Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

U Fa Kpa?

U Fa Kpa?

Sha ayange a Yesu la, i eren iyua ken tempel nena?

Iyou i inyar i ken tempel la yange i lu ken tembe u i ver sha ci u kasev la. Takerada u i yer ér The Temple—Its Ministry and Services la kaa ér: “Yange i tim mtôm i kase iyou i inyar la ken won, ken atô di i ver mbaakwati pue kar utar, mba i yilan ér ‘ikyor’ la, suur ken kpekpe, [ape] i koson uiyua mba ior eren la.”

Yange i yilan mbaakwati mbara ér ikyor sha ci u ve gbanger shin, ve za hor sha zwa. Hanma akwati lu a ngeren sha mi kposo, u tesen kwagh u a eren a iyua i i lu shimi la yô, shi yange a zua a inyaregh shin ma akwati yô, i ver ki sha ci u eren kwagh u i nger sha akwati la tseegh. Yesu lu ken Tembe Ukase shon, shighe u nenge kwasecôghol u lu ican kwase la kua mbagenev kpishi lu va eren iyua la.Luka 21:1, 2.

Yange i ver akwati u hiihii la ér i taan kpandegh ku inyom i karen ken ijime shimi, sha ci u tempel, akwati u sha 2 di sha ci u kpandegh ku tempel, ken inyom i i lu ker la. Akwati u sha 3 lu u kohol inyaregh ki yamen mbaatii, u sha 4 lu ki yamen mkungum, u sha 5 lu ki yamen ikyon, u sha 6 lu ki kwaghhumandoon, u sha 7 lu ki agbande a zenaria. Akwati u sha 8 lu inyaregh ki nagh ku isholibo ki neer, u sha 9 lu ki iniav mbi iboov ki neer, u sha 10 lu ki sha inyon i nan nagh a mi, u sha 11 lu nagh ku Mbanasari, u sha 12 lu nagh ku mbaamandev. Akwati u sha 13 la lu iyua i ior eren sha asema a ve yô.

Orngeren Bibilo Luka lu or u time sha akaa a tse doo doo yôô?

Luka nger takerada u Ivangeli u i yer sha iti na la, kua Aerenakaa a Mbaapostoli. Luka kaa ér un “time sha akaa la cii doo doo, hii sha mhii u a zan zan,” kpa mbafan takerada mbagenev nyiman akaa agen a a nger yô. (Luka 1:3) Nahan yange time sha akaa la doo doo nena?

Luka ôr akaa a tse a se fatyô u tôvon fan mimi u a yô. U tesen ikyav yô, a ter atiatom a mbatomov mba gomoti u tar u Roma u sha ayange a tsuaa la, a ior kpishi ve fe ga yô, inja er “mbaajiriv,” ken Filipi, man “mbatamen,” ken Tesalonika, man “mbavesen,” ken Efese nahan. (Aerenakaa 16:20; 17:6; 19:31) Luka yila Herode [Antipa] ér ka or u Tetera, shin ortamen u hen icile, shi a yila Sergiu Paulu ér, gomna u icile i Shiperu.Aerenakaa 13:1, 7.

Atiatom a Luka yila vough vough ne ka kwagh u vesen kpishi, sha ci u shighe u tartor u Roma kôr gema la, atiatom a mbatomov mba gomoti kpa gema. Nahan kpa, orgen u timen sha akaa a ken Bibilo, u i yer un ér Bruce Metzger yô kaa ér, “hanma shighe yô, takerada u Aerenakaa ngu u tesen ér akaa a i er la kua ajiir man ashighe a akaa shon er la ka nahan vough.” Orfantakerada ugen u i yer un ér William Ramsay yô, kaa ér Luka ka “or u a hembe timen sha akaa a tse vough vough yô.”