Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Maaci 2015

Sue Anmgbianev mba Kristu sha Mimi

Sue Anmgbianev mba Kristu sha Mimi

“Er ne er a mô gen u ken anmgbianev Av mba hemban gban ijime mban nahan yô, ka Mo je ne er a Mo nahan ye.”—MAT. 25:40.

1, 2. (a) Ka anzaakaa a nyi Yesu lam sha mi vea azende a na a kôôsôô? (Nenge foto u a lu sha mhii u ngeren ne la.) (b) Ka nyi i gbe u se fa sha kwagh u injakwagh i iyôngo man ivo laa?

YESU lu lamen vea a azende na a kôôsôô, Peteru man Yakobu man Anderia kua Yohane. Ve sember ungwan un ôr injakwagh i anuunaukase man i talenti la. Yesu mase kuren kwaghôron na a ve sha injakwagh igen. A pase kwagh u shighe u “Wan u or” una va ôr “akuraior cii” ijir la. Nenge er injakwagh ne yange ia doo mbahenen nav sha wono! Ken injakwagh la, Yesu hemba veren ishima sha kwagh u iniongo ihiar. Nongo u hiihii la lu kwagh i iyôngo; u sha uhar la di lu kwagh u ivo. Shi yange ôr kwagh u nongo ugen u sha utar u ú lu a inja kpishi yô. A yila nongo ne ér, “anmgbianev” mba “Tor la.”Ôr Mateu 25:31-46.

2 Kwagh u injakwagh ne gba ior mba Yehova ishima tsung, man ka sha inja je. Sha ci u ken injakwagh la Yesu ôr kwagh u una va er ior yô. A pase er i hii ve mbagenev vea va ngohol uma u tsôron, kpa mbagenev vea ngohol mtim u tsôron yô. U se va lu uma yô, saa se kav shi se dondo akaa a mimi a Yesu a er ken injakwagh ne la. Sha nahan yô, ken ngeren ne, se lu nan mlumun sha mbampin mba dondon mban: Yehova wase se u  kaven injakwagh ne nena? Se fatyô u kaan ser, injakwagh la tese er tom u pasen kwagh la u lu hange hange sha ci u nyi? Ka unô i ne ve tom u pasen kwagh la? Man hii nan ve hegen i lu shighe u i doo u se sue “Tor la” man mba a yer ve ér “anmgbianev av” la sha mimi?

YEHOVA WASE SE SE HEMBA KAVEN INJAKWAGH LA NENA?

3, 4. (a) Ka akaa atar a vesen a nyi i gbe u se fa sha kwagh u injakwagh i iyôngo man ivo laa? (b) Ken inyom i 1881 la, Iyoukura pase injakwagh ne nena?

3 Cii man se zua a mkav u vough sha injakwagh i iyôngo man ivo la yô, gba u se fa akaa atar ken injakwagh shon: ior mba i er kwagh ve la man shighe u ijirôron la, kua ityôkyaa i i ne ve i pav iyôngo a ivo la.

4 Ken inyom i 1881 la, Iyoukura i Shion, pase ér “Wan u or,” u shi a lu “Tor la,” ka Yesu. Mbahenen Bibilo mba sha ayange tsuaa la, kav ishember i i “anmgbianev av” la ér, ngi ôron kwagh u mba vea va hemen vea Kristu imôngo la, man uumace cica cii, mba vea va hingir vough shin tar la. Yange ve nenge ér, a va pav iyôngo a ivo zum u Hemen u Kristu u Anyom Dubu la. Shi ve na jighjigh ér, ior mbagenev vea va lu iyôngo sha ci u ve dondo tindi u Aôndo u dooshima la.

5. Ken kwavanyom u 1920 la, yange i nyôôso mkav wase nena?

5 Ken mhii u kwavanyom u 1920 la, Yehova wase ior nav nyôôso mkav u ve lu a mi sha kwagh u injakwagh ne la. Iyoukura i Oktoba 15, 1923 la, pase ér “Wan u or” la, ka Yesu. Sha nahan yô, Iyoukura la er tom a avur a Bibilo agen pase ér mba i er kwagh ve ér mba anmgbianev mba Kristu la, ka mba vea za hemen vea Yesu Sha la, gema mba ve lu iyôngo la di ka mba ve lu a ishimaverenkeghen i va lun uma shin tar sha hemen u Tartor u Kristu la. Hide shighe u a va pav iyôngo a ivo la di ye? Ngeren la kaa ér, a lu sha shighe u Hemen u Anyom Dubu, zum u anmgbianev mba Kristu vea lu hemen vea na Sha la. Ka nahan man mba ve lu iyôngo igen la vea fatyô u wasen ve ga ye. Sha nahan yô, a gba u a va pav iyôngo a ivo cii man Hemen u Anyom Dubu la ua hii ye. Hide ityôkyaa i i ne ve i kaa ér mbagenev mba iyôngo la yô, ngeren la mase kuren ikyaa ér a va ôr ior ijir ér mba iyôngo sha ci u yange ve lumun ér Yesu ka Ter ve shi ve ver ishima ér ka Tartor na la ua va a uma u hemban doon ye.

6. Ken inyom i 1995 la, i hide i nyôôso mkav wase nena?

6 Mkav wase u yange i hide i nyôôso ne na yô, ior mba Yehova nenge ér a lu ôron ior ijir ér mba iyôngo shin ivo ken ayange masejime ne cii, nahan ka er vea ungwa loho u Tartor la shin vea ungwa ga la ve a tese ér mba iyôngo shin ivo ye. Nahan kpa, ken inyom i 1995 la, se hide se nyôôso mkav wase ne. Ngeren mba uhar mba ken Iyoukura i Oktoba 15, 1995 la yange ve pase akaa a a ne ve mkaanem ma Yesu ma i nger ken Mateu 24:29-31; 25:31, 32 la (ôr), ma zough sha ma i nger ken Mateu 25:31, 32 la yô. (Ôr.) * Maa i kure ikyaa ér nyi? Ngeren u hiihii la kaa ér: “Shighe u a va ôr iyôngo man ivo ijir la ngu ken hemen.” Kpa a lu shighe u han jighilii? “A lu shighe u ‘ican’ i i ter ken Mateu 24:29, 30 ia va shi Wan u or ‘Una va sha iengem na’ kera la. Nahan, sha shighe u mkur ne, Yesu una tema a ôr ior ijir.

7. Ka mkav u nyi se zough a mi hegen wang-na?

7 Nyian ne, se hemba zuan a iwanger sha injakwagh i iyôngo man ivo la. Sha kwagh u ior mba Bibilo i er kwagh ve ken  injakwagh ne la yô, ka Yesu a lu “Wan u or,” shin Tor la ye. Mba i̱ yer ve ér “anmgbianev av” la, ka anmgbianev mba nomso man mba kasev, mba i shigh ve mkurem, mba vea va hemen vea Kristu Sha imôngo la. (Rom. 8:16, 17) “Iyôngo man ivo” la tile sha ityough ki ior mba ken akuraior cii. Mban ne ka mba i tsough ve sha icighan jijingi ga la. Hide shighe u ijirôron la di ye? A ôr ior ijir ne er zegecan, u a sôôn van ne, una lu yemen u za kuusu la. Kpa a gema a ôr ior ijir ér mba iyôngo shin ivo sha ci u ityôkyaa i nyi? Ka er vea lu eren kwagh a asande a anmgbianev mba Kristu mba i shigh ve mkurem, mba ve lu shin tar la, a tese ér mba iyôngo shin ivo ye. Er mkur u tar ne a mgbôghom hegen ne, se mba a iwuese kpishi er Yehova a seer tan iwanger sha injakwagh i iyôngo man ivo la, kua anzaakaa agen a a gbe a zough sha injakwagh shon, i nger kwagh u a ken Mateu 24 man 25 la nahan!

INJAKWAGH LA TESE ÉR GBA U A ER TOM U KWAGHPASEN LA NENA?

8, 9. Er nan ve i kaa ér iyôngo la, ka “mbaperapera”?

8 Ken injakwagh i i iyôngo man ivo la, Yesu ôr kwagh u tom u kwaghpasen la jighilii ga. Nahan se fatyô u kaan ser injakwagh la ngi ôron kwagh u tom u kwaghpasen sha ci u nyi?

9 Hiihii yô, fa wer Yesu lu eren tom a injakwagh ne sha u tesen ior. Mimi yô, lu ôron kwagh u paven iyôngo shin ivo kpôô kpôô ga. Nahan lu kaan ér hanma or u i er nan ijir i kaa ér nan ngu iyôngo cii yô, gba u nana na anmgbianev nav kwaghyan shin nana zer ve ikyondo shin nana va nenge ve angev shin nana va sôr ve ken gaadi kpôô kpôô ga. Kpa lu ôron kwagh u mba ve lu iyôngo i sha injakwagh la vea va er a anmgbianev nav la. A pase ér iyôngo la ka “mbaperapera,” sha ci u ve kav ér Kristu ngu a nongo u anmgbianev nav mba i shighe ve mkurem la shin tar ne heregh, shi mba suen ve sha mimi ken ayange a masejime a ican ne.Mat. 10:40-42; 25:40, 46; 2 Tim. 3:1-5.

10. Mba ve lu iyôngo la vea tese anmgbianev mba Kristu erdoo nena?

10 Sha uhar yô, time ase sha kwagh u Yesu lu ôron ve va ôr mkaanem nam man yô. Lu lamen sha kwagh u ikyav i mve na man i mkurtar la. (Mat. 24:3) Ken mhii u kwaghôron na la, Yesu tese ér ikyav i mve na la ia kua tom u injaa ugen. Tom shon ka loho u dedoo u Tartor u “á ôr u á tser tar” la. (Mat. 24:14) Shi Yesu yange vande ôron injakwagh i talenti la cii man ôr injakwagh i iyôngo man ivo la ye. Er se vande pasen ken ngeren u karen la nahan, Yesu ôr injakwagh la sha u tesen mbahenen nav, mba i tsegha ve sha icighan jijingi, ve hingir “anmgbianev” nav la ér, gba u vea er tom u kwaghpasen la sha gbashima. Nahan kpa, mba i shigh ve mkurem, mba ve shi her shin tar ne, sha shighe u mve u Yesu ne vese iyenge ga. Nahan mba a zegetom u pasen “akuraior cii” kwagh man mkur una va ye. Injakwagh i iyôngo man ivo la tese ér gba u a wase mba i shigh ve mkurem la tom ne. Sha nahan yô, gbenda u vesen u mba i kaa ér mba iyôngo la vea tese anmgbianev mba Kristu mbara erdoo yô, ka u wasen ve u eren tom u pasen kwagh la. Iwasen i i gbe u a na ve ne wa nyi man nyi kera? Ka u suen ve sha inyar shi surun ve ishima tseegh shinii, gba u a er kwagh a hemba nahana?

KA UNÔ I GBE U VEA PASEN KWAGHA?

11. Ka mpin u nyi a dughu, man ka sha ci u nyi?

11 Nyian ne, mbahenen mba Yesu mba ve kom umiliôn 8 la, kpishi ken ve ka mba i tsough ve sha icighan jijingi ga yô. Ve yô, Yesu na ve utalenti mba yange na mbatomov nav mba i shigh ve mkurem la ga. (Mat. 25:14-18) Nahan mpin u a gem a  dugh yô ér, gba u mba i shigh ve mkurem ga la vea er tom u pasen kwagh laa? Een. Nenge ase atôakyaa a a ne ve mlumun u sha mpin la a lu een yô.

12. Ka nyi se hen ken mkaanem ma Yesu ma i nger ken Mateu 28: 19, 20 laa?

12 Yesu yange kaa a mbahenen nav cii ér ve pase kwagh. Yange mba nderen Yesu shin ku kera cii yô, a kaa a mbadondon un ér ve za gema ior ve hingir mbahenen, shi ve tese ve u kuran “akaa” un we ve kwagh sha mi la “cii.” Môm ken akaa shon yô, lu tom u pasen kwagh la. (Ôr Mateu 28:19, 20.) Sha nahan yô, gba u mbahenen mba Kristu cii vea pasen kwagh, vea lu a ishimaverenkeghen i za hemen Sha, shin i va lun uma shin tar ne kpaa.—Aer. 10:42.

13. Mpase u sha mnenge u Yohane la tese ér nyi, man ka sha ci u nyi?

13 Takerada u Mpase tese ér mba i shigh ve mkurem la man mbagenev cii, vea er tom u pasen kwagh la. Yesu yange tese apostoli Yohane mpase u sha mnenge u sha kwagh u “kwasehe,” u a lu mba i shigh ve mkurem, ve lu iorov 144,000, mba vea za hemen vea Kristu imôngo Sha la. Ken mpase shon, kwasehe la lu lôhôn ior ér ve va “ngohol mngerem ma umam gbilin.” (Mpa. 14:1, 3; 22:17) Mngerem man tile sha ityough ki akaa a Yehova a er sha u una hide a paa uumace cii sha ikyev isholibo man ku, sha nagh ku Kristu ku ipaan kura yô. (Mat. 20:28; Yoh. 3:16; 1 Yoh. 4:9, 10) Nagh ku ipaan kura ka loho u vesen u se pasen yô, kpa ka mba i shigh ve mkurem mbara ve lu hemen sha u wasen ior ér ve kav shi ve zua a iwasen ken nagh ku ipaan shon ye. (1 Kor. 1:23) Kpa ken mpase u sha mnenge shon, Yohane nenge a ior mbagenev mba ve lu ken nongo u kwasehe la ga yô. Ve kpa i kaa a ve ér, ve lôhô ior ve “Va!” Ve lumun shi mba lôhôn mbagenev ér ve va ngohol mngerem ma umam. Ka mba ve lu nongo u sha uhar ne, ve lu a ishimaverenkeghen  i va lun uma shin tar ye. Sha nahan yô, mpase u sha mnenge la tese wang ér mba ve lumun myer u i yer ve ér “va” la cii, mba a tom u pasen mbagenev kwagh.

14. U dondon “tindi u Kristu” la wa nyi man nyi kere?

14 Mba ve lu sha ikyev i “tindi u Kristu” la cii, gba kpee u vea pase kwagh. (Gal. 6:2) Yehova soo ér mbacivir un cii ve kuran atindi a un we la. Ikyav i tesen yô, yange kaa a Mbaiserael ér: “Tindi ngu môm sha ci u or u tar la kua shiror u a va nyer ne a nyôr la kpaa.” (Eks. 12:49; Lev. 24:22) Mbakristu mba sha ikyev i tindi u Mose ga. Kpa se cii, sea lu ken mba i shigh ve mkurem la, shin sea lu ga kpa, se mba sha ikyev i “tindi u Kristu.” Tindi la wa akaa a Yesu yange tese la cii ker. Kwagh u vesen u Yesu yange tese yô, ér mbadondon un ve tesen ior dooshima. (Yoh. 13:35; Yak. 2:8) Man gbenda u vesen u ka se tese ser Aôndo man Kristu kua mbawanndor a vese doo se ishima yô, ka sha u pasen loho u dedoo u Tartor la.—Yoh. 15:10; Aer. 1:8.

15. Er nan ve se fatyô u kaan ser, Yesu yange kaa a mbadondon un cii ér ve eren tom u pasen kwagha?

15 Mkaanem ma Yesu ôr a mbahenen nav mba kpuaa la, ashighe agen ma a fatyô lun sha ci u mbahenen kpishi. Ikyav i tesen yô, Yesu yange ya ikyur a mbahenen nav mba 11 mbara tseegh, kpa jighilii yô, ikyuryan shon wa mba 144,000 mbara cii ker. (Luka 22:29, 30; Mpa. 5:10; 7:4-8) Kape lu mbadondon mba Yesu kpuaa tseegh a na ve tom u pasen kwagh, shighe u nder shin ku ve ande hen a ve la je la. (Aer. 10:40-42; 1 Kor. 15:6) Kpa, mbahenen nav mba jighjigh mba sha ayange a mbaapostoli la cii kav er ve kpa gba u vea er tom ne yô, shin er ve ungwa kwagh shon sha zwa na ga nahan kpaa. (Aer. 8:4; 1 Pet. 1:8) Kape nyian kpa i lu je la. Yesu kaa a iorov miliôn anigheni, mba ve lu pasen kwagh sha gbashima la jighilii ér ve er tom ne ga. Kpa se cii se kav er se lu a tom u nan Kristu jighjigh shi tesen jighjigh la sha u eren tom u pasen kwagh la yô.—Yak. 2:18.

KA HEGEN I LU SHIGHE U CIVIR AÔNDO SHA MIMI YE

16-18. Mba ve soo u va lun iyôngo la vea fatyô u suen anmgbianev mba Kristu nena, man er nan ve i doo u vea er kwagh ne hegene?

16 Satan ngu nôngon ityav a asande a anmgbianev mba Kristu mba i shigh ve mkurem, ve lu shin tar ne her la, shi ngu hemban nôngon ityav mbin hegen cii, er “shighe na a kera vese ga” ne. (Mpa. 12:9, 12, 17) Er anmgbianev mba Yesu mban ve lu wan ishima a ameen nahan kpa, mba hemen u eren tom u pasen kwagh u hemban cii, u a tsa kpa a hungur a mi ga ne. Yesu ngu a ve shi ngu hemen ve je ka u hen a hen ga.Mat. 28:20.

17 Mba ve lu iyôngo, mba ve lu ngeen seer a seer la, mba a ian i civirigh i suen anmgbianev mba Kristu sha u eren tom u pasen kwagh la tseegh ga, kpa sha igbenda injaa igen kpaa. Ikyav i tesen yô, ka ve na iyua sha inyar shi ve wase u maan Ayou a Tartor man Ayou a Mkohol man iyaagh ki ubranci, shi ve keghen ato a ior mba “wanakiriki u jighjigh man u fan kwagh” la a tsough ve ér ve hemen la.Mat. 24:45-47; Heb. 13:17.

Mba ve lu er ka iyôngo la mba suen anmgbianev mba Kristu sha igbenda kposo kposo (Nenge ikyumhiange i sha 17 la)

18 Ica a kera gba ga tsô, mbatyomov vea pase ahumbe a zegecan la. Kwagh ne una er zum anmgbianev mba Kristu mba ve shi her shin tar ne la vea ngohol ikyav ve i masetyô kera la. (Mpa. 7:1-3) Cii man Armagedon a va yô, a vande tôôn mba i shigh ve mkurem la yemen a mi Sha. (Mat. 13:41-43) Sha nahan yô, ka hegen i lu shighe u mba ve lu a ishimaverenkeghen ér i va kure ve ijir ér mba iyôngo la, vea sue anmgbianev mba Kristu sha mimi ye.

^ par. 6 Wer soo u seer zuan a iwanger yô, nenge ngeren u a lu a itinekwagh ér, “How Will You Stand Before the Judgment Seat?” (A Na U Ibo Shin Ishô sha Iyange i Jirigh Laa?) man u a lu a itinekwagh ér, “What Future for the Sheep and the Goats?” (Kwagh A Va Za a Iyôngo man Ivo ken Hemen Nena?) ken Iyoukura i ken zwa buter i Oktoba 15, 1995 la.