Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Mei 2015

 NGEREN U PASEN KWAGH U UMA U OR

Ka Mea Umbur Dooshima U M Hii Lun a Mi sha Yehova la Nahan, I Wasem u Wan Ishima

Ka Mea Umbur Dooshima U M Hii Lun a Mi sha Yehova la Nahan, I Wasem u Wan Ishima

KWAGH u m lu ôron ne yange er shighe u iceenyolough ken inyom i 1970 la. Yange i kôrom gambe ken iyouci, hen gar ugen ken kpentar u Pennsylvania, tar u Amerika. Hanma shighe u miniti 30 ve kar cii yô, nôôsu u nomso ugen a karem BP sha u una fa er ishima yam i lu eren tom yô. M lu orshoja u kuman anyom 20, u yange m gba bouange ugen yô. Kwagh ne na ishima nyian nôôsu u lu nengen sha a mo, u lu tamen a mo anyom kpuaa la. Er BP wam lu vihin seer a seer yô, m kaa a na mer, “I lu nahan u nenge or kpe sha ashe a ou vee?” Mluashe na gema, maa a na mlumun ér, “Ei, m ngu a vande nengen ga.”

Hii shighe la je, lu inja er me war ga nahan. Kpa hii nan ve yange i va kôron gambe ken iyoucii? Yô, de ase m pase u kwagh u uma wam.

SHIGHE U M NYÔR ITYAV MBI NÔNGON LA

Yange m tôô angev shighe u m lu nan iwasen ken iyou i paven ior zum u i lu nôngon ityav ken tar u Vietnam la. Yange i doom u wasen mbauangev man mbavihin iyol, shi awashima wam lu u va hingir ortwer u paven ior. Ken uwer u Julai 1969 la, m za nyôr ken tar u Vietnam. Yange i tôô kasua môm i tesem akaa a ken tar la, sha u m fa shighe u her, shi m hoghol a iceenyolough i i lu her kpishi la yô, vough er i eren a mbahev mba ve za sember van la nahan.

M hoghol a akaa a ken tar la cii yô, m za hii tom ken iyouci i paven ior igen hen afo a uitya, ape agirgi a purugh kpishi wa ushoja mbavihin iyol poo va nyôr a mi la. Er m soo tar wam kpishi shi tom doom yô, fese je m gba a mi nan ior iwasen. Yange a ôôn ve avav a been yô, i yem a ve fese ken ayou a cuku a paven ior ker, a i er sha myô, i wa eekôndishen ker la. Ortwer u paven ior man u humen ior man unôôsu mbagenev uhar ve lu ken ayou a cuku ne, ve lu nôngon sha afatyô ve cii u waren uma. M gem ashe m kenger agirgi a purugh agen yô, m nenge i kange ikyav mbigen ken aba a il poo, mbi i lu a dugh ga yô. Yange i kaam ér aba la lu a aci a ushoja mba gbuuka pav ve ker avegher avegher ken uitya yô. Lu shighe u m kav mer m nyôr ityav mbi nôngon je la.

ER M KER AÔNDO YÔ

Shighe u m lu gumor la m war kaven kwagh u mimi

Shighe u m lu gumor la m war kaven kwagh u mimi u Mbashiada mba Yehova lu tesen la. Ngôm u doom mo ishima la lu henen Bibilo vea Mbashiada, kpa a vese zan zan kuma u a er un batisema ga. Yange i doom kpishi u teman keghen ato shighe u a  henen kwagh a ngôm la. Iyange igen mo vea nom u ngôm se za kar ikyua a Iyou i Tartor igen. Maa m pine un mer, “Ka nyi iyou la?” A kaa ér, “De ze ikyua a ior mbara mayange ga!” Er nom u ngôm ne doom ishima shi m na un jighjigh yô, m ungwa kwaghwan na ne. Sha nahan yô, m de kwagh u Mbashiada mba Yehova.

M undun tar u Vietnam m hidi ken tar u Amerika yô, sarem pe fan kwagh u Aôndo. Akaa a vihin tsung a m umbur la na yô, m ure kpishi. Lu inja er or môm kpa nan fa kwagh u yange lu zan hemen ken Vietnam la ga nahan. M umbur inyum i ior yange ve gba, ve due sha ugodobi, ve lu yilan mbautyaav mba Amerika ér ka shoja i wuan mbayev sha ci u ibaver nyôr a ve ér i sôngo mbayev ken ityav mbira.

Er m lu keren mer me bee a ijen i ken jijingi yô, m hii u zan mbaadua kposo kposo. Aôndo doom ishima, kpa akaa a m tagher a mi ken mbaadua la doom ga cii. Ken masejime yô, m za hen Iyou i Tartor i Mbashiada mba Yehova, hen gar ugen ken kpentar u Florida la. Lu sha iyange i Lahadi, uwer u Febewari 1971 la, m za hen Iyou i Tartor ne ye.

M za nyer ken Iyou i Tartor yô, i na kwaghôron u ken gbar lu nôngon u been, nahan m tema m ungwa kwagh u i lu henen ken Iyoukura la. M umbur itinekwagh i yange i lu henen la ga, kpa m gema m umbur kwagh u mbayev mba kiriki mbagenev mba ve lu bughun Bibilo sha u vea zua a avur a i lu teren a la yô. Kwagh ne doom je zua ga! M kegh ato zulee shi m lu nengen kwagh u lu zan hemen la. Mkombo been, m ngur duen ken Iyou i Tartor, mer me yem yô, anmgbian ugen u nôngo u kuman er anyom 80 nahan va hen a mo. I yilan anmgbian ne ér Jim Gardner. A tesem takerada ugen u u lu a itinekwagh ér The Truth That Leads to Eternal Life (Mimi u A Ne Uma u Tsôron la) maa a kaa ér, “Wea lumun yô, ngohol takerada ne.” Maa se lumun ser se hii Bibilo i henen Tomanyiin pepe.

Yange gba u me er tom sha iyange i Laha la aikighe. I tôôm tom hen iyouci igen hen gar u Boca Raton, kpentar u Florida, ape kwagh a er or aburabur ve i hii van a nan la. M hiin tom sha ahwa 11 utu, m za kuren sha ahwa 7 pepe. Er yange i huan tugh yô, m fatyô u ôron takerada u The Truth That Leads to Eternal Life la. Iyange igen yô, kwasenôôsu u tamen ugen va tsuwem takerada la sha uwe, kenger igbenda na, maa ngor ér, “U soo u hingir Orjohova zee?” Mo kpa m hide m tsuwe takerada wam hen a na kera, maa m kaa mer, “M ôr takerada ne gba atô tseegh kpa, kam er me hingir Orshiada u Yehova keng yô!” Kwasenôôsu la maa kar yem kwagh na. Hen tugh mbura, m mase ôron takerada la been.

Lu anmgbian Jim Gardner, u yange i shighe un mkurem shi fa Charles Taze Russell la tesem Bibilo ye

Kwa u hiihii u Anmgbian Gardner va u henen Bibilo a mo la, m pine un mer, “Nahan, ka nyi se lu henene?” A na mlumun ér, “Ka takerada u yange m na u la.” Tsô m kaa mer, “M ôr u m bee.” Nahan Anmgbian Gardner kaa ér, “Kpa de se gba henen ityough ki hiihii ne tsô.” Se mba henen ki yô, kpiligh mo iyol er yange m kav akaa kpishi ker ga yô. Yange wasem m ôr avur a ruamabera kpishi ken mgber u Bibilo yam i King James Version la. Lu shighe u m hii u henen kwagh u Yehova, Aôndo u mimi je la.  Anmgbian Gardner, u i doom yilan un mer Jim la, hen mtom mtar ken takerada u Truth la vea mo pepe la. Hii shighe la je, hanma Tomanyiin pepe yô, se hen mtom mtar ken takerada la. Kwaghhenen la yange a doom je i zua ga. Anmgbian Gardner lu Orshiada u i shighe un mkurem, nahan lum kwagh u civirigh kpishi u henen kwagh sha ikyev i anmgbian u fa anmgbian Charles T. Russell ne!

Ukasua mba kar kpuaa yô, i lumun ér mo m hingir orpasen loho u dedoo. Jim yange wasem u nôngon a mbamtaver av kpishi, kua mtaver u m lu a mi sha kwagh u pasen loho u dedoo sha uya uya la. (Aer. 20:20) Er m pasen kwagh vea na imôngo yô, tom la va hingir u doon mo. Zan zan hegen kpa m nenge tom u pasen kwagh la mer ka tom u civirigh u hemban cii. Ka kwagh u saan mo iyol kpishi er m lu orshirentom a Aôndo imôngo yô!—1 Kor. 3:9.

DOOSHIMA U M HII LUN A MI SHA YEHOVA LA

De m pase u kwagh u dooshima u yange m hii lun a mi sha Yehova la. (Mpa. 2:4) Dooshima la wasem u nôngon a akaa a vihin tsung a ka m umbur sha kwagh u uitya man atsan agen kpishi a m tagher a mi la.—Yes. 65:17.

Mdoo u Yehova a doom ishima la wasem u nôngon a akaa a vihin tsung a ka m umbur sha kwagh u uitya man atsan agen kpishi a m tagher a mi la

I erem batisema ken uwer u Julai 1971 sha mkohol u vesen u lu a itinekwagh ér “Divine Name” (Iti i Aôndo) la, hen agirigi u anumbegh u hen Yankee la

M umbur kwagh u vesen ugen u yange erem sha iyange i igen ken inyom i 1971 la. Mbamaren av sember zendan mo hen ya ve u ve lumun m tsaan her la. Lu kwagh u nom u ngôm a lumun Orshiada u Yehova nana lu hen ya na ga! M lu a inyaregh kpishi hen shighe ne ga. Iyouci i m eren tom her la, kimbin mo hanma kasua uhar, man m vande vihin inyaregh ki i kimbim la sha u yamen akondo a me huan me duen kwaghpasen yô, sha er me va a ilyahan sha iti i Yehova ga yô. Yange m koso inyaregh ki gen mape, kpa lu ken banke ugen ken kpentar u Michigan, ape m vese la. Nahan gba u me tsa shin mato wam ayange a kar kpuaa. Yange m hondon gbem shi m ôôn iyol ken ahungwa akôngo a a lu sha utashan mba teen mkurem la.

 Shighe u m tsaan shin mato wam la, iyange igen m za nyôr ken Iyou i Tartor ica i gba cii ve annongo u duen kwaghpasen ugen va mase kohol imôngo, eren mkombo u duen kwaghpasen ye. M sember yaren tom ken iyouci la kurun. Shighe u m tema ken Iyou i Tartor, ape or môm nana fatyô u nengen a mo ga la, m umbur akaa yange erem ken tar u Vietnam la. M umbur kwagh u ior mba yange i nande ve ve, ihyuma kpurum la man azen a awambe a yange m nenge a mi la nahan, huram kondo. M lu ungwan shi nengen a agumaior a a lu zamber a mo, pinen ér, “Me war je kpa? Me war je kpa?” la ken ishima yam vindi vindi. Yange m fa er vea war ga yô, kpa m nôngo sha fatyô wam cii m sur ve ishima sha u tesen sha ishigh yagh mer a wua ve ga. Er m tema m lu henen sha kwagh ne la, ishima zam iyol tsung.

M nôngo sha afatyô wam cii sha er me ta dooshima u yange m hii lun a mi sha Yehova la kera ga yô, hemban je yô sha ashighe a m lu tagher a atsan man mbamtaver la

Yange m er msen je mliam ndôôr mo ashe. (Ps. 56:8) M hii u henen sha kwagh u ishimaverenkeghen i mnder u shin ku la. Maa m kav mer, Yehova Aôndo una va bee a akaa a vihin tsung a m nenge a mi la, kua ican i ken ishima i mo man mbagenev se ye la cii shighe u una nder ior shin ku la. Aôndo una va nder agumaior a yange i wua ve la cii, nahan vea zua a ian i henen kwagh u mimi sha kwagh na. (Aer. 24:15) Kwagh ne na yô, Yehova doom ishima je ikighir kera lu ga. Iyange la ia hungur mo mayange ga. Hii shighe la je, m nôngo sha afatyô wam cii sha er me ta dooshima u yange m hii lun a mi sha Yehova la kera ga yô, hemban je yô sha ashighe a m lu tagher a atsan man mbamtaver la.

YEHOVA TESEM ERDOO

Ior ka ve er aferakaa a kpiligh iyol ken uitya. Mo kpa yange m lu nahan. Kpa m zua a iwasen sha u gbidyen kwar sha avur a Bibilo ahar a a doom tsung ne. Ivur Bibilo i hiihii la ka Mpase 12:10, 11. I kaa ér se hemba Diabolo ityav sha kwaghôron u shiada wase man sha awambe a Waniyôngo la kpaa. Ivur i sha uhar la di ka Mbagalatia 2:20. Ivur la wasem u fan mer Yesu Kristu kpe ‘sha ci wam.’ Awambe a Yesu la na yô, Yehova zungwem mhôônom shi dem a asorabo a m er la. Er m fe nahan yô, kwagh la wasem m ngu a imoshima i wang shi mgbegham u eren kwagh u m fetyô la cii sha u wasen ior ve fa mimi u sha kwagh u Yehova Aôndo wase u a zungu mhôônom la!Heb. 9:14.

Ka mea hide mea hen sha uma wam yô, m wuese kpishi er Yehova a ze hemen u wan mo ikyo nahan. Ikyav i tesen yô, yange Jim fe ér m ngu tsan shin mato je maa a kaa a mo ér m za kohol anmgbian u kwase ugen u lu a ya u naan haya yô. M na jighjigh sha mimi mer, lu Yehova je mgbegha Jim man anmgbian u kwase la u keren mo ijiir i tsan ye. Yehova ngee a erdoo! We mbacivir un sha mimi ikyo.

M HEN U TESEN ISHIMATSEEN SHA U EREN KWAGH SHA KWAGHFAN

Ken uwer u Mei, inyom 1971 la, hingir hange hange u me yem ken Michigan me za er kpenga. Kpa cii man m undu Tiônnongo u Delray Beach, ken kpentar u Florida la yô, m wa ityakerada shin ityô i mato wam poo, maa m gba nahan mato yemen sha zege gbenda ugen, vegher u ken imbusutarimese la. Cii man m undu kpentar u Georgia u u lu ikyua a Florida la nahan, ityakerada i yange m wa shin ityô matoo la cii bee. Yange m pase loho u dedoo u Tartor sha gbashima sha ajiir atô kposo kposo. M pase kwagh sha upurusu, shi ken ahungwa akôngo a a lu sha ajiir a memen je kpa m na ior utrak. Zan zan nyian kpa m fatyô u fan aluer ivor igen i yange m lôô la mende shin mende ga ze.—1 Kor. 3:6, 7.

Nahan cii kpa, u ôron kwagh sha mi yô, shighe u m hii fan mimi la, m eren kwagh sha kwaghfan ga, hemban je yô shighe u mea pasen mba hen tsombor wam kwagh la. Er Yehova doom ishima kpishi sha hiihii la yô, m pasen ior kwagh vangertiôr, kpa m gema m er kwagh ne sha kwaghfan ga. Yange anngôôv av John man Ron, doom ishima tsung, nahan m lu kighir ve mer ve fa mimi. Ken masejime yô, m va kaa a ve mer ve yam anyi sha ibume ieren yam ne. Nahan kpa, m za hemen u eren msen mer Yehova  a wase ve ve fa mimi. Hii shighe la je, Yehova za hemen u tesen mo, nahan m ngu hemban pasen ior kwagh shi tesen ve sha kwaghfan hegen.—Kol. 4:6.

MBAGENEV MBA VE DOOM ISHIMA YÔ

Er Yehova a doom ishima tsung nahan kpa, mbagenev kpa doom ishima. Orgen u nan doom ishima kpishi yô, ka kwase wam Susan. Yange m soo u zuan a kwase u nana wasem u eren tom u Tartor la yô. Susan ka kwase u a lu kôôsôô a Yehova yô. M umbur wang er yange m za un inya iyange igen shighe u se lu sôôr ayol a ase la yô. Susan yange tema sha hunda hen ya u mbamaren nav. Lu ôron Iyoukura a Bibilo na. Kwagh u yange doom a na je yô, lu ôron ngeren mba i henen ken mkombo ga la, shi lu ôron avur a ruamabera aa lu ker la. Maa m kaa ken ishima yam mer, ‘Yehova doo kwase ne ishima!’ Nahan se er ivese ken inyom i 1971 la, shi doom kpishi er hii shighe la je, a lu a mo ikyooso ikyooso shi a lu suen mo nahan. Kwagh u a hembe doom mo a na jim je yô, ka er m doo un ishima, kpa Yehova a hembe doo un ishima la.

Mo vea kwase wam Susan, man ônov asev, Paul man Jesse

Susan vea mo se mar ônov uhar, ka Jesse man Paul je la. Yehova lu a ve shighe u ve lu vesen la. (1 Sam. 3:19) Er ve gema mimi hingir kwagh ve yô, ve va Susan man mo a icivir. Ve za hemen u civir Yehova sha ci u ve umbur dooshima u yange ve hii lun a mi sha a na la. Hanmô ve nan er tom u pasen kwagh hanma shighe la hemba anyom 20 hegen. Shi m te ave vanger a kasev mba ônov av, mba ve doonashe mba i  yer ve ér Stephanie man Racquel la. Ka m nenge mer ka ônov av kpôô kpôô. Ônov av cii vôso kasev mba Yehova Aôndo a doo ve ishima a uma ve cii man ishima ve cii yô.—Ef. 6:6.

Yange i doo se u za pasen kwagh hen haregh u i fe pasen kwagh her ga yô

Yange m eren batisema yô, m za er tom u sôron atôônanongo ken kpentar u Rhodef Island la kuma anyom 16, nahan m zua azende a injaa kpishi. M umbur akaa a doon tsung a yange m er vea mbatamen mbagenev, mba m er tom vea ve imôngo la. Heela tseegh ga, m wuese mbatamen mba ningir sha, mba ve ngee je me fatyô u teren ve sha ati ati been ga, mba yange ve wasem la. Kam kwagh u civirigh kpishi er m er tom vea ior mba dooshima u hiihii u ve lu a mi sha Yehova la a ndôhôr ga la! Ken inyom i 1987 la, se mough se yem ken kpentar u North Carolina, se za er tom ape kwagh a hemba gban sha mbapasenkwagh la. Heen kpa se zua a azende a injaa kpishi. *

M ngu eren mkombo u duen kwaghpasen shighe u m lu eren tom u ningir sha la

Ken uwer u Agusutu inyom i 2002 la, mo vea Susan se lumun u za eren tom vea tsombor u Betel u ken Patterson, tar u Amerika la. M er tom vea Gbaatom u Nengen sha Tomshiren. Susan di er tom shin ijiir i kiren akondo. Yange i doo un u eren tom ne kpen kpen! Maa mba ker uwer u Agusutu inyom i 2005 la yô, i tsuam m hingir môm ken Mbahemenev mba Shin Itine. Kpiligh mo iyol er mo di nahan kpa i nem tom ne yô. Yange cier kwase wam iyol kpishi sha zegetom u i nam la, kua ijende i se lu zenden la. Susan soo kwagh u purugh sha girgi la ga, kpa ka se shi purugh sha mi! Susan kaa ér mkaanem ma kasev mba Mbahemenev mba Shin Itine mbagenev ve ôr a na sha dooshima la, wase un, nahan un kange ishima u suen mo er un fetyô la cii. Shi mimi je ka kwagh u a er je la, nahan kwagh na doom je gande.

M ngu a ufoto kpishi ken afishi am mba ve gbem kwagh yô! Ka ve umbur mo akaa a injaa a m er ken uma wam la. M zua a averen a doon tsung sha u nôngon sha afatyô wam cii sha er Yehova una za hemen u doon mo ishima er sha hiihii la yô!

Yange mea tema imôngo vea mba hen tsombor wam nahan i doom i zua ga

^ par. 31 I ôr kwagh u tom u pasen kwagh hanma shighe u Anmgbian Morris er la dike dike ken Iyoukura i Maaci 15, 2006, peeji 26.