“Aluer TER Una kura gar ga yô, ka gbilin tsô orkuran nan kor ye.”PS. 127:1b.

1, 2. (a) Averen a doon tsung yange kar Mbaiserael mba kuman iorov er 24,000 nahan sha ci u nyi? (b) Kwagh u yange er sha ayange a tsuaa ne ka icintan hen a vese nena?

ER KERA shi ica ga u Mbaiserael vea nyôr ken Tar u Ityendezwa la, nomso udubu imôngo er “idya a ônkasev mba Moabi.” Nahan Yehova tim ve kuma iorov 24,000. Nenge ase yô, kera shi ica ga u Mbaiserael vea ya dyako u ve lu veren ashe a mi ica i gba la, nahan kpa averen a doon tsung ne kar ve sha ci u ve gba ken imeen.Num. 25:1-5, 9.

2 I nger kwagh u Mbaiserael er u vihin tsung ne “sha u a̱ lu se ityesen, se mba mkur u ashighe a ve sha a vese ne” la. (1 Kor. 10:6-11) Hegen u se lu ken “ayange a masejime” ne, mbacivir Aôndo mba ikyua ikyua u nyôron ken tar u he u perapera la. (2 Tim. 3:1; 2 Pet. 3:13) Kwagh gema er vihi yô, mbacivir Yehova mbagenev de u kuran. I mee ve ve er idya, nahan ve hingir u nyôron ken mbamzeyol mba vihin tsung sha idya ve la. Aluer amba ne gema ishima ga yô, averen a tsôron la aa kar ve.

3. Gba u noov man kasev vea lumun kwaghwan man mkor u Yehova sha ci u nyi? (Nenge foto u a lu sha mhii u ngeren ne la.)

3 Er idya i dumbur nyian yô, gba u noov man kasev vea lumun kwaghwan man mkor u Yehova ve vea kura ivaa ve ye.  (Ôr Pasalmi 127:1.) Se lu henen er nom man kwase vea taver ivaa ve sha u kuran ishima ve shi kporom ikyua a Aôndo shi haan or u he iyol shi zan hemen u lamen doo doo shi yaven a ayol a ve yô.

KURA ISHIMA YOU

4. Ka nyi i ne Mbakristu mbagenev ve hingir u za eren idyaa?

4 Ka i er nan ve Orkristu nan hingir u za eren idyaa? Ashighe kpishi ka i hii sha ashe. Yesu yange pase wener: “Hanma or u nana kenger kwase sha u nana tôm un yô, nan er idya a na ken ishima je ve.” (Mat. 5:27, 28; 2 Pet. 2:14) Mbakristu kpishi mba ve er idya la, haa iyol inya sha kwagh u a eren a wang la sha u nengen ufoto mba ijimbagh shin ôron ityakerada i i er kwagh u yaven a or la, shin ve nenge akaa sha Intanet aa vihi ishima kpishi yô. Mbagenev di nenge ufiim man anumbe a sha tsembe man akaa a i tesen sha televishen, a a tese kwagh u yaven a or yô. Mbagenev di za upati mba i eren tugh tseegh la, shin mba ior ka ve er akondo ve lu idyelegh la shin ve za sha ajiir a tiligh ior iyol sha gbenda u ijimbagh.

5. Gba u se kura ishima yase sha ci u nyi?

5 Ior mbagenev gba ken imeen sha ci u ve hingir u za lun kôôsôô a or u nan lu nom ve shin kwase ve ga yô. Er se lu ken tar u ior ve ker iyol tsaha ga shi ve eren hanma idya cii yô, ka i lu ican ga u ishima yase i i we atseregh shi ka i tsugh se la, u mgbeghan se hingir u soon or u nan lu nom shin kwase wase ga yô. (Ôr Yeremia 17:9, 10.) Yesu kaa ér: “Ka ken ishima man aferakaa a henen kua iwoo-or man idya . . .ve dugh ye.”Mat. 15:19.

6, 7. (a) Ishima i wan atseregh ia fatyô u mgbeghan or u eren kwaghbo u nyi? (b) Or a er nan ve nana fatyô u palegh idyaa?

6 Ishima i wa atseregh kpishi, nahan asaren a bo nga a hii u wan amise ken ishima i nomsoor man kwase yô, ve hii u lamen sha akaa a i doo u ma i lu ikyar ve tseegh ma ve lu lamen sha mi vea nan la. Ica a gbaan ga yô, ve gba keren aan a vea seer luun imôngo yô, shi i lu inja er kwagh ngu zan hemen hen atô ve ga, ka di aburabur tsô ve zuan nahan. Er ve lu soon ayol a ve seer a seer la, i taver ve kpishi u eren kwagh u vough. Er ikyar ve i lu seer taver la, ka i hemba taver cii u den i, shin er ve fe nyiaan ér ka kwaghbo ve lu eren nahan je kpaa.—Anz. 7:21, 22.

7 Shighe a karen yô, ve hungur a atindi a Yehova a we sha kwagh u aeren a wang la, nahan asaren a bo kua iliam ve i na ve gba eren akaa a i lu u ma ve er a nom shin kwase ve tseegh la; ve hii u kôron ave shin susen zwa shin ovur ave iyol sha ajiir a kenden isharen shin benden ave iyol sha gbenda u jimbagh, man ambaakaa la nahan. Nahan ‘i mee ve sha asaren a ve iyol ve, i urugh ve sha hôn ve.’ Isharen la ia jilen iyol kera yô, i “gema i mar isholibo,” nahan ve hingir u za eren idya. (Yak. 1:14, 15) Nenge imba la sha wono! Luun er ve uhar cii ve de ér Yehova a taver ieren i nengen ivese ér ka icighankwagh la ken a ve yô, kwagh ne ma a wase ve u palegh isholibo i vihin tsung ne. Kpa or a nenge ivese ér ka icighankwagh nena?

ZA HEMEN U KPOROM IKYUA A AÔNDO

8. Aluer se ya ikyar a Yehova kôôsôô yô, kwagh la una wase se u palegh idya nena?

8 Ôr Pasalmi 97:10. Aluer se ya ikyar a Yehova kôôsôô yô, kwagh ne una wase se u palegh idya. Ka sea hen kwagh u aeren a Yehova a doon tsung la, shi sea nôngo sea hingir “mbakaven Aôndo er ônov mba doon ishima nahan,” shi sea ‘zenden ken dooshima’ yô, kwagh ne a taver se ishima u palegh “idya man hanma inja i hôngorough” cii. (Ef. 5:1-4) Er noov man  kasev ve fe ér “Aôndo Una ôr mbaerenijimba man mbavihin ivaa sha idya la ijir” yô, ka ve nôngo kwagh kpoghuloo sha er ivaa ve ia lu kwagh u civirigh shi ia lu a acôghor ga yô.Heb. 13:4.

9. (a) Yosev yange hendan a imeen i eren idya nena? (b) Ka akaa a nyi se fatyô u henen ken kwagh u yange er Yosev laa?

9 Mbacivir Aôndo sha mimi mbagenev haa iyol inya sha kwagh u aeren a wang la sha u lun imôngo vea ior mba sha ijiirtom ve, mba ve civir Yehova ga la shighe u i kur tom yô. Shighe u i eren tom la je kpa imeen ia fatyô u van. Yange lu hen ijiirtom na gumor Yosev, u doo ashe tsung la kav ér un doo kwase u orvesen na ishima tsung ye. Hanma iyange yô, a nôngo ér Yosev a yav a na. Ken masejime yô, “a kôr un sha ikyondo na, a kaa er: Va yav a mo.” Kpa Yosev nôngo osough, yevese yem kera. Lu nyi i wase Yosev ve tagher a imeen ne kpa, mayange haa iyol inya ga. Lu sha ci u a kange ishima ér mayange una vihi mlu na vea Aôndo ga ve, kôrcio u lun wang shi tilen sha mimi ye. Er Yosev tile sha mimi yô, i de un tom shi i wuhe un ken gaadi, nahan kpa, Yehova gema ver un doo doo. (Gen. 39:1-12; 41:38-43) Nahan a lu hen ijiirtom shin a lu ape se lu tswen vea orgen kpa, gba u Mbakristu vea palegh akaa a na vea hingir u za lun kôôsôô a or u ve vese nan ga la, sha er vea gba ken imeen ga yô.

HAA NEN OR U HE IYOL

10. Aluer se haa or u he iyol yô, kwagh ne una kura ivaa yase nena?

10 Aluer noov man kasev haa or u he u i “gbe un sha inja i Aôndo ken perapera u mimi man mtsegh u mimi” la iyol yô, kwagh ne una kura ve, nahan vea palegh idya. (Ef. 4:24) Ior mba ve haa or u he ne iyol yô, ve “wua” alegh a yolough a ve kera, ka “idya man hôngor man ityoronshima man isharen i bo man hua u eren” je la. (Ôr Mbakolose 3:5, 6.) Ishember i “wua” la, tese ér gba u se nôngo ityav a asaren a yolough kpoghuloo. Gba u se palegh nyityôkwagh i ia na se lu a isharen i za yaven a or u i lu nom shin kwase wase ga cii. (Yobu 31:1) Aluer se mba dondon atindi a Aôndo yô, kwagh ne una wase se se ‘nyagh kwagh u a lu u ifer’ la, se gema se ‘var a kwagh u dedoo.’Rom. 12:2, 9

11. Noov man kasev ka vea haa or u he iyol yô, kwagh ne a taver ivese ve nena?

11 Or u he la ka a tese “ibeen i Un u A gbe un” la, ka Yehova je la. (Kol. 3:10) Noov man kasev ka vea lu a “mhôônom ma kôron tsung iyol, man shi ieren i dedoo man iyol i gengese ga, man ishima i legh legh” yô, ivaa ve i taver shi Yehova a ver ve doo doo. (Kol. 3:12) Shi aluer ve de ér “bem u Kristu a̱ lu orhemen ken asema a [ve]” yô, vea hemba lun ken mzough ken ivese ve cii. (Kol. 3:15) Zum u noov man kasev ve ‘doo ayol a ve tsung’ yô, kwagh ne ngu a va ve a mbamtsera kpishi. Kwagh ne ngu a mgbegha ve, ve “hemen” u ‘nan ayol a ve icivir.’Rom. 12:10.

12. Ka aeren a nyi nahan u nenge wer nga hange hange sha u van a msaanyol ken ivese?

12 Zum u i pine anmgbian ugen u i yer un ér Sid la kwagh u a ne ve i saan un man kwase na iyol ken ivese ve yô, a kaa ér: “Dooshima ka kwagh u vesen u hanma shighe ka se nôngo u tesen ayol a ase yô. Shi se nenge ser ishima i legh legh la kpa ka kwagh u hange hange.” Kwase na Sonja, kpa lumun a mkaanem nam mara, shi a kaa ér: “Erdoo kpa ngu hange hange. Shi ka se nongo kpoghuloo se hiden a iyol ijime shin er ashighe kpishi ka i lu zange ga nahan kpaa.”

 LAMEN NEN DOO DOO

13. Ka kwagh u vesen u nyi ka a na ivese i tavera, man ka sha ci u nyi?

13 Aluer noov man kasev mba lamen kundu kundu yô, kwagh ne una na ivese ve ia taver je ka u henen a hen ga. Kwagh er vihi yô, noov man kasev mbagenev mba lamen a ikyar ve sha icivir ga cii, mba hembe nan ior mba ve fe ve ga kuaa, shin annyamev je kpaa icivir! Noov man kasev ka vea de “ishima i yuan man ishima i nyoon man iyugh man u zôhôn genger genger man ityuhwanev” a nyôr ken ivese ve yô, kwagh la ngu a na ivaa ve i kera taver ga. (Ef. 4:31) Doo u noov man kasev vea zeren lahan ayol a ve shin kaan ayol a ve akaa ga, sha er vea vihi ivese ga yô; kpa gba u vea maa ivese ve sha u lamen kundu kundu man sha gbenda u tesen mhôônom ma zungwen.—Ef. 4:32.

14. Ka akaa a nyi nahan i doo u se palegha?

14 Bibilo kaa ér, “shighe u huan ving” ngu. (Orpa. 3:7) Kpa kwagh ne ngu tesen ér gba u se nyôr ijôv, se de u lamen a ikyar wase ga, sha ci u gba hange hange u nom vea kwase vea lamen. Kwase ugen ken tar u Jamani kaa ér: “Ka wea lamen a ikyar u ga yô, ishima i vihi nan ker kpishi.” Shi a kaa ér: “Er ashighe agen ka i taver u lun ving shighe u i hingir hang nahan kpa, doo u ú lam sha ishimanyoon sha u ishima i gba u shimi ga. Ú er nahan yô, alaghga u ôr kwagh shin u er kwagh gagher u una vihi ikyar u ishima yô, maa kwagh a seer vihin a vihi.” Jighilii yô, noov man kasev vea sôr zayol ve sha u zôhôn genger genger shin den u lamen ga. Nahan doo u vea de ér i hingir ikye ve u eren ayôôso shi den ér a hingir zege kwagh ga, kpa vea sôron ayôôso fefa sha er ivese ve ia taver yô.

15. Kwaghôron u doon una fatyô u taver ivese nena?

15 Noov man kasev ka vea tôôn shighe vea lamen imôngo, vea pasen ikyar ve mbamnenge vev man er i lu ve ken ishima la yô, kwagh la a taver ivaa ve. Gba hange hange u se wa ikyo sha gbenda u se ôron kwagh a ikyar wase la kua kwagh u se ôron a nan la. Sha nahan yô, aluer a taver nan nan kpa, nôngo sha afatyô wou cii  kwaghôron wou a lu u doon, ken ikyenge you man sha asember a u lu lamen a mi la kpaa. U er nahan yô, a hemba lun ikyar u ican ga u keghen ato a we. (Ôr Mbakolose 4:6.) Nom man kwase vea fatyô u taver ivese ve, aluer kwaghôron ve ka u “doon u una fatyô u maan a maa kwagh ape kwagh a gbe sha mi yô.”—Ef. 4:29.

Aluer nom man kwase mba lamen doo doo yô, kwagh ne una taver ivese ve (Nenge ikyumhiange i sha 15 la)

EREN IKYAR U KWAGH U I LU KPEE U U EREN A NA LA

16, 17. Er nan ve i gbe hange hange u nom man kwase vea yaven ayol a ve shi vea ker u fan er i lu hanmô ve ken ishima?

16 Noov man kasev shi vea fatyô u taver ivaa ve aluer ve hii keren mkpeyol u ikyar ve, ve hemba wan iyol ve ikyo ga yô. (Fil. 2:3, 4) Gba u noov man kasev vea fa er i lu ikyar ve ken ishima la shi vea ker u kuren isharen i yaven a ikyar ve imôngo la.Ôr 1 Mbakorinte 7:3, 4.

17 Kpa kwagh gema er vihi yô, noov man kasev mbagenev mba soon u tesen ikyar ve dooshima shin tsan a nan hen ikya ga, shi nomso mbagenev ka ve nenge ér aluer or ngu eren a kwase u nan kundu kundu man sha ue yô, nan ngu nomsoor ga. Bibilo kaa ér: “Ne nomso kpaa, lu nen a kasev enev imôngo sha kwaghfan.” (1 Pet. 3:7) Gba u nom nana fa ér kwagh u i gbe u nana eren a kwase u nan la saa sha u tsan a nan tseegh ga. A hemba saan kwase iyol u yaven a nom na, aluer nom na ngu tesen un dooshima shi eren a na kundu kundu hanma shighe cii, ka sha ashighe a ve lu yaven imôngo la tseegh ga yô. Aluer nom man kwase cii mba tesen ayol a ve dooshima yô, a hemba lun ve ican ga u fan er i lu ve ken ishima la shi kuren isharen ve i yaven imôngo la.

18. Noov man kasev vea lu kôôsôô, shi vea taver ivaa ve nena?

18 Shin er nom man kwase ve lu a ityôkyaa i môm i eren idya ga nahan kpa, kwagh ugen u ka a na ve nom shin kwase nan hingir u za yaven a orgen yô, ka i lu sha ci u mba yaven imôngo tsembelee ga. (Anz. 5:18; Orpa. 9:9) Sha nahan yô, Bibilo wa noov man kasev kwagh ér: “De vende nen ayol a en [u tsan imôngo] ga, saa di alaghga né zua zwa ayol a en sha shighe u né ver yô.” Sha ci u nyi? Sha ci u “Satan a̱ de meen ne sha mban u kôron iyol tsaha la ga” yô. (1 Kor. 7:5) Aluer nom man kwase de ér Satan a ya mtsera sha “mban u kôron iyol tsaha” ve la, nahan mô ve nan hingir u gban ken imeen, eren idya yô, nenge imba er a vihi sha won yô! Kpa aluer nom shin kwase nan ngu “keren kwagh u doon sha ci u nan iyol i nan tsô ga, kpa [ka] kwagh u doon orgen,” shi nan ngu yaven a ikyar u nan sha ci u a doo nan ishima, ka sha ci u gba u nana er nahan ga yô, vea hingir kôôsôô, shi ivaa ve ia taver.—1 Kor. 10:24.

ZA HEMEN U KURAN IVAA YOU

19. Ka nyi i gbe u se kange ishima u erene, man ka sha ci u nyi?

19 Se mba ikyua ikyua u nyôron ken tar u he u perapera la. Nahan aluer se de asaren a yolough ya tor sha a vese yô, kwaghbo una tser se, er yange tser Mbaiserael iorov 24,000 hen ukpuunkpuun mba Moabi la nahan. Mkaanem ma Aôndo ma pasen kwagh u kunya man u vihin tsung u er Mbaiserael ne ma been yô, ma ta se icin ér: “Or u nan fe ér nan tile yô, nana̱ ver ishima er nana kera va gba ga yô.” (1 Kor. 10:12) Sha nahan yô, ka hange hange u se taver ivaa yase sha u zan hemen u eren kwagh sha mimi a or u se vese la, man Ter wase u sha la. (Mat. 19:5, 6) Hegen ne, gba u se nôngo kwagh a hemba ave a tse, se ‘nôngo tsung sha u i kohol se ken bem sha ishigh Nagh, se lu wang a acôghor iyol ga.’2 Pet. 3:13, 14.