Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Agusutu 2015

Ieren You I Tese Hegen Ér U Ngu Wan Agoyol U Va Lun Uma ken Tar u He

Ieren You I Tese Hegen Ér U Ngu Wan Agoyol U Va Lun Uma ken Tar u He

“Ve̱ eren akaa a dedoo, . . . sha u vea kôr ave sha uma u a lu uma jim la.”1 TIM. 6:18, 19.

ATSAM A A GBER YÔ, KA: 125, 40

1, 2. (a) Ka averen a nyi u lu veren ashe u va zuan a mi ken Paradiso? (Nenge foto u a lu sha mhii u ngeren ne la.) (b) Ka averen a ken jijingi a nyi se va zua a mi ken tar u he?

SE KPISHI ka sea ungwa kwagh u “uma u a lu uma jim la” yô, kwagh ne a umbur se kwagh u ishimaverenkeghen yase i va lun uma ken Paradiso shin tar gbem sha won la. Apostoli Paulu kaa jighilii ér “uma u a lu uma jim la,” ka “uma u tsôron.” (Ôr 1 Timoteu 6:12, 19.) Se mba keghen uma u tsôron u una va se a mkom man msaanyol u been mayange ga la. Se fatyô u pasen vindi vindi er uma una doo hen shighe la ga, gadia hanma sev yô, se nder gbong gbong, shi i saan se iyol shi se zua a mkom kpaa. (Yes. 35:5, 6) Hen ase er a saan se iyol u lun imôngo a ior asev man azende a ase kua ior mbagenev mba a nder ve shin ku la yô! (Yoh. 5:28, 29; Aer. 24:15) Shi se zua a ian i seer mfe u se lu mi sha akaa la, er akaa a sainsi man ityogholough mbi kuhwan man u kpelan shi maan ayou, kua akaa agen nahan.

2 Er se lu veren ashe u va zuan a akaa a doon ne nahan kpa, averen a hemban a se va zua a mi ken tar u he la yô, a lu a ken jijingi. A saan se iyol kpishi u nengen er a tsegha iti i Yehova shi a tese er i lu un tseegh a kom u hemen yô! (Mat. 6:9, 10) A doo se  tsung u nengen er kwagh u Aôndo yange wa ishima hiihii u eren sha ci u uumace man tar la una kure yô. Shi shighe u a gema se kure kure se hingir vough la, a hemba lun se ican ga u kporom ikyua a Yehova!Ps. 73:28; Yak. 4:8.

3. Ka nyi i gbe u se lu wan agoyol sha mi hegene?

3 Averen ne cii se fatyô u zuan a mi, gadia Yesu yange kaa a vese ér, “Aôndo yô, [fe] akaa cii ityô.” (Mat. 19:25, 26) Nahan kpa, aluer se soo u nyôron ken tar u he la, shi zan hemen u lun uma zum u Hemen u Kristu u Anyom Dubu la ua bee kera yô, gba u se nôngo hegen se “kôr ave” sha uma u tsôron. Gba u ieren yase ia tese ér se mba keghen mkur u botar ne, shi gba u se wa agoyol hegen sha ci u uma u ken tar u he la. Kpa er se lu ken botar ne her yô, se er kwagh ne nena?

ER SE WA AGOYOL YÔ

4. Tese ikyav er se fatyô u wan agoyol hegen sha ci u uma u ken tar u he la yô.

4 Se wa agoyol hegen sha ci u uma u ken tar u he u Aôndo la nena? Tôô ase wer se soo u moughon yemen twev ken tar ugen, nahan se wa agoyol nena? Alaghga se hii u henen zwa u ior mba ken tar shon ve lamen la. Aluer se hen igbenda i ve eren akaa la yô, a wase se. Shi se fatyô u benden akaayan a ve agen nengen. Alaghga je yô, se hii u eren kwagh er se mba ior i tar shon nahan, sha ci u kape se yem ken tar shon kpa se za eren kwagh je la. Nahan tar u he la kpa gba u se wa agoyol hegen sha ci u uma u ker. Se nôngo nen sha afatyô wase cii se eren nen kwagh er se va nyôr ker kpa a gba u se eren la nahan. De ase se time nen sha akav a a dondo ne.

5, 6. Aluer se hen u dondon gbendatesen u nongo u Yehova hegen yô, kwagh la una wa se agoyol sha ci u uma u ken tar u he la nena?

5 Ken tar u he la, hanma or cii nana lumun a hemen u Aôndo. Hen shighe la, kwagh a lu kposo a tar u Satan a hemen, u ior ve hembe soon u eren kwagh sha asema ve hegen la! Mbagenev yô, tseeneke u keren kua ieren i hanger ér i eren kwagh er ve nenge la gba ve kwagh je gande. Kpa ka nyi i dugh ken ieren nee? Er ve vende ér Aôndo a de hemen ve ga yô, kwagh la gema va a ican man ishimavihin, kua aahe je kpaa. (Yer. 10:23) Se mba veren ashe keghen shighe u uumace cii vea va lu sha ikyev i hemen u Yehova u sha dooshima la!

6 A va saan se iyol u dondon gbenda u Yehova una lu tesen ior nav ken tar u he la kpen kpen; se lu eren tom u geman tar cii hingir paradiso, shi tesen mba a nder ve shin ku la shi eren ishima i Yehova. Nahan kpa, aluer i gema i kaa a vese ér se er ma tom u se soo u ga di ye? Se lumun u eren kwagh u i kaa ér se er la sha gbashima, shi se er tom u i ne se la saan saan kpa? Alaghga se kpishi se kaa ser een! Nahan yô, hegen ne se mba dondon gbenda u nongo u Yehova u tesen ér se eren kwagh la hanma shighe kpa? Aluer se mba eren nahan yô, se mba wan agoyol sha u va zuan a uma u tsôron shighe u Yehova una lu hemen la.

7, 8. (a) Er nan ve i doo u se eren kwagh ken mzougho? (b) Ka sha igbenda i nyi nahan Mbakristu mbagenev ve gem uuma veve? (c) Ka vangertiôr u nyi se fatyô u lun a mi sha kwagh u uma u ken tar u he laa?

7 Se fatyô u wan agoyol sha ci u uma u ken tar u he la, sha u dondon gbenda u nongo u Yehova u tesen se u eren kwagh la tseegh ga, kpa gba u kwagh a kuman se shi se eren kwagh ken mzough hegen. Aluer se mba eren kwagh ken mzough vea mba ve hemen se nyian la, shi alaghga ve na se ityom i he, kpa se mba eren i saan saan shi se mba zuan a mkom ker yô, adooga ken tar u he la kpa se lu a imba ieren ne. (Ôr Mbaheberu 13:17.) Yange i kar Mbaiserael dyako u Tar u Ityendezwa la sha ishor i eren. (Num. 26:52-56; Yos. 14:1, 2) Nahan kpa, nyian yô, se fa ijiir i a va kaa a  hanmô wase ér nana za lu her ken tar u he la ga. Kpa u eren kwagh ken mzough la una na kwagh a va kuman se, shi a saan se iyol tsung u eren ishima i Yehova hanma ijiir i se lu sha tar hen shighe la cii.

8 Ian i civirigh i se lu a mi i va lun sha ikyev i hemen u Tartor la hemba nyityôkwagh i se er sha u eren kwagh ken mzough vea nongo u Yehova shi nengen sha ityom i i ne se la. Ka mimi, shighe ka una karen yô, mbamlu asev kpa ve gema. U tesen ikyav yô, yange i hide i tindi anmgbianev mbagenev mba ve lu tsombor u Betel u ken tar u Amerika yô, ér ve za er tom u kwaghpasen, man hegen mba zuan a averen kpishi u eren tom u pasen kwagh hanma shighe la sha igbenda wue wue. Shi iyolbeen shin akaa agen yange na yô, gba u mbatamen mba ningir sha mbagenev vea hide a za er tom u ikpur pania. Aluer kwagh ngu kuman se, shi se mba sônon Aôndo ser a wase se shi se mba eren un tom er se fetyô la cii yô, a saan se iyol shi se zua a averen kpishi ken ayange a masejime a ican ne je kpaa. (Ôr Anzaakaa 10:22.) Nahan kpa, aluer ken tar u he la, se soo ser se lu hen ma ijiir, kpa i kaa a vese ér se yem hen igen di ye? Sea lu han han shi sea lu eren nyi tom kpa, se lu a vangertiôr ser a doo se, shi se zua a kwagh a kuma se shi se ember tsung.Neh. 8:10.

9, 10. (a) Ka sha igbenda i nyi nahan, alaghga a va gba u se tese ishimawan ken tar u he laa? (b) Se er nan ve se tese ser se mba a ishimawana?

9 Ken tar u he la, ashighe agen i gba u se wa ishima sha kwagh. U tesen ikyav yô, alaghga se ungwa er i nder ior shin ku ve, i doo anmgbianev vev man azende a ve kpishi yô. Nahan kpa, se mbagenev yô, alaghga a gba u se kegh ve a mase nderen ior asev ye. Aluer kwagh ngu nahan yô, se ember a mba i vande nderen ior vev la, shi se wa ishima kpa? (Rom. 12:15) Aluer se hen u wan ishima keghen mkur u uityendezwa mba Yehova hegen yô, kwagh ne una wase se u va wan ishima hen shighe la kpaa. Eccl. 7:8.

10 Shi se fatyô u wan agoyol u va lun ken tar u he la, sha u wan ishima zum u i nyôôso mkav wase sha kwagh u mimi u Bibilo i tese yô. Ka a due a ityesen i he nahan, se hen i, shi se wa ishima zum u se kav i tsembelee ga je kpa? Aluer se mba wan ishima hegen yô, ken tar u he la kpa, alaghga tsô a kera taver se u wan ishima, er Yehova una lu tesen uumace akaa a a soo ér ve er la ga.—Anz. 4:18; Yoh. 16:12.

11. Ka nyi Yehova a lu tesen se hegen sha kwagh u mlu wase a mbageneve, man kwagh ne una va wase se ken tar u he la nena?

11 Ieren igen i ia va lu se a inja kpishi ken tar u he la yô, ka u den or a kwaghbo. Sha shighe u Hemen u Kristu u Anyom Dubu la, alaghga shighe a kar cii ve mbaperapera man mbaperapera ga mbara vea de aeren a ve a vough ga la ye. (Aer. 24:15) Se fatyô u eren kwagh a hanma or hen shighe la sha dooshima kpa? Aluer se hen u den mbagenev a kwaghbo, shi aluer se palegh u lun iyongo a ve hegen yô, a va hemba lun se ican ga u eren nahan ken tar u he la.Ôr Mbakolose 3:12-14.

12. Pase er uma u se lu veren ashe a mi ken tar u he la, a gbe a zough sha gbenda u se eren kwagh hegen yô.

12 Alaghga ken tar u he la, a lu hanma shighe cii se zuan a kwagh u se soo ser ma se zough a mi la ga. Er se lu zuan a iwasen sha ikyev i hemen u Yehova u sha dooshima la, a gba u se kpa se lu tesen iwuese man ieren i kwagh kuman se la sha hanma gbenda cii. Kwagh ne tese ér, gba u se lu a aeren a Yehova a lu tesen se hegen ér se lu a mi la. Aluer se mba henen u eren kwagh er se va eren ken tar u he la nahan yô, se mba lun a aeren a i gbe u se va lu a mi gbem sha won la. Shi se mba tesen ser se na jighjigh a “tar u u lu van” la tsung. (Heb. 2:5; 11:1) Kwagh ugen yô, se mba  tesen ser sar se tsung u va lun ken tar u ior cii vea lu eren ishima i Yehova la. Kwagh ne cii tese ér se mba wan agoyol keghen uma u tsôron u ken tar u he u Aôndo la.

VER ISHIMA HEGEN U EREN AKAA A KEN JIJINGI

Eren tom u pasen kwagh la sha gbashima

13. Ka akaa a nyi nahan se hemba veren ishima sha mi ken tar u he?

13 Nenge gbenda ugen kpaa, u se fatyô u wan agoyol sha uma u tsôron u a lu van la yô. Er i tende zwa a vese ér kwaghyan kua akaa agen a kwagh a gbe se a mi hange hange la aa va dumbur ken tar u he la nahan kpa, kwagh u una hemba nan se msaanyol cii yô, ka u kuren mgbe wase u ken jijingi la. (Mat. 5:3) Akaa a ken jijingi aa hemba lun se kwagh u vesen, shi se tese ser saan se iyol u civir Yehova. (Ps. 37:4) Aluer se hemba veren ishima sha akaa a ken jijingi hegen yô, se mba wan agoyol sha uma u tsoron u ken tar u he la.Ôr Mateu 6:19-21.

14. Ka akaa a ken jijingi a nyi agumaior aa tsua u eren ve, a wase ve u veren ishima sha kwagh u uma u tsôrono?

14 Se er nan ve se seer zuan a msaanyol sha u eren akaa a ken jijingi? Gbenda môm yô, ka u tsuan akaa a ken jijingi, a se er yô. Aluer u ngu gumor shi u ngu gbidyen kwar kpoghuloo sha tom u u er ken mcivir u Yehova yô, u fatyô u hiden ôron ngeren mba i gber sha kwagh u igbenda kposo kposo i eren tom u pasen kwagh hanma shighe la, nahan tsuan môm ker eren. * U fatyô u lamen a mbagenev mba ve er tom u pasen kwagh la anyom kpishi yô. Aluer u gema tom u pasen kwagh la hingir tom wou yô, u ngu wan agoyol a va zan hemen u eren Aôndo tom ken tar u he, ape ityesen i u lu zuan a mi ken nongo u Yehova hegen, man mkav wou la una lu a iwasen kpishi yô.

Eren ityom i nongo u Yehova

15. Ka akaa a ken jijingi a nyi nahan mbapasenkwagh u Tartor vea fatyô u tsuan u erene?

15 Er se lu mbapasenkwagh u Tartor yô, ka akaa a ken jijingi a nyi nahan se fatyô u tsuan u erene? Se fatyô u seer tsaase mfe wase sha ma gbenda u pasen kwagh. Shin alaghga se nôngo sha er se hemba kaven atindiakaa a Ruamabera man er se dondon a ken uma wase yô. Shi se hen er se hemba fan takerada u ôron ken igbar shin nan kwaghôron gayô ikyar ken mbamkombo asev yô. Heela tseegh ga, u fatyô u henen akaa agen kpaa a u er yô. Kpa kwagh u vesen yô, ka un ne: Aluer se mba tsuan akaa a ken jijingi a se er yô, kwagh ne una na se hemba lun a gbashima sha ityom i ken nongo u Yehova, nahan a wase se u wan agoyol sha uma u ken tar u he la.

 SE HII U ZUAN A AVEREN HEGEN JE!

Tese wer u ngu a iwuese sha kwaghyan u ken jijingi la

16. Er nan ve u civir Yehova la i lu kwagh u hemban doon cii u se er ken uma?

16 Aluer se tôô shighe se mba wan agoyol sha tar u he u Aôndo la yô, tese ér se de uma u injaa u nyian ne ngu karen se shinii! Mayange ga cii! U civir Yehova la ka kwagh u hemban doon cii u se er ken uma yô. Or kighir se ve se lu civir Yehova ga, shi u ngu wer se mba civir un ser se nôngo se va war zegecan tsô ga. Yehova yange gba se ér se civir un, man ka sea er nahan yô, i hemba saan se iyol cii. Ka sea de ser Yehova a hemen se, shi sea nenge er se doo un ishima sha mimi yô, i hemba kpen se iyol a u ma se lu paleghaa a na la. (Ôr Pasalmi 63:1-3.) Nahan kpa, gba u se kegh ser tar u he u va tsô se zua a averen a ken jijingi a or ka nan zua a mi sha u civir Yehova a ishima i môm la ga; hegen je kpa se fatyô u zuan a averen ne! Sha mimi yô, se mbagenev se zua a averen ne anyom udubu imôngo hegen, nahan se kav ser kwagh môm ngu u una hemba nan se mkom ken uma, er u civir Yehova ga.Ps. 1:1-3; Yes. 58:13, 14.

Dondo kwagh u Ruamabera a tese la

17. Se lu va eren iemberyolough shi kuren asaren a ase ken Paradiso nena?

17 Ken tar u he u Aôndo la, se fatyô u kuren asaren a ase shi eren iemberyolough kpaa. Kera kpa, Yehova yange gba se ér se kuren asaren a ase shi se eren iemberyolough i ia va se a msaanyol yô. (Orpa. 2:24) Yehova una ‘na hanma kwagh u uma sha isharen na, a kuman un’ sha hanma gbenda man hanma shighe cii. (Ps. 145:16) Ka sea er kwagh u nan se msaanyol shi se a mem yô, i doo se. Nahan kpa, ka sea ver ikyar i se ye a Yehova la hiihii yô, se seer zuan a iember. Kape ken Paradiso kpa, kwagh a va lu vough je la. Nahan, se lu eren kwagh sha kwaghfan aluer se hemba veren ishima u kuren asaren a ase ga, kpa se mba vanden keren Tartor la, shi se hemba veren ishima sha averen a ken jijingi a ior mba Yehova ve lu zuan a mi hegen la yô.Mat. 6:33.

18. Se tese ser se mba wan agoyol sha uma u tsôron u ken Paradiso la nena?

18 Ken Paradiso u a lu van la, se zua a msaanyol u i lu je se lu a vande zuan a mi ga yô. Yô, se tese nen ser, sar se tsung u zuan a uma u a lu uma jim la sha u wan agoyol sha mi hegen je. Se lu nen a aeren a Aôndo shi i saan se iyol kpishi u eren tom u i ne se u pasen kwagh u Tartor la sha gbashima. Yô, i saan se iyol tsung u eren akaa a ken jijingi. Shi er se ne uityendezwa mba Yehova jighjigh vangertiôr yô, ieren yase i tese hegen ér se mba keghen uma u ken tar u he la!

^ par. 14 Nenge takerada u ken zwa Buter u u lu a itinekwagh ér Young People Ask—Answers That Work (Mbampin Mba Agumaior A Pin La man Mbamlumun Mba Wasen) la, tihi u sha 2, peeji 311-318.