U er nan ve Aôndo una hingir u doon ônov ou ishima?

Tese mbayev ou akaa a igbetar, sha er aa wase ve u fan Aôndo shi soon kwagh na yô

Saa ônov ou vea vande nengen ér Aôndo ngu shi a soo kwagh ve ve, ve kpa Aôndo una hingir u doon ve ishima ye. Gba u vea fa Aôndo cii man vea soo kwagh na ye. (1 Yohane 4:8) U tesen ikyav yô, gba u vea fa mbamlumun sha mbampin mban: Aôndo yange gba orumace ér nana er nyi? Er nan ve Aôndo a de ér ican i er ioro? Ka nyi Aôndo una va er sha ci u orumace?Ôr Mbafilipi 1:9.

Cii man u wase mbayev ou u soon Aôndo yô, gba u ú hii tesen ve wer we iyol you kpa Aôndo doo ú ishima. Aluer ve nenge nahan yô, vea nôngo u dondon ikyav you la.Ôr Duteronomi 6:5-7; Anzaakaa 22:6.

U tese ônov ou kwagh nan ve a kôr ve ken ishima?

Mkaanem ma Aôndo ma tem gbilin ga. (Mbaheberu 4:12) Sha nahan yô, wase mbayev ou ve kav atesen a Bibilo a i gbe u vea hii kaven la. Yesu yange una tesen ior kwagh yô, a pine ve mbampin shi a kegh ato a ve shi a ta ve iwanger ken Ruamabera, nahan ityesen ne i kôr ve ken ishima. We kpa u fatyô u dondon ikyav i Yesu ne, sha er u tese ônov ou kwagh a kôr ve ken ishima yô.Ôr Luka 24:15-19, 27, 32.

Shi ngeren mba ken Bibilo mba ve pase gbenda u Aôndo yange eren kwagh a ior la kpa vea wase mbayev ou u fan Aôndo shi soon kwagh na. I ver ityakerada i ia wase ú u eren kwagh ne yô, hen ijiir i yase i sha Intanet i www.jw.org/tiv la.Ôr 2 Timoteu 3:16.