Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Novemba 2015

 ITINEKWAGH I TAMEN | KA A INJA U EREN MSENEE?

Msen Una Wase U sha Akaa Kpishi

Msen Una Wase U sha Akaa Kpishi

Alaghga cii man u er ma kwagh yô, ka u vande pinen wer, ‘Ka nyi mtsera me zua a mi kere?’ Kpa aluer u pine imba mpin ne sha kwagh u msen nahan a lu shami gaa? A lu shami. Sha ci u se cii ka i sar se u fan aluer msen u eren ngu se a inja yô. Orjighjigh Yobu je kpa yange pine ér: ‘Aluer m yila un nahan, una vengese kpa?’Yobu 9:16NW.

Ken ngeren mba ve kar la, se time sha akav a a tese ér msen u eren ka di ieren i kwaghaôndo, shin gbenda u keren wer i lu u shin ishima guda tseegh tsô ga yô. Aôndo u mimi la ongo msen jighilii. Aluer se er msen sha gbenda u mimi man sha akaa a vough yô, una ver ato. Jighilii yô, a kaa ér se kporom hen a na. (Yakobu 4:8) Nahan aluer se mba eren msen hanma shighe yô, ka nyi se zua a mini? De se nenge mbamtsera mba gen mba se fatyô u zuan a mi yô.

Bem u ken ishima.

Ka wea tagher a mbamzeyol kua mbamtaver kpishi nahan, ishima i nyian we kpishii? Bibilo taver se ishima ér shighe u se tagher a mbamlu mban yô, se ‘eren msen gbem,’ se pasen Aôndo ‘akaa a a gbe se la.’ (1 Mbatesalonika 5:17; Mbafilipi 4:6) Shi Bibilo kaa a vese ér aluer se mba eren msen hen Aôndo yô, “bem u Aôndo u a gande hanma mfe wase cii una kura asema a [ase] man mbamhen [asev].” (Mbafilipi 4:7) Aluer se mba pasen Ter wase u sha la akaa a a ze se iyol la yô, ishima ia gba se shimi. Jighilii yô, a taver se ishima er se er nahan. Pasalmi 55:22 kaa ér: “Haa akaa a zan we iyol cii sha TER, tsô Una taver we.”

“Haa akaa a zan we iyol cii sha TER, tsô Una taver we.” Pasalmi 55:22

Ior kpishi sha tar nyian zua a bem u ken ishima ne. Kwase ugen ken tar u South Korea mba yer un ér Hee Ran, a kaa ér: “Shin er m lu ken mbamzeyol mba vesen  nahan kpa, zum u ka mea er msen sha ve yô, ishima i pever mo shi m zua a agee a wan ishima.” Kwase ugen ken tar u Philippines mba yer un ér Cecilia, a kaa wener: “Er m lu ngô yô, ishima ka i nyian mo kpishi sha kwagh u ônov av mba kasev man ngôm, u hegen a gbe angev je a kera fem ga ne. Kpa er m eren msen sha kwagh ne yô, ishima kera zem iyol kpishi ga. M fa je mer Yehova una wasem u nengen sha ve.”

Msurshima man agee a wan ishima a atsan.

U ngu tagher a mbamtaver kpoghuloo, mba ve cier iyol shin ve vihi tsung je kpaa yôô? Aluer u ngu eren msen hen “Aôndo u A lu a ishimasurun cii” la yô, u zua a msurshima kpishi je. Bibilo kaa ér Aôndo “surun se asema sha atsan a ase cii.” (2 Mbakorinte 1:3, 4) U tesen ikyav yô, sha shighe ugen la Yesu nyôr  ken mtaver tsung, tsô “A gure inya, A er msen.” Nahan lu nyi i ere? “Tsô ortyom u Sha ande hen Na, gba taver Un ishima.” (Luka 22:41, 43) Orjighjigh Nehemia kpa mbaaferev mbagenev yange ve lu tan un mciem iyol, nôngon ér vea yange tom u lu eren Aôndo la. Tsô a er msen ér: “Yô, shi taver mo ave!” Kwagh u yange za hemen la tese ér mimi je Aôndo ungwa msen la shi wase un u hemban mciem mara, nahan er tom la kure doo doo. (Nehemia 6:9-16) Orgen ken tar u Ghana, mba yer un ér Reginald, a pase er msen a wasen un yô, a kaa ér: “Ka mea er msen shighe u m lu ken mbamtaver tsung yô, m nenge mer m ôr or u a lu a tahav mbu wasen mo la mbamzeyol av, shi nan kaa a mo ér kwagh a za iyol ga.” Sha kpôô yô, Aôndo una sur se ishima shighe u se er msen hen a na yô.

Kwaghfan u a dugh hen Aôndo la.

Akaa agen a ka se tsua u eren la aa fatyô u wasen se shin van se a ican ken uma wase cii, kua ior asev kpaa. Se er nan ve se tsua akaa a dedoo? Bibilo kaa ér: “Aluer kwaghfan una yina mô wen yô, [hemban cii je yô shighe u nan tagher a atsan yô] nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je.” (Yakobu 1:5) Aluer se er msen se sôn kwaghfan yô, Aôndo una wase se sha icighan jijingi na sha er se tsua kwagh u dedoo yô. Sha kpôô yô, se fatyô u sônon icighan jijingi u Aôndo jighilii, gadia Yesu kaa a vese ér “Ter wen u A lu Sha Una . . . na mba ve sen Un la Icighan Jijingi.”Luka 11:13.

“Yange m sôn Yehova acin imôngo mer a wasem u tsuan kwagh u vough.”—Mkaanem ma Kwabena, orgen ken Ghana

Yesu je kpa yange fa er i gbe u una sôn Ter na iwasen shighe u un lu tsuan akaa a hange hange yô. Bibilo kaa ér shighe u Yesu soo u tsuan iorov 12 mba vea va lu mbaapostoli nav la, “a tsa sônon Aôndo kaka.”Luka 6:12.

Er Aôndo yange ungwa msen u Yesu nahan, nyian ne kpa ior kpishi ka vea nenge er Aôndo a ongo mbamsen vev, a wase ve ve tsough akaa a dedoo nahan, ishima i taver ve. Kwase ugen ken tar u Philippines, mba yer un ér Regina, a ôr kwagh u mbamzeyol mba yange tagher a mi kposo kposo yô. U tesen ikyav yô, yange gba u una nengen sha iyol na man tsombor na shighe u nom na kpe kera la, shi i de un tom, shi lu yesen ônov nav sha ican. Lu nyi i wase un u tsuan akaa a dedoo? A kaa ér: “Yange m er msen, m suur sha Yehova.” Orgen ken tar u Ghana, mba yer un ér Kwabena, a pase er i hii ve yange un sôn Aôndo iwasen yô. A kaa ér: “Yange i dem tom u maan kwagh, u m eren i kimbin mo inyaregh kpishi yô.” Ngur henen sha ityom igen i soo u hiden eren la yô, a kaa ér: “Yange m sôn Yehova acin imôngo mer a wasem u tsuan kwagh u vough.” Shi a kaa ér: “M fa dedoo mer lu Yehova je wasem u tsuan tom u dedoo u ua wasem u nengen sha mgbe wam u iyolough man u ken jijingi ye.” We kpa Aôndo una wase u, aluer u ngu eren msen sha akaa a a gbe a zough sha mlu wou vea na la yô.

Se pande se ter akaa a msen una fatyô u wasen we sha mi la kpuaa di tsô. (Wea soo u fan akaa agen yô, ôr ngeren u kiriki u a lu a itinekwagh ér “ Igbenda i Msen a Wasen Se La.”) Kpa cii man u zua a iwasen ne yô, saa u hii fan Aôndo kua awashima na. Aluer ka kwagh u ú soo la yô, se mba taver we ishima ser lam a Mbashiada mba Yehova ve wase u u̱ henen Bibilo. * Ka kwagh u u hii eren ve u kporom ikyua a Un u a “ongo msen” la je la.Pasalmi 65:2.

^ par. 14 Wea soo u seer zua a iwanger yô, lam a Mbashiada mba Yehova mba hen ningir wou la, gayô za hen ijiir yase i sha Intanet i www.jw.org/tiv la.