Sha ayange a tsuaa la je, ior hii u lun a ishimaverenkeghen i doon tsung ér vea va hide a lu agumaior shi vea lu gbong gbong shi vea lu uma gbem sha won. Kpa kwagh er vihi yô: Ka u se cii se kpe. Mkaanem ma Yobu ma i tee sha heen, ma yange ôr anyom a kar i hembe dubu utar hegen ne ma kuren sha mi nyian kpaa.

Hanma orumace yô, ka i sar nan tsung u lun uma gbem sha won. Bibilo kaa a vese ér Aôndo wa mtsôr ken asema ase. (Orpasenkwagh 3:11) Er i lu nahan yô, u nenge wer Aôndo u lun a dooshima una wa isharen ken avese i se fatyô u kuren i ga yôô? Aluer mlumun wou ka ei yô, u kaa vough. Mkaanem ma Aôndo yila ku ér orihyom shi ma tôndo zwa ér a va ‘tim ku kera.’—1 Mbakorinte 15:26.

Ku ka orihyom wase je ka u henen a hen ga. Orumace u lun a mkav u nana soo ku je kpa nan ngu ga. Kwaghbo ka una penda ishigh u van sha a vese yô, ka se palegh shin se yer gayô se yevese. Shighe u se gbe angev yô, ka se ker gbenda u angev asev mbua bee yô. Ka se er hanma kwagh u se fetyô cii sha er se palegh akaa a a na se kpe la yô.

Ma ityôkyaa ngi i se fatyô u nan jighjigh ser a va tim ku u u lu tse orihyom wase ne kera? Een, ityôkyaa ngi. Yehova Aôndo u a gbe se la gba uumace ér ve tsaan anyom kpuaa tseegh maa ve kpeen ga. Yange ku lu ken awashima na sha hiihii la ga. Yange wa ishima ér uumace ve lu uma sha tar gbem sha won, shi ka una wa shima u eren kwagh yô, a er kwagh shon kpee je.—Yesaia 55:11.

Nahan a va tim ku kera nena? Sha ayange a tsuaa la je uumace hii u nôngon ér vea kera kpeen ga, kpa ve fatyô ga. Sha ayange ase ne kpa ve de ga. Mbatimen sha akaa er mcimbim shi due a igbenda i sôron twer atô kposo kposo i i been iangev mbigenev yô. Ve tôv ve fa er uma ka a hii ken awambe la cica cii. Sha ajiir kpishi nyian ior ka ve tsa sha won i hemba ayange a ior mba ken anyom deri a karen ne tsaan sha won la. Nahan cii kpa, ku ngua bee ga. Bibilo kaa ér, “ve cii . . . ka shin vuulevu kpaa vea hide ye.”—Orpasenkwagh 3:20.

Loho u dedoo u u lu sha kwagh ne yô, doo u se suur sha kwaghfan u uumace ve har sha mi u keren gbenda u been a zayol u a hii i lu kwagh u nyian a mi ga ne la ga. Yehova vande eren gbenda u a fatyô u yiman se sha ikyav i ku yô, man ka Yesu je gbenda la u har sha a na ye.