Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

U Ngu Nôngon sha Er U Kuma sha Mluyol u Kristu la Kpa?

U Ngu Nôngon sha Er U Kuma sha Mluyol u Kristu la Kpa?

‘Kuma sha mlu u ikyaren i mluyol u m-iv u Kristu la.’—EF. 4:13.

ATSAM A A GBER YÔ, KA: 69, 70

1, 2. Ka mvese u nyi i gbe u Mbakristu cii vea nôngo vea nyôr sha mini? Tese ikyav.

ZUM u kwaseya nan soo u yamen atamaikyon ken kasua yô, nan tôôn a a hembe kehen shin a a hembe gban ishe ijime la tsô ga, kpa ka nan sange atam a a vie yô. Sha ci u nan soo u zuan a atam a a doo u yan shi a hom i doo shi a a wase ken iyol yô. Sha nahan yô, ka nan sange atamaikyon a a vie tsembelee yô.

2 Or ka nana vese ken jijingi zan zan nana tsegha iyol i nan shi a er batisema kpa, nan za hemen u vesen her. Awashima u nan ka u hingir or u civir Aôndo u nan vie ken jijingi yô. Mvie u se lu ôron ne, ka u sha iyol ga, kpa ka u ken jijingi. Apostoli Paulu yange nger Mbakristu mba ken Efese, pase er i gbe hange hange u vea vese ken jijingi yô. A taver ve ishima ér ve nôngo ve kuma sha “mzough u ken jighjigh u nan, man mfe u fan Wan u Aôndo man sha mlu u igyandenor man ikyaren i mluyol u m-iv u Kristu la.”—Ef. 4:13.

3. Ka mlu u ior mba ken tiônnongo u ken Efese u nyi, a zough sha mlu u ior mba Yehova nyiana?

3 Shighe u Paulu nger Mbaefese washika ne la, tiônnongo ne vande lun anyom kar imôngo. Mbahenen mba ken tiônnongo la  kpishi via ken jijingi tsembelee. Nahan cii kpa, gba u mbagenev ken tiônnongo la vea nôngo a via ken jijingi. Nyian kpa, kape kwagh u Mbashiada mba Yehova a lu vough je la. Anmgbianev mba nomso man mba kasev kpishi civir Aôndo ica i gba, shi ve via ken jijingi kpaa. Kpa jighilii yô, ka ve cii kwagh ve a lu nahan ga. Ikyav i tesen yô, hanma inyom ka i er ior mbahev batisema udubu udubu, nahan gba u vea nôngo a via ken jijingi. Hide we di ye?—Kol. 2:6, 7.

ER ORKRISTU NANA VESE KEN JIJINGI YÔ

4, 5. Ka sha igbenda i nyi nahan, mlu u Mbakristu mba ve vie ken jijingi la a kaha, kpa ka aeren a nyi nahan ve cii ve lu a mini? (Nenge foto u a lu sha mhii u ngeren ne la.)

4 Ka wea peven atamaikyon ken kasua sha er u fa aa vie yô, u kav er i lu a cii a lu kwaghmôm ga yô. Nahan cii kpa, nga a lu a akaa agen a a wase se u fan ser a cii via yô. Nahan kape Mbakristu mba ve vie ken jijingi la kpa alaghga ve due ken ityar kposo kposo, shi mlu ve man gbông gbông ve man anyom a ve man mfe ve una kaha je la. Shi ieren ve shin aeren a ityô ve je kpa a a kaha. Nahan cii kpa, mba ve vie ken jijingi la cii ka ve lu a aeren a a tese ér mba Mbakristu mba ve vie yô. Se ôr nahan sha ci u nyi?

5 Or u civir Yehova u nan vie ken jijingi la ka nan dondon ikyav i Yesu ver sha u se “dondo Un ijime” la. (1 Pet. 2:21) Lu nyi Yesu tese ér hemba ngin hange hange? Yange tese ér Yehova a doo u ishima a ishima you cii man a uma wou cii man a mfe wou cii, shi or u nan we ndor a we yô, nana doo u ishima er we iyol you nahan. (Mat. 22:37-39) Orkristu u nan vie ken jijingi la ka nan nôngo nan dondo kwaghwan ne. Ka nan tese ken uma u nan cii ér ikyar i nan ye a Yehova la hemba gban nan kwagh, shi nan tesen mbagenev dooshima u tangen iyol ga la.

Mbakristu mba been iyol vea fatyô u hiden a iyol ijime er Kristu nahan, sha u wasen agumaior a a lu hemen hegen la (Nenge ikyumhiange i sha 6 la)

6, 7. (a) Ka aeren agen a nyi ka i fa Orkristu u nan vie la sha mini? (b) Se lu timen sha nyi?

6 Kpa er se fe nahan, dooshima ka di vegher u ityamegh ki jijingi ki Orkristu u nan vie ken jijingi nana lu a mi tsô. (Gal. 5:22, 23) Avegher agen, er ishima i legh legh man iyolkôrontsaha man ishimawan kpa nga hange hange. Aeren ne aa fatyô u wasen nan u nôngon a mbamlu mba taver, kpa vihin ishima ga, shi wan ishima a akaa a van or ahenge, yinan ishima ga. Shighe u nan lu henen Bibilo sha tseeneke u nan kpa, ka nan keren akaawan a ken Ruamabera a a fatyô u wasen nan u paven kwagh u dedoo a u bo yô. Nahan shighe u nan lu tsuan akaa a nana er ken uma yô, nan tese ér nan via ken jijingi. Ikyav i tesen yô, ka nan ungwa kwagh u imoshima i nan i Bibilo i tsaase i la, i kaa a nan la. Orkristu u nan vie ken jijingi la ka nan hiden a iyol i nan ijime sha ci u nan fa ér igbenda i Yehova kua atindi a na hemba doon a a nan sha hanma shighe cii. * Ka nan pasen loho u dedoo sha gbashima shi nan eren kwagh u una wase tiônnongo una lu ken mzough yô.

7 Sea civir Yehova ica a gba nan nan kpa, doo u hanmô wase nana pine iyol i nan ér, ‘Igbenda igen ngi i m nenge mer doo u me hemba dondon ikyav i Yesu la, sha er me za hemen u vesen ken jijingi yôô?’

“KWAGHYAN U TAVER YÔ, NGU SHA CI U MBAGANDEN”

8. Yesu yange fa Ruamabera vindi vindi shi fa u eren tom a mi nan je?

8 Yesu Kristu yange fa Mkaanem ma Aôndo kôr inya. Shighe u lu anyom 12 tseegh la je kpa, a fatyô u lamen sha akaa a ken Ruamabera vea mbatesen mba ken  tempel. Nahan “mba ve lu ungwan Un cii, kpiligh ve iyol sha mkav Na man sha mbamlumun Nav kpaa.” (Luka 2:46, 47) Shighe u Yesu lu pasen kwagh shin tar la kpa, a er tom a Mkaanen ma Aôndo sha u cilin mba ve lu hendan a na la zwa.—Mat. 22:41-46.

9. (a) Aluer or soo u vesen ken jijingi yô, ka igbenda i henen Bibilo i nyi i gbe hange hange u nana dondono? (b) Ka nyi i lu awashima wase u henen Bibilo?

9 Ikyav i Yesu la tese ér aluer Orkristu soo u vian ken jijingi yô, gba u nana fa Bibilo tsema tsema. Gba u hanma shighe yô, nana timen ken Bibilo zulee, sha ci u nan fa je ér “kwaghyan u taver yô, ngu sha ci u mbaganden.” (Heb. 5:14) Kwagh ne tese wang ér, gba u Orkristu u nan vie ken jijingi la nana soo u lun a “mfe u fan Wan u Aôndo” la. (Ef. 4:13) U ver shighe u ôron Bibilo hanma sev kpa? U dondon shighe u u ver u henen kwagh sha tseeneke wou la, shi ka u nôngo kpoghuloo u er mcivir u hen tsombor ken hanma kasua kpa? Zum u u lu henen Mkaanem ma Aôndo yô, ver ishima sha er u zua a akaawan a ken Ruamabera a a wase u, u hemba fan mnenge u Yehova sha akaa kua gbenda u a henen kwagh la wang yô. Shi nôngo dondon akaawan a Bibilo, shi de a hemen we zum u lu tsuan akaa a a u er yô, nahan u hemba kporom hen Yehova.

10. Mfe u Orkristu u nan vie ken jijingi nan lu a mi la, hemen nan ayange ayange nena?

10 Orkristu u nan vie ken jijingi yô, nan fa ér gba u nana lu a mfe tseegh tsô ga. Gba u kwagh u nan fe sha kwagh u igbenda i Aôndo man atindi a na la una doo nan ishima. Ka nan tese ér igbenda i Aôndo man atindi a na doo nan ishima sha u eren ishima i Yehova, i lu ishima i nan ga. Heela tseegh ga, Orkristu ka nan “er” anza man aeren a nan a tse la nan haa  kera. Er Orkristu nan lu geman inja la, ka nan dondon ikyav i Yesu sha u haan or u he iyol, “u i gbe un sha inja i Aôndo ken perapera u mimi man mtsegh u mimi” la. (Ôr Mbaefese 4:22-24.) Yange i nger Bibilo sha iwasen i icighan jijingi u Aôndo. Zum u Orkristu nan lu henen Bibilo yô, icighan jijingi u Aôndo ngu a wase nan, nan seer kaven atindi a Bibilo, shi a seer doon nan dooshima, nahan nan seer lun kôôsôô a Yehova.

LU NEN KEN MZOUGH

11. Lu nyi Yesu tagher a mi shighe u lu eren akaa vea tsombor na man mbahenen nav laa?

11 Yesu lu or u vough. Nahan kpa, shighe u lu shin tar la, luun imôngo a uumace mba ve lu vough ga yô. Mbamaren nav mba ve yese un la yina, shi lu hen ya imôngo vea mba hen tsombor na mba ve yina yô. Mbadondon un mba ve hemba lun a na kôôsôô la je kpa, ve lu a ihyagh kua ieren i or soon iyol i nan tseegh la. U tesen ikyav yô, hen tugh mbu kpernan i wua Yesu la, “ve gba sendegh anyiman ayol a ve ér shin ka hanmô ve á ver nan orvesenou?” (Luka 22:24) Kpa Yesu lu a vangertiôr ér mbadondon un mba ve yina mban vea fatyô u vesen ken jijingi shi veren tiônnongo u una lu ken mzough yô. Hen tugh mbu shon, Yesu er msen, sôn Ter na u sha la ér mbaapostoli nav mban ve lu ken mzough; a kaa ér: “Ve̱ lu kwagh môm, er We Ter, U lu ken a Mo, Mo kpaa M lu ken a We nahan, sha u ve kpaa ve̱ lu ken a vese; . . . sha u ve̱ lu kwagh môm er se se lu kwagh môm nahan.”—Yoh. 17:21, 22.

12, 13. (a) Mbaefese 4:15, 16 tese er i gbe u se er kwagh u una wase u van a mzough ken tiônnongo nena? (b) Anmgbian ugen yange hemba myen ugen u wase un hen u eren kwagh ken mzough nena?

12 Or u civir Yehova u nan vie yô, ka nan wase u van a mzough ken tiônnongo. (Ôr Mbaefese 4:1-6, 15, 16.) Awashima wase yô, ka u ior mba Aôndo ve “zua” imôngo, shi ve cii ve eren kwagh ken mzough. Mkaanem ma Yehova tese ér, cii man se lu ken mzough ne yô, gba u se hiden a iyol ijime. Anmgbian u nomso shin u kwase u nan vie ken jijingi la ka nan hide a iyol ijime, nan er kwagh u una va a mzough yô, aluer nan ngu tagher a mbamyen mba mbagenev je kpaa. Shighe u anmgbian u nomso shin u kwase nan er kwagh u tesen ér nan yina yô, ka u er nena? Shin aluer ka we iyol you orgen ken tiônnongo nan er kwagh u vihin we yô, u er nena? Ka u de u lamen a nan, shin ka u nôngo wer u hime iyôngo laa? Orkristu u nan vie ken jijingi yô, ka nan sôr zayol u a ve la, nan keren ér nana lu or u van mbagenev a zayol ga.

13 Nenge ase kwagh u yange er anmgbian Uwe ne. Ngise la, de ér mbamyen mba anmgbianev mbagenev ve na un ishimavihin. Kpa a hen kwagh u uma u Davidi ken Bibilo man takerada u Insight on the Scriptures la. Er nan ve tsua u henen kwagh u Davidi? Uwe pase wener: “Davidi yange tagher a ieren i vough ga i ior mbagenev mba civir Aôndo a ve imôngo la. Ikyav i tesen yô, Tor Saulu yange nôngo ér una wua un, shi ior mbagenev di soo u tan un awen, shi kwase na iyol na je kpa naha un tar. (1 Sam. 19:9-11; 30:1-6; 2 Sam. 6:14-22) Kpa Davidi lumun ér ieren i mbagenev la i na Yehova a de kera doon un ishima ga ze. Shi Davidi zungwen mhôônom, nahan gba u mo kpa me lu a ieren ne. Kwagh u yange m hen la, gema gbenda u m nengen mbamyen mba ior mba m civir Aôndo vea ve imôngo la. M kera umbur mbamyen vev ga, kpa ka m nôngo sha u me wase u van a mzough ken tiônnongo.” We kpa ka awashima wou u eren kwagh u una va a mzough ken tiônnongo kpa?

 KÔR IJENDE A MBA VE EREN ISHIMA I AÔNDO LA

14. Lu unô Yesu tsua ve ér ve lu azende a na?

14 Yesu Kristu yange eren kwagh kundu kundu a ior cii. Nomso man kasev man agumaior man mbabeenyol kua mbayev je kpa, yange ve cian u van ikyua a na ga. Kpa lu hanma or cii Yesu a gba tsuan nan tsô ér nana lu ijende na i kôôsôô ga. A kaa a mbaapostoli nav mbajighjigh mbara ér: “Aluer ne eren kwagh u M we ne tindi sha mi yô, ne mba akar Am je.” (Yoh. 15:14) Yesu yange tsua azende a na ne ken atô u mba ve dondon un sha mimi shi ve civir Yehova sha ishima i môm la. We u tsough azende a ou ken atô u mba ve lu civir Yehova a ishima ve cii la, er Yesu nahan kpa? Kwagh ne ngu hange hange sha ci u nyi?

15. Aluer agumaior kôr ijende a Mbakristu mba ve vie ken jijingi la yô, kwagh ne una wase ve nena?

15 Er oo ka u a ta ve u wase atamaikyon agen kpishi a via nahan, kape dooshima u anmgbianev asev la kpa ngu a wase se se via ken jijingi je la. Alaghga u ngu gumor u u lu nôngon wer u tsua kwagh u u er ken uma wou yô. Aluer u ngu lun imôngo vea anmgbianev mba ve civir Aôndo ica i gbe, shi ve lu wasen u van a mzough ken tiônnongo la yô, u lu eren kwagh sha kwaghfan. Ken anyom a karen ne, alaghga ve tagher a mbamzeyol ken uma shi ve wa ishima a mbamtaver sha u civir Aôndo. Ambaaior ne aa fatyô u wasen we tsuan uma u hemban doon cii. Aluer u ngu lun a ve imôngo yô, vea wase u u tsuan akaa a u er ken uma la sha kwaghfan, shi u vese ken jijingi kpaa.—Ôr Mbaheberu 5:14.

16. Mbaganden mbagenev ken tiônnongo yange ve wase anmgbian ugen u lu gumkwase la nena?

16 Ikyav i tesen yô, anmgbian u kwase ugen u i yer un ér Helga yô, umbur ér shighe u shi un inyom i môm tseegh u been kôleeji la, mbayevmakeranta mba ken klase na lu ôron akaa a vea er ken uma ve yô. Ve kpishi ve kaa ér ve soo u zan yunivasiti, sha er vea bee yô, vea zua a tom u injaa yô. Maa Helga za lam sha kwagh ne vea azende a na a ken tiônnongo. A kaa wener: “Azende am ne kpishi lu tamen a mo, shi ve wasem tsung. Ve taver mo ishima ér m er tom u pasen kwagh hanma shighe la. Shighe kar yô, m er tom pania kuma anyom ataan. Er anyom a kar kpishi hegen ne, doom kpishi er yange m hemba veren ishima sha tom u Yehova shighe u m lu gumkwase la yô. M ngu a ityôkyaa i môm i vaan afanyô sha kwagh u m er ne ga.”

17, 18. Aluer se via ken jijingi yô, kwagh ne una wase se u eren akaa a se soo u eren ken uma la nena?

17 Aluer se mba nôngon u dondon ikyav i Yesu la ken uma wase yô, kwagh ne una wase se u vesen ken jijingi. Se hemba kporom ikyua a Yehova, shi a seer saren se u civir un er se fetyô la cii. Ka shighe u Orkristu nan vie ken jijingi la, ka nan kôrcio u civir Aôndo a ishima i môm ye. Yesu yange taver mbadondon un ishima ér: “Kape ne kpaa iwanger yen i̱ wanger sha ishigh ki iorough la, sha u ve̱ nenge aeren a en a dedoo man ve̱ civir Ter wen u A lu Sha yô.”—Mat. 5:16.

18 Er se vande henen nahan, Orkristu u nan vie ken jijingi la, ka nan lu tiônnongo a iwasen kpen kpen. Shi gbenda u Orkristu shon ka nan eren tom a imoshima i Aôndo a ne nan la, ka u tese ér nan via ken jijingi. Imoshima yase ia fatyô u wasen se u tsuan akaa a se er la sha kwaghfan nena? Shi se tese icivir sha akaa a imoshima i Mbakristu mbagenev i ne ve ian u eren la nena? Se lu timen sha kwagh ne ken ngeren u dondon ne.

^ par. 6 Ikyav i tesen yô, alaghga a gba u anmgbianev mba ve bee iyol la vea gema ityom igen i ve lu a mi la vea na anmgbianev mba ve lu agumaior la, shi vea sue ve sha u ve er i kpaa.