Tar ne ua fatyô u lun sha ikyev i gomoti môm je kpa?

Gomoti u tar cii la una er akuraior a sha won cii aa lu ken mzough nena? Yesaia 32:1, 17; 54:13

Hen er gomoti u tar cii la una wase uumace yô. Nyian ne, ior kpishi mba yan ican sha ci u ibanave, mbagenev gema mba a inyaregh kpishi. Kpa gomoti u tar cii, u mhôônom ma ker un a ior la yô, una nenge ér hanma or nan zua a kwagh u a gbe nan yô. U hen wer uumace vea fatyô u veren imba gomoti laa?Ôr Yeremia 10:23.

Hii sha ayange a tsuaa la je, ugomoti mba uumace ker igbenda kposo kposo ér vea nenge sha ior vev, hemban cii je yô mbaibanave, kpa ve kan shio. Ugomoti mbagenev ka ve er a ior caveraa kpishi. (Orpasenkwagh 4:1; 8:9) Aôndo Uhembanagee la tôndo zwa ér una ver gomoti u una kar a tile sha ityough ki ugomoti mba tar ne cii yô. Orhenen u gomoti la una nenge sha ior mba a hemen ve la sha mimi.Ôr Yesaia 11:4; Daniel 2:44.

Tartor u Aôndo ua er nyi?

Yehova Aôndo tsua Orhemen u a lu a mshi ken a na ga yô, ka Wan na Yesu je la. (Luka 1:31-33) Shighe u Yesu lu shin tar la, a wase ior sha gbashima. Er a lu Tor hegen ne, una va er akuraior a sha won cii a a lu ken mzough shi una bee a ican i yan elegh elegh.Ôr Pasalmi 72:8, 12-14.

Ka ior cii vea lumun ér Yesu a lu Orhemen ve yee? Ei. Kpa Yehova ngu wan ishima a ve. (2 Peteru 3:9) A na ior ian i lumun Yesu ér a lu Orhemen ve. Ica ia gba ga tsô, Yesu una kar a udangmbaiorov kera shi una va a bem man mkpeyol sha tar cii.Ôr Mika 4:3, 4.