Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  1 2017

 ITINEKWAGH I TAMEN | ER U SEER ZUAN A MTSERA KEN BIBILO I ÔRON YÔ

Bibilo ia Wasem Nena?

Bibilo ia Wasem Nena?

Bibilo ka takerada u nengen u beelee ga. Ngi a kwaghwan u a dugh hen Aôndo u a gbe se la yô. (2 Timoteu 3:16) Loho u u lu ker la ua wase u tsung je. Bibilo pase jighilii je ér: “Mkaanem ma Aôndo ma uma je, ma tem gbilin ga.” (Mbaheberu 4:12) Bibilo wasen se sha igbenda i vesen ihiar: Ka i wa se kwagh hanma iyange, u una wase se hegen yô, shi ka i wase se u fan Aôndo kua uityendezwa nav.—1 Timoteu 4:8; Yakobu 4:8.

Bibilo ia wase u hegen. Bibilo ia wase u sha mbamgbe ou jighilii. Ka i wa se kwagh sha ambaakaa ne nahan.

  •   Mlu wase vea mba hen tsombor wase man mbagenev. —Mbaefese 4:31, 32; 5:22, 25, 28, 33.

  • Zayol u ken ishima man mnyoon. —Pasalmi 37:8; Anzaakaa 17:22.

  • Anza man aeren a dedoo. —1 Mbakorinte 6:9, 10.

  • Mbamgbe mba iyolough. —Anzaakaa 10:4; 28:19; Mbaefese 4:28. *

Gumor ugen ken veghertar u Ashia vea kwase na cii ve nenge er kwaghwan u Bibilo a lu a inja tsung yô. Shighe u ve sember eren ivese la, ve shi gban ayôôso shi i taver ve u lamen gbar gbar, er noov man kasev kpishi mba ve sember eren ivese kpa ka i lu nahan. Kpa ve va hii u ôron Bibilo shi dondon kwaghwan u ker. Nahan ka nyi i dugh kere? Vicent, u a lu nom la kaa ér: “Kwagh u yange m ôr ken Bibilo la wasem u nôngon a mbamtaver mba ken ivese yase sha gbenda u tesen ér m wa kwase wam ikyo. Kwaghwan u Bibilo wase se u lun imôngo saan saan.” Kwase na Annalou kpa lumun a kwagh ne, a kaa ér: “Ikyav i ior mba i er kwagh ve ken Bibilo la yange i wase se. Hegen ne saan mo iyol ken ivese yam, shi ishima kera nyian se ga, se hemba veren ishima yase sha akaa a se soo u eren la.”

Bibilo ia wase u u fan Aôndo. Dugh kwagh u ivesegh kera yô, Vincent shi kaa ér: “Bibilo yam i ôron na yô, m hemba kporom ikyua a Yehova * hegen cii.” Kwagh u Vicent a er ne tese mtsera u hemban cii u Bibilo ia va u a mi yô: ia na u seer fan Aôndo. Nahan u zua a mtsera ken kwaghwan na tseegh tsô ga, kpa u hingir u nengen un er ka ijende you nahan. Shi u nenge er a pase akaa vighe vighe sha kwagh u mlu u dedoo u ken hemen, shighe u u va zua a uma u tsôron, “u a lu uma jim” la yô. (1 Timoteu 6:19) Takerada ugen môm ua fatyô u nan we ishimaverenkeghen ne ga.

Aluer u hii u ôron Bibilo shi u za hemen u ôron i yô, we kpa u zua a mbamtsera mban: ia wase u sha mbamgbe ou hegen, shi ia na u seer fan Aôndo. Nahan kpa, er u lu ôron Bibilo la, alaghga mbampin vea lu van we ken ishima kpishi. Shighe u i lu u nahan yô, umbur kwagh u or u Etiopia u eren tom ken ya u tor, u yange lu uma anyom a karen er 2,000 nahan ken ijime la. Yange akaa tsume un kpishi sha kwagh u Bibilo. Yange mba pinen un ér a fa una kav kwagh u a lu ôron la yô, gema kaa ér: “Á er nan man me kavaa? Saa or nana pasem.” * Maa a lumun u ngohol ityesen hen Filibu, or u fan Bibilo tsema tsema, u lu môm ken mbahenen mba Yesu mba tsuaa la. (Aerenakaa 8:30, 31, 34) We kpa wea soo u seer fan Bibilo er or u Etiopia la nahan yô, tindi se a loho hen ijiir yase i sha Intanet i www.jw.org/tiv la wer i va hen Bibilo a we, gayô, tindi se a mi sha adereshi u a lu ikyua a we yô, er i tese ken magazin ne nahan. Shin u fatyô u lamen a Mbashiada mba Yehova mba ve lu ikyua a we la, gayô, za hen Iyou i Tartor i i lu hen ijiir you la. Er nan nyian je u hii u ôron Bibilo shi dondon kwaghwan u i, sha u uma wou a hemba doon ga?

Aluer ka taver we u nan Bibilo jighjigh za been yô, nenge vidio i tiônôô igen, ngi a itinekwagh ér Se Er Nan Ve Se Fa Ser Akaa a I Nger ken Bibilo la Ka a Mimi? Za hen jw.org/tiv, za nenge ape i nger ér ITYAKERADA > ICER I VIDIO > BIBILO la.

^ par. 8 Wea soo u seer zuan a akaa a injaa agen a Bibilo i we yô, za hen ijiir yase i sha Intanet i jw.org/tiv la. Nenge ape i nger ér ATESEN A BIBILO > MBAMPIN MBA BIBILO I NE MLUMUN SHA MI LA.

^ par. 10 Shi nenge ngeren ugen ken magazin ne, ngu a itinekwagh ér “Aluer Or Kav Loho u Bibilo Shami Ga kpa Ka Zayol Gaa?”

^ par. 11 Bibilo tese ér Yehova ka iti i Aôndo.