Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Novemba 2015

 ITINEKWAGH I TAMEN | KA A INJA U EREN MSENEE?

Ior Mba Eren Msen sha Ci u Nyi?

Ior Mba Eren Msen sha Ci u Nyi?

“Do u gbidyen yange ya tor ken mo. Yange m er msen mer ikyôr i lagham me ya do. Kpa mayange m ya ga.”—Mkaanem ma Samuel, * orgen ken tar u Kenya.

“Yange sea eren msen sha makeranta yô, i lu di u kimbir mbamsen mba i tese se se fe la tseegh.”—Mkaanem ma Teresa, kwase ugen ken tar u Philippines.

“Ka m er msen shighe u m tagher a mbamzeyol yô, m zamber a Aôndo mer a dem asorabo am shi a wasem me lu Kwasekristu u dedoo.”—Mkaanem ma Magdalene, kwase ugen ken tar u Ghana.

Mkaanem ma Samuel man Teresa kua Magdalene man tese ér ior mba eren msen sha atôakyaa wue wue, shi atôakyaa agen ka a hemba lun a inja a agen. Ior mbagenev ka ve er msen sha akaa a a dugh ve ken ishima yô; mbagen di msen ve ka a tese ér kwagh u ve ôron la due ve ken ishima ga. Nahan cii kpa, aluer ior mba eren msen ér vea ya ikyaren shin kwe bolough ve u hemba shin Aôndo a wase icombor ve, shin sha atôakyaa agen wue wue kpa, kwagh ne tese ér ior umiliôn imôngo nenge ér ka a inja u eren msen. Jighilii yô, kwaghtôvon tese ér mbagenev mba ve ze adua ga je kpa mba eren msen hanma shighe.

We kpa u eren msene? Wea eren yô, ka sha ci u nyi? A lu ikye you u eren msen shin wea eren ga kpa, alaghga u pine wer: ‘Sha mimi yô, ka a inja u eren msenee? Or ongo msen wam je he?’ Orngerenakaa ugen pase mnenge na ér, msen ka di “gbenda ugen u keren wer i saan we shin ishima tsô . . . inja er u lamen a ma zendenya u hen ya nahan.” Mbamzough mbagenev mba nengen sha kwagh u twersôron kpa mba a mnenge ne, ka ve yila msen ér ka “gbenda ugen u keren wer u zua a sooki.” Nahan ior mba ve eren msen la mba gbe eren tsô ér hingir ikye ve, shin ér i lu ve iyol guda tseegh tsô shinii?

Bibilo gema tese ér msen u eren hemba di u nôngon a mnyoon tseegh tsô la. Bibilo pase se ér or ngu u nan ongo mbamsen mba se eren sha mimi se sônon akaa a vough la yô. Ka mimii? De se nenge akaa a a tese ér ka mimi yô.

^ par. 3 I gema ati agen.