Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  1 2017

 Kav Jighjigh Ve U Nan Enoki

“A Doo Aôndo Ishima”

“A Doo Aôndo Ishima”

ENOKI yange tsa kpishi ga. Alaghga a taver se u kaven er i hii ve i ôr nahan yô, kpa Enoki yange tsa anyom 365; man aluer se tôô mtse na la se kar sha anyom a ior ve tse ainge yô, a fatyô u kaan ér a kohol ikyov inyiin! Kpa hen shighe na la yô, a fatyô u kaan ér yange bee iyol keng ga. Ken anyom a hemban er dubu utaan ken ijime la, ior hemban tsan a hen shighe wase ne ica je. Adam or u hiihii la, yange tsa hemba anyom deri ateratar shighe u i mar Enoki la. Mba maren Enoki kera yô, Adam shi tsa anyom deri utar. Ônov mba Adam mbagenev je yô tsa hemba nahan. Nahan alaghga shighe u Enoki tsa anyom 365 la, lu her gbong gbong, er or u i lu a zurum u nana kpe ga nahan. Kpa kera tsa kpishi ga.

A̱ shi nan kpa kwaghbo yange penda ishigh u tseren Enoki. Nenge ken ishima you er lu yevese henen kwagh u ior mba yange sember pasen ve loho u Aôndo la ken ishima yô. Ishima vihi ve ker je ve kura icul sha. Ior mban yange ve kôr un ihyom. Ve laha loho na, shi ve soo kwagh u Aôndo u a tindi un la kpaa ga. Lu u vea fatyô u bulan Yehova, Aôndo u Enoki la ga, kpa gema lu u vea bula Enoki kpee je! Alaghga Enoki lu henen ér una kera fatyô u shi nengen a tsombor na ga. Yange una lu henen sha kwagh u kwase na man ônov nav mba kasev shin wan na Metusela, gayô wan u wan na Lameki shinii? (Genese 5:21-23, 25) Yange nenge ér kwagh na bee a bee jee?

Bibilo fa ôron kwagh u Enoki kpishi ga. I nger kwagh na ken Bibilo tiônôô sha ajiir atar tseegh. (Genese 5:21-24; Mbaheberu 11:5; Yuda 14, 15) Nahan kpa, avur ne ta se ankyurce sha kwagh na, sha gbenda u a wase se u nengen er yange lu or u nan jighjigh taveraa yô. U ngu a tsombor u u kôson yôô? Ashighe agen ka i taver we u tilen sha kwagh u u nenge wer ka u mimi laa? Aluer ka nahan yô, u fatyô u henen akaa kpishi ken jighjigh u nan u Enoki la.

ENOKI ZA HEMEN U “ZENDEN VEA AÔNDO”

Shighe u i mar Enoki la nahan, orumace vande vihin gbenda u nan sha ishigh ki Aôndo. Hii sha Adam zan zan va hen shighe na la, lu kov u sha utaankaruhar. Sha mimi yô, shighe la nahan orumace pande lu a gbong gbong u iyolough u Adam man Ifa yange ve lu a mi sha hiihii ve, ve va kera lu vough ga la. Ka nahan ve ior mba hen shighe la yange ve tsaan shighe gôgônan ye. Nahan kpa, aeren a ior gema vihi kpishi, shi ve lu mba civir Aôndo ga. Ipila lu hanma ijiir cii. Ieren la yange hii sha kov u sha uhar, shighe u Kain wua anngô na Abel la je. Shi ikyav tese ér wan u Kain ugen la je yô, yange hemba wan ipila shi hemban oron iyev a Kain, shi kwagh ne lu un kwagh u tan ave vanger a mi je kpaa! Ka va nyer sha kov u sha utar la yô, ifer igen shi ta tombo. Ior hii u yilan sha iti i Yehova, kpa lu sha gbenda u civirigh ga. Ikyav tese ér yange ve lu lahan, shi tuhwan a tuhwa icighanti u Aôndo.—Genese 4:8, 23-26.

Sha shighe u Enoki la nahan je yô, alaghga imba mcivir u aiegh ne samber wuee. Enoki va vesen yô, Gba u una tsua kwagh u una er yô. Una tsua u nyôron nongo a ikpelaior i hen shighe na laa? Shin una ker u fan Yehova, Aôndo u mimi, u a gbe sha man tar laa? Alaghga yange a doo un tsung u henen kwagh u Abel, u yange kpe sha ci u a tsua u civir Yehova sha gbenda u Yehova a soo la yô. Tsô Enoki tsua u eren er Abel nahan.  Genese 5:22 kaa ér: “Enoki gba zenden vea Aôndo imôngo.” Ishemberkwaghôron ne tseegh kpa tese ér Enoki yange lu or u civir Aôndo, u lu hen atô u ior mba ve civir Aôndo ga yô. Ka un a lu orumace u hiihii u Bibilo i hii pasen kwagh na sha gbenda ne ye.

Shi i pase hen ivur shon kpaa ér Enoki yange za hemen u zenden vea Aôndo shighe u mar wan na Metusela kera la. Sha nahan yô, Enoki yange kom er anyom 65 je tsô, lu or u lun a tsombor sha ikyev. Lu a kwase, u Bibilo i ter iti na ga yô, kua “ônov mba nomso man mba kasev” mba i pase iyenge ve ga yô. Aluer ter ngu zenden vea Aôndo shighe u nan lu yesen ônov shi nengen sha tsombor u nan yô, ka keng nana ker u tesen tsombor u nan ér u za sha gbenda u Aôndo. Enoki yange fa je ér Yehova soo ér una var ken kwase na, una eren kwagh a na sha mimi. (Genese 2:24) Shi yange una nôngo sha afatyô na cii una tese ônov nav kwagh u Yehova. Ka nyi yange i due ken iniôngon na shono?

Bibilo pase se vighe vighe ga. I ôr se kwagh u jighjigh u nan u Metusela, wan u Enoki, u Bibilo i tese ér a hemba tsan sha won a hanma or la ga. Metusela yange lu uma zan zan va kar kpen ken inyom i Mngerem ma Deemee va sha tar la. Nahan kpa, Metusela gema mar wan i yilan un ér Lameki. Yange i mar Lameki anyom kar hemba deri môm cii ve ter na u tamen Enoki va mase lun ga ye. Shi ikyav tese wang ér Lameki yange vese lu a jighjigh u nan. Jijingi u Yehova yange mgbegha un u ôron kwaghôron u profeti sha kwagh u Noa, wan u Lameki, man kwaghôron u profeti ne va kure sha mi shighe u Mngerem ma Deemee kar kera la. Noa kpa i pase kwagh na ér yange zende vea Aôndo, vough er ter u ter na u tamen Enoki nahan. Noa yange kohol Enoki ga. Kpa Enoki gema ver un dyako i jighjigh u nan i doon tsung. Adooga Noa yange hen kwagh u dyako ne hen ter na Lameki, shin hen Metusela, ter na u tamen, gayô alaghga je yô lu hen Yaredi, ter u Enoki, u yange va kpe shighe u Noa lu anyom 366 la.—Genese 5:25-29; 6:9; 9:1.

Mkposo ngu hen atô u Enoki man Adam kpishi je. Yange i gba Adam lu a isholibo ga, kpa va hemba Yehova ato, nahan ver ônov nav dyako i ihembeato man ican i yan. Enoki di i mar un ken isholibo, kpa gema zende vea Aôndo, nahan ver ônov nav dyako i jighjigh u nan. Adam yange va kpe shighe u Enoki lu anyom 308 la. Tsombor u Adam yange u zungwe ku u ter ve u wan iyol na ikyo tseegh ne je he? Se fa ga. Nahan cii kpa, Enoki za hemen u “zenden vea Aôndo.”—Genese 5:24.

Aluer u ngu nengen sha tsombor yô, nenge ase ityesen i u fatyô u zuan a mi sha kwagh u jighjigh u nan u Enoki ne yô. Shin er i gbe u u nenge sha mbamgbe mba tsombor wou mba iyolough nahan kpa, kwagh môm hemba mgbe ve u ken jijingi la ga. (1 Timoteu 5:8) Gba u u kure mgbe ne sha mkaan tseegh tsô ga, a kua sha ieren kpaa. Aluer u tsua u zenden vea Aôndo er Enoki nahan, u ngu dondon atindi a Aôndo ken uma wou yô, we kpa u na tsombor wou dyako i doon tsung; u ver u ikyav i dedoo i vea dondo yô.

ENOKI YANGE “ÔR KWAGHÔRON U PROFETI SHA KWAGH” VE

Er lu Enoki tswen na jighjigh hen shighe la yô, alaghga tsô yange a huan un kpishi. Kpa Aôndo na, Yehova, yange nenge a jighjigh u nan na la kpa? Een, yange nenge a mi. Tsô sha iyange igen yô, Yehova lam a wanakiriki na u jighjigh ne. A tindi Enoki loho hen ior mba sha ayange a na la. Sha nahan yô, a ver Enoki  profeti; a hingir profeti u hiihii u i nger loho na ken Bibilo yô. Se fa kwagh ne sha ci u yange jijingi u Aôndo va mgbegha Yuda, u lu ngô môm vea Yesu la, nger kwaghôron u profeti u Enoki yange ôr anyom uderi imôngo la shin inya. *

Enoki yange ôr kwaghôron u profeti kaa ér nyi? A kaa ér: “Ter va a uicighan Nav udubu udubu, sha u Una ôr ior cii ijir; mba ve vende Aôndo la cii Una na ve ibo sha aeren a ve a vendan Aôndo la cii, a ve er ve venda Aôndo la man shi sha akaaôron a vihin cii a mbaasorabo mba ve vende Aôndo la ve lu ôron sha a Na yô.” (Yuda 14, 15) Adooga kwagh u u hii nengen a mi hen ivur ne yô, Enoki yange ôr kwagh inja er Aôndo vande kuren kwaghôron u profeti la nahan. Uprofeti mbagenev kpa yange ve va dondo gbenda na u ôron kwagh la. Ka jindikwagh je ne: Profeti ne pase kwagh u una va er kpee a bunde ga ne sha gbenda u a fatyô u kaan ér kwagh shon vande eren kera!—Yesaia 46:10.

Enoki yange taver ishima yôô loho u Aôndo hen ior mba ve hendan a na yô

Yange gba u Enoki una za ôr loho u ijirigh la nahan lu un ken ishima nena? Man alaghga je yô, lu u una za pase u a pase hen hanma or u nan kegh ato cii. Nenge ase er yange ta ior icin ken loho la taveraa yô. Yange ter ishember i ‘mba ve vende Aôndo’ la kwa nyiin, sha u nan ior ibo sha aeren a ve kua gbenda u ve tese aeren shon la. Sha nahan yô, kwaghôron u profeti ne yange lu tan uumace cii icin ér, aeren a ve lu a mi hii shighe u i zenda Adam man Ifa ken sule u Eden kera la, a vihi kpishi. Lu u tar u hen shighe la ua tagher ishigh a zege mtim shighe u Yehova una va a “uicighan Nav udubu udubu” u va tan ityav sha u la. “Uicighan nav” mbara ka ikpela i mbatyomov mba ageegh mba ve we iyol i utya yô. Enoki yange ôr loho u Aôndo u tan ior icin la a mciem shio, man lu un tswen! Alaghga Lameki, u lu wanye hen shighe ne la, yange una nenge ishimataver i ter na u tamen la nahan, a kpiligh un iyol. Aluer ka nahan yô, se fatyô u kaven wang er i hii ve i lu nahan yô.

Kwagh u jighjigh u nan u Enoki ne ma a mgbegha se u pinen ayol a ase aluer sea lu nengen tar u se lu ker ne er Aôndo a nengen u la yô. Ijirôron i Enoki yange pase sha ishimataver la ngi her; ngi van sha tar u hegen ne kpaa, vough er tar u sha ayange a Enoki la nahan. Yehova yange er kwagh sha icintan i Enoki la, a va a Mngerem ma Deemee sha tar u sha ayange a Noa la. Kpa mtim la ka ikyav i mtim u vesen ugen u a lu van yô. (Mateu 24:38, 39; 2 Peteru 2:4-6) Nyian ne kpa, Aôndo vea uicighan nav udubu udubu wa iyol kegh a kegh i va timin tar u u vende Aôndo ne. Gba u hanma wase nana hen sha kwagh u icintan i Enoki la tsung, shi nana ôr mbagenev kwagh u i. Alaghga azende a ase man mba hen tsombor wase vea lu pareghaa a vese. Shi alaghga se lu tswen ashighe agen. Kpa mayange Yehova undu Enoki ga; nyian kpa una undu mba ve civir un sha mimi la ga!

‘I YEM A NA SHA, NAHAN A KERA NENGE A KU ASHE GA’

Kwagh u Enoki yange kure nena? Se fatyô u kaan ser, kwagh u ku u Enoki hemba cimin a kwagh u uma na kpôô kpôô. Takerada u Genese gba kaan tsô ér: “Enoki gba zenden vea Aôndo, kpa va kera lu ga, gadia Aôndo yem a na.” (Genese 5:24) Ka sha nyi gbenda nahan Aôndo yange yem a Enoki? I gema kwagh u i nger ken Mbaheberu 11:5 la ken Ubibilo mbagenev ér Aôndo yange yem a Heno (shin Enoki) sha tartor. Kpa kwagh a fatyô u lun nahan ga. Bibilo tese ér ka Yesu yange lu or u hiihii u i nder un yem sha ye.—Yohane 3:13.

Ken Mbaheberu 11:5 shon môm môm ne, shi i pase ken Ubibilo mbagenev ér i yem a Enoki sha nahan a  kera nenge a ku ashe ga. Inja i kwagh ne ér nyi? Alaghga tsô Yehova yange kure uma u Enoki sha u nyôron a na ken ku sha gbenda u a nyoon un ga yô. Kpa cii man shighe ne yô, “i er shiada sha a na ér a doo Aôndo ishima.” Sha nena yô? Cii man Enoki kpe yô, afaerenga Aôndo tese un kwagh u paradiso u shin tar ken mpase u sha mnenge. Nahan Enoki nenge a ikyav i tesen wang ér un doo Yehova ishima, maa mase kpen. Apostoli Paulu yange va nger kwagh u Enoki kua nomso man kasev mbajighjigh mbagenev ér: “Ka ken jighjigh u nan man mban cii ve kpe ye.” (Mbaheberu 11:13) Alaghga mbaihyomov nav mbara yange vea va ker ikyom na, kpa vea ‘zua a i ga,’ sha ci u adooga Yehova yange er ikyom na ndiir, sha u ve̱ de tôôn i za nzughul a mi, shin eren akombo a mi ga yô. *

Lu ase a kwagh u Bibilo i er sha kwagh u mkur u Enoki ne ken ishima, nahan se gbidye kwar se nenge er alaghga yange kwagh ne una er yô. Hen sha kwagh ne, shi umbur wer ka gbenda môm u kwagh ne yange una fatyô u eren di tsô. Enoki yange yevese je nôngo u vôron gbeda gbeda. Mbatôvon un a ican mbara lu zendan un ityô, ishima gba ve awambe sha loho u ijirigh u a ôr ve la. Enoki maa va zua a ijiir i una yer her a mem kpuaa yô, kpa fa er un lu waren ga yô. Lu zurum a ku swendegh. Er lu memen la, a er msen hen Aôndo na. Maa bem gba un iyol tsung. Tsô Enoki hii u nengen a mpase u sha mnenge, mpase ne lu vighe vighe je yô lu un er un ngu henpe kwagh shon a lu eren la nahan, ishima na kera lu ikyua ga.

A̱ shi nan kpa Enoki yange lu tagher ishigh a ipila ve Yehova kar a na kera ye

Tôô wer i bugh ian, i tese un tar u u kaha kposo a u a vande fan yô. Lu un er tar ne doo je hemba sule u Eden nahan, kpa i ver ucerubi her mba yangen uumace u nyôron ker ga. Nomso man kasev lu ker kpishi; ve cii ve lu gbong gbong shi ve lu yev yev kpaa. Bem dumbur hen atô ve. Enoki kera nenge i kôr or ihyom shin i tôv or a ican sha kwagh u kwaghaôndo, er vanden nengen kpur kpur la ga. Enoki gema nenge er un doo Yehova ishima shi a lumun un yô. A nenge wang ér ka ijiir i i gbe u una lu, ia lu ya na je la. Er bem lu gban Enoki iyol seer a seer la, a kusu ashe teghelee maa a gba mnyam ma kuugh.

A za hemen u yaven mnyam ma kuugh zan zan nyian. Shin er a kpe nahan kpa, kwagh na hungur Yehova mayange ga! Yange shighe karen yô, Yesu va tôndo zwa ér, shighe ngu van u mbakpenev mba Aôndo a lu umbur kwagh ve cii vea ungwa imo i Kristu vea nder shin uwar, vea lu shin tar ken bem, ken paradiso u doon ashe tsung yô.—Yohane 5:28, 29.

Sar u pe we kpa va lun keree? Hen er a girim we iyol u zuan ashe a Enoki yô. Shi hen ase sha akaa a doon tsung a se fatyô u henen hen a na yô! Una pase se aluer akaa a se hen ser yange er ken mkur u uma na la yange a lu nahan mimi yô. Kpa kwagh ugen gema ngu u i gbe torough torough u se hen hen a na hegen je yô. Paulu yange er kwagh u Enoki been yô, a kaa wener: “Á fatyô u doon Aôndo ishima ga, saa sha jighjigh u nan.” (Mbaheberu 11:6) Sha kpôô yô, kwagh ne ka ityôkyaa i vesen i i gbe u se kav jighjigh u nan u Enoki yange lu a mi taveraa la yô!

^ par. 14 Mbatimen sha kwagh u Bibilo mbagenev senge ér Yuda yange tôô mkaanem man ken takerada u i yilan ér Takerada u Enoki la, kpa ka orgen sha ayange a tsuaa la yange nan gber takerada ne, nan gema nan yila u sha iti i Enoki, sha aie ye. I nger kwaghôron u profeti u Enoki la ken takerada ne gedee, kpa alaghga or shon yange nan zua a mkaanem man hen aeren a uter a yange i nger a nger ga yô, shin ken ma takerada u i nger sha ashighe a tsuaa, kpa u kera lu ga yô. Alaghga Yuda kpa yange zua a mkaanem man hen ijiir shon, gayô yange hen kwagh u Enoki hen Yesu, sha ci u shighe u Yesu lu sha la, a nenge kwagh u Enoki er yô.

^ par. 20 Ikyav tese ér kape ikyom i Mose kua i Yesu kpa Aôndo yange de ér i nzughul a mi ga je la.—Duteronomi 34:5, 6; Luka 24:3-6; Yuda 9.