Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITINEKWAGH I TAMEN | MBAANYINYAV MBA UNYIIN MBARA—KA NYI VE LU ERENEE?

Kwagh u Mbaanyinyav mba Unyiin Mbara Ve Lu Eren Yô

Kwagh u Mbaanyinyav mba Unyiin Mbara Ve Lu Eren Yô

Mbaanyinyav mba unyiin mbara ande tembe ibuv, angahar a anyinya nga kumen acin! Ka sea ôron kwagh u anyinya a utaha la kua mba ve hende a la ken Bibilo yô, i lu se inja er se mba nengen a kwagh shon kpôô kpôô nahan! Nyinya i hiihii la ngi pupuu, or u a lu hendan i la i sember veren un tor, ngu a iengem kpishi. Nyinya u nyian bong cir un ijime, or u a henda i la ngu tôôn bem sha tar cii kera. Nyinya i sha utar i i dondo la i ile dimii er ime i ken atôutu nahan. Or u a lu hendan i la kôr iyôgh ki karen myohom kende a mi sha, ngu yôôn loho u mzungu sha kwagh u m-ban u kwaghyan. Nyinya i sha unyiin i i dondo la di ngi iyol fuee, Ku kpôô kpôô henda i, ngi tesen ikyav i iangev man akaabo agen a nan ku. Uwar u mbakpenev di ngu van i ken ijime ikyua ikyua, ngu menan uuma mba iorov je vaa kaa!—Mpase 6:1-8.

“Shighe u m hii ôron kwagh u mbaanyinyav mba unyiin mban la, cier mo iyol kpishi. M hen mer Iyange i Ijirigh sôôn van, man er m lu a wa iyol ga yô, lum er me war ga nahan.”—Mkaanem ma Crystal, kwase ugen.

“Kwagh u mbaanyinyav mba unyiin mba ve henda anyinya a lun ukala kposo kposo ne yange doom je gande. Yange m kaven inja i mpase la yô, m nenge mer ka kwagh u mimi.”—Mkaanem ma Ed, orgen.

We kpa ka wea hen sha kwagh u mbaanyinyav mba unyiin mba i er kwagh ve ken Mpase la nahan, i lu u er yange lu Crystal nahana? Shin ka i lu u er yange lu Ed nahana? Er ka i lu u ken ishima la cii kpa, fa wer kwagh u mbaanyinyav mbara ka môm ken mbampase mba kôron ken ishima mba i nger ken takerada u masetyô u Bibilo, u i yer ér Mpase la yô. Aluer u kav inja i mpase ne yô, kwagh ne una wase u kpishi je. Sha nyi gbenda? Aôndo tôndo zwa ér aluer u ngu ôron takerada u akaaôron a profeti ne shi timen ker shi dondon kwagh u i nger ker la yô, u zua a msaanyol u mimi.—Mpase 1:1-3.

Er mpase u mbaanyinyav mba unyiin mbara a cier mbagenev iyol nahan kpa, i nger un ér a cier we iyol ga. Jighilii yô, ior umiliôn imôngo nenge ér mpase ne seer taver jighjigh ve u nan shi a na yô, ve mba a ishimaverenkeghen ér mlu ve u ken hemen una va doo. We kpa una fatyô u nan we ishimaverenkeghen ne! Yô, za hemen u ôron.