Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Julai 2015

Kwagh Gba sha Kwagh u Or u Nan Nengen Tom u U Eren Yôô?

Kwagh Gba sha Kwagh u Or u Nan Nengen Tom u U Eren Yôô?

BESALEL kua Oholiabi yange ve vande fan tom u maan kwagh. Yange vea soo u umbur ican i ve ya ken Igipiti u tan akam kpishi shighe u ve lu ikpan la ga. Kpa shighe u ve lu ikpan la kar. Hegen ne i tsua ve ér ve hemen tom u eren tabernakel, nahan ve hingir ior mba fan tomaveegh tsema tsema. (Eks. 31:1-11) Nahan kpa lu di ior kpuaa tseegh lu vea nenge a ityomaveegh igen i injaa i ve er la ye. Er lu ior kpuaa tseegh nenge a ityomaveegh ve igen la yô, kwagh la na ve iyolkpen shinii? Mimi je kwagh gba sha kwagh u or u yange nan nenge tom u ve er la yôô? Man we yô, kwagh gba sha kwagh u or u nan nengen tom u u eren laa?

ITYOM I INJAA I LU IOR KPUAA TSEEGH NENGE A MI YÔ

Akaa agen a yange i er i ver ken tabernakel la lu a doon ashe tsung je. U tesen ikyav yô, er ucerubi mba i er sha zenaria i ver sha areki u ikyuryan la nahan. Apostoli Paulu kaa ér, ve lu mba “iengem.” (Heb. 9:5) Hen ase er ucerubi mba i er sha zenaria u injaa la yange vea engem ashe tsung yô.—Eks. 37:7-9.

Aluer i zua a akaa a yange Besalel kua Oholiabi er la sha ayange ne yô, alaghga ma i ver ken iyou i koson akaa a Mbayiase, ape ior kpishi vea za nenge a mi yô, i doo ve yô. Kpa shighe u i er a la, lu iorov ume jim nenge a mdooashe u a laa? Yange i ver ucerubi mbara ken Icighankpar u Hemban cii; ape i lu zegepristi tseegh una nyôr ker kwa môm ken inyom, sha Iyange i Iwom la ve a nenge a mi yô. (Heb. 9:6, 7) Sha nahan yô, lu asande a ior kpuaa tseegh nenge a mi ye.

IOR A WUESE TOM WOU SHIN A WUESE GA KPA I SAAN WE IYOL

Tôô wer yange u lu Besalel shin Oholiabi shi u er ityomaveegh i injaa la, kpa gema lu ior kpuaa tseegh ve nenge a mi ye, nahan ma lu u nena? Nyian ne, ior ka vea er kwagh una doo azende a ve man aa wuese yô, ve tôô er ve er kwagh u injaa. Ka kwagh u ngu a na ve fa ér ve er tom u injaa je la. Kpa mbacivir Yehova yô, kwagh ve ngu kposo. Ka i saan se iyol zum u se lu eren ishima i Yehova shi a lumun se la, vough er Besalel man Oholiabi nahan.

Mbahemenev mba kwaghaôndo mba sha ayange a Yesu la, yange ve eren msen ken igbar sha er i doo ior yô. Nahan kpa, Yesu gema tese gbenda ugen, a kaa ér: Eren msen a ishima i môm, i de lu  sha ci u ior ve nenge nahan, ve wuese we ga. Sha ci u nyi? “Teru u A nengen ken myer la, Una ungwa imo you.” (Mat. 6:5, 6) Kwagh ne tese wang ér, ka mnenge u ior ve nengen mbamsen asev la a lu kwagh u vesen ga, kpa ka er Yehova a nengen ve la. Ka mnenge na la, ngu a tese ér msen wase ngu a inja mimi ye. Nahan kape nyityôkwagh i se er ken mcivir na cii kpa i lu je la. Saa ior vea wuese kwagh u se er la ve una lu u injaa ga; kpa saa kwagh shon una doo Yehova u “a nengen ken myer la.”

Yange mba been tabernakel yô, ibeenegh “va cir tenti u kohol ker la, iengem i TER kpaa iv ken tabernakel.” (Eks. 40:34) Kwagh ne tese wang ér Yehova lumun a tom la! U hen wer yange a lu Besalel man Oholiabi ken ishima nena hen shighe laa? Er i nger ati ve sha akaa a ve er la ga nahan kpa, yange saan ve iyol u fan er iveren i Yehova lu sha tom u ve er la yô. (Anz. 10:22) Yange a doo ve u nengen er i za hemen u eren tom a akaa ve er la ken mcivir u Yehova ken anyom aa dondo la kpen kpen. Zum u a va nder Besalel man Oholiabi shin ku ken tar u he la, a doo ve kpishi u fan er yange i civir Yehova ken tabernakel la nôngo u kuman anyom 500 yô!

Aluer ior nenge a tom u se lu eren a ishima i môm man a iyol hiden a mi ijime ne ga kpa, Yehova yô, nenge!

Sha ayange ne kpa, mba eren ityomaveegh mba ken nôngo u Yehova, er mba eren icer i vidio man mba kperan akaa man mbawanatsam man mba tôôn foto man mbageman kwagh kua mbangeren kwagh cii mba eren ityom i ior ve fe ér ka ve jighilii ve eren i ga yô. Sha nahan yô, or môm fe ér mba eren ityom i injaa ne ga. Shi ityom kpishi i i eren ken atôônanongo a hemban 110,000 tar sha won cii la kpa kape i lu je la. Ka an ka nan nenge er diakon u nengen sha inyar ngu a eren tom u ngeren akaa sha kwagh u inyaregh ki tiônnongo ken mbee u weregh laa? Ka an ka nan nenge er akawe u tiônnongo ngu a kohol ripoti i kwaghpasen i tiônnongo laa? Ka an ka nan nenge er anmgbian u nomso shin u kwase nan lu sôron ma kwagh u i gbe u a sôr sha Iyou i Tartor laa?

Yange i va na Besalel man Oholiabi iyôngo shin tsar gayô ma iyua igen u tesen ér ve er tom u injaa u doon tsung ga. Nahan kpa, ve zua a injar i i hemba akaa la cii yô, sha ci u Yehova lumun ve. Se kpa se fatyô u lun a vangertiôr ser Yehova yange nenge tom ve la. Yô, se dondo nen ikyav ve i hiden a iyol ijime shi keghen iyol u eren Yehova tom la.