Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITINEKWAGH I TAMEN | U FATYÔ U LUN IKYUA A AÔNDO

U Lamen Vea Aôndo Kpa?

U Lamen Vea Aôndo Kpa?

Ior mba ve ye ijende yô, mba lamen hanma shighe u ve fetyô cii, ka a lu sha hanseeti ga yô, ve tindin a ilyoho shin ve lamen sha Intanet gayô ve ngeren uwashika. Nahan, se kpa gba u se lamen vea Aôndo hanma shighe ve, se lu ikyua a na ye. Kpa se er kwagh ne nena?

Se fatyô u lamen a Aôndo ken msen. Nahan kpa, u lamen a Aôndo ken msen la ka er ka se lamen a ma orkwar wase nahan ga. Shighe u se lu eren msen yô, gba u se fa ser se mba ôron kwagh a Aôndo u hemban sha won cii, u a gbe se la. Nahan gba u se eren msen sha icivir man a iyolhiden ijime tsung. Kpa akaa agen nga, a i gbe u se eren ve Aôndo una ungwa mbamsen asev yô. Akaa atar ken akaa shon yô, ka a ne.

Hiihii yô, gba u se eren mbamsen asev cii hen Yehova Aôndo tseegh, a lu hen Yesu, shin ma orjighjigh, shin eev ga. (Ekesodu 20:4, 5) Bibilo pase wang ér: ‘Akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.’ (Mbafilipi 4:6) Sha uhar yô, gba u se eren mbamsen asev cii ken iti i Wan u Aôndo, Yesu Kristu. Yesu iyol na kaa ér: ‘Ma or gbe van hen Terem ga, saa nana kar her a Mo.’ (Yohane 14:6) Sha utar yô, gba u akaa a se eren msen sha mi la cii, a lu a sha ishima i Aôndo. Bibilo kaa ér: ‘Ka sea sôn nyityô kwagh u a lu sha ishima Na vough yô, A ungwa se.’ *1 Yohane 5:14.

Hanma shighe u ijende you i lu lamen vea we cii yô, ka u kegh ato, shi we kpa wea lamen yô, i kegh ato

Aluer iorov uhar ya ijende kpa ka u môm tseegh a ôron kwagh hanma shighe yô, ijende ve la ia tsa ga. Er ijende you ka ia lamen ve u kegh ato shi we kpa wea lamen i kegh ato ve i maa ne iyol nahan, gba u se keghen ato a Aôndo shighe u a lu lamen a vese yô. U fa gbenda u Aôndo a lamen a vese kpa?

Nyian ne, Aôndo lamen a vese ken Bibilo i i lu Mkaanem nam ma a ne i nger la. (2 Timoteu 3:16, 17) Se ôr nahan sha ci u nyi? U tesen ikyav yô, tôô wer ijende you i ishima ishima tindi u a washika. U er washika shon yô, alaghga doo u je u ôr mbagenev wer, “M sember ungwan a ijende yam!” Nahan kpa, ijende you la lam a we sha zwa ga, ka ken washika. Se kpa, aluer se mba ôron Bibilo yô, se mba keghen ato a Yehova ser a lam a vese. Sha nahan yô, Gina u se er mkaanem nam ken ngeren u hiihii la kaa ér, “M hen mer, u m nenge Aôndo mer ngu ijende yam yô, a gba u me time ken ‘washika’ na u a nger se la, ka Bibilo je la.” Shi a kaa ér, “Er m er Bibilo ayange ayange yô, kwagh la wasem u seer kporom hen Aôndo.” U keghen ato wer Yehova a lam a we sha u ôron Bibilo i i lu Mkaanem nam la ayange ayange kpa? Aluer u ngu eren nahan yô, kwagh la una na u nenge wer u hemba ngun ikyua a Aôndo cii.

^ par. 5 Wea soo u seer fan er se fatyô u kporom hen Aôndo ken msen yô, nenge ityough 17 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye.