Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Janawari 2015

Er Kwagh u Una Na Ivese Yen ia Taver shi a Saan Ne Iyol Yô

Er Kwagh u Una Na Ivese Yen ia Taver shi a Saan Ne Iyol Yô

“Aluer TER Una maa iyou ga yô, ka gbilin tsô mbamaan i la ve eren tom ye.”PS. 127:1a.

1-3. Ka mbamtaver mba nyi noov man kasev ve tagher a mini? (Nenge foto u a lu sha mhii u ngeren ne la.)

NOM ugen u a er ivese i kom anyom 38 hegen, shi i saan ve iyol yô, kaa ér: “Aluer u ngu nôngon kwagh kpoghuloo shi u ngu tesen wer u soo wer ivese you i doo yô, u fatyô u zuan a iveren i Yehova.” Sha mimi yô, noov man kasev cii vea fatyô u lun ken msaanyol shi wasen ayol a ve ken ashighe a taver kpaa.—Anz. 18:22.

2 Nahan kpa, ashighe kpishi noov man kasev ka ve tagher a “ican ken iyol.” (1 Kor. 7:28) Sha ci u nyi? Mbamzeyol mba noov man kasev ve tagher a mi ayange ayange la tseegh kpa, vea na ivese ve ia kera taver ga. Er ve yen yô, ashighe agen ka ve na or u ve vese nan la ishimavihin shi ve kera lamen gbar gbar ga. (Yak. 3:2, 5, 8) Shi ka i lu noov man kasev ican kpishi u eren ityom i yan shighe la shi nengen sha uôn. Er tom ka u na i tume noov man kasev mbagenev iyol yô, ka i taver ve kpishi u zuan a shighe u taver ivese ve. Alaghga ican i inyar shin angev, gayô mbamtaver mbagenev vea na yô, vea kera tesen ayol a ve dooshima shi vea naan ayol a ve icivir ga. Heela tseegh ga, ivese i dedoo je kpa ia fatyô u vihin sha ci u “aeren a iyolough,” er idya man ijimba man ihyom i kôron man iyongo i keren man iwuhe  man ishima i nyoon man u hendan akaa nahan.Gal. 5:19-21.

3 U hemban vihin cii yô, se mba ken “ayange a masejime” a ior kpishi ve we ayol a ve ikyo tseegh shi ve vende u civir Aôndo yô, man aeren ne nga a vihi ivese i ngôôr ga. (2 Tim. 3:1-4) Heela tseegh ga, orihyom ugen u vihin tu tsung kange ishima ér una pav noov vea kasev vev kpee. Sha nahan yô, apostoli Peteru ta se icin ér: “Orihyom wen diabolo ngu zenden er begha u tan kume nahan, keren or u una ya yô.”1 Pet. 5:8; Mpa. 12:12.

4. Noov man kasev vea er nan ve vea lu kangenaa shi a saan ve iyolo?

4 Nom ugen ken tar u Japan kaa ér: “Yange m va nyôr ken ican inyar kpoghuloo. Shi er m kera lu lamen vea kwase wam tsembelee ga yô, un kpa hingir un haghelaa. Heela tseegh ga, semberee ne, vihi un iyol tsung. Nahan ashighe agen, kwagh ne ka a na se hingir ayôôso.” Mbamtaver mbagenev ka mba noov man kasev vea fatyô u palegh ve ken ivese ga yô, kpa u ngu wer vea kanshio u nôngon a mi ga. Sha iwasen i Yehova yô, noov man kasev vea fatyô u lun ken bem shi ivese ve ia taver. (Ôr Pasalmi 127:1.) De se time sha akaa a ken jijingi ataan a aa wase noov man kasev vea lu kangenaa shi ivese ve ia tsa yô. Maa se nenge er dooshima una wase ve u eren akaa ne yô.

WA YEHOVA KEN IVESE YOU

5, 6. Ka nyi noov man kasev vea er ve vea lu wan Yehova ken ivese ve?

5 Kwagh u vesen u una wase noov man kasev vea lu kangenaa yô, ka u suur sha Yehova, un u yange hii kwagh u ivesegh la shi ungwan imo na. (Ôr Orpasenkwagh 4:12.) Noov man kwasev vea fatyô u wan Yehova ken ivese ve sha u dondon akaa a a we ve sha dooshima la. Bibilo ôr kwagh u ior mba Aôndo mba sha ayange a tsuaa la ér: “Ato ou kpaa aa ungwa kwaghôron ken ijime you u kaan er: Ka gbenda je ne, za nen sha u, zum u á sar ne u geman ken iyan shin ken imese la yô.” (Yes. 30:20, 21) Nyian ne, noov man kasev vea fatyô u ‘ungwan’ kwaghôron u Yehova sha u ôron Mkaanem ma Aôndo imôngo. (Ps. 1:1-3) Shi vea fatyô u seer taver ivese ve sha u eren Mcivir u hen Tsombor sha gbenda u a saan ve iyol shi vea taver ken jijingi yô. Shi u eren msen imôngo hanma sev la kpa ka kwagh u vesen u una wase ivaa ve ia taver, nahan vea hendan a mbamtaver mba tar u Satan ne yô.

Aluer noov man kasev mba eren akaa a ken jijingi imôngo yô, vea var a Aôndo man or u ve vese la, shi vea lu kôôsôô shi a saan ve iyol kpaa (Nenge ikyumhiange i sha 5, 6)

6 Anmgbian Gerhard u a lu ken tar u Jamani yô, kaa ér: “Zum u se tagher a mbamtaver shin se lu ken ayôôso, i kera saan se iyol ken ivese yase ga yô, kwaghwan u ken Mkaanem ma Aôndo ngu a wase se u wan ishima shi den ayol a ase kwaghbo. Gba u noov man kasev vea wan ishima shi vea deen ayol a ve kwaghbo ve ivese ve ia taver ye.” Noov man kasev ka vea nôngo kpoghuloo, vea wa Aôndo ken ivese ve sha u eren akaa a ken jijingi imôngo yô, ve var a Aôndo shi ve lu kôôsôô shi i saan ve iyol kpaa.

NOOV HEMEN NEN SHA DOOSHIMA

7. Gba u noov vea hemen nena?

7 Gbenda u nom nan hemen la ua fatyô u wasen kpishi, sha er ivese i nan ia taver shi msaanyol una lu ker yô. Bibilo kaa ér: “Ityough ki hanma nomsoor yô, ka Kristu, man ityough ki kwase yô, gema ka nom.” (1 Kor. 11:3) Kwagh u i lu ôron ve i va ter mkaanem mara la tese noov gbenda u i doo u vea hemen yô. Gba u vea hemen sha gbenda u Kristu kpa a hemen la. Yesu yange nyoon ishima a ior shin eren tswam a ve ga, kpa hanma shighe yô, a tesen ve dooshima shi a eren a ve kundu kundu shi norom ikyaa ga, shi lu ishima legh legh, shi keghen ityough kpaa ga.Mat. 11:28-30.

8. Nom una er nan ve kwase na una soo un shi una naan un iciviri?

 8 Gba u noov vea zer zan kasev vev iyol ér ve naan ve icivir ga, er Kristu nahan. Kpa vea ‘luun a kasev vev imôngo sha kwaghfan shi ve waan ve ikyo er kasev vev ve hembe yinan agee yô.’ (1 Pet. 3:7) Gba u noov vea ôron kwagh a kasev vev sha icivir shi vea zungwen ve mhôônom, ken igbar man ken iuv cii. (Anz. 31:28) Aluer nom ngu hemen kwase na sha dooshima nahan yô, kwase na a soo un shi una naan un icivir, shi Aôndo una ver ivese ve doo doo kpaa.

KASEV UNGWAN NEN IMO I NOOV ENEV SHI HIDEN NEN A IYOL IJIME

9. Kwase nana tese ér nan ongo imo i nom u nan shi nan hidi a iyol ijime nena?

9 Aluer se mba a dooshima u tangen iyol ga la sha Yehova yô, kwagh ne una wase se u hiden a ayol a ase ijime er uwegh nagh ku ageegh ku lu sha a vese yô. (1 Pet. 5:6) Gbenda u injaa u kwase u ungwan imo i nom ka nan tese icivir sha hemen u Yehova yô, ka u eren kwagh ken ijoughave vea nom u nan shi suen ivese i nan. Bibilo kaa ér: “Ne kasev, ungwan nen imo i noov enev er i doo ken Ter yô.” (Kol. 3:18) Ka mimi, a lu hanma kwagh u nom a tsough u eren cii una doo kwase na ga. Nahan kpa, aluer kwagh u nan tsough la per atindi a Aôndo ga yô, kwase u ungwan nom ka nan kegh iyol u lumun kwagh shon.1 Pet. 3:1.

10. Gba hange hange u kasev vea ungwan imo i noov vev sha ci u nyi?

10 Kwase nan ngu a ian i civirigh i lun “ijende” i nom u nan. (Mal. 2:14) Shighe u nom man kwase ve lu tsuan akaa hen tsombor yô, kwase nana pase mhen man mnenge u nan sha icivir, kpa nana zan hemen u ungwan imo i nom u nan her. Nom u lun a kwaghfan ka nan kegh ato a kwagh u kwase u nan a lu ôron la zulee. (Anz. 31:10-31) Kasev ka vea ungwan imo i noov vev yô, kwagh ne a va a bem man msaanyol, shi tsombor u eren kwagh ken mzough, nahan ve cii ve zua a mkom sha ci u ve fa ér mba eren ishima i Aôndo.—Ef. 5:22.

 DEEN NEN AYOL A EN KWAGHBO

11. Gba hange hange u noov man kasev vea deen ayol a ve kwaghbo sha ci u nyi?

11 Kwagh u vesen u ngu a wase ivese i tsa yô, ka u den orgen a kwaghbo. Noov man kasev ka vea ‘waan ishima a ayol a ve, shi vea deen ayol a en kwaghbo’ yô, kwagh ne a na ivese ve i taver. (Kol. 3:13) Nahan kpa, aluer nom shin kwase nan ngu umbur akaa a yange or u nan vese la nan er doo nan ga, shi nan ngu zeren teren a yô, kwagh ne una vihi ivese ve. Er iyou ka ia pav ikwe ve i kera taver ga nahan, ishimavihin man u wan kwagh ken ishima la ngu a na yô, i seer taver nom man kwase u den ayol a ve kwaghbo shi eren kwagh ken mzough. Nahan kpa, nom man kwase ka vea deen ayol a ve kwaghbo, er Yehova a den ve nahan yô, kwagh ne a taver ivese ve.—Mika 7:18, 19.

12. Dooshima “cirin asorabo kpishi” nena?

12 Dooshima u mimi “koson kwagh u bo ken ishima ga.” Jighilii yô, “dooshima cirin asorabo kpishi.” (1 Kor. 13:4, 5; ôr 1 Peteru 4:8.) Nahan aluer mbagenev doo se ishima yô, vea hii se er ma nyi, kpa se za hemen u den ve a kwaghbo. Shighe u apostoli Peteru pine Yesu ikwa i orgen a hii un ve una de nan a kwaghbo la, Yesu kaa ér: “I̱ lu zan zan akunduatargber kwa taankaruhar.” (Mat. 18:21, 22) Yesu lu tesen ér i ver a ver ikwa i Orkristu nana de mbagenev a kwaghbo a za kighir ga.—Anz. 10:12. *

13. Se er nan ve se palegh ieren i den mbagenev kwaghbo ga laa?

13 Anmgbian u kwase ugen, u i yer un ér Annette la kaa ér: “Aluer nom man kwase mba soon u den ayol a ve kwaghbo ga yô, vea hingir u wan kwagh ishima shi nan ayol a ve jighjigh ga, nahan kwagh ne una vihi ivese ve. Kpa ka wea deen or u u vese nan la kwaghbo yô, ivese yen i taver shi ne hingir kôôsôô.” Wea soo u palegh ieren i den orgen a kwaghbo ga la yô, nôngo lu a ieren i wuese kwagh. Hanma shighe yô, wuese or u u vese nan la sha mimi. (Kol. 3:15) U er nahan yô, u tema a kpe u iyol, shi u lu ken mzough vea nomou shin kwase wou, shi u zua a averen a mba ve den mbagenev kwaghbo ve zuan a mi la.Rom. 14:19.

DONDO TINDI U VESEN LA

14, 15. Ka nyi i lu Tindi u Vesen la, man noov man kasev ka vea dondo un nahan i wase ve nena?

14 U soo wer i eren a we sha ue shi i naan we icivir je ka ashe tugh ga. Ka a wa mbamhen man mbamnenge ou ikyo nahan i doo u kpishi. Kpa i lu nahan u ungwa or kaa ér, “U kuam, me kua u” vee? Alaghga ashighe agen se kav er i hii ve or er nahan yô. Nahan kpa, Bibilo gema kaa ér: ‘De kaan wer: Me er a na er a er a mo nahan, me or or shon iyev, ga.’ (Anz. 24:29) Jighilii yô, Yesu tese gbenda u hemban doon cii u sôron ayôôso a vesen. I fa tindi ne tsembelee je yô, ashighe agen ka i yila un Tindi u Vesen. A kaa ér: “Er i lu ne pe ior ve̱ eren a ven la, ne kpaa eren nen a ve di nahan kpaa.” (Luka 6:31) Yesu lu kaan ér, doo u se eren a ior er se soo ser ve eren a vese la, se de eren a ve dang sha ci u ve er a vese dang yum ga. Kwagh ne tese ér gba u nom shin kwase nana er kwagh u nan ver ishima u zuan a mi ken ivese i nan la ve nana zua a mi ye.

15 Aluer noov man kasev mba wan mbamnenge mba or u ve vese nan la ikyo yô, vea fatyô u taver ivese ve. Nom ugen shin tar u South Africa kaa ér: “Se nôngo  se dondo Tindi u Vesen la ken uma wase. Mimi yô, ashighe agen ka se gba anyiman, kpa se nôngo kpoghuloo se dondo Tindi u Vesen la sha u eren a hanma wase sha ue man sha icivir.”

16. Ka nyi i doo u nom shin kwase nana er a ikyar u nan ga?

16 De pasen mbagenev mbamyen mba ikyar u shin zeren teren aeren a na a a vihi u ishima la ga, a lu sha asenge tsô kpaa ga. Umbur wer ivese ka gesa u i lu gban sha u a fa or u nan hembe taver iyol shin nan hembe ngoron shin nan hembe fan u kaan orgen akaa la ga. Mimi yô, se cii se yina, man ashighe agen ka se vihi mbagenev ishima ker. Kpa ityôkyaa i môm ngi i nom shin kwase nana lam a ikyar u nan côu côu shin nana hee nan, shin u hemban vihin je yô, nana daa nan shin nana ta nan sambe ga.Ôr Anzaakaa 17:27; 31:26.

17. Noov vea dondo Tindi u Vesen la nena?

17 Shin er sha ajiir agen i nengen nomso mba ve gbidi kasev vev shin ve tswamen ve la ér mba ior mba ageev nahan kpa, Bibilo kaa ér: ‘Or u nan nyoon ishima fefa ga yô, nan hemba or u ageegh; u nan ker iyol i nan tsaha kpaa, nan hemba or u a ngohol gar sha utya yô.’ (Anz. 16:32) Gba u or a lu a shin ishima tsung ve nana fatyô u kôron iyol i nan tsaha er Yesu Kristu, or u hemban sha won cii, u yange lu shin tar la nahan ye. Or u nan lamen a kwase u nan côu côu shin nan gbidi un yô, nan ngu or u ikyoo ga, shi nana vihi ikyar i nan vea Yehova. Orpasalmi Davidi, u lu orageegh shi cian kwagh ga la je kpa yange kaa ér: “Nyoon nen ishima, kpa de eren nen isholibo ga; hen nen kwagh ken asema a en sha ugambe enev; lu nen ving.”Ps. 4:4.

“HAA NEN DOOSHIMA IYOL”

18. Gba hange hange u noov man kasev vea za hemen u tesen dooshima sha ci u nyi?

18 Ôr 1 Mbakorinte 13:4-7. Dooshima ka ieren i i hembe lun hange hange i noov man kasev vea lu a mi yô. “Haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan. . . . Kwagh u a hembe cii yô, haa nen dooshima iyol, ka kwagh u maghen mlu u vough je la.” (Kol. 3:12, 14) Noov man kasev ka vea lu a dooshima u tangen iyol ga, u Kristu kpa lu a mi la yô, kwagh ne a na ve lu kôôsôô shi ve taver ivese ve. Aluer imba dooshima ne ngu ken ivese yô, una na ivese la ia za hemen u taver, shin er ikyar u una lu a aeren a vihin we, shin una lu uange shin una lu tagher a mbamzeyol mba inyar shin una lu a zayol vea ior ou shin we u lu a zayol vea ior nav nahan kpaa.

19, 20. (a) Noov man kasev vea er nan ve vea lu kangenaa shi a saan ve iyolo? (b) Ka nyi se lu timen ken ngeren u dondon nee?

19 Mimi yô, gba u noov man kasev vea lu a dooshima shi vea eren kwagh a ikyar ve sha mimi, shi vea nôngo kwagh kpoghuloo ve, ivese ve ia doo ye. Shighe u mbamzeyol ve lu ken ivese yô, doo u noov man kasev vea ker u paven ga, kpa vea kange ishima ér vea hemba lun kôôsôô cii. Er Yehova man nomou shin kwase wou ve doo u ishima tsung yô, dooshima la a mgbegha u u sôron mbamzeyol ou mba ken ivese, sha ci u “dooshima been mayange ga.”—1 Kor. 13:8; Mat. 19:5, 6; Heb. 13:4.

20 Ken “ashighe a ican” ne, hemba taver cii u noov man kasev lun kangenaa ken msaanyol. (2 Tim. 3:1) Kpa sha iwasen i Yehova yô, vea fatyô. Nahan cii kpa, gba u noov man kasev vea kôr iyol tsaha sha er vea palegh idya ken tar u idya i dumbur ker ne yô. Ngeren u dondon ne una time sha kwagh u noov man kasev vea er ve vea er idya ga yô.

^ par. 12 Er i doo u noov man kasev vea nôngon u kuren mbamzeyol vev nahan kpa, Bibilo na nom shin kwase u ikyar u nan a er idya yô ian i paven ivaa gayô den nan a kwaghbo. (Mat. 19:9) Nenge ngeren u ken Awake! u Agusutu 8, 1995, u a lu a itinekwagh ér “The Bible’s Viewpoint: Adultery—To Forgive or Not to Forgive?” la.