Ior kpishi fa Mbashiada mba Yehova sha tom ve u pasen kwagh ken igbar la. Kpa u gema u fa er se lu eren tom u henen Bibilo a ior sha tar cii kpa?

Ken inyom i 2014 la, Mbashiada mba hemban 8,000,000 ken ityar 240 hen Bibilo a ior zulum iyenge 9,500,000 ken hanma uwer. * Sha kpôô yô, iyenge i ior mba ve lu henen Bibilo a vese hegen la, hemba iyenge i ior i ken ityar i kuman er 140 nahan!

Hanma inyom yô, Mbashiada mba Yehova ka ve gber Ubibilo kua ityakerada man umagazin man ityakerada igen i wasen ior u henen Bibilo, i kohol cii i nôngo u kuman ukôpi biliôn môm man tiôn, ken ijô i kuman er 700 nahan, sha u eren tom ne a mi! Ityakerada i gberen i Mbashiada mba Yehova ve hembe sha tar cii la na yô, or ka nan hen Bibilo ken zwa u nan soo cii.

Ka i hen Bibilo a or nena?

Ka se hen Bibilo a or sha atineakaa a Bibilo i er kwagh sha mi yô, nahan se time sha avur a Bibilo a a er kwagh sha ma itinekwagh i se lu timen sha mi vea nan la. Ikyav i tesen yô, Bibilo na mbamlumun sha mbampin er mban nahan: Ka an nan lu Aôndo? Aôndo ngu nan jimi? Ngu a iti jee? Ka han a lu? Se fatyô u kporom hen a na je he? Kwagh u a lu ican ken mbampin mban yô, ka u fan ape zuan a mbamlumun ken Bibilo la.

Ka se wase ior u zuan a mbamlumun ken takerada u lun peeji 224, u i yer ér Bibilo Tese Ér Nyi Jimi? la. * I er takerada ne ér u wase ior u kaven atesen a Bibilo a i gbe u vea hii fan la. Ngu a atineakaa a sha kwagh u Aôndo man Yesu Kristu man ican i uumace ve lu yan la man mnder u shin ku man msen kua atineakaa agen kpishi.

 Ka hanma shighe a fatyô u henen Bibilo a oro, man a lu hana?

Ka shighe u u tsough man ijiir i u soo la a hen Bibilo a we her ye.

Ka i tema i hen Bibilo a or i kuma miniti ume?

Ior kpishi ka ve ver ihwa jimin shin i hemba nahan hanma kasua sha u henen Bibilo. Kpa ka i geman shighe la. Se fatyô u geman shighe ne zum u i gbe u u er kwagh ugen hen shighe u u ver la yô. Mbagenev mba henen Bibilo miniti 10 shin 15 tseegh ken hanma kasua.

Ka i kimbi nyi sha kwaghhenen laa?

Kwaghhenen la man ityakerada i se henen kwagh a ior ker la cii ka gbilin. Se mba eren nahan sha u dondon kwaghwan u Yesu wa mbahenen nav ne, ér: “Ne ngohol gbilin, na nen di gbilin kpaa.”—Mateu 10:8.

Ka i hen Bibilo a or ayange ame?

I ver ikighir ga, kape u soo u henen za kighir la cii. Takerada u Bibilo Tese Ér Nyi Jimi? la ngu a atineakaa ker 19. U fatyô u henen ma ityough shin mtom ma ma lu ker la cii ken ayange a u fetyô la.

A gba u me hingir Orshiada u Yehova?

Ei. Ka se na hanma or icivir sha ian i nan lu a mi u tsuan kwagh u nan soo u nan jighjigh a mi yô. Nahan kpa, ior mba ve henen akaa a i gbe u vea hii fan ken Bibilo la, vea fatyô u tsuan kwaghaôndo u mimi.

 Ka han me seer fan kwagh u Mbashiada mba Yehova?

Ijiir i sha Intanet i jw.org la tese akaa a Mbashiada mba Yehova ve ne jighjigh a mi la kua ityom i ve eren la vighe vighe.

Me er nan ve me zua a or u henen Bibilo a mo?

• Za nger pine sha Intanet hen ijiir i www.jw.org/tiv la.

• Za nger sha adereshi u a lu sha peeji u sha uhar u magazin ne tindin a mi hen afishi a branci a a lu ikyua a ijiir you la.

• Lam a “Mbashiada mba Yehova” mba ve lu hen ijiir you la. ▪