Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Maaci 2015

 ITINEKWAGH I TAMEN | GOMOTI U A EREN ANYIGHE GA LA

Tartor u Aôndo—Gomoti U A Eren Anyighe Ga La

Tartor u Aôndo—Gomoti U A Eren Anyighe Ga La

Zum u akawe u tamen u a ngeren akaa a gomoti u tar u Nicaragua a vihin inyaregh sha mi cii la lu pasen er i hii ve un nenge ér gbenda ngu u a fatyô u been a anyighe u gomoti ga yô, a kaa ér: “Mbatomov mba gomoti ka ve lu marnya u tar ve, man se cii ka kwagh u tar u eren la ka se eren ye.”

U nenge wer aluer anyighe ya tor ken uumace yô, hanma gomoti u uumace cii una er anyighe ga zee? Aluer ka kwagh u a lu la yô, saa a lu gomoti u uumace ga una hemen ve anyighe a lu ga ye. Bibilo yila gomoti la ér, Tartor u Aôndo, ka gomoti u Yesu yange kaa a mbahenen nav ér ve sônon ken msen la.—Mateu 6:9, 10.

Tartor u Aôndo ka gomoti kpôô kpôô, u a lu hemen sha yô. Una kar a ugomoti mba tar ne cica cii kera. (Pasalmi 2:8, 9; Mpase 16:14; 19:19-21) Kwagh u dedoo ugen u Tartor la ua er sha ci u uumace yô, ua kar a anyighe u gomoti kera. Nenge ase akaa ataratar a sha kwagh u Tartor la, a a tese ér ua er kwagh ne kpee yô.

1. TAHAV

MZEYOL: Hanma gomoti u uumace cii ka i lu ior mba a hemen ve la ve suen un sha inyar ye, man ashighe kpishi ka i lu sha kpandegh ku tan man akaa agen a i kimbin gomoti inyaregh sha mi yô. Mbatomov mba gomoti ka vea nengen a inyaregh kin yô, i lu pe iin, shi mbagenev ve ngohol ingyatu hen ior mba ve soo ér gomoti a pande ve kpandegh, shin inyaregh ki ve kimbin gomoti sha akaa agen la. Ka a keren gbenda u been a zayol ne yô, kwagh a hemba vihin gban a gba kera, sha ci u gomoti ka a seer kpandegh sha er una hide a zua a kwagh u a saa la yô. Kpa kwagh ne ngu a na yô, mbatomov mba gomoti ve hemba eren anyighe cii. Ken tar u kwagh a lu nahan yô, a lu ior mba ve eren kwagh sha mimi la vea hemba yan ican ye.

KWAGH U UNA BEE MZEYOL NE YÔ: Ka Yehova, Aôndo uhembansha la a ne Tartor u Aôndo tahav ye. *  (Mpase 11:15) Tartor la ngu ngohol kpandegh ve u eren akaa ga. “Mtaver u tahav” mbu Aôndo kua ieren na i nan ior kwagh mgbeghaa la ia na yô, Tartor la ua kure isharen i hanma or u nan lu sha ikyev i u cii.—Yesaia 40:26; Pasalmi 145:16.

2. ORHEMEN:

MZEYOL: Kwase u i yer un ér Susan Rose-Ackerman, u se vande teren mkaanem nam ken ngeren ugen la kaa ér, aluer i soo u karen a anyighe kera yô, a gba u a hii tan ityav sha “mba ve lu sha ahenga” a gomoti la je. Ugomoti ka ve keren ér udasenda shin mbakangen iyav mba ve nengen sha ikyav mbi i nyôron a mi ken tar ve la ve de anyighe, kpa mbatomov mba gomoti mba tagher tagher yô, ka vea eren anyighe kpa kwagh gbe gomoti sha mi ga, nahan ior kera na gomoti jighjigh ga. Shi aluer ma orhemen tar nan ngu eren akaa sha mimi nan nan kpa, nana fatyô u eren kwagh u vough za been ga. Bibilo kaa ér “orperapera môm u shin tar u nan eren kwagh u dedoo nan eren isholibo ga, nan ngu ga.”—Orpasenkwagh 7:20.

Yesu venda ingyatu i hemban cii, i i gbe je or lu a na orgen ga yô

KWAGH U UNA BEE MZEYOL NE YÔ: Yesu Kristu u Yehova a tsough un ér a lu Orhemen u Tartor la, una fatyô u gban ken imeen i eren kwaghbo er uumace nahan ga, sha ci u ngu or u vough, kpa uumace yô mba vough ga. Yesu tese kwagh ne wang shighe u venda ingyatu i hemban cii, i i gbe je or lu a na orgen ga yô, ka “ityartor i sha won cii kua icivir i i” je la. Yange i tôndo zwa ér a na un kwagh ne, aluer a er kwagh môm tseegh u tesen ér a sue mcivir u aiegh sha u civir Diabolo, u a lu tor u tar ne la yô. (Mateu 4:8-10; Yohane 14:30) Shighe u i lu eren Yesu ican zan zan i za kar wuan un la je kpa, yange kange ishima u tilen sha mimi her je venda u ngohol icigh ki ma ki pande un mnyoon, kpa ma ki na un ma hingir humeen yô. (Mateu 27:34) Hegen er Aôndo a yem a Yesu sha, a za ne un uma u yange vande lun a mi sha ne, Yesu tese wang ér un kuma u lun orhemen u Tartor la.—Mbafilipi 2:8-11.

3. HEMEN U TENGER GA

MZEYOL: Ityar kpishi ka i eren asangen sha ashighe ashighe, a ka i lu ian i ior ma ve zende mbahemenev mba gomoti mba ve eren anyighe la sha ikyôn kera, kpa i lu nahan keng ga yô. Jighilii yô, ka i er anyighe sha shighe u keren ishangen man shighe u haan i la, ken ityar i i lu a kwagh ave kpishi la je kpaa. Inyaregh ki ka i kohol kua akaa a ka i eren sha shighe u keren ishangen la ka a na yô, mbanyarev ve zua a ian i kighir mbakeren asangen mba ve soo u lun sha ikyôn her la kua mbagenev mba ve lu a vande yan ishangen ga la kpaa.

Loya ugen u i yer un ér John Paul Stevens, u a yaren hen Atejir u Tamen u tar u Amerika la yô, nger ér mkighir la ka a vihi “gomoti kua atindi a na shi ior ve kera na gomoti kua atindi shon jighjigh ga.” Sha nahan yô, se fatyô u kaven er i hii ve sha tar cii ior ve nenge ér ka mbapatii ve hembe eren anyighe yô.

KWAGH U UNA BEE MZEYOL NE YÔ: Tartor u Aôndo ua lu gomoti u tenger ga, ua hemen gbem sha won, nahan kwagh u ishangen i keren kua ishangen i iin cii una kera lu ga. (Daniel 7:13, 14) Er i lu Aôndo iyol na a tsough Orhemen u Tartor la yô, ityôkyaa ngi i uumace  vea haa un ishangen ga, shi vea fatyô u dughun un tor kera kpaa ga. Mtenger u Tartor la u tenger ga la ngu a wase u u̱ nengen ér hanma kwagh u ú tsough u eren cii yô, ka u una wase ior gbem sha won yô.

4. ATINDI

Tartor u Aôndo ka gomoti kpôô kpôô, u a lu hemen sha yô

MZEYOL: Gomoti ka una due a atindi a he yô, alaghga sha hiihii la ka u hen wer aa fatyô u sôron kwagh. Nahan kpa, mbatimen sha akaa nenge ér ashighe kpishi ka a seer atindi yô, ior ve hemba zuan a ian i eren anyighe cii. Shi kwagh ugen yô, ashighe kpishi ka i vihi inyaregh kpishi sha u keren gbenda u ior vea kura atindi a i we sha u panden anyighe la yô, kpa i kura atindi shon sha ikyo ga.

KWAGH U UNA BEE MZEYOL NE YÔ: Atindi a gomoti u Tartor u Aôndo la nga vough hemba atindi a ugomoti mba uumace yem zende zende. U tesen ikyav yô, Yesu yange wa atindi sha akaa kpete kpete ga, kpa ôr kwagh u a lu tindi u doon tsung yô. A kaa ér: “Akaa cii a i sar ne ka ior ve̱ er ne yô, ne kpaa er nen ve di nahan je.” (Mateu 7:12) U hemban cii je yô, Tartor u Aôndo ua fatyô u wan atindi sha kwagh u mhen u ken ishima kua ieren cii. Yesu kaa ér, “or u nan we ndor a we yô, nana̱ doo u ishima er we iyol you nahan.” (Mateu 22:39) Sha kpôô yô, Aôndo u a nengen ken asema a ior la una fatyô u wan ior atindi a ngara nahan.1 Samuel 16:7.

5. MBAAWASHIMA

MZEYOL: Akaa a ka a na ior ve hingir u eren anyighe yô, ka hua kua ieren i or keren mtsera u nan tseegh la. Ashighe kpishi mbatomov mba gomoti u ma tar kua marnya mba tar la ka ve tese ér mba a aeren a bo ne. Iyou i yange i yôhôr hen gar u Seoul, i se vande teren kwagh u i ken ngeren ugen la kpa, lu mbahemenev mba gomoti ngohol ingyatu hen kômpeni u i na u tom u maan i, u yange u fa dedoo je ér aluer u na mbahemenev mbara ingyatu la yô, vea kera hanger ér saa ve maa iyou shon sha ikyav mbi injaa shi ve er tom la sha gbenda u vough keng ga yô.

Sha nahan yô, kwagh u a er ve anyighe una bee yô, saa a tese ior u dughun mbaawashima mba ve ye tor ken ve u eren ambaakaa er hua shi keren mtsera ve tseegh la nahan kera. Nahan kpa, ugomoti mba u  uumace mba a isharen man tahav mbu tesen ior akaa ne ga.

KWAGH U UNA BEE MZEYOL NE YÔ: Tartor u Aôndo ngu dughun anyighe ken asema a ior kera sha u tesen ve kwagh u una wase ve vea kera lu a awashima u eren anyighe ga kuaa yô. * Ityesen ne ngi wasen ve u ‘hingir hegh ken jijingi u mhen’ ve. (Mbaefese 4:23) Mba henen u den hua shi keren mtsera ve tseegh tsô la, geman lun a ieren i kwagh kuman ve shi wan mbagenev ikyo la.—Mbafilipi 2:4; 1 Timoteu 6:6.

6. MBA GOMOTI A HEMEN VE LA

MZEYOL: Sha ajiir a hemban doon a ior ve hemban zuan a ityesen i injaa sha kwagh u aeren a wang la je kpa, mbagenev vea tsua u eren kwagh sha mimi ga shin eren anyighe. Mbatimen sha ambaakaa ne kaa ér ka ityôkyaa ne i ne ve i lu u ugomoti mba uumace vea fatyô u been a anyighe ga ye. Ugomoti ka ve hen ér vea fatyô u panden anyighe kua mvihi u ieren ne i ve a mi ken ityar ve la.

KWAGH U UNA BEE MZEYOL NE YÔ: Mkohol u Mzough u Ityar Cii, u i er sha kwagh u keren igbenda i been a anyighe la yange due a kwaghwan ér, u gomoti a ta num sha kwagh u anyighe yô, saa una tese ior “u eren kwagh sha mimi shi tilen sha mimi shi veren ikyav i mimi.” Er awashima ne a lu u injaa nahan kpa, Tartor u Aôndo ngu tesen ior ér ve lu a aeren ne tseegh tsô ga, kpa ngu tesen ér gba hange hange u mba ve lu sha ikyev i u la cii vea lu a aeren ne. Bibilo kaa ér “mbahuav” man “mbaerenaie” cii ve kuma u yan dyako u Tartor u Aôndo ga.—1 Mbakorinte 6:9-11; Mpase 21:8.

Mbakristu mba sha ayange a mbaapostoli mbara tese ér nyian kpa ior vea fatyô u kuran atindi a Aôndo ne. U tesen ikyav yô, zum u orhenen ugen u i yilan un ér Simon la nôngo ér una zua a iyua i icighan jijingi hen mbaapostoli sha inyar yô, ve venda u ngohol ingyatu na la, ve gema ve kaa a na ér: “Gema ishima sha ifer you ne kera.” Simon nengen a kwaghbo u lu ken isharen na i bo ne yô, a kaa a mbaapostoli ér ve er msen sha ci na sha er una de ifer la yô.—Aerenakaa 8:18-24.

KWAGH U OR A ER VE NANA HINGIR MARNYA U KEN TARTOR LA YÔ

Wea lu marnya u ken tar u han han kpa, u ngu a ian i hingir marnya ken Tartor u Aôndo la. (Aerenakaa 10:34, 35) Ityesen i Tartor la, i ior ve lu zuan a mi sha tar cii hegen ne, ia tese u kwagh u u er ve u hingir marnya u Tartor la yô. A saan Mbashiada mba Yehova iyol u tesen we er ka ve hen Bibilo a or hen ya u nan gbilin, ken atô u miniti mba kuman er 10 nahan ken hanma kasua yô. Aluer u hen Bibilo vea ve yô, u seer fan kwagh u “Loho u Dedoo u tartor u Aôndo” la, man er Tartor shon ua va kar a anyighe u gomoti kera yô, kua akaa agen kpaa. (Luka 4:43) Se mba kaan a we ser lam a Mbashiada mba hen ijiir you, gayô za hen ijiir yase i sha Intanet i jw.org/tiv la.

U soo wer i va hen Bibilo a we hen ya wou gbilini?

^ par. 8 Bibilo tese ér Yehova ka iti i Aôndo.

^ par. 22 Ikyav i tesen yô, nenge ngeren u ken Iyoukura (zwa Buter) i October 1, 2012, u a lu a itinekwagh ér “Is It Possible to Be Honest in a Corrupt World” la.