Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Iyoukura  |  2008-05-01

 Akaa A Van A Msaanyol Hen Tsombor

Gbenda u Sôron Ayôôso

Gbenda u Sôron Ayôôso

Orya ugen pine kwase na ér: “Mbayevkasev mban za hana?”

Kwase na kaa ér: “Ve za kasua vea za yam akondo.”

Orya la kaa ér: [Ishima vihi un, ngu ôron kwagh jang jang] “Vea za yam akondo a nyi? Ka uwer u ú kar la ve yam akondo gaa?”

Kwase na kaa ér: [Vihi un, nahan ngu kperan ishô henen ér orya na ngu wan un kwagh iyol] “I va a mbaalaha kpishi mba teen. Ve pinem ian, m kaa mer ve za ye.”

Orya la kaa ér: [Ishima seer vihin un, ngu ôron kwagh sha nom-or] “U fa er mbayevkasev mban ka vea yam kwagh a u ôron mo shio i doom ga yô. Er nan u erem ga maa u na ve iana?”

KA MZEYOL u nyi man nyi nahan u nenge wer gba u nom man kwase u se er kwagh ve heen ne vea sôrô? Ikyav tese wang ér orya la ka or u nyoon ishima. Heela tseegh ga, ka inja er á soo ér ônov nav ve de gbe karen ishima tsô eren kwagh ga nahan, kpa kwase na yô nenge nahan ga. Shi ikyav tese ér ve fa u lamen ayol a ve ga.

Ivaa i lun vough ngi ga. Noov man kasev mba lun a mbamzeyol ayol a ve sha ashighe ashighe. Aluer mzeyol shon ka u vesen shin u kiriki kpa, ka hange hange u nom man kwase vea hen u sôron akaa a á lu zayol la. Sha ci u nyi?

Nom man kwase ka vea hime iyongo ayol a ve ga, vea de shighe a kar gôgônan yô, ve hingir u tsweren iliam ayol a ve. Tor u fankwagh, Solomon yange kaa wener: “Inium ngi er uishindan mba iyou i taver yô.” (Anzaakaa 18:19) Ne er nan ve ne hemba lamen ayol a en doo doo sha u sôron mbamzeyolo?

Dooshima man icivir mba hange hange ken ivaa, aeren ne nga a wase nom man kwase ve lamen ayol a ve doo doo, vough er ishima man huhu ve wasen awambe u zenden ken iyol i or sha inja nahan. (Mbaefese 5:33) Dooshima ngu a wase nom man kwase ve sôr ayôôso a hen atô ve, a a lu inya la, mba kera umbur a umbur akaa a tse a nan ve ishima vihin ga. (1 Mbakorinte 13:4, 5; 1 Peteru 4:8) Aluer nom ngu eren kwagh a kwase na sha civir, kwase kpa nahan yô, vea lamen ayol a ve gbar gbar, shi vea kav kwagh u ve lu ôron ayol a ve la kpaa.

Igbenda Inyiin i Sôron Ayôôso

Ôr igbenda inyiin i sôron ayôôso i í ter shin heen ne shi nenge er atindiakaa a Bibilo aa wase u u sôron ayôôso sha dooshima man sha gbenda u heen a hee ikyar u ga yô.

1. Ver shighe u lamen sha mzeyol u a lu inya la.

“Hanma kwagh ngu a ayange na; . . . shighe u huan ving, man shighe u lamen.” (Orpasenkwagh 3:1, 7) Ashighe agen ayôôso nga a na ishimavihin kpishi er anyiman a orya u se er kwagh na ken mhii u ngeren ne vea kwase na la nahan. Aluer anyiman gba hen atô wou vea ikyar u yô, kôr iyol tsaha, “huan ving” hen shighe la sha er ne  zôhô kpoghuloo sha ishimavihin ga yô. Aluer u dondo kwaghwan u Bibilo u i nger shin heen ne yô, u palegh kwagh u una vihi ivaa you yô. Bibilo kaa ér: “Mhii u num yô, ngu er ka a na mngerem ian ma a ande yô, nahan yô, de anyimanakaa, je er a lu a hingir num ga la.”—Anzaakaa 17:14.

Er shighe u huan ving a lu nahan, “shighe u lamen” kpa ngu. Nom man kwase ka vea nenge sha mzeyol u a lu hen atô ve la ga yô, a vese fele er toho nahan. Nahan de palegh nen u lamen sha mzeyol u a lu hen atô wen la, henen nen ner una gba been tsô ga. Aluer ne hii anyiman sha kwagh man u huan ving, u soo u lamen sha mi hen shighe la ga yô, er kwagh a ikyar u sha icivir sha u ôron un shighe u ú soo wer ne lam sha mzeyol shon yô, kpa i de lu ayange kpishi ken hemen ga. Aluer u er nahan yô, kwagh ne una wase u kua ikyar u, ne dondo kwaghwan u Bibilo, u a kaa ér: “Iyange i̱ de been ne a ishima i vihin her ga” la. (Mbaefese 4:26) Mayange i de hungur we u lamen sha mzeyol shon sha shighe u ú kaa wer ne lam sha mi la ga.

ER KWAGH NE: Ver shighe ken hanma sati u ne lamen sha mbamzeyol mba hen tsombor wen yô. Aluer u nenge wer ashighe nga a ishima i hemban vihin we ker yô, de lamen nen sha mbamzeyol sha ashighe la ga. U tesen ikyav yô, shighe u ú sember kurun tom shin shighe u ú lu a ya kwagh ga nahan. Tsua nen shighe u i lu ne ken ishima haang ga yô.

2. Pase ishima you sha mzeyol u a lu inya la, kpa i lu sha icivir.

“Hanma or nana̱ ôron kwagh sha mimi a or u nan we ndor a nan yô.” (Mbaefese 4:25) Aluer u ngu a nom shin kwase yô, ka nomou shin kwase wou la a lu or u wan ndor a we u hemban lun ikyua a we cii ye. Nahan wea lamen a orya wou shin kwase wou yô, ôr un kwagh u mimi shi pase un ishima you kpaa. Kwase ugen u a er nom hegen anyom 26 yô, mba yer un ér Margareta, * a kaa ér: “Shighe u m sember eren nom la, m hen mer hanma shighe u mzeyol a lu hen atô wase cii yô, orya wam una gba fan fan mnenge wam sha mzeyol shon tsô. Kpa m va mase kaven mer mhen wam ne ngu shami ga. Nahan hegen kwagh ka una za iyol yô, m pase un mnenge wam man ishima yam gbar gbar.”

Umbur wer, zum u ne lu lamen sha mzeyol u a lu hen atô wen la yô, awashima wou yô ka u pasen ikyar u mhen wou sha kwagh shon, ka u hemban orihyom wou ityav ga. Aluer u soo u eren nahan vough yô, pase ikyar u kwagh u ú hen wer ka mzeyol la shi ôr un shighe u mzeyol shon a hii la, maa ôr un er kwagh shon a ne ishima i lu u ker yô. U tesen ikyav yô, aluer ishima vihi u ker sha gbenda u ikyar u a haan akaa ken iyou cimba cimba yô, u fatyô u ôron kwagh a na sha icivir wer, ‘Ka wea za kur tom ve, wea er akondo wea gba haan dang dang nahan [inja na yô u pase un shighe u mzeyol shon a hii man kwagh u a lu mzeyol la], i lum er iniôngon yam i esen iyou ne ker shi sôron akaa veren vough vough ne cii i doo u ga nahan [u pase un er ishima i lu u ker yô].’ Nahan mase duen a mhen u sôron mzeyol ne sha kwaghfan.

ER KWAGH NE: Nea tsua shighe u ne lam sha ma mzeyol yô, vande ngeren kwagh u ú hen wer ka mzeyol shon la shin takerada man gbenda u ú soo wer ne hime iyongo shon la sha er u fa kwagh u ú ôr a orya wou shin kwase wou jighilii yô.

3. Kegh ato a orya wou shin kwase wou shi tese wer u kav mnenge u nan kpaa.

Orhenen Yakobu yange nger wener Mbakristu ve “lu tsev tsev sha u ungwan kwagh kpa [ve̱] gema [ve̱] ngôôr a kwaghôron, [ve̱] ngôôr a iyugh kpaa.” (Yakobu 1:19) Ka a bee or inja er ikyar i nan kav er ishima i lu nan ker sha mzeyol u a lu inya la ga nahan, i vihi nan je i zua ga. Nahan yô nôngo kpoghuloo de eren kwagh u orya wou shin kwase wou una hen nahan ga.—Mateu 7:12.

Orgen, mba yer un ér Wolfgang, a er kwase hegen ka anyom 35 je ne, a kaa ér: “Ka mea lamen sha mbamzeyol vea kwase wam, ishima i nôngo u vihin mo ker, hemban je yô zum u ka mea ôron kwagh kpa una kaven mnenge wam ga yô.” Dianna, a er nom hegen ka anyom 20 je ne, a kaa ér, “ka m shi gban orya wam ijir mer, soon u keghen ato a mo shighe u kwagh a ze iyol se tem se lu lamen sha mi ga.” U er nan ve kwagh una kera lu nahan ga?

De gbe tôôn tsô wer u fa mhen u ikyar u shin er ishima i lu un ker ga. Mkaanem ma Aôndo kaa ér, “iyolgengese ngi ne num tsô; kpa mba ve ngohol mhen u mimi yô, kwaghfan ngu her a ve.”  (Anzaakaa 13:10) Er kwagh a orya wou shin kwase wou sha icivir, de tende un iliam sha zwa ga. Hide kimbir kwagh a er la sha mkaanem ou a̱ ungwa, ka nahan man kwagh shon una wanger we tsembelee ye; kpa de eren kwagh ne sha inja i u ngu wan un asôngo shin u ngu nahan un a naha tar ga. Aluer kwagh u ú kimbir la tese ér u kav kwagh u orya wou shin kwase wou a er la tsembelee ga, man a soo u kôôm we yô, de a kôôm we. De neer iliam tswen ga. Lam a orya wou shin kwase wou sha imba gbenda ne, un kpa a lam a we nahan zan zan u mase kaven mnenge na un kpa una kav u wou shi u fa ishima na sha kwagh u ne lu ôron la.

Sha mimi yô, gba u ú hide a iyol ijime shi u lu a ishimawan ve u kôr cio u keghen ato zulee a ikyar u shi u kav mnenge na kpaa ye. Aluer u ngu eren kwagh a orya wou shin kwase wou sha icivir nahan yô, un kpa ishima ia hemba lun un u nan we icivir.—Mateu 7:2; Mbaromanu 12:10.

ER KWAGH NE: Zum u ú lu kimbir kwagh u ikyar u a er la yô, de kimbir sha mkaanem nam mara vough inja er u ngu kaven un a kav ga. Kpa nôngo u pasen kwagh u ú hen wer orya wou shin kwase wou ngu ôron la sha imo i kundu kundu kua mhen na sha kwagh shon.—1 Peteru 3:8.

4. Gba nen zwa môm sha gbenda u ne sôr mzeyol yô.

“Guda uhar a u môm, sha ci u mba a injar i dedoo sha tom ve u sha ican. Gadia aluer vea gba kpaa, u môm nana kôr ugen nan mough a nan sha.” (Orpasenkwagh 4:9, 10) Aluer nom man kwase mba eren kwagh ken ijoughave shi wasen ayol a ve ga yô, a taver ve kpishi u sôron mbamzeyol mba ken ivaa ve.

Ka mimi, Yehova tsua nom ér a lu ityough ki tsombor. (1 Mbakorinte 11:3; Mbaefese 5:23) Kpa u lun ityough ki tsombor ka u eren kwagh sha nom-or ga. Nom u fan kwagh nan gbe eren kwagh sha ishima i nan aa u henen er a lu kwase u nan ken ishima ga ze. David er kwase hegen ka anyom 20 je ne, a kaa ér, “Ka mea soo u eren kwagh yô, m nôngo u fan kwagh u a lu sha ishima i kwase wam kua sha ishima yam kpaa yô, nahan m mase tsuan kwagh u se uhar cii se zua ave se er yô.” Kwase ugen iti na ér Tanya, a er nom hegen ka anyom ataankarahar, a kaa ér: “Kwagh ne ka kwagh u or u nan lu a i bo man u nan lu a ishô keng ga. Ashighe agen yô, hanma wase ka nan gba lun a mnenge u nan sha gbenda u nan hen ér se sôr mzeyol u a lu inya la tsô. M nenge mer aluer nom man kwase mba norom ikyaa sha kwagh ga shi mba a kwaghfan yô ivaa ve ia za ikyura.”

ER KWAGH NE: Nger igbenda kposo kposo, we vea ikyar u, i ne fatyô u sôron ma mzeyol u ne tagher a mi yô, kwagh ne una tese ér ne mba eren kwagh ken ijoughave. Ne ngeren cica cii ne been yô, hide nenge nen sha igbenda kposo kposo i ne nger la, maa tsua nen gbenda môm u ne kar sha u sôron mzeyol wen la yô. Ne eren nahan cii yô, tsua nen shighe u ne hide ne nenge sha kwagh u ne tsough u eren la sha er nea er un kpa ne fa yô, shi nenge nen er kwagh shon a lu zan la.

Eren Nen Kwagh Imôngo

Yesu kaa ér ivaa ka kwagh u i zough a lu môm er igbur nahan yô. (Mateu 19:6) Sha ayange a Yesu la, igbur lu bamber kon u gôgônan u yange i kange uzendenya uhar sha er vea eren tom imôngo yô. Uzendenya mban yange vea zua ga yô, ve fatyô u eren tom kpishi ga, igbur la i nyoon ve a nyoon mon. Kpa vea zenden imôngo yô, ve urugh ikyav mbi vesen shi ve kaha sule je kpaa.

Nahan aluer nom man kwase mba eren kwagh ken ijoughave ga yô, igbur i ivaagh la ia nyoon ve a nyoon. Kpa aluer ve hen u eren kwagh imôngo yô, vea fatyô u sôron nyityô mzeyol cii shi zan ikyura kpaa. Orgen u a lu vea kwase na saan saan anyom imôngo yô, mase kuren kwagh ne nahan ér, “Ken atô u anyom 25 aa a kar ne, mo man kwase wam ka sea tagher a mbamzeyol yô se lam sha mi gbar gbar shi ka m nôngo u nengen er aluer ka mo ve a lum yô shi ka se er msen hen Yehova ser a̱ wase se shi se dondo kwaghwan u Bibilo kpaa.” U nenge wer doo u we vea kwase wou kpa ne eren nahana?

PINE IYOL YOU WER . . .

  • Ka mzeyol u nyi nahan i hemba lun mo u lamen sha mi vea orya wam shin kwase wama?

  • Me er nena ve mnenge u orya wam shin u kwase wam sha kwagh ne una wanger mo tsembelee?

  • Aluer hanma shighe ka m norom mer me er kwagh sha ishima yam keng keng yô, ka mbamzeyol mba nyi nahan ieren yam ne ia va a mini?

^ par. 17 Ka iti na kpôô kpôô ga.