Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Janawari 2015

 ILIAM I ORPASENKWAGH VEA ORWANNDOR

Lu Hanma Shighe Tartor u Aôndo Hii u Hemene? (Vegher u sha 2)

Lu Hanma Shighe Tartor u Aôndo Hii u Hemene? (Vegher u sha 2)

Iliam i i nger shin heen ne, ka iliam i alaghga Orshiada u Yehova nana lam vea orwanndor yô. Se tôô ser Orshiada u i yer un ér Kameron yô, hide va u va sôron orya ugen, iti na ér Jon.

U HIDEN SAVEN KWAGH U MNYAM MA NEBUKADINESAR LA TIÔNÔÔ

Kameron: Doom kpishi er nyian kpa m zough ishigh a we yô, Jon. Hanma kasua ka mea tema vea we sea timen sha akaa a ken Bibilo imôngo nahan, i doom je i zua a ga. * Tsô u ngu nena?

Jon: Ei, kwagh er ga. M sugh u.

Kameron: Doom kpishi er u lu gbang gbang yô. Kwa u masetyô u se tema la, se lam sha kwagh u a ne ve Mbashiada mba Yehova ve kaan ér Tartor u Aôndo hii u hemen ken inyom i 1914 yô. * Er se time sha kwagh ne yô, se nenge a ikyav i tesen mimi u kwagh ne ken kwaghôron u profeti u ken takerada u Daniel ityough 4 la. U umbur kwagh u i nger ker la kpa?

Jon: Lu mnyam ma ma cier Tor Nebukadinesar sha kwagh u zege kon la.

Kameron: Vough-koko. Ken mnyam ma Nebukadinesar mara, yange nenge a zegekon u tav je za kôr sha kwavaôndo yô. Nahan ungwa ortyom u Aôndo ugen kaa ér i gber kon la i kende inya, kpa i de ikpughur u kon shon a lu shin inya her. Lu u ‘ashighe ataankarahar’ aa karen yô, kon shon ua hide a vese her. * Shi yange se nenge er i lu u kwaghôron u profeti ne una kure sha igbenda ihiar yô. U umbur gbenda u yange hii kuren la kpa?

Jon: Lu kwagh u er Nebukadinesar iyol na yô, shin ka nahan ga. Yange kera lu a mhen u orumace ga zan zan anyom ataankarahar.

Kameron: U kaa vough. Nebukadinesar yange kera lu a mhen u orumace ga shighe wa karen, nahan ikyônough ki torough nagh kira hingir gbilin hen shighe la. Kpa ken vegher u vesen u mkur u kwaghôron u profeti la yô, lu u orumace nana kera tema sha ikyônough ki torough ki Aôndo shin tar ga ashighe ataankarahar. Er yange se nenge nahan, ashighe a ataankarahar la hii shighe u i tim Yerusalem ken inyom i 607 C.S.Y. (Cii man Shighe u Yesu) la. Hii shighe la je, orumace môm shin tar kera tema tor sha ityough ki Aôndo sha u hemen ior nav ga. Nahan kpa, lu u ashighe a ataankarahar la aa been yô, Aôndo una tsua Orhemen u he, a lu ma orumace shin tar ga, kpa a lu or u sha, u nana hemen ior nav yô. Inja na yô, mbee u ashighe ataankarahar la a lu mhii u hemen u Tartor u Aôndo u sha la je la. Se vande timen se fa shighe u ashighe ataankarahar la hii yô. Nahan, aluer se gbidye kwar se fa er ashighe shon a lihi i kighir la yô, se fa shighe u Tartor u Aôndo hii u hemen la. U ngu kaven vough vough ga?

Jon: Een, Kwagh u u sav ne umbur mo hanma kwagh.

Kameron: Doo yum! De a ase se hii kwar gbidyen, nahan se fa er ashighe ataankarahar la a lihe a kighir  la. M sember ôron ityakerada yase sha itinekwagh ne sha er me umbur atôakaa a vesen a vesen yô. A kpa me nôngo me ta u iwanger sha a er m fetyô la cii.

Jon: OK.

ASHIGHE ATAANKARAHAR LA BEE, MAA AYANGE A MASETYÔ HII

Cameron: Shighe u kwaghôron u profeti ne hii kuren sha Nebukadinesar la, ikyav tese wang ér ashighe ataankarahar la lu anyom ataankarahar tseegh. Kpa gbenda u vesen u kwaghôron u profeti shon una va kure sha Tartor u Aôndo la yô, lu u ashighe ataankarahar la aa lihe a hemba anyom ataankarahar a yem zende zende.

Jon: Er nan u kaa nahana?

Kameron: Hiihii yô, umbur wer ashighe ataankarahar la yange hii sha shighe u i tim Yerusalem ken inyom i 607 C.S.Y. la. Aluer se hii ken inyom ne se ôr anyom ataankarahar tseegh se haa ken ijime yô, ashighe ataankarahar la aa lihe a kighir ken inyom i 600 C.S.Y. la. Kpa kwagh môm er ken inyom shon u tesen ér Tartor u Aôndo lu hemen ga. Shi er se vande nengen nahan, yange anyom deri imôngo kar cii ve Yesu va shin tar ye. Nahan kpa, shighe u Yesu lu shin tar la, a tese ér ashighe ataankarahar la lu a bee ga.

Jon: Ahoo! ka mimi. M umbur hegen.

Kameron: Sha nahan yô, ashighe ataankarahar la ka di anyom ataankarahar tsô ga, kpa ka gôgô shighe, u ayange kpishi.

Jon: Er ayange a me nahana?

Kameron: Takerada u Mpase, u u er kwagh i ze ihyan i môm vea takerada u Daniel la wase se u fan er ashighe ataankarahar la a lihi i kighir yô. U pase ér ashighe atar man tiôn, ka shighe, man ashighe man vegher shighe je la, ka ayange 1,260. * Ashighe atar man tiôn za ken ashighe ataankarahar kwa har, nahan ashighe ataankarahar la ka ayange 1,260 kwa har, ka ayange 2,520 je la. Kam er u ngu zuan a mi vough vough yô?

Jon: Een, m ngu zuan a mi. Kpa m ngu a nenge a pe kwagh ne a tese ér Tartor u Aôndo hii u hemen ken inyom 1914 la ga.

Kameron: OK, de ase se nenge kwagh u a tese ér ka ken inyom la yô. Ashighe agen Bibilo ka ia ôr kwagh u iyange i môm ken kwaghôron u profeti yô, iyange i môm i tile sha ityough ki inyom i môm. * Aluer se dondo kwagh u iyange i môm sha ityough ki inyom ne yô, ashighe ataankarahar la a lu anyom 2,520. Gema hii ken inyom i 607 C.S.Y. la, va ken inyom i 1914 la, ka anyom 2,520 vough. * Ka kwagh u a wase se u fan ser ashighe ataankarahar la kure ken inyom i 1914, i hementor u Yesu hii sha Tartor u Aôndo la je ne. Nahan hii ken inyom i 1914 la je, akaa a vesen er shin tar ne, vough er Bibilo tsengaôron ér aa er ken ayange a masejime nahan.

Jon: Ka akaa a nyi nahan a ere?

Kameron: Nenge mkaanem ma Yesu ma i nger ken Mateu 24:7 la. Yesu pase kwagh u una za hemen shighe u una hii u hemen sha la kaa ér: “Ikyurior igen ia mough ityav a ikyurior igen; tartor ugen kpaa ua mough ityav a tartor ugen; ijen ia gba man ityartenger ia lu sha ajiir kposo kposo.” Fa wer Yesu tsengaôron ér hen shighe la, ijen ia gba shi ityar ia lu tenger sha ajiir kposo kposo. Tar ne tagher a mbamzeyol mban ken anyom deri a a kar ne, ka iee?

Jon: Ka ie ga.

Kameron: Ken ivur Bibilo ne, Yesu tsengaôron ér ityav mbia nôngo shighe u una lu Tor u Tartor u Aôndo la. Takerada u Mpase tsengaôron kwagh u ityav mbi a nôngo sha ajiir kposo kposo la tseegh ga, u ôr kwagh u ityav mbi mbia tser tar cii sha shighe u mkur  la kpaa. * U umbur inyom i yange ityav mbi tar cii mbi hiihii mbira pev la kpa?

Jon: Lu ken inyom i 1914, i u lu kaan wer Yesu yange hii u hemen la! I gbe je kpa m ngu a hen kwagh la nahan ga.

Kameron: Aluer se tôô kwaghôron u profeti u sha kwagh u ashighe ataankaarahar la se zua sha akaa agen a Bibilio i tsengeôron sha kwagh u ayange a masetyô la yô, u nenge a kwagh ne wang. Mbashiada mba Yehova na jighjigh ér Yesu u a lu Tor u Tartor u Aôndo la hii u hemen ken inyom i 1914 la, shi lu ken inyom shon kpa ayange a masetyô hii ye. *

Jon: M ngu a kav kwagh la i kumam ga cii.

Kameron: Ior kpishi kape ka i taver ve je la. Er m vande ôron nahan, mo kpa yange tôôm shighe u kaven inja i kwagh ne vindi vindi. Kpa m hen mer kwagh u se tim sha mi ne di tsô yô wase u u nengen er i ter inyom i 1914 la ken Bibilo jighilii ga kpa, akaa a Mbashiada mba Yehova ve ne jighjigh a mi sha kwagh u inyom shon la a dugh ken Ruamabera yô.

Jon: Een, ka i doom a ven kpishi, sha ci u hanma kwagh u ne kende zwa ne kaa cii yô, ka ne ôr ivur Ruamabera i suen un. Ne mba er kwagh sha mnenge wen tseegh ga. Kpa taver mo er i hii ve kwagh ne a cimin u kaven yum nahan yô. Er nan Aôndo yange pase se ken Bibilo jighilii ér Yesu una hii u hemen sha ken inyom i 1914 la ga?

Kameron: Mpin wou doo kpishi, Jon. Jighilii yô, akaa nga ken Ruamabera kpishi, a i pase vindi vindi ga yô. Nahan hii nan Aôndo a ne i nger Bibilo sha gbenda u saa or a nôngo kwagh kpoghuloo ve nana kav ma kwagh u Bibilo i̱ lu ôrono? Kwagen me va tsô, se lam sha kwagh ne.

Jon: A doom kpishi.

Kwagh tsume u sha ma kwagh u Bibilo i tese yôô? Sar u u fan ma kwagh u Mbashiada mba Yehova ve ne jighjigh a mi, shin aeren a kwaghaôndo vee? A sar u yô, de cie u pinen ma Orshiada u Yehova ga. A doo Orshiada shin Kwaseshiada la u lamen a we sha akaa la kpishi.

^ par. 5 Mbashiada mba Yehova ka vea eren tom ve u henen Bibilo a ior, u ve eren sha inyar ga la yô, ve timen sha atineakaa a ken Bibilo môm môm.

^ par. 7 Nenge ngeren u a lu a itinekwagh ér “Iliam I Orpasenkwagh Vea Orwanndor—Lu Hanma Shighe Tartor u Aôndo Hii u Hemene?—Vegher u sha 1,” ken Iyoukura i Novemba–Disemba, 2014 la.

^ par. 9 Nenge Daniel 4:23-25.

^ par. 22 Nenge Mpase 12:6, 14.

^ par. 24 Nenge Numeri 14:34; Esekiel 4:6.

^ par. 24 Nenge caate i i lu a itinekwagh ér “Mnyam ma Nebukadinesar ma sha Kwagh u Kon la.”

^ par. 28 Nenge Mpase 6:4.

^ par. 30 Nenge ityough 9 ki takerada u Bibilo Tese Ér Nyi Jimi? la. Ka Mbashiada mba Yehova ve gber u ye. Ngu hen ijiir yase i sha Intanet i www.jw.org/tiv la kpaa.