?” Kpa yange m zua a mlumun ken ukwaghaôndo kposo kposo mba m za la ga. Yange m seer man mcimbim sha er me yer ishimanyian yam la yô.

Ken inyom i 1972 la, mbayevmakeranta mba ken Philippines kohol ér vea due sha godobi a venda kwagh u gomoti lu eren la. Mo kpa m kohol ve u eren kwagh ne, maa va hingir kwagh u ayôôso. Yange i kôr ior kpishi i za wuhe, iwer ngi kar yô, i har shoja hanma ijiir ken tar la.

Maa shi m hide m yem u lun sha godobi, kwa ne yô, m lu cian mbaatindiv sha ci u m lu uwegh ken ihyembeato i yange i za hemen la. Yange m hingir u iin shi ior ve kimbim inyaregh ve za yav a mo, nahan m zua a inyaregh ki man mcimbim ma bov. Kwagh kera gbam hen shighe la ga, mea lu uma shin mea kpe kpaa.

Hen shighe ne, ngôm man anngôm u nomso u kiriki ve hii u henen Bibilo vea Mbashiada mba Yehova. Kwagh ne yange vihi terem tsung, a nande ityakerada ve i henen Bibilo la. Kpa ve uhar cii ve taver ishima, ve er batisema ve hingir Mbashiada.

Iyange igen la, Orshiada ugen lam vea terem sha kwagh u Bibilo i tende zwa ér shighe ngu van u ieren i mimi ia lu sha tar cii la. (Pasalmi 72:12-14) Kwagh ne yange doo terem je a tsua ér una tôv sha mi iyol na. Ngur timen ken Bibilo yô, a nenge a ityendezwa i Aôndo i van a gomoti u mimi tseegh ga, kpa shi a nenge a kwagh u Aôndo a soo ér noov man uter ve eren yô. (Mbaefese 5:28; 6:4) Shighe kar kpuaa yô, un man anmgbianev mbagen mbara cii hingir Mbashiada. Mo yange m lu ica a ya, nahan m fa kwagh u za hemen ne ga.

GBENDA U BIBILO GEMA UMA WAM LA

Ken inyom i 1978 la, m yem ken tar u Australia. Hen tar u bem lu ker shi inyaregh ngee ne je kpa, m zua a bem ken ishima ga. Yange m za hemen a ieren yam i man ikyôhô kua mcimbim ma bov la. Ken inyom shon i môm la, Mbashiada mba Yehova vam inya. Kwagh u ve tesem ken Bibilo ér tar a va lu bem bem la doom, kpa m lu cian u nyôron nongo a ve.

Shighe kar kpuaa yô, m hide m za ken tar u Philippines ukasua kpuaa. Anmgbianev av yange ve kaa a mo ér ter wase nôngo kpoghuloo sha er una lu or u injaa yô, kpa ishima yange vihim a na her kpishi je m nôngo mer me palegh un sha hanma gbenda cii.

Anngôm u kwase u kiriki yange pasem ken Bibilo er i hii ve uma a mgbough a ican i yan man ieren i mimi ga yô. Kpiligh mo iyol er an-wankwase u lun anyom puekar tseegh u a lu a mfe yum kpaa ga ne a lu a mbamlumun sha mbampin av yô. Cii man m yem yô, terem nam takerada u Ú Fatyô u Lun Uma Gbem sha won ken Paradiso Shin Tar la. * Yange kaa a mo ér: “De u yevese. Takerada ne ua wase u u zuan a kwagh u u lu keren la.” Yange taver mo ishima ér m ker Mbashiada mba Yehova ken Australia.

Yange m dondo kwaghwan u terem la, nahan m za ker Iyou i Tartor i Mbashiada mba Yehova ikyua a ya wam ken geri u Brisbane. Yange m lumun mer i va henen Bibilo a mo. Akaaôron a profeti aa ken Bibilo er aa i nger ken Daniel ityough 7 man Yesaia ityough 9 la nahan, yange tesem ér gomoti u Aôndo u anyighe a lu ker ga la una va hemen se. Bibilo tesem ér se va lu ken Paradiso shin tar. Yange m soo mer Aôndo a lumun mo, nahan m nenge mer a gba u me de u vihin ishima dang dang shi me de u man mcimbim ma bov kua ikyôhô, shi me de dang u eren kpaa. Yange m pav vea wankwase u m lu tsan vea na la, shi m de aeren a am a doo ga la. Er m lu seer suur sha Yehova yô, m er msen mer a wasem me gema sha igbenda igen kpaa.

Kure kure tsô, m mase kaven mer kwagh u m lu henen la una fatyô u geman mlu u or. Bibilo kaa ér, aluer se nôngo kwagh kpoghuloo yô, se fatyô u haan “orhe iyol.” (Mbakolose 3:9, 10) Er m lu nôngon mer me gema inja la m mase kaven nahan mer kwagh u m ungwa mer terem gema inja la alaghga a lu mimi. Nahan er ishima ma vihim shin ma m lu ihyom a na la yô, M soo mer me hime vea na sha er se lu ken bem yô. Ken masejime yô, m de terem a kwaghbo, nahan ihyom i m kôr un hii iyev wam la maa bee kera.

IWASEN I M ZOUGH A MI LA

Shighe u m lu gumor la, m dondo mbagen u eren akaa a dang shin a bo. Icin i Bibilo i te la yange i kure sha mo sha ci u uijende mba bov yange ve tsume a mo. (1 Mbakorinte 15:33) Kpa m zua a azende a injaa hen ato u Mbashiada mba Yehova, shi azende ne wasem u hingir or u injaa. Ka ken ato ve kpaa m zough a kwase wam Loretta ye. Hegen ne mo vea na cii ka se tesen ior er Bibilo ia fatyô u wasen ve yô.

M ngu yan kwaghyan vea kwase wam kua azende a am

Bibilo na yô, terem hingir or u ngise m tsa m hen mayange una lu ga yô. Hegen ngôm ngu a nom u injaa shi terem ne ka or u hiden a iyol na ijime kpaa shi ka Orkristu u a soo bem yô. Yange mba eren mo batisema ken inyom i 1987 la m hingir Orshiada u Yehova shighe kar yô, m za zua vea terem, maa a kuvem; er i marem je, lu hiin je terem kuvem ne!

Terem vea ngôm yange ve er tom imôngo u pasen ior ishimaverenkeghen i ken Bibilo la hemba anyom 35. Yange hingir or eren kwagh kundu kundu shi waan mbagen ikyo; ior fa un wuee er a lu or u wasen ior yô. Yange m hen u nan u icivir shi soon un ken anyom la cii. Yange i saan mo iyol tsung er m lu wan na yô! Yange kpe ken inyom i 2016 la, kpa ka m shi henen kwagh na ken ishima. M nenge er un vea mo cii yange se dondo atesen a Bibilo nahan se gema uma wase sha gbenda u vesen yô. Ihyom i ngise i lum ken ishima la kpa i bee vindi vindi. Shi doom kpishi er m zough a Terem u Sha, Yehova Aôndo u a tendezwa u va been a hanma kwagh u a ve icombor a mbamzeyol la nahan.

^ par. 20 Lu Mbashiada mba Yehova gber u ye, kpa hegen mba kera gberen u ga.