Aver yem sha atineakaa

Mbashiada mba Yehova

Tsua Zwa Tiv

BIBILO GEM IOR

“Godobi Hingir Ya Wam”

“Godobi Hingir Ya Wam”
  • I Mar Un ken Inyom I: 1955

  • Tar Na: Ishpania

  • Injaor I Yange Lu Yô: Yange Maan Mcimbim ma Bom shi Hunden Msôrom shi Eren Ipila

YIASE YAM

Ior mbagenev yô, shighe ka a kar kpishi cii ve ve mase henen kwagh ken akaa a vihin tsung a ve nyer ker la ye. Mo kpa ka injaor i yange m lu je la. Yange i marem hen geri u Barcelona shi m vese her. Geri ne ka un a lu geri u vesen u sha uhar ken tar u Ishpania ye. Tsombor wam lu hen anjiir u i yilan ér Somorrostro, u a hembe tôôn vegher u vesen u icile i geri ne la. Yange i fa Somorrostro sha kwagh u ifer i eren man mcimbim ma bom.

Mbamaren av yange ve lu a mbayev utaankarunyiin (mba nomso ataratar, mba kasev utar), mo m lu wan ve u vesen. Er se gba ican kpishi yô, terem kaa a mo ér m za hen agirigi u gbidyen tenisi, m za eren tom u tôôn ubor mba ve gbe ken inya la m naan mba gbidyen bor u tenisi la. Yange m lu anyom pue, kpa m eren tom ne ahwa pue hanma sev. Kwagh ne na yô, m fatyô u zan makeranta er mbayev mbagenev mba ve lu kwav wam la nahan ga. M va nyer anyom 14 yô, m hii u eren tom u varen iwa hen shôôpu i myôô igen.

Ken inyom i 1975 la, m za kohol kwe shojaa u i yilan ér Spanish Foreign Legion u u lu ken North Africa, shi m hua yonofum ve i i due kposo la

Ken inyom i 1975 la i kaa a mo ér m za shoja, i ka i gba u hanma or nana za keng ken tar u Ishpania la. Yange m soo u eren kwagh ken uma wam a due inja kposo, nahan m tsuaa u kohol kwe shojaa u i yilan ér Spanish Foreign Legion la hen geri u Melilla, Ishpania mba ve lu ken North Africa la.

Hen shighe ne, m nyôr iyol ken aeren a bo tsung, m maa mcimin ma bom kua msôrom.

M va undun kwe shojaa u Ishpania la yô, m hide m yen ken Barcelona m za kohol mbayev nomso mbagenev se eren ifer.

Nahan, hanma kwagh u sea nenge a mi cii yô, se ii je. Maa se tee akaa a se ii la, se yam mcimbim ma bom ma ma ya tor ken a vese la. Shi yange m hii u man mcimbim ma bom ma garen ityough ker, er LSD man amphetamines nahan, shi m eren idya kpoghuloo shi m hunden msôrom shi m gbidyen do. Ieren i i lu vihin uma wam ne na yô, m lu eren ipira seer a seer. Hanma shighe yô m zenden a ihyô shin anijembe gayô ishôm, shi yange i cier mo iyol u gberen or shighe u i gbe hange hange u me er nahan la ga. Shighe ugen la mo vea nongoior wam se za ii mato man udasenda gba zendan se ijime. Lu inja er se mba eren ka inumbe nahan.

Yange se naha mato u se ii ne zan zan kuma er kilomita 30 nahan, maa udasenda za hii u keren se gbuuka. Ken masejime yô mato wase za gba maa se due se yevese. Terem va fe kwagh u m er ne yô, maa zendam hen ya na kera. Man lu sha inja je.

M hingir u tsan sha ugodobi anyom ataan. M tsaan ior sha ihinda, man shin umato mba vesen man sha ubenci mba ken garaji kua sha ajiir a i iin mbakpenev yô. Shighe ugen la je yô m tsa ken bar sha anshighe kpuaa. Uma wam kera lu a inja ga, shi m nenge mer mea kpe shin mea lu uma je kpa iwasen ngi ga. Shi m umbur er shighe ugen la m ma mcimbim ma bom, nahan m hingir u gberen avav sha uwe yô. M ngu a ayol sha ajiir la zan zan nyian.

GBENDA U BIBILO GEMA UMA WAM LA

Shighe u m kuma anyom 28 la, ngôm va hen mo va kaa a mo ér m hide ken ya. Yange m lumun shi m tôndozwa a na mer me sôr uma wam, kpa shighe kar cii ve m mase kuren ityendezwa yam la ye.

Iyange igen atetan Mbashiada mba Yehova uhar ve va hen a vese, ve va tile sha hunda wase. Er m lu keghen ato a ve la, terem maa ngor ken atô you ér mo m wuhe hunda la. Kpa er m soon mer or a nam wada ga yô, m tsuaa u eren kwagh sha imo na ga. Yange ve nam ityakerada i kiriki itiar, mo kpa m ngohol i saan saan. M pine ve ape ijiir ve i mkombo i lu yô, ve tesem, ayange nga kar kpuaa yô, m za mkombo hen Iyou i Tartor shon m za tile ken won.

Kwagh u hiihii u m nenge yô, hanma or nan wuha iyol sha inja. Kpa mo yô m ume ityough man indyer shi m hua akondo a lun sha ashe wang ga. Ikyav yange i tese wang ér mo m kuma u lun hen ijiir ne ga, nahan m za hemen u lun ken won. Kpa kwagh er u kpiligh mo iyol, m nenge a Juan u yange lu môm ken nongoior u se iin imôngo la, hua suutu tsembelee. Shighe kar yô, m va mase kaven er a lu Orshiada u Yehova i kom inyom jimin ken ijime yô. Er m nenge a na yô, kwagh ne nam vangertiôr u kwagh gbam a mi la, nahan m nyôr m za tema inya ken atô. Lu kwagh u na ve uma wam hii u geman je la.

M lumun u henen Bibilo, man fele je m kav er aluer m soo mer Aôndo a lumun a mo yô, a gba u me de tswam man idya i eren. Kpa u geman undun aeren ne lu kwagh u kiriki ga. Yange m hen m fa mer aluer m soo u eren kwagh sha ishima i Yehova Aôndo yô, a gba u me ‘gema sha mgem u he u mhen wam’ la. (Mbaromanu 12:2) Mhôônom ma Aôndo mara yange ma kôrom ken ishima tsung. Er yange nenge a mbamshi av cii nahan kpa, m nenge er nam ian i geman uma wam yô. Kwagh ne wanger mo wang, m fa je mer Orgban wase wam ikyo.—1 Peteru 5:6, 7.

Kwagh ne na yô, m hii u den a kaa a bo a yange m eren la. Ikyav i tese yô, shighe u m lu henen Bibilo la se va gba henen kwagh sha kwagh u taav u man, maa m kaa ken ishima yam mer, ‘aluer Yehova Aôndo soo ér m za hemen u lun wang, shi m de luun a hôngor iyol ga sha hanma gbenda cii yô, a gba u me de taav u man!’ (2 Mbakorinte 7:1) Man m za haa taav la shin ijiir i haan ihyôghonough!

Shi gba u me de u teen shi man mcimbim ma bom kpaa. Kwagh ne tôô shighe shi m nôngo kwagh tsung. Kpa cii man m hemba ieren ne yô, gba u me pav ijende i m ya vea azende am a yange m kohol imôngo a ve la. Sha ci u ieren ve la i lu yangen mo u za hemen ken jijingi. Nahan kpa, shighe kar yô, m hemba suur sha Aôndo shi m zua a i wasen ken azende am a he a ken tiônnongo la. Dooshima ve man ikyo i ve wam la lu kwagh u m lu a vande nengen a mi ga yô. Er iwer lu karen la, m kôrcio u hemban ieren yam i man mcimbim ma bom la shi m ‘haa orhe iyol’ u una wasem, nahan Aôndo una lumun mo la. (Mbaefese 4:24) Ken uwer u Agusutu inyom i 1985 la, m er batisema, m hingir Orshiada u Yehova.

IWASEN I M ZOUGH A MI LA

Bibilo wasem, nahan uma wam ngu a inja. I paam sha ikyev i uma u vihin tsung u yange lu vihin iyol yam man iciviryolough yam la. Sha mimi yô, azende am a nomso man a ukase a hemban er 30 nahan saa ku yev yev, sha ci u ve gba anakande shin iangev mbigen, mbi ve zough a mi ken mcimbim ma bom ma man yô. Yange m dondon akaawan a Bibilo nahan doom kpen kpen, sha ci u kwagh ne wasem u palegh akaabo a vihin tsung a yange er azende am la.

Ahô man azembe a yange m zenden a mi m eren ipila shighe u m lu gumor la hingir mo kwagh u tse. Mayange je m fa mer yange igen me hingir u zenden a Bibilo wasen ior ga. Nyian ne, mo vea kwase wam se mba Mbashiada mba Yehova mba eren un tom hanma shighe.

Mbamaren av yange ve hingir Mbashiada mba Yehova ga, kpa yange ve wuese mbamtsera mba m zua a mi sha ci u m hen Bibilo la. Jighilii yô, shighe u mba ve eren tom vea terem vea lamen sha Mbashiada dang yô, terem di a gema a paan Mbashiada iyol. Yange fa wang er jighjigh u nan wam u he ne gema uma wam sha gbenda u doon tsung yô. Ashighe kpishi ngôm akaa ér mo yange ma m hen Bibilo faa. Kpa yange m lumun a na kpishi ga.

Akaa a erem ken uma la wasem u fan er kwaghfan a lu ken u keren mkom ken mcimbim ma bom man aferakaa agen ga yô. Hegen ne ka mea tesen ior atesen a a lu ken Mkaanem ma Aôndo la yô, m zua a mkom. Atesen ne sha mimi yô, a yima uma wam.