Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

“Se Nenge a Ven ken Paradiso!”

“Se Nenge a Ven ken Paradiso!”

“Ú lu a mo imôngo ken Paradiso.”—LUKA 23:43.

ATSAM: 145, 139

1, 2. Ka mbamnenge mba nyi ior ve lu a mi kposo kposo sha kwagh u paradiso?

YANGE anmgbianev mba nomso man mba kasev mough ken ityar kposo kposo za mkohol ken geri u Seoul, tar u Korea. Mkohol za been mba ngur duen ken agirigi u yemen yô, Mbashiada mba ken tar la kumba her kpishi. Lu kwagh u kôron ken ishima kpen kpen. Mbagenev lu eren ve ave, kaan ér “Se nenge a ven ken Paradiso!” Kpa lu paradiso u han ve lu ôron kwagh naa?

2 Ior ka vea ôron kwagh u paradiso yô, ve ôron ve yemen a mi sha kwagh u ve fe yô. Mbagen kaa ér paradiso ka kwagh u a lu mape kpôô kpôô ga, ka di mhen u ken ishima tsô. Mbagenev di kaa ér paradiso ka ape u zough a msaanyol kua mkom her cii. Aluer or ngu ijen maa nan za asegh sha kwaghyan kpishi hen ma iniongo yô, nana kaa ér nan ngu ken paradiso. Kwase ugen yange nenge a ufaluwa kpishi shin pev ugen nahan doo un u kenger tsung, a kaa ér, “Hmm, nenge paradiso sha wono!” Zan zan nyian kpa mba yer ijiir la ér Paradiso, shin er senou ka a nôô her hanma inyom, a gba akpoghol, a tav a kuma umita 15 nahan kpaa. We ka a ôron kwagh u Paradiso nahan, ka nyi ka i va u ken ishima? U ngu veren ashe keghen Paradiso shono?

3. Ka hanma shighe i hii teren Paradiso ken Bibilo?

3 Bibilo ôr kwagh u paradiso u ngise lu yô. Shi i ôr kwagh u paradiso u una va lu ken hemen yô. I hii ôron kwagh u Paradiso ken takerada  u Bibilo u hiihii la je. Genese 2:8 kaa ér: “TER Aôndo er sule ken Eden [shin paradiso u msaanyol, mgem u Bibilo u Catholic Douay Version] vegher u sha ityoughkitaregh, ver or u A er la keregh.” Ngeren u ken zwa Heberu la ôr kwagh u sule u Eden. Inja i Eden ér, “Msaanyol.” Man sule la yange u doo tsung je. Kwaghyan yange ta ijar ker, ijiir la kpa doo ashe, shi uumace man annyamev cii lu bem bem.—Gen. 1:29-31.

4. Er nan ve se fatyô u kaan ser sule u Eden lu paradiso?

4 Ishember i ken zwa Heberu i i gem ér “sule” la, ken zwa Grika yô, ka pa·raʹdei·sos. Takerada u i yer ér Cyclopædia, u M’Clintock man Strong ve gber yô, ôr kwagh u ishember i pa·raʹdei·sos la ér, yange Orgrika nana ungwa ishember la yô, kwagh u a va nan ken ishima yô, i lu foto u ijiir i zegenan i doon ashe, i kwagh u bo una fatyô u nyôron ker ga yô. Ijiir ne i lu a ikyon i doon ashe, i umen atam atô kposo kposo shi i lu a ukungwambamngerev, toho u mende, u hôm sha akpekpe; nahan ikyum iyongo man ihyo i va yaan toho her yô.—Nenge Genese 2:15, 16.

5, 6. Paradiso yange saa nena, man kwagh ne gema due a mbampin mba nyi?

5 Ka imba paradiso u Aôndo yange ver Adam man Ifa ker je la. Nahan kpa ve lu ker gbem ga. Yange ve va hemba Aôndo ato nahan ve kera kuma u lun ker ga. Nahan Paradiso la maa saa; ve kua ônov vev kera tsa lu ken paradiso ga. (Gen. 3:23, 24) Er ior kera lu ken sule ne ga nahan kpa, ikyav tese ér sule ne lu her zan zan ar sha shighe u Mngerem ma Deemee ma sha shighe u Noa la.

6 Nahan kpa alaghga mbagen vea pine ér, ‘Ma nomsoor shin kwase gayô wanye nana tsa a lu ken Paradiso shin tar kpa?’ Akaa nga a a tese ér yange sev a av shi ior vea lu ken Paradiso yôô? Aluer u ngu veren ashe u va lun vea ior ou mba doon we ishima ken Paradiso yô, u ngu a ityôkyaa i i ne ve u lu a ishimaverenkeghen la yôô? U fatyô u pasen er i hii ve i lu u paradiso una va kpee a bunde ga kpa?

AKAA A A TESE ÉR PARADISO NGU VAN KEN HEMEN YÔ

7, 8. (a) Aôndo yange er ityendezwa a Aberaham ér nyi? (b) Alaghga tsô ityendezwa i Aôndo er a Aberaham la na yô, Aberaham hen sha nyi kwagha?

7 Ijiir i hemban doon i se zua mbamlumun sha mbampin mba sha kwagh u Paradiso yô, ka ken Bibilo, sha ci u ka Yehova, u gba Paradiso la iyolna je a ne i nger i ye. Nenge ase kwagh u yange ôr a ijende na Aberaham ne. Aôndo yange kaa ér una seer ônov mba Aberaham vea hingir “er waarawa u shin kpezegemnger nahan.” Shi Yehova tôndo zwa a Aberaham ér: ‘Akuraior a sha won cii aa zua a iveren ken tsombor wou, sha ci u, u we imo Yam ikyo yô.’ (Gen. 22:17, 18) Aôndo va kimbir eren ityendezwa ne a wan u Aberaham man wan u wan na cii.—Ôr Genese 26:4; 28:14.

8 Bibilo ôr kwagh môm u a tese ér Aberaham yange hen ér uumace vea va zua a injar i masetyô ken paradiso sha tartor ga. Nahan shighe u Aôndo kaa ér “akuraior a sha won cii” aa zua a iveren la, ka keng Aberaham yange una lu henen kwagh u averen a shin tar. Ka Aôndo yange er ityendezwa ne ye; man i tese ér a va kpe “akuraior a sha won cii” iyol yô. Kpa ka cii kwagh u Bibilo i ôr u a tese ér paradiso una va lu shin tar laa?

9, 10. Ka uityendezwa mba nyi yange i va er mba ve tese ér paradiso una va lu ken hemene?

9 Davidi u va due ken tsombor u Aberaham la kpa yange ôr kwagh ter shighe u ken hemen, zum u a kar a “mbaerenakaabo” man “mbaerenafer” kera yô. Ka nyi ia er hen shighe shono? “Iferor á kera lu ga.” (Ps. 37:1, 2, 10) Kpa “mbaasemaleghlegh yô, vea ya dyako u tar, á saan ve iyol sha mngee u bem.” Jijingi shi mgbegha Davidi nger ér: ‘Mbaperapera vea ya dyako u tar, vea lu ken u gbem.’ (Ps. 37:11, 29; 2 Sam. 23:2) U hen wer uityendezwa mban yange vea na a lu ior mba i sar ve u eren ishima i Yehova la nena? Vea zua a ityôkyaa i injaa i lun a ishimaveren ér, aluer ka mbaperapera tseegh  vea va lu sha tar yô, tar ua fatyô u shi hiden lun paradiso er ngise lu ken sule u Eden nahan.

10 Shighe kar yô, Mbaiserael kpishi mba ve senge ér mba civir Aôndo la gema ijime a na shi ve gbihi mcivir u mimi. Nahan Aôndo de Mbababilon va hemba ior nav ityav, ve vihi ijiir ve shi ve kura ve kpishi ve yem a mi uikyangen. (2 Kron. 36:15-21; Yer. 4:22-27) Nahan kpa, uprofeti mba Aôndo tsengapasen ér anyom aa karen 70 yô, ior mba Aôndo vea hide ken tar ve. Yange akaaôron a profeti ne cii va iv sha mi. Shi se kpa nga se a inja nyian. Se nguren timen sha akaaôron a profeti ne agen yô, umbur wer kwagh u se lu veren ishima sha mi jighilii yô, ka paradiso u a lu van shin tar la.

11. Yesaia 11:6-9 yange kure sha mi nena, nahan kpa alaghga shi se pine ser nyi?

11 Ôr Yesaia 11:6-9. Aôndo yange tsengaôron sha ikyev i Yesaia ér ior nav vea hiden ken tar ve yô, vea tema bem bem. Vea cia ér inyamtoho shin ior mba lun anza er inyamkyume nahan vea va ta num sha a ve ga. Agumaior man mbabeenyol cii vea lu ken mkor. Kwagh la umbur we er ngise Aôndo er sule u Eden lu kundu kundu, a zayol shio la ga he? (Yes. 51:3) Kwaghôron u profeti u Yesaia la shi kaa ér tar cii ua “mgbough a mfe u TER er mngerem ma ngee shin zegemnger nahan,” a lu ikyuior i Iserael tseegh ga. Ka hanma shighe kwagh la una ere?

12. (a) Ka averen a nyi mba ve due ken uikyangen ken Babilon la zua a mi? (b) Ka nyi i tese ér Yesaia 35:5-10 shi una va kure sha mi ken hemene?

12 Ôr Yesaia 35:5-10. Yesaia shi yange kaa ér mayange inyamtoho shin uumace vea ta ior mba vea hide ken uikyangen la mciem iyol ga. Iyiav mbia ta ijar ken tar ve, sha ci u mngerem ma a ngee vough er ngise mngerem lu ken sule u Eden kpishi nahan. (Gen. 2:10-14; Yer. 31:12) Lu u kwaghôron ne una kure sha shighe u Mbaiserael la tseeghlee? Kwagh môm tese ér yange i bee ior mba ve due ken uikyangen la angev sha ivande ga. Ikyav i tesen yô, yange i bugh mbaapirashe ashe ga. Nahan Aôndo lu tesen kwagh u una er kpôô kpôô ken hemen yô, a bee ior iangev.

13, 14. Yesaia 65:21-23 yange kure sha mba ve due ken uikyangen la nena; kpa ka nyi kwagh ken kwaghôron u profeti ne i lu a kure ga? (Nenge foto u a lu sha mhii u ngeren ne la.)

13 Ôr Yesaia 65:21-23. Mbayuda yange ve due ken uikyangen, ve hide ve va lu ken ayou a injaa a i maa i ver ve ga; yange ve va kohol iyiav ken ishule shin ishule i wain ga. Kpa lu u Aôndo una ver ve, nahan shighe a karen yô, hanma kwagh una gema. Nenge ase er yange vea maa uya vev shi vea lu ker ve a saan ve iyol tsung yô! Yange vea lôô iyiav shi vea ya atam a dedoo a iyiav mbira kpaa.

14 Nenge ase kwagh ugen ken kwaghôron u profeti la. Shighe ngu van u se va tsaan sha won shin ayange ase aa luun ‘er ayange a ikyon a lun nahana?’ Ikyon igen ka i tsa anyom udubu imôngo. Nahan cii kpa, saa uumace vea lu gbang gbang ve, vea fatyô u tsan sha won imba la nahan ye. Aluer ka u uumace vea va tema kundu kundu shin vea lu hen haregh u doon ashe er Yesaia tsengaôron nahan yô, a lu kwagh u doon tsung, a lu paradiso jim jim! Man kwaghôron u profeti la una va kure sha mi vough kpaa!

Ityendezwa i Yesu yange er sha kwagh u Paradiso la ia va kure sha mi nena? (Nenge ikyumhiange i sha 15, 16)

15. Ka averen a nyi nahan yange i tsengaôron kwagh u a ken takerada u Yesaia?

15 Gbidye ase kwar nenge er uityendezwa mba se tim sha mi mban ne cii, ve tese wang ér paradiso ngu van ken hemen yô. Aôndo una ver akuraior a sha won cii doo doo. Or môm nana cia inyamtoho shin uumace mba lun er inyamkyume nahan ga. A bugh mbaapirashe ashe shi a bugh mbakondonato ato shi a bee mbagban awan iwan ve. Ior vea maa uya vev, shi vea er tom a zua a kwaghyan u dedoo, vea ya. Vea tsa sha won a hemba ikyon. Sha mimi yô, Bibilo tese wang nahan ér kwagh a va lu nahan. Nahan kpa alaghga mbagen vea kaa ér se mba kehen a kehe a kwaghôron, ka kwagh u kwaghôron u profeti la a tese jighilii la ga. U kaa wer nyi sha imbakwagh laa? Ka ityôkyaa i injaa i nyi  u lu a mi i veren ishima wer paradiso una va lu sha tara? Yesu u yange lu or u hemban cii ken uumace la, pase se ityôkyaa i injaa.

U LU KEN PARADISO!

16, 17. Ka hanma shighe Yesu yange ôr kwagh u Paradiso?

16 Yesu yange er kwaghbo ga, nahan kpa i kure un ijir ér a kuma ku, maa i mande un sha kon vea mbaiv uhar mba ve lu Mbayuda yô; u môm ken iyan, ugen ken imese. Cii ve Yesu a kpe yô, ormbaiv ugen la kav er Yesu a lu tor yô, maa a kaa a na ér: “Yesu, umbur mo zum u Wea nyôr sha tartor Wou yô.” (Luka 23:39-42) Mlumun u Yesu na or ne, u a lu ken Luka 23:43 la bende sha kwagh u mlu wou u ken hemen. Mbafantakerada mbagen mba sha ayange ne gema mkaanem mara nahan ér: “Mimi je m kaan we ne, nyian je u lu vea mo ken Paradiso.” Ver ishima sha ishember i “nyian” la. Yesu lu ôron ér nyi? Ior mba a mbamnenge kposo kposo.

17 Ijô kpishi nyian ka i wa akav a memen ken kwaghngeren sha er una wanger yô. Kpa ngeren mba sha ave mba ken zwa Grika mba ngise mbara yô, i waan akav a kwaghngeren la hanma shighe ga. Nahan mpin u a gem a lu yô: Yesu lu kaan ér “M ngu kaan we, nyian u lu vea mo ken Paradiso”? Shin lu kaan ér “M ngu kaan we nyian, u lu vea mo ken Paradiso”? Mbagemankwagh wa ikyav i memen la kposo kposo; ka ve wa sha er ve kav mkaanem ma Yesu mara yô. Mbagenev wa ikyav la cii man ishember i “nyian” la ye, mbagen di wa ken hemen u ishember i “nyian” la. U fatyô u nengen a igbenda ihiar ne cii ken Ubibilo kpishi.

18, 19. Ka nyi i wase se u kaven kwagh u Yesu ôr laa?

18 Kpa umbur wer Yesu yange vande kaan a mbadondon un ér: “Wan u or . . . Una tsa shin semanyaagh ayange atar man aime atar.” Shi kaa ér: “Á na Wan u or sha ikyev i ior. Vea wua Un kpaa, man sha iyange i sha utar la á nder Un.” (Mat. 12:40; 16:21; 17:22, 23; Mar. 10:34) Apostoli Peteru kaa ér kwagh yange er nahan vough. (Aer. 10:39, 40) Nahan Yesu yange yem ken Paradiso sha iyange i un vea ormbaiv la ve kpe la ga. Yesu lu “shin Hade” gayô shin uwar ayange kar cii ve Aôndo nder un ye.—Aer. 2:31, 32. *

19 Se nenge a kwagh ne wang, Yesu yange hii ityendezwa na a ormbaiv la sha u kaan ér: “Mimi je m kaan we nyian ne.” Shighe u Mose la kpa ior lamen nahan. Mose yange ôr kwagh kaa ér: ‘Akaaôron a m kaan we nyian ne, a̱ lu u ken ishima.’—Dut. 6:6; 7:11; 8:1, 19; 30:15.

20. Ka nyi i sue mkav u se lu a mi sha mkaanem ma Yesu ôr laa?

20 Orgeman Bibilo ugen u ken vegher u Ityoughkitaregh la ôr kwagh u mlumun u Yesu la ér: “Kwagh u i gbe u a hemba veren ishima sha mi ken ivur ne yô, ka ishember i ‘nyian’ la, nahan gba u ma i nger ivur la ér, ‘Mimi je m kaan we nyian ne, u va lu vea mo ken Paradiso.’ Yange i er ityendezwa la sha iyange la, kpa lu u a va kure i ken hemen. Lu gbenda u ior mba ken veghertar la lamen je la. Yange ve ôr kwagh nahan u tesen ér i er ityendezwa sha iyange shon shi ka u a kure i kpee.” Mgem u Bibilo u ken zwa Syriac, u a zurum anyom 1,600 nahan yô, gema ivur la ér: “Amen, m ngu kaan a we nyian mer we vea mo se va lu ken Sule u Eden.” Ityendezwa ne taver se cii ishima kpen kpen.

21. Ka nyi kwagh se fe ser ngi sha ci u ormbaiv la ga, man er nan se fe?

21 Ormbaiv la yange fa kwagh u ikyuryan i Yesu ya vea mbaapostoli nav mbajighjigh ér vea lu vea na ken Tartor u Sha la ga. (Luka 22:29) Heela tseegh ga, ormbaiv la yange er batisema kpaa ga. (Yoh. 3:3-6, 12) Sha nahan yô,  se kav wang ser paradiso u Yesu tôndozwa a or ne la lu paradiso u shin tar. Anyom yange nga kar yô, apostoli Paulu ôr kwagh u mpase u sha mnenge ugen u ‘i feese or i za a nan ken Paradiso’ yô. (2 Kor. 12:1-4) Paulu kua mbaapostoli mbagenev mbajighjigh mbara cii i tsua ve u za hemen Sha vea Yesu ken Tartor, kpa ormbaiv la yô, lu nahan ga. Nahan je kpa, Paulu lu ôron kwagh u kwagh ugen ken hemen, ka “paradiso” * u a lu van la je la. Paradiso la una va lu shin tara? We u fatyô u va lun ker kpa?

KWAGH U U FATYÔ U VEREN ISHIMA A MI YÔ

22, 23. Ka nyi u fatyô u veren ashe keghene?

22 Umbur wer Davidi yange tsenganengen a shighe u ‘mbaperapera vea ya dyako u tar’ la. (Ps. 37:29; 2 Pet. 3:13) Davidi lu ôron kwagh u shighe u hanmaor u nana lu sha tar cii nana dondon igbenda i Aôndo i perapera la yô. Kwaghôron u profeti u ken Yesaia 65:22 la kaa ér: “Er ayange a ikyon a lu nahan kape ayange a ior Av kpaa aa lu la.” Kwagh ne tese ér ior vea tsa sha won anyom udubu imôngo. U hen wer kwagh a fatyô u eren nahana? Kwagh a er nahan yum. Mpase 21:1-4, kaa ér Aôndo una ver uumace, man iveren igen i a tendezwa a mi yô, ér “ku ua kera lu ga.” Ior mba Aôndo mba vea lu ken tar na u he la cii yô, mayange vea kpe ga.

23 Kwagh ne wanger wang. Adam man Ifa yange ve na Paradiso u ken Eden la saa; kpa maa tese ér una saa gbem sha won ga. Aôndo una ver uumace doo doo shin tar er a tendezwa nahan. Jijingi yange mgbegha Davidi kaa ér mbaasemaleghlegh man mbaperapera vea ya dyako u tar shi vea lu sha u gbem. Akaaôron a profeti a ken takerada u Yesaia la a wase u u veren ashe keghen shighe u se ember uma ken shighe u doon ken paradiso shin tar la. Kpa kwagh ne a lu hanma shighe? Ka shighe u Yesu una kure ityendezwa na i er a ormbaiv la. We kpa u fatyô u va lun ken Paradiso la. Zum la, mkaanem ma yange i ôr a ior mba ve za mkohol ken tar u Korea la ma a kure sha mi vough, ér “Se nenge a ven ken Paradiso!”

^ par. 18 Profesôr ugen iti na ér C. Marvin Pate, a kaa ér mbafantakerada mbagenev kpishi na jighjigh ér shighe u Yesu kaa ér “nyian” la, lu kaan ér una kpe sha iyange la, shi iyange shon i môm una yem ken Paradiso, gayô ken atô u ahwa 24. Profesôr ne shi kaa ér zayol u a lu sha mnenge ne yô, a zua sha akaa agen a Bibilo i er la ga. Ikyav i tesen yô, Bibilo kaa ér shighe u Yesu kpe la, i ii un lu shin uwar, va nderen yô, kôndo yem sha.—Mat. 12:40; Aer. 2:31; Rom. 10:7.