Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Mei 2015

 ITINEKWAGH I TAMEN | U SOO U HENEN BIBILO?

Doo u U Hen Bibilo sha Ci u Nyi?

Doo u U Hen Bibilo sha Ci u Nyi?
  • Ityôkyaa i se lu uma jim yô ka nyi?

  • Er nan ve ior ve ye ican shi ve kpene?

  • Uma una va lu nena ken hemene?

  • Kwagh gba Aôndo a mo je he?

Ka u pine iyol you mbampin er mbara nahanaa? Wea henen sha ve yô, ka we tseegh ga. Ior kpishi sha tar mba pinen mbampin sha akaa a vesen a a tsum ve ken uma yô. U fatyô u zuan a mbamlumun kpa?

Ior umiliôn imôngo vea lumun ér, “Een!” Sha ci u nyi? Sha ci u ve zua a mbamlumun ken Bibilo mba kuman ve sha mbampin vev. U soo u fan kwagh u Bibilo i kaa yôô? Wea soo yô, u fatyô u zuan a iwasen sha tom u henen Bibilo a ior gbilin u Mbashiada mba Yehova ve eren la. *

Ka mimi, ka wea kaa a or wer ne time ken Bibilo yô, mbagenev ve kaa ér: “M ngu gbilin ga,” shin “Bibilo taver u kaven yum,” shin “Ishima ngim sha kwagh u u m soo u eren yô.” Kpa mbagenev nenge Bibilo nahan ga. Ka ve lumun ian i henen kwagh u Bibilo i tese la. Nenge ase iorov kpuaa mba ve er nahan yô:

  • “M za adua u Fada man u Mbaprotestanti man u Mbasikhi kua u Mbabuddha, shi m hen kwagh u kwaghaôndo ken yunivasiti kpaa. Kpa m zua a mbamlumun sha mbampin mba m lu a mi sha kwagh u Aôndo la ga. Yange igen la kwase u a eren kwaghaôndo u Mbashiada mba Yehova yô va hen ya wam. Mbamlumun mba na ken Bibilo la doom kpishi, nahan m lumun mer a hen Bibilo a mo.”—Mkaanem ma Gill, kwase u ken tar u Ingila.

  • “Yange m lu a mbampin kpishi sha kwagh u uma, kpa mbamlumun mba pastô wam nam la kumam ga. Nahan kpa, Orshiada u Yehova ugen nam mbamlumun sha mbampin av ken Bibilo. Hide pinem aluer m soo u seer fan yô, maa m lumun a ishima i môm.”—Mkaanem ma Koffi, or u ken tar u Benin.

  • “Yange sarem tsung u fan kwagh u ka a er or shighe u nan kpe la. M na jighjigh mer mbakpenev vea fatyô u eren mbaumav kwaghbo, kpa shi m soo u fan kwagh u Bibilo i kaa yô. Nahan m hii u henen Bibilo vea ijende yam i i lu Orshiada yô.”—Mkaanem ma José, or u ken tar u Brazil.

  • “Yange mea nôngo mea ôr Bibilo kpa m fatyô u kaven ga. Yange igen yô, Mbashiada mba Yehova va va tam iwanger sha akaaôron a profeti agen ken Bibilo wang. Nahan m soo mer ve za hemen, alaghga me seer fan akaa agen.”—Mkaanem ma Dennize, kwase u ken tar u Mexico.

  • “Yange m hen mer shin kwagh gba Aôndo a mo je-o. Nahan m er msen hen Aôndo u Bibilo i lu takerada na la. Kpernan maa Mbashiada va kemam uwegh sha hunda, maa m lumun mer ve hen Bibilo a mo.”—Mkaanem ma Anju, kwase u ken tar u Nepal.

Akaa a ior ve ôr sha heen ne umbur se mkaanem ma Yesu man, a kaa ér: “Saan mba ve lu mbaibanave ken jijingi la iyol.” (Mateu 5:3) Sha kpôô yô, mlu u uumace cii tese ér gba u vea fa Aôndo. Kpa ka Aôndo tseegh una fatyô u pasen uumace kwagh na ye, man a er kwagh ne ken Bibilo i i lu Mkaanem nam la.

Nahan ka i hen Bibilo nena? Bibilo i henen ia wase u nena? Se zua a mbamlumun sha mbampin mban ken ngeren u a dondo ne.

^ par. 8 Bibilo tese ér Yehova ka iti i Aôndo.