Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Desemba 2015

Bibilo i New World Translation i I Hide I Sôr ken Inyom i 2013 La

Bibilo i New World Translation i I Hide I Sôr ken Inyom i 2013 La

KEN anyom a a kar ne, i hide i sôr Bibilo i New World Translation of the Holy Scriptures la acin imôngo, kpa ken inyom i 2013 la, i hemba sôron akaa ker ngeen. Ikyav i tesen yô, i pande asember ken avur kpishi ken Bibilo i zwa Buter la. Yange i hide i sôr asember a vesen agen ken Bibilo ne. Shi i nger avur a mtom ma Bibilo magenev er ka i nger icam nahan, maa i wa ngeren mba shin kpe mba seer tan iwanger ken mgber u Bibilo i New World Translation, u a cir ken mgber u hemban kehen la. Se fatyô u ôron akaa a i hidi i ser ken Bibilo la cii ken ngeren ne ga, kpa de se time nen sha akaa a vesen kpuaa a i hidi i ser yô.

Ka asember a ken Bibilo a nyi yange i sôrô? Er se pase ken ngeren u karen la nahan, i hide i sôr ishember i “Sheol” man “Hade” kua i “uma” la. Kpa ka cii la ga, i sôr asember agen kpa kpishi.

Ikyav i tesen yô, ishember i “kuma Un” la hingir “wua un sha kon” shin “mande Un sha kon,” nahan kwagh ne tese gbenda u i wua Yesu la wang. (Mat. 20:19; 27:31) Ishember i “ijimba” la hingir “ieren i dang i vihin,” i i pase inja i vihin tsung, i i lu kwagh môm a ishember i ken zwa Grika la yô. Ishember i ngise i gema ér “u yan ican gbem,” i i lu ôron kwagh u yan ican shighe gôgônan la hingir “ishima i wan,” sha ci u ishimawan hemba pasen inja i kwagh la vough. Ishember i “ugurgurmbaakaav” la hingir “uiniongo mba dang” sha ci u ka kwagh u i hembe fan nyian je la. (Gal. 5:19-22) Ishember i “erdoo” la di i gema hingir u “tesen or dooshima sha mimi, kenden nan ga,” man kwagh ne hemba tesen kwagh u i soo la vough. Ashighe kpishi Bibilo ka i ter ishember ne, sha ci u i nôngo u lun kwaghmôm a ishember i “jighjigh” shin “mimi” la.—Ps. 36:5; 89:1.

Asember agen a yange i gema a cii gbenda môm la, hegen ka i gema a er kwagh u i lu ôron van la a tese yô. U tesen ikyav yô, ishember igen ken zwa Heberu i ngise i gema ér “uicôronmbaashighev” la hingir “gbem sha won.” Kwagh ne na yô, i hide i sôr ivur i Pasalmi 90:2 man Mika 5:2 la.

Ka i er tom a ishember i ken zwa Heberu man zwa Grika i i gem ajiir kpishi ken Ruamabera ér “vor” la, shighe u i lu ôron kwagh u tom sule, man shighe u i lu ôron kwagh u “wan” sha injakwagh yô. Yange i er tom a ishember i “vor” la tseegh ken mbamgber mba Bibilo i New World Translation mba tsev mbara, kua ken Genese 3:15 kpaa. Nahan kpa, mba kera fe eren tom a ishember i “vor” shighe u i lu ôron kwagh u “wan” la ken zwa Buter ga. Sha nahan yô, i ter ishember i “wan” la ken Genese 3:15 man avur agen ken Bibilo i i hidi i ser la. (Gen. 22:17, 18; Mpa. 12:17) Ajiir agen a ishember ne i dugh yô, ka i gema i er kwagh u i lu ôron zan a mi a tese la.—Gen. 1:11; Ps. 22:30; Yes. 57:3.

 Hii nan ve i ser ajiir kpishi a ngise i gema lu asemberatii, lu inja i mkaanem mara ga laa? Ngeren u Seer u A1 u Bibilo i ken inyom i 2013 la kaa ér, Bibilo i i gem i doo yô, gba u ia “pase inja i ishember shin asember wang ape aluer i gema a gedee, er a lu la ve a gba iliam ga, shin loho la ua saa la.” Aluer i ôr anzaakaa ken ijô i yange i hii ngeren Bibilo ker la, man anzaakaa la wanger ken ijô igen yô, a fatyô u geman a nahan vough. Ka nahan ve ishember i ‘tim asema,’ i i ter ken Mpase 2:23 la, i wanger ken ijô kpishi ye. Nahan kpa, ken ivur shon i môm, i kaa ér “tim ahi,” man alaghga a taver or u kaven kwagh shon fele. Sha nahan yô, i gema ishember i “ahi” la hingir “mbamhen mba ken atô ishima,” nahan mkav ne hemba zuan sha inja i ishember la. Heela tseegh ga, i gema ishember i “homon alakema” i i ter ken Duteronomi 32:14 la hingir “alakema u hemban doon cii,” nahan hemba wanger. Ka nahan ve ishember i ngise i gema ér “i tsôngo ityumbuzwaa yam ga” la, i gem i hingir “mo u m lu orfan kwaghôron ga” ye. Kwaghgeman ne hemba wanger ken ijô kpishi.—Eks. 6:12.

Hii nan ve i gem ishember i “ônov Mbaiserael” la i hingir “Mbaiserael,” man i “mbayevnomso mba lun icôghor” la, i hingir “ancôgholov”? Ken zwa Heberu yô, ashighe kpishi ishember ka i lu i wasen u fan ér or u i lu ôron kwagh u nan la ka nomsoor shin ka kwase. Nahan kpa, alaghga ishember igen a fatyô u eren tom a i u ôron kwagh u nomsoor man kwase cii. Ikyav i tesen yô, kwagh u i lu ôron ken avur a Bibilo agen van la ka a tese ér “ônov mba Iserael” wa nomso man kasev cii ker, nahan hegen ka i gema ishember la ér, “Mbaiserael.”—Eks. 1:7; 35:29; 2 Utor 8:12.

Ka sha ityôkyaa ne i môm, yange i gema ishember igen ken zwa Heberu i inja i, i lu “ônov mba nomso” i ken Genese 3:16 la ken mbamgber mba tsev mba Bibilo i New World Translation la ér “ônov” ye. Kpa hegen i hide i sôr ishember ne ken Ekesodu 22:24 la, ér: ‘Ônov enev [zwa Heberu, “ônov mba nomso”] kpaa vea hingir ancôgholov.’ I dondo ieren ne ken avur agen kpaa, nahan i gema “wannomso u lun icôghor” hingir “ancôghol.” (Dut. 10:18; Yobu 6:27) Kwagh ne zua sha kwagh u i gem ken Septuajinta la vough. Shi ka kwagh ne yange na ve i gema ishember i “sha ayange a u lu gumor,” i ken Orpasenkwagh 12:1 la hingir “sha ayange a iyev ou” ye.

I gema asember a ken zwa Heberu kpishi a pasen ieren sha gbenda u taver ga sha ci u nyi? Zwa Heberu pav asember a pasen ieren ker ahar: a tesen kwagh u a lu eren zan ave man u a er a kur yô. Yange i gema asember a pasen ieren a ken zwa Heberu la, sha u eren tom a ishember i pasen ieren i môm man ishember igen i wasen i, er “za hemen” nahan, ken mbamgber mba tsev mba Bibilo i New World Translation la, u tesen kwagh u a lu eren zan ave shin a er kwa kimbir kimbir yô. * Yange i er tom a asember a shiishi pasen kwagh, er “kpee” man “keng” kua “kpôô” nahan, u tesen kwagh u a er a kur yô.

Kpa ken Bibilo i yange i hide i sôr ken inyom i 2013 la yô, i kera er tom a asember la ga, saa di ape a wase u pasen inja i kwagh u i lu ôron la tseegh. Ikyav i tesen yô, ityôkyaa ngi i pasen ciligh ciligh ér Aôndo za hemen u kaan ér “Iwanger i̱ lu” ga, nahan ken mgber u he ne, i kera gema ishember la ér “kaan,” u tesen kwagh u a lu eren zan ave ga. (Gen. 1:3) Nahan kpa, ken Genese 3:9 yô, Yehova yila Adam acin imôngo, nahan ityôkyaa ngi i tesen ér Aôndo yange “za hemen u yilan” un. Kwagh u vesen yô, ka i gema asember a pasen ieren la sha gbenda u taver u kaven ga; i hemba  veren ishima sha kwagh u a lu eren la, i lu sha kwagh u a er a bee shi a lu zan hemen, er i lu ken zwa Heberu nahan la ga. Shi kwagh ne ka a wase i gema kwagh a ngee asember kpishi ga, er ken zwa Heberu nahan.

I nger avur a mtom ma Bibilo kpishi hegen sha gbenda u ka i nger icam la, er yange i hii ngeren la nahan

I nger avur a mtom ma Bibilo kpishi er ka i nger icam nahan sha ci u nyi? Avur a ken Bibilo kpishi yange i hii ngeren a, er ka i nger icam la. Ken ijô kpishi nyian, ashighe kpishi ka i fa ngeren u icam sha asember a a lu kwaghmôm ken mkur u hanma hwangekwaghôron la, kpa ken zwa Heberu yô, kwagh u vesen u i fe ngeren u icam sha mi yô, ka sha u tesen mkposo u kwaghgen a ugen, shi ôron ape akaa ahar a nôngo u lun kwaghmôm yô. Ken zwa Heberu yô, mba fe ngeren u icam sha asember a a lu kwaghmôm ken mkur u hanma hwangekwaghôron la ga, kpa ka i fa sha gbenda u i lian kwaghôron sha adondo adondo la.

Ken mbamgber mba tsev mba Bibilo i New World Translation la, yange i nger avur a ken takerada u Yobu man u Upasalmi la sha gbenda u tesen ér yange i nger ityakerada ne sha hiihii la ér ior ve kimbir shin ve waan atsam a mi. Gbenda u ngeren kwagh ne ka u wase or fa wang ér ka icam nan lu ôron ye, shi kwagh ne ka a wase or u umbur kwagh u nan lu ôron la. Ken mgem u Bibilo u ken inyom i 2013 la, i nger takerada u Anzaakaa man u Icam i Hemban la, kua avur a mtom ma Bibilo ma ken ityakerada i uprofeti igen la er ka i nger icam nahan, sha u tesen ér yange i nger lu icam, shi tesen mkposo kua kwagh u a lu kwaghmôm a ugen yô. Ikyav i tesen yô, hanma hwangekwôron ken Yesaia 24:2 yô, tese mkposo u kwaghgen a ugen, kpa hanma hwange yô, gema sue ugen, u tesen ér or môm nana war ijirôron i Aôndo ga. Aluer or kav ér avur ne ka icam yô, a wase nan u fan ér orngeren Bibilo la yange nan gba kimbir kwagh u nan lu ngeren la tsô ga; kpa nan nger kwagh la er ka icam nahan, sha u shiishi pasen loho u Aôndo.

Ashighe agen ka i taver u fan mkposo u kwagh u i nger ken zwa Heberu ér a lu icam man u i nger ér a lu icam ga yô. Sha nahan yô, mbageman Bibilo gba zwa môm sha kwagh u avur a a lu icam la ga. Ka orgemankwagh la i lu u nana tsua avur a nan nenge ér doo u a a lu er ka icam nahan la ye. Avur agen yô, i nger a er kera je i ngeren kwagh la, kpa gema nga a asember a icam ker, shi i er tom a asember ker sha inja shi nga a anzaakaa shi a tese mkposo u kwaghgen a ugen, sha er kwagh u i lu ôron la a wanger yô.

Shi i due a Ngeren u Saven Atôakaa a Vesen ken mhii u hanma takerada u Bibilo cii, man kwagh ne hemba ngun se a iwasen cii sha ci u hegen ka kera taver se u fan ior kposo kposo mba ve lu lamen ken takerada u Solomon u Icam i Hemban la ga.

Yange i time sha ngeren mba tsev mba ken ijô i i hii ngeren Bibilo ker la nahan, kwagh ne wase Bibilo i i hidi i ser ne nena? Mgber u Bibilo i New World Translation u hiihii la, yange har sha ukôpi mba Bibilo i ken Zwa Heberu la, man ukôpi mba Bibilo i ken Zwa Grika, i ior ve ne i icivir, i Westcott man Hort gber la. Ior mba tôvon sha ngeren mba Bibilo mba tsev seer a seer, man kwagh ne ngu tan iwanger sha avur a Bibilo agen ken ngeren mbara. Shi i zua a ukôpi mba uihyurenruamabera mba ve lu ikyua a Zegemnger u Kuugh la. Shi ior seer timen ken ngeren mba ken zwa Grika mba tsev mbara. I wa ngeren mba tsev mba i hidi i ser la ken ukômputa, nahan kera ka ican u fan mkposo u a lu hen atô u ngeren u ken zwa Heberu man zwa Grika u ior ve hembe lumun a mi la ga. Kwagh ne wase Kômatii u Geman Bibilo i New World Translation la u tôvon sha avur agen, maa kwagh ne na ve sôr akaa agen.

Ikyav i tesen yô, ken 2 Samuel 13:21 la, Septuajinta ôr kwagh u a zough sha mkaanem man vough yô, ér: “Kpa a soo u vihin wan na Amnon ishima ga, sha ci u a doo un ishima, shi lu wan na u iunda, NW.” Mbamgber mba tsev mba Bibilo i New World Translation la yange ve lu a mkaanem mara ga, sha ci u ma ken Bibilo i ken zwa Heberu la ga. Nahan kpa, mkaanem man ma ken uihyurenmbaruamabera mba i zua a mi ikyua a Zegemnger u Kuugh la, nahan i wa ma ken Bibilo i i hide i sôr ken inyom i 2013 la. Ka nahan ve i hide i nger iti i Yehova ken 1 Samuel kuma kwa taan ye. Shi mba tôvon sha ngeren mba ken zwa Grika yô, i kav ér doo u a gema gbenda u i er akaa ken Mateu 21:29-31 la. Sha nahan yô, yange i sôr akaa agen lu sha ci u akaa a vesen a i nenge a mi ken ngeren mba tsev la, i saa sha kwagh u a lu ken ngeren u ken zwa Grika môm tseegh, u i nengen ker i geman Bibilo la ga.

Se time sha akaa a i hidi i ser ken Bibilo i New World Translation la kpuaa tseegh tsô. Kwagh ne wase ior kpishi u ôron shi kaven Bibilo i ve nenge ér ka iyua i Aôndo u a lamen a vese la a ne ve yô.

^ par. 10 Nenge Bibilo i New World Translation of the Holy Scriptures—With References, Ngeren u Seer u 3C, u a lu a itinekwagh ér “Hebrew Verbs Indicating Continuous or Progressive Action” (Asember a ken Zwa Heberu a Pasen Ieren, A Tesen Kwagh u A Lu Eren Zan Ave Yô) la.

Uikyaren

Kalenda u Mbaheberu