Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Setemba 2015

U Fa Kpa?

U Fa Kpa?

Sha ayange a i ngeren Bibilo la, i dughun ior ake sha ci u nyi?

Orashiria ngu eren ér i kundu or u i dugh un ake ne iyol

Sha ayange a i ngeren Bibilo la, i dugh or ake sha u tsahan nan. Shi shighe ugen a za kôr or ken uitya shin a kôr or kpan yô, i dugh nan ake.

Tindi u ikyuryan la yange na ian ér or u i dugh nan ake nana nyôr nongo a ior mba Aôndo ga. (Duteronomi 23:1) Sha nahan yô, ikyav cuku tsô kpa tese ér ma Oriserael shin shiror u ken tar la môm kpa yange i dugh nan ake ér nana er tom ken ya u ma tor u Iserael ga.

Tindi yange na ian ér i tsôngon ikpan, kpa i de dughun kpan ake ga. Nahan kpa, akuraior a fan Aôndo ga a a kase Mbaiserael la lu a ieren ne. Akuraior ne yange aa za hemba ikyurior igen ityav yô, a kôr mbayev, a dugh mbagenev ake.—Yesaia 56:3, 4.

Er nan ve mbakuranilev mba sha ayange a i ngeren Bibilo la paven iyôngo kposo a ivo?

Shighe u Yesu lu ôron kwagh u ijir i a va ôr tar ken hemen la, a kaa ér: “Zum u Wan u or Una va sha iengem Na” yô, “Una pav [ior] kposo er orkuranilev ka nan pav iyôngo a ivo nahan.” (Mateu 25:31, 32) Mbakuranilev yange ve pav uzendenya mban sha ci u nyi?

Jighilii yô, yange i due a ikyum i iyôngo man ivo atetan, nahan i de uzendenya mban cii ve yaan toho imôngo. Tugh a ilen yô, i hide a ilev mbin ken ityôr sha u palegh inyamkyume man mbaiv kua mndolom. (Genese 30:32, 33; 31:38-40) Ivo ngi nenge num kpishi kpa iyôngo yô, ngi fe nôngon num ga. Nahan yange i pav iyôngo a ivo, i nyôr a iyôngo ken ityôr igen kposo a ivo, sha er ivo ia bula iyôngo ga yô, hemban je yô ungômbaiyôngov man ônov­mbaiyôngov. Takerada ugen kaa ér orkuranilev shi yange nan pav iyôngo a ivo sha shighe u ilev mbin mbi lu “unden yô, man shighe u kamen mbi atumba kua sha shighe u tôndon mbi aive.” Sha nahan yô, ikyav i Yesu tese ne lu sha akaa a ior mba ken tar u Iserael u tsuaa la vanden nengen shin eren yô, sha ci u iyôngo man mbakuranilev lu ken tar la kpishi.