Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  1 2017

 ITINEKWAGH I TAMEN | ER U SEER ZUAN A MTSERA KEN BIBILO I ÔRON YÔ

U Er Nan Ve a Maa U Iyol u Ôron Bibilo?

U Er Nan Ve a Maa U Iyol u Ôron Bibilo?

Ka wea ôron Bibilo nahan ka i lu u nena? Iyol ka i kpe u wee? Shin ka i doo u u ôron i? Kwagh ne cii har sha gbenda u u ôron i la. De se nenge kwagh u u er ve a seer maan we iyol u ôron Bibilo shi u zua a iwasen ker yô.

Ker Bibilo i i gem i vough, sha asember a i lamen a mi ainge yô. Aluer u ngu ôron Bibilo i i gem i sha asember kpishi a a taver we u kaven shin u kera fe a ga yô, iyol ia kpe u u ôron i. Nahan yô, ker Bibilo i i gem i sha asember a a taver ga, i u ôr ve a kôr u ken ishima yô. Nahan kpa i̱ gema i̱ lu Bibilo i i ver ishima zulee i gem i vough yô. *

Er tom a iwabuter i ainge. Nyian ne, i gber Bibilo ken ikyatakerada tseegh ga, i er i sha igbenda igen kpaa. Or a fatyô u ôron Ubibilo mbagenev sha Intanet, shin nana danlood nana lu a mi ken kômputa shin ken hanseeti shin ken tablet u nan kpaa. Mbagenev i er ve sha gbenda u u fatyô u kighir her je maa nengen avur agen a a er kwagh a ze kwagh môm yô, gayô kighir nengen avur shon ken Ubibilo mbagenev je kpaa. Wea hemba soon wer i ôron Bibilo u ungwan a ungwa yô, u fatyô u zuan a icer i ungwan a ungwa kpaa, ken ijô igen. Ior kpishi ka i doo ve u ungwan icer ne shighe u ve nyôr mato ve lu yaren shin ve lu kurun, shin ve lu kiren kwagh, shin ve lu eren ityom igen i ia yange ve u eren kwagh ne ga yô. Er nan u kar gbenda u u hembe lun sha ishima you la ga?

Er tom a ngeren mba wasen we u timen ken Bibilo. Ngeren mba timen ken Bibilo vea wase u u seer zuan a mtsera ken Bibilo you i ôron. Umaape mbá, mba ve tese ajiir a ken Bibilo yô. Umaape mban vea  wase u u fan ape ajiir a i ter kwagh u a la a lu yô, nahan u seer henen sha akaa a yange er la sha igbenda igen. Ngeren mbagenev, er mba i nger ken magazin ne shin mba ve lu sha Intanet hen jw.org, vegher u “Atesen a Bibilo” la nahan, vea wase u u kaven avur a Bibilo agen kpishi.

Geman a igbenda i u ôron Bibilo la. Alaghga u hiin Bibilo i ôron ken Genese zan zan za kuren ken Mpase la una gba u uwer. Nahan er nan u hii u ôron ape i hemban doon we la sha er a maa u iyol ga? Aluer u soo u fan kwagh u ior mba Bibilo i hembe ôron kwagh ve la yô, u fatyô u henen kwagh ve môm môm. Ken ngeren u kiriki u a lu a itinekwagh ér “Ker u Fan Ior mba ken Bibilo, Nahan U Hemba Timen ken I” la, i tese ikyav her er u er kwagh ne yô. Shin wea soo ga yô, ôron Bibilo sha atineakaa, shin ôron akaa a a er, i nger ker la sha adondo adondo. Er nan u kar dondon môm ken igbenda ne ga?

^ par. 4 Mbagenev kpishi nenge ér ka Bibilo i New World Translation of the Holy Scriptures la i gem i sha inja, shi i lu vough, shi i taver u kaven ga ye. I gema Bibilo ne ken ijô i hemban 130. Ka Mbashiada mba Yehova ve gber i ye. U fatyô u za zuan a kôpi u ken zwa Buter sha Intanet hen jw.org, gayô za danlood kwagh u wan sha hanseeti u i yer ér JW Library la. Shin wea soo ga yô, Mbashiada mba Yehova vea va na u kôpi môm hen ya wou.

^ par. 49 Ityakerada ne igen ngi ken zwa Tiv ga, kpa ngi ken zwa Buter.