Yange i marem ken tar u Romania ken inyom i 1952. Er ngôm lu Kwaseshiada shi er batisema nahan kpa, kera zaan mbamkombo shi duen kwaghpasen ga, nahan mo kpa m zaan mbamkombo mba Mbakristu ga. Heela tseegh ga, shighe la lu gomoti u Ityemimôngo hemen tar u Romania ye, man gomoti la yange cir tom u Mbashiada u gberen ityakeda shi pasen kwagh la. Nahan hii shighe u i marem la zan zan shighe u m nyôr anyom 36 la, m fa or u nan lu Yehova ga, shi m fa kwagh u Bibilo i tese kpaa ga. Kpa ken inyom i 1988 shighe u m lu ken geri u Satu-Mare vea nomom, István la, kwagh ugen er u yange gema uma wam yô.

I Pinem Kwagh u Me Venda Ga Yô

 Iyange igen la ngôm va u va nengen a mo. Va nyer yô, a kaa a mo ér: “M soo u za nengen anngôm ugen kpaa. Nahan u za verem ga? Se zaan se hiden yô, se kar se za yam akaa ken kasua.” Er m lu eren kwagh ga yô, m lumun.

 Yange se mba za nyer hen ya u anmgbian u mama wam la yô, m za mase kaven mer Mbashida mba Yehova lu nyôron mkombo her, iorov 9 va mkombo la. Lu shighe la m mase kaven mer ngôm hide ngu zan mbamkombo shi duen kwaghpasen, ka Kwaseshiada u tseen ishima ye. Kwagh u m ungwan hen mkombo shon pepe la doom saa her.

 Mba beem mkombo la yô, or u hemen mkombo la va sughum shi ôrom iti na. A kaa ér: “Iti yam ér János. A shen m nenge u kegh ato zulee u lu ungwan hanma kwagh. Kwagh u ashen u ongo la doo u wee?” M kaa a na mer i marem je kpa, m ngu a za imba mkombo ne ga, nahan kpa a doo, kwagen kpa me va. Maa a pinem ér: “Aluer i kaa ér a hen Bibilo a we nahan u lumun kpa?” Kwagh u pinem ne, lu kwagh u me venda ga. Yange m fa je mer ka Aôndo a urugh mo ér m va kohol ior mban ye.

 Kpernan maa, János va a kwase ugen va tesem, i yilan un ér Ida, nahan Ida maa hii u henen Bibilo a mo. Nahan kpa gema cier mo iyol, sha ci u m fa kwagh u István una va fa ér mo m ngu henen Bibilo vea Mbashiada mba Yehova ve una er ga. Yange m nôngo acin imôngo mer me lam a na sha kwagh shon, kpa mea hiin je, a soo u ungwan kwagh môm môm ga. Yange m fa je mer a soo kwagh u m lu eren ne ga.

 Nahan kpa, m za hemen u henen Bibilo her, maa m va er batisema ken uwer u Agusutu, inyom i 1989. Iwer ngi karen inyiin yô, I ngohol tahav hen gomoti u Ityemimôngo u lu hemen tar u Romania la kera, shi i wua orhemen u gomoti shon.

M Seer Tagher a Ahendan

 Yange mba ngohol tahav hen gomoti u Ityemimôngo la kera yô, ior zua a ian i eren akaa kpishi sha ishima ve. Yange Mbashiada mba Yehova kpa zua a ian i nyôron mbamkombo vev shi pasen kwagh gbar gbar. Nahan kpa mo yô, shighe ne gema lu shighe u m tagher a ahendan kpoghuloo yô. István kaa a mo ér “Wea soo ga, za adua u u soo cii kwagh gbam shami ga, kpa de cihin duen wer u ngu za pasen kwagh sha uya uya ga.”

 Jighilii yô, yange lu me de u pasen kwagh ga. (Aerenakaa 4:20) Sha nahan yô, m nôngo tsung m eren kwagh sha kwaghfan. Nahan kpa, iyange igen la azende a István nenge a mo shighe u se due se lu pasen kwagh sha uya uya yô, maa ve za ôr un. M za hidi ken ya yô, nomom maa gba ngoron a mo, ér “U ngu heen mo kua tsombor wase cii nahan u fa kpa?” Maa a tsua ihyô a pendam hen ikyer, a kaa ér aluer mo m de u pasen kwagh ga yô, una wuam.

 Yange m nôngo m lam vea István, shi m kaa a na mer a doom ishima kpishi. Lu inja ér iliam la na ishima wa gban un shimi nahan. Nahan kpa, iyange igen la m vende u zan ivese i anmgbian wase ugen ken adua yô, ishima hide vihi István dedoo. A gba lamen a mo côu côu.

 Kwagh ka a er i vihi yô, István za hemen u vihin ishima a mo nahan, zan zan anyom 13. Hen shighe ne cii, a shi kaan a mo ér una pav ivaa a mo. Ashighe agen yô, yange a gesa hunda, maa m saa ken won. Ashighe agen di a kaa ér m kura ikyav yav m yem.

 Ka nyi yange i wasem u wan ishima a kwagh laa? Yange m er msen hen Yehova, m sôn un mer a wasem me gba ishima ikyôr, man sha mimi yô, m nenge mer Yehova yange wasem. (Pasalmi 55:22) Tiônnongo kpa yange suen kpishi je. Yange mbatamen kua anmgbianev mba kasev mba ve civir Yehova ica i gbe yô, ve shi taver mo ishima ér m de yen ishima den u civir Yehova ga cii. Yange ve umbur mo kwagh u Bibilo i ôr sha kwagh u kasev urugh noov vev, kpa i lu “sha kwaghôron ga” la, ér aluer m tile dông shi m za hemen u civir Yehova sha mimi yô, kape a lu je la. (1 Peteru 3:⁠1) Shighe kar yô, mo kpa mkaanem mara va kure sha a mo vough.

Shighe u Hanma Kwagh Kôr Gema Yô

 Ken inyom i 2001 la, István gba strooku, nahan kera faantyô u zenden ga. Yange tsa sha iyouchi uwer jimin, shi i tôô ukasua imôngo u wasen un u hiden karen iyol u eren akaa agen. Hen shighe ne cii yange m kenden un ga, m lu vea na ikyooso ikyooso. M yien un kwaghyan shi m lamen a na, shi hanma kwagh u a gbe un cii m er un.

 Anmgbianev mba ken tiônnongo kpa yange ve va ve va nenge un. István yange nenge a dooshima man ikyo i wan i anmgbianev la sha a na iyol na. Yange anmgbianev mbagen ve va wase se u eren akaa a hen ya. Mbatamen ve shi van va taver se ishima shi surun se ishima.

 Gbenda u anmgbianev va sôron se ne kôr István ken ishima kpishi, maa kunya gba kôron un a iyol na sha er yange un nzughul a mo yô. Shi un iyol na kaa ér ijende na i môm kpa i ker u va nengen un ga. Nahan yange se mba hungu gambe sha iyouchi yô, István kaa ér “Mo kpa m soo u henen Bibilo, hingir Orshiada u Yehova.” Yange saan mo iyol je gande tsô m gba vaan!

 Ken uwer u Mei inyom i 2005 la, István er batisema. Er kera zenden sha ga yô, anmgbianev tuur un shin ikyekye i mbaawanev za ver ikyua a ijir i eren batisema la, maa i kôr un, i hungwa a na shin mnger teghelee, i er un batisema. István maa hingir or u pasen kwagh u Tartor sha gbashima. Ka m umbur er yange mea due kwaghpasen vea na ve i saan se iyol kpishi yô. Yange mea hen er or u ngise a hendan a mo kpoghuloo ér m de pasen mimi u ken Mkaanem ma Aôndo ga ne, hegen ka se due se lu ikyooso ikyooso, a pasen ior loho u dedoo saan saan nahan i kpiligh mo iyol!

 István yange soo Yehova sha mimi, shi a tôô shighe a hen kwagh shi a nôngo a kôr avur a Bibilo ken ityou. Yange i doo un u lamen sha avur a Bibilo aa kôr ken ityou la vea ior mba ken tiônnongo kpen kpen. A er tom a ian la u taver anmgbianev mba nomso man mba kasev asema.

 Nahan kpa, kwaghnyion na la lumun u hiden ijime ga. Yange strooku la shi kimbir kôron un acin imôngo, nahan kera lamen ga, maa ken masejime yô, kera mough sha gambe kera ga. Kpa mayange de u civir Yehova ga cii. Yange a ôron Bibilo shi a henen kwagh er a fetyô la. Yange anmgbianev vea za u za nengen a na yô, a lamen a ve sha ankômputa ugen u lu a mi yô, shi a taver ve ishima kpaa. Anmgbian ugen kaa ér: “Ka mea va nenge a István nahan i doom kpishi. Ka mea va nenge a na yô, m zua a ishimataver.”

 Kwagh ka a er i vihi yô, ken uwer u Disemba, inyom i 2015 la, István saa ku. Ku na yange u nyoon mo kpen kpen. Nahan kpa me ôr sha mimi, yange m zua a bem ken ishima kpaa. Ityôkyaa yô, cii man István a saa ku yô, yange hingir ijende i Yehova kôôsôô. Ka kwagh ugen u yange na saan mo iyol je la. Hegen ne, István man mama wam cii, Yehova ngu umbur ve. A va lu kwagh u doon tsung u kuven ve shi ngohol ve ken tar u he u Yehova u perapera la.

 Mough shighe u mama yange mough vea mo, se za hen anngô na la va heen hemba anyom 35, man ka kwagh u a tsa kpa una hungur mo ga yô. Hegen m hemba anyom 70 kpuaa shi m ngu pania. M nenge mer ka gbenda u hemban doon u sughun Yehova sha hanma kwagh u a er a mo je ne. (Pasalmi 116:12) Yange wasem u civir un sha mimi shi gban ishima ikyôr, wan ishima a ahendan. Er i lu hendan a mo kpoghuloo nahan kpa, yange m fa je mer, mlu wase una fatyô geman. Sha nahan yô, er lu kwagh u m ver ishima mer una tsa a er ga nahan kpa, ken masejime yô, m va urugh nomom fa Yehova, kpa lu sha kwaghôron ga.