Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Maaci 2015

Noov—Eren Nen a Kasev Enev Er a Saan Ve Iyol Yô

Noov—Eren Nen a Kasev Enev Er a Saan Ve Iyol Yô

KA NYI nahan i doo u or a er sha ci u mkpeyol u kwase u nana? Ior kpishi vese hen ijiir i i nengen ér kwagh u vesen u i gbe u nom nana er sha ci u tsombor u nan yô, ka u wasen tsombor u lun a kwagh ave yô. Nahan cii kpa, kasev mba ve lu a uyôughyôughmbaakaav la je kpa ka saan ve iyol ga, shi ka ve cian gighir gighir je kpaa. Ikyav i tesen yô, kwase ugen ken tar u Ishpania u i yer un ér Rosa yô, ôr kwagh u orgen u yange vôso yô, kaa ér “Yange una due hen ya yô, a tese ieren i doon ior, kpa una hiden hen ya yô, a lu nom u vihin inja je i zua ga.” Shi kwase ugen ken tar u Najeria u i yer un ér Joy yô, kaa ér, “Yange mea lumun a kwagh u orya wam a soo ga yô, a kaa a mô ér ‘gba u me eren hanma kwagh u un kaam cii, sha ci u un ngu nomom.’ ”

Or a er tom u nan u nom la sha dooshima nena? Ka nyi nom nana er ve ya u nan una lu saan saan, nahan kwase u nan nana zua a “mmem” here?—Rutu 1:9.

KWAGH U BIBILO I ER SHA KWAGH U TAHAV MBU NOM NAN LU A MI LA

Er nom man kwase ve lu kwaghmôm sha ishigh ki Aôndo nahan kpa, Bibilo kaa ér hanmô ve nan ngu a tom u i gbe u nana eren hen tsombor yô. Mbaromanu 7:2 kaa ér, kwase u nan er nom yô, i kange nan sha “tindi vea nom.” Aôndo tsua nom ér nana lu ityough sha kwase u nan, vough er mbamzough kpishi kpa ka i tsua or u nana lu ityough sha akaa a i eren kimi la nahan. (1 Mbakorinte 11:3) Gba u noov vea hemen hen uya vev.

Ne noov, ne er tom a tahav mbu Aôndo a ne ne la nena? Bibilo kaa ér “kasev enev ve̱ doo ne asema di er Kristu kpaa, nongo Na u doo Un ishima” nahan. (Mbaefese 5:25) Shin er Yesu er kwase ken uma na ga nahan cii kpa, ikyav i Kristu a ver la ia wase u u lun nom u injaa. De ase se nenge.

YESU VER NOOV IKYAV I VOUGH

Yesu keren ér ior ve zua a mmem shi ikyav mbi heghem ve. Yesu yange tôndo zwa a mba i lu kighir ve a ican shi ve tôô ikyav ken ishima kpishi la ér: “Va nen her a Mo, . . . Mo me na ne mmem.” (Mateu 11:28, 29) Ashighe kpishi yange a pande ior ican i sha iyol shi a wase ve u kporom ikyua a Yehova. Ka nahan ve ior kpishi mba ve na jighjigh ér Yesu una heghem ve ikyav yô, yange ve zaan ikyua a na ye!

Er noov vea dondo ikyav i Yesu ne yô. Nôngo fa akaa a u eren a kwase wou ve ikyav mbia heghem un yô. Ka i lu kasev mbagenev er Rosa vaa iyol nahan, ér: “Yange nomom eren a mo vough er m ngu kpan na u kwase nahan.” Orgen u kwagh na a kaha  kposo, i yer un ér Kweku, u ivese na i doo yô, kaa ér: “Ka m shi pinen kwase wam er me wase un ikyav yô. Sha ci u a doom ishima, shi ka m tsua u wasen un ityom i hen ya kpaa.”

Yesu yange waan ior ikyo shi zungwen a ve imôngo. Icankwase ugen yange ya ican a angev mbu vihin tsung anyom 12. Er ungwa akaa a kpiligh iyol a Yesu lu eren sha ivande la yô, “A kaa er: Aluer mea bende shin akondo Na tseegh tsô kpaa, me war je.” Kwagh u ôr ne lu mimi. Er za ikyua a Yesu yô, a bende a ikyondo na maa angev nav mbura bee. A shi nan kpa mbagenev yange vea kaa ér kwase ne er kwagh la sha igbongor, kpa Yesu yô nenge ér sar kwase ne tsung u zuan a iwasen. * Nahan a kaa a na sha imo i kundu kundu ér: “Wankwase, . . . angev ou mbu̱ bee u.” Yesu yange palegh u heen kwase la shin puun un sha ieren na la tseegh tsô ga, kpa tese ér un fa ican i a ye a angev mbura yô. Sha nahan yô, a tese inja or i un lu yô, lu or u zungwen a mba ican i tser ve la imôngo.—Marku 5:25-34.

 Er noov vea dondo ikyav i Yesu ne yô. Shighe u i shi kwase wou iyol yô, tese un wer u wa ikyo sha zayol na la tsung, shi wa ishima a na. Nôngo u nengen a akaa a a lu ôron we la, shi fa er a lu eren kwagh hen shighe u i doo un iyol ga la yô. Ikyav i tesen yô, orgen u i yer un ér Ricardo yô, kaa ér, “Kwase wam ka una hingir ishima mgbar mgbar yô, m nôngo sha afatyô wam cii m palegh u ôron un akaa a aa na ishima a seer vihin un yô.”

Yesu yange lamen a mbahenen nav. Yesu yange a lam vea azende a na sha akaa kpishi. Yange kaa a ve ér, “Akaa a M ongo hen Terem cii, M ôr ne a.” (Yohane 15:15) Ka mimi, ashighe agen Yesu yange a soo u lun tswen sha er una hen sha kwagh shi una er msen yô. Kpa ashighe kpishi yange a lu vea mbahenen nav, a pasen ve akaa a a henen sha mi yô. Hen tugh mbu Yesu mbu masetyô shin tar ne mbu i kure un ijiir i kuugh la, a pase mbahenen nav wang ér ‘ishima vihi un tsung.’ (Mateu 26:38) Zum u azende a Yesu er kwagh u van un ahenge je kpa, a de u lamen a a ga.—Mateu 26:40, 41.

Aluer or ngu gbidyen kwar sha ikyav i Yesu a ver se la yô, kwagh la una wase nan nana hemba lun nom kua ter u injaa

Er noov vea dondo ikyav i Yesu ne yô. Pasen kwase wou akaa a u lu henen sha mi, man er i lu u ken ishima la. Alaghga kwase ugen nana kaa ér ka a lu ken igbar yô, nomom a lamen a ior sar sar, kpa una hiden hen ya yô, a nyôr ijôv. Kpa nenge ase er ka i lu kwase ugen u i yer un ér Ana yô ken ishima zum u nom na a pase un ishima na yô, a kaa ér “Ka m nenge mer m doo nomom ishima sha mimi, nahan m tôô mer m ngu a na kôôsôô.”

Zum u ishima i vihi u a kwase wou yô, de gbe num a na wer a hen kwaghfan ga. Kwase ugen kaa ér “Yange ishima a doo nomom a mo ga yô, a venda u lamen a mo ayange imôngo. Yange a er ishima i nam ibo shi i lum er m gba kwagh ga nahan.” Kpa orgen u i yer un ér Edwin yô, ka a nôngo u dondon ikyav i Yesu. A kaa ér, “Ishima ka ia vihim a kwase wam yô, m er kwagh a na gagh ga, kpa ka m ker shighe u i doo u se lam sha zayol shon yô.”

Joy u se vande teren mkaanem nam ken ngeren ne la, nenge a akaa a nom na a de u eren er a lu henen Bibilo vea Mbashiada mba Yehova hegen ne yô. A kaa ér, “Nomom seer doon inja shi ngu nôngon kpoghuloo ér una dondo ikyav i Yesu, sha er una lu nom u soon kwase u nan yô.” Kwaghwan u Bibilo ne ngu wasen noov man kasev umiliôn imôngo. We kpa u soo wer kwaghwan u Bibilo a wase u wee? U fatyô u kaan a Orshiada u Yehova wer nana hen Bibilo a we gbilin.

^ par. 10 Tindi u Mose la tese ér kwase la lu wang ga, nahan lu u or a bende a na yô, nan kpa nana kera lu wang ga.—Levitiku 15:19, 25.