Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITINEKWAGH I TAMEN | KA A INJA U EREN MSENEE?

Er i Hii Ve Aôndo A Kaa Ér Se Eren Msen hen a Na Yô

Er i Hii Ve Aôndo A Kaa Ér Se Eren Msen hen a Na Yô

Aôndo soo u yan ijende a vese.

Er ka se lamen vea azende a ase hanma shighe ve se lu kôôsôô nahan, kape Aôndo kpa a soo ér se lamen vea na sha er se lu vea na doo doo je la. A kaa ér: “Né . . . sônom man Mo kpaa Me ver ato her a ven.” (Yeremia 29:12) Aluer u ngu lamen a Aôndo yô, u ‘kporom hen a Na, Un kpaa, Una kporom her a we.’ (Yakobu 4:8) Bibilo na se vangertiôr ér: “TER ngu ikyua ikyua a mba ve yer Un cii.” (Pasalmi 145:18) Aluer se mba eren msen hen a na hanma shighe yô, ijende yase vea na kpa ia hemba taver cii.

“TER ngu ikyua ikyua a mba ve yer Un cii.”Pasalmi 145:18

Aôndo soo u wasen we.

Yesu yange kaa ér: “Ka an or je nan lu ken a ven u aluer wan u nan á sôn nan bredi, nana gema á na un iwen ase? Shin una sôn ishu yô, nana gema á na un iyô ase? Aluer ne mba ne lu mbaaferev je kpaa ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un, akaa a dedoo ga yee?” (Mateu 7:9-11) Sha kpôô yô, Aôndo soo ér se eren msen hen a na sha ci u ka un a koson se ye. (1 Peteru 5:7) A soo ér we u ôron un mbamzeyol ou. Bibilo kaa a vese ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.”Mbafilipi 4:6.

Uumace mba a isharen i civir Aôndo.

Mbafantakerada mba timen sha aeren a uumace kav nahan ér, ior umiliôn uderi uderi nenge ér gba u vea eren msen. Mbatan akperan sha kwagh u mlu u Aôndo kua mbanyiman Aôndo mbagenev je kpa nenge kwagh ne nahan. * Kwagh ne tese wang ér yange i gba uumace a isharen i civir Aôndo. Yesu yange pase er i saren uumace u kuren mgbe ve u ken jijingi ne yô. A kaa ér: “Saan mba ve lu mbaibanave ken jijingi la iyol.” (Mateu 5:3) Gbenda môm u kuren mgbe ne yô, ka u lamen vea Aôndo hanma shighe cii.

Aluer se er msen hen Aôndo er a kaa ér se er nahan yô, ka mbamtsera mba nyi se zua a mi?

^ par. 8 Mbatôvon sha akaa mba hen Pew Research Center pase ken kwaghtôvon ve u ken inyom i 2012 la ér, iorov 11 ken hanma iorov deri mba ve nyiman Aôndo shin ve te akperan sha kwagh u Aôndo mba ken tar u Amerika mba eren msen kwa môm shin kwa har ken uwer.