Iliam i i nger shin heen ne, ka iliam i alaghga Orshiada u Yehova nana lam vea orwanndor yô. Se tôô ser Orshiada u i yer un ér Brian yô, va hen orya ugen, iti na ér Eric.

BIBILO ÔR HISTERI I VOUGH

Eric: M soo u kaan a we mer m eren kwaghaôndo joo ga. Nahan m hen mer se lam sha kwagh ne kpishi ga.

Brian: Doom kpishi er u pasem nahan yô. Kpa mo mba yerem ér Brian. We di mba yer u ér ana?

Eric: Iti yam ér Eric.

Brian: Doom kpishi er m zough a we yô, Eric.

Eric: Mo kpa m zua ishigh a we nahan doom.

Brian: Kpa de m pine u yôô, yange u vese hen tsombor u i eren kwaghaôndo her yôô?

Eric: Een. Kpa yange m yemen makeranta u vesen yô, m de u eren kwaghaôndo.

Brian: M nenge nahan. U hen nyi ken makeranta?

Eric: M hen Social studies kua histeri. M soo kwagh u histeri kpishi. U fa, i ôr kwagh u mzehemen u uumace hii sha ayange a tsuaa la je.

Brian: Histeri doo tsô. Bibilo kpa u fa er i lu takerada u histeri yô ga. Ka wea tôvon sha kwagh nahan, u nenge ken Bibilo kpa?

Eric: Keng ga. M fa er Bibilo i lu takerada u dedoo yô, kpa mayange m hen mer ka takerada u histeri ga.

Brian: Ikyav tese ér u ngu or u lun a ishima i gbar gbar. Wea lumun yô nam miniti kpuaa, m soo u tesen we ikyav sha akaa kpuaa, er Bibilo i er histeri i vough yô.

Eric: Ka shami. Kpa m ngu a Bibilo ga.

Brian: OK. Me tese u ken Bibilo yam. Se hii nengen ikyav ken 1 Kroniku ityough 29 ivur 26 man 27. Avur ne kaa ér: “Kape Davidi wan u Yese lu tor sha Iserael cii la. Anyom a a lu tor sha Iserael yô, lu akunduahar; anyom ataankarahar a lu tor ken Heberon, man anyom ikundugber kar atar a lu tor ken Yerusalem.”

Eric: Nahan kwagh ne ka histeri i vough nena?

Brian: Mbanyiman akaa kaa ér ma shighe môm kpa or lu u i yilan nan ér Tor Davidi ga.

Eric: Ve kaa nahan mimii? Hii nan i taver ve u lumun ér yange luu?

Brian: Dugh Bibilo sha je kpa, ankwagh ugen ngu u a tese ér Tor Davidi yange lu kpôô kpôô yô. Ken inyom i 1993 la, mbatôvon sha akaa a mbayiase a shin inya za dugh iwen i mbayiase igen shin inya, i nger sha mi ér, “Ya u Davidi.”

Eric: Een-en, nahanaa?

Brian: Orgen u Bibilo i er kwagh na kpa i taver ior u lumun ér yange lu yô, ka Pontiu Pilatu, u lu gomna sha ayange a Yesu la. I ter iti na kua ati a mbahemenev mba gomoti mba sha ayange a na la ken Luka ityough 3, ivur 1 heen.

Eric: Een. M nenge a mi. I ôr her ér: “Pontiu Pilatu lu gomna sha Yudia, Herode gema lu tor u tetera sha Galilia.”

Brian: Vough. Taver mbafantakerada anyom imôngo u lumun ér Pontiu Pilatu yange lu or kpôô kpôô. Ken anyom 50 a karen la, i dugh iwen igen  hen haregh u tar u Iserael la, i nger iti na sha mi sha kwaghngeren u sha iyôugh.

Eric: Een-een. M ngu a vande ungwan kwagh nahan ga.

Brian: Doom kpishi u pasen we akaa ne.

Eric: Me yer u ga, ka m na Bibilo icivir mer ka takerada u ior ve nger sha kwaghfan ve yô, kpa mayange je m nenge mer ngi a iwasen sha ayange ase ne ga. Alaghga ia ôr akaa a mbayiase a vough, kpa m hen mer ka akaa a ior vea fatyô u eren hegen ga yô.

BIBILO KA TAKERADA U U LU A INJA NYIAN KPAA YÔ

Brian: Ior kpishi vea lumun a kwagh ne. Kpa mo m na jighjigh a mi ga. Ityôkyaa yô: Hii sha igbetar je, kwagh gba uumace a akaa a a lu a hange hange ken uma ve la zan zan nyian. Ikyav i tesen yô, kwagh gbe se a kwaghyan man ikyondo kua ijiir i tsan. Ka i lu se ape lamen vea mbagenev shi zuan a msaanyol hen tsombor. Sha kpôô yô, se cii akaa ne nga se a inja gaa?

Eric: Sha kpôô yô nga se a inja.

Brian: Bibilo ia fatyô u wasen se sha akaa ne cii. Alaghga se kaa ser ka takerada u tse, kpa gema ngu a inja nyian kpaa.

Bibilo ngi a akaawan a hange hange a a lu a inja nyian vough er sha ayange a i nger a la kpa lu a inja nahan

Eric: U ôr nahan u ver ishigh wer nyi?

Brian: M ngu kaan mer: Bibilo ngi a akaawan a hange hange a a lu a inja nyian vough er sha ayange a i nger a la kpa lu a inja nahan.

Eric: OK. Ngi a inja sha nyi akaa nahana?

Brian: Akaawan a Bibilo ka a wase se sha ambaakaa er u lun a mnenge u vough sha kwagh u inyar shin kwagh u se er ve a saan se iyol hen tsombor shin se lu ijende i dedoo yô. Bibilo ngi er ka ngeren u tesen or gbenda u eren hanma kwagh kuren vough nahan. U nenge nahan ga he, u tesen ikyav yô, u lun nom shin orya u injaa ken ayange ne ka kwagh u ican kpishi.

Eric: Een, m lumun a we. Mo vea kwase wam se er ivese kuma inyom môm hegen, kpa ka i taver se u gban zwa môm sha kwagh ashighe agen.

Brian: Kape ka i lu je la. Kpa Bibilo ngi a akaawan a a fatyô u wasen we sha ikyaa ne yô. U tesen ikyav yô, nenge kwagh u i er ken Mbaefese ityough 5 ne. De se ôr ivur i sha 22, 23 man 28 la. U fatyô u ôron avur shon.

Eric: Ka shami. “Kasev, ungwan nen imo i noov enev er ka Ter nahan. Gadia nom ka ityough ki kwase di er Kristu kpaa A lu ityough ki nongo Na nahan man ka Un je A lu Oryiman u iyol Na la kpaa ye.” Ivur i sha 28 kaa ér: “Kape noov kpaa, kasev vev ve̱ doo ve ishima keng er ayol a ve nahan la. Or u kwase u nan a doo nan ishima yô, ka iyol i nan je i doo nan ishima ye.”

Brian: Doo yum. M sugh u. U nenge wer aluer nom man kwase mba dondon kwaghwan u Bibilo u a taver ga ne nahan, ivese ve ia seer doon ga he?

Eric: Een, m hen nahan. Kpa zwa ngu a kuhe ga.

Brian: Mimi yô; or môm nan ngu vough za bee ga. Ken ityough kira môm Bibilo taver se ishima ér se eren kwagh sha kwaghfan. * Ken hanma ivese cii, gba u nom man kwase cii vea keghen iyol u gban zwa môm sha kwagh u ve soo u eren yô. Mo vea kwase wam se nenge ser Bibilo ia wase se u eren nahan.

Eric: Kwagh u u er la ka mimi.

Brian: Mbashiada mba Yehova mba a ijiir ve sha Intanet i i lu a akaawan a dedoo sha kwagh u ivesegh man tsombor yô. Wea lumun yô, nam miniti kpuaa, m tese u ikyav cuku tseegh i kwagh u u fatyô u zuan a mi hen ijiir ne yô.

Eric: Za hemen. M shi a miniti kpuaa.

Brian: Too. Adereshi u ijiir shon i sha Intanet la ér www.jw.org/tiv. Ka kwagh u a lu sha peeji u hiihii u ijiir shon je ne.

Eric: Ufoto mban doo u nengene!

Brian: Ka ufoto mba tesen ajiir a i eren tom u pasen kwagh u se eren sha tar cii la yô. Vegher ugen ngu hen ijiir ne, i nger her ér “Ityakerada.” Aluer u za her yô, u zua a umagazin kua ityakerada igen kposo kposo, i i lu a kwaghwan sha akaa agen kua tsombor yô. Ikyav i tesen yô, de se nenge ken antakerada  u i yer ér Loho u Dedoo U Ú Dugh hen Aôndo La! Itinekwagh igen ken antakerada ne kaa ér “U Er Nan Ve Tsombor Wou Ua Zua a Msaanyolo?

Eric: Itinekwagh la doo tsôô? M soo u zuan a mlumun sha mpin la!

Brian: Itinekwagh ne ôr akaa a aa wase u u zuan a msaanyol ken ivese you yô. Nenge ikyumhiange i sha mpin u sha 2 ne. Eric u soo u ôron ihiange i ihiar i masetyô nee?

Eric: Een. I kaa ér: “Noov man kasev ve̱ soo ayol a ve shi ve̱ naan ayol a ve icivir. Er noov man kasev cii ve yen yô, ka hange hange u vea hen ieren i den orgen a kwaghbo la, gadia kwagh ne una wase u van a msaanyol ken ivaa ve.” Hmm, m lumun a kwagh ne.

Brian: M sugh u sha takerada u u er la. I tese ken Mbaefese 5:33 kua avur agen ken ikyumhiange ne. M ngu a Bibilo yam heen, wea lumun yô ôr ivur ne.

Eric: I kaa ér, “Hanma or kwase u nan a̱ doo nan ishima er iyol i nan nahan, kwase kpaa, a̱ cia nom u nan.”

Brian: U nenge er i ôr var var ér nom shin kwase nana er a or u nan vese la er or shon nan ver ishima ér i er a nan nahan kpa?

Eric: M kav kwagh u u lu ôron la jighilii ga.

Brian: U nenge wer nom ka nan soo ér kwase u nan a na nan icivir ga he. Kape kwase kpa ka nan soo ér nom u nan a tese ér nan doo nan ishima la ga he?

Eric: Een, m lumun a we.

Brian: Aluer nom ngu eren akaa a tesen ér kwase u nan doo nan ishima yô, a hemba lun kwase la ican ga u nan nom u nan icivir.

Eric: Kwagh u u er la ka inja er una wase nahan.

Brian: I nger avur a Bibilo a se er heen ne anyom kar hegen 2,000, nahan kpa avur ne ôr akaa a i gbe u nom man kwase vea eren ken ivese ve yô, shi a due a akaawan a injaa a vea dondo ve ivese ve ia doo yô.

Eric: Sha mimi yô, Bibilo ôr akaa hemba er m hen la.

Brian: Doom kpishi er u kaa nahan yô Eric. M soo mer me vaan kwagen yô, u nam mlumun sha mpin u sha 3 u a kaa ér, “Aluer u zua a msaanyol ken ivaa you ga yô, doo u u undu orya wou shin kwase wouwee?” la. A dondo sha mpin u se vande time sha mi la, hen ijiir yase i sha Intanet la. *

Eric: Ka mimi. Me ôr u vea kwase wam imôngo.

Kwagh tsume u sha ma kwagh u Bibilo i tese yôô? Sar u u fan ma kwagh u Mbashiada mba Yehova ve ne jighjigh a mi, shin aeren a kwaghaôndo vee? A sar u yô, de cie u pinen ma Orshiada u Yehova ga. A doo Orshiada shin Kwaseshiada la u lamen a we sha akaa la kpishi.

^ par. 43 Nenge Mbaefese 5:17.

^ par. 63 Wea soo u seer zuan a iwanger yô, ôr ityough 14 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye.