Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 Ngeren U Pasen Yiase Yase

“Mba I Ne Ve Tom u Pasen Kwagh La”

“Mba I Ne Ve Tom u Pasen Kwagh La”

URAAHUMBE yange u nôôr kpishi ayange imôngo, cii man iyange i Hiitom, Setemba 1, 1919 la ye. Sha iyange ne, oo ta, shi tsee iyol doo kpishi. Ka va hingir atetan yô, mbazan mkohol mba ve nôngo u kuman er 1,000 nahan la, za kohol hen agirigi u lu a akaateman 2,500 la, sha u vea hii mkohol u i kumba ken gar u Cedar Point, kpentar u Ohio, ken tar u Amerika la yô. Ka va lun aikighe yô, iorov 2,000 seer nyôron hen agirigi ne. Yange ve va sha utso man umato kua sha agirgiadogo. Sha iyange i Tomahar yô, ior seer iyenge hen mkohol la je yô, i mase eren un cii ken won, shin atine a ikyon a doon kenger.

Yange oo ta sha ahu a ikyon la kar kôr nomso sha akondo, lu inja er ve hua leesi nahan. Ahumbe a kundun iyol a shin ifi u Lake Erie di gema lu daase a ingyur i i wa sha ader a ukase cir la. Anmgbian ugen kaa ér: “Ijiir i mkohol ne yange i doo ashe kpen kpen, ayôôso lu her ga, nahan lu inja er se mba ken Paradiso nahan.”

Er ijiir la doo ashe tsung nahan kpa, lu msaanyol u anmgbianev lu ker la hemba lun kwagh u vesen ye. Ipipaabaver igen hen ijiir la kaa ér: “Er hanma or yange nan ver ishima zulee sha kwagh u lu zan hemen la nahan kpa, saan ve iyol tsung shi ve lu eren asenge kpoghuloo je.” Ken anyom kpuaa a a kar ken ijime la, Mbahenen Bibilo tagher a atsan a vihin tsung, kpa er ve hemba atsan la yô, doo ve kpishi u kohol imôngo vea anmgbianev vev hen mkohol ne. Lu atsan a ngise ve tagher a mi je ne: yange i hendan a ve shighe u i lu nôngon ityav la, shi ayôôso lu ken tiônnongo shi i wuhe anmgbianev kpishi sha ci u kwagh u Tartor shi i cir Betel u ken Brooklyn la, shi i wuhe anmgbianev mbagenev anigheni mba ve lu hemen nongo u Yehova la, ve tsa ken purusu kuma anyom 20. *

Er Mbahenen Bibilo mbagenev yina ishima shi ve fa kwagh u lun zan hemen ken anyom a i lu tôvon ve a ican la ga yô, ve de u eren tom u pasen kwagh la. Kpa mbagenev kpishi nôngo sha afatyô ve cii, ve lu eren tom ne her, shin er i lu kighir ve ér ve de u eren u nahan kpaa. Ikyav i tesen yô, ordasenda ugen yange kaa ér, shin er i ta Mbahenen Bibilo mbara icin taveraa ér ve de u pasen kwagh nahan kpa, ve kaa ér vea “za hemen u pasen loho u Aôndo la zan zan mkur.”

Hen shighe u i lu tôvon Mbahenen Bibilo mba ve lu civir Aôndo sha mimi a ican la cii, yange ve lu “dondon hemen u Ter, . . . shi ve lu eren msen hanma shighe ér a tese ve kwagh u vea er yô.” Hegen ne, ve va kohol ijiir môm hen mkohol u saan iyol u hen gar u Cedar Point ne. Anmgbian u kwase ugen yange ôr kwagh u lu mbagenev kpishi ken ishima yô; ve lu henen er vea er ve “vea hide a hii tom u pasen kwagh la kpoghuloo” yô. Yange hemba gban ve ishima cii u hiden eren tom u pasen kwagh la!

“GA”—IKYAV KI TOMOUGH KI HEGH!

Ken kasua u i lu eren mkohol la cii, mbazan mkohol fa kwagh u asangaabaacaa a ahar a i nger ér “GA” ne tile sha mi la ga. Yange i nger asangaabaacaa ne sha porogeram u mkohol man sha ukaade mba sughun ior za van man usainboodu mba ve lu hen ijiir i mkohol la cii. Sha iyange i Tomataan i mkohol u lu a itinekwagh ér “Co-Laborers’ Day” (Iyange i Mbaerentom u Pasen Kwagh) la, Anmgbian Joseph F. Rutherford pase iorov 6,000 mba ve za mkohol ne la, inja i asangaabaacaa la. Yange pase inja i “GA” ér ka The Golden Age (Shighe u Doon Tsung), u a lu magazin u he u a pasen kwagh a mi yô. *

Anmgbian Rutherford yange ôr kwagh u Mbakristu mba i shigh ve mkurem la ér: “Er ve lu yan ican nahan kpa, jighjigh u ve lu a mi la wase ve u nengen a Shighe u Doon Tsung u Mesiya a lu hemen ne. . . . Ve nenge ér mba a tom u vesen u yôôn Shighe u Doon Tsung u a lu van sha tar cii la. Ka tom ugen u Aôndo a ne ve yô.”

Yange i nger sha igbende i Golden Age la ér “a Journal of Fact, Hope, and Conviction” (Magazin u Mimi man u Nan Ior Ishimaverenkeghen kua Vangertiôr). Lu u a er tom a magazin ne u samber a mimi sha gbenda u he, inja na yô, a zenden a mi sha uya uya, a naan mba ve kimbi inyaregh ér i va na ve la. Yange mba pin mba ve soo u eren tom ne yô, ior cii mough tile sha ér vea er u. Maa ve wa icam “a ishima i môm, i i lu mbadondon Yesu ijime tseegh fa” la ér: “Aye Tere! Tindi iwanger you man mimi wou.” Anmgbian J. M. Norris kaa ér: “Yange i wa icam ne genger genger je lu inja er ikyon ngi tenger nahan.”

Yange mkohol ne been yô, mbazan mkohol mough wa nôngo, tile sha mi ahwa imôngo, sha er vea lu mba hiihii mba kimbin inyaregh ér i va naan ve magazin la yô. Yange lu mbagenev kpishi ken ishima er Mabel Philbrick nahan, a kaa ér: “Yange saan se iyol kpishi u fan er lu u shi se hide se hii tom ne yô!”

“MBA I NE VE TOM U PASEN KWAGH LA”

Mbahenen Bibilo mba kuman er iorov 7,000 nahan wa agoyol u za eren tom u pasen kwagh la. Kwatakerada u Organization Method (Gbenda u Nongo Wase u Eren Kwagh Yô) man antakerada u To Whom the Work Is Entrusted (Mba I Ne Ve Tom u Pasen Kwagh La) yange ve tese er a eren tom ne la vindi vindi. Nongo wase yange u ver Gbaatom u Nengen sha Tomshiren u he, hen ijiir yase i shin itine la, sha u a tesen er a eren tom u pasen kwagh la yô. Nahan gba u a ver Kômatii u Nengen sha Tomshiren ken tiônnongo shi a tsua or u nana tesen akaa a a er yô. Shi gba u a pav uharegh mba pasen kwagh ker, nahan hanma haregh una luun a uya 150 shin 200. Heela tseegh ga, lu a eren Mkombo u Henen Tomshiren sha iyange i Tomanyiin aikighe sha er anmgbianev vea pasen akaa a ve tagher a mi ken kwaghpasen la, shi vea naan ibaver i kwaghpasen ve yô.

Anmgbian Herman Philbrick kaa ér: “Yange se mba hidi ken uya asev yô, se tume ityough eren tom u nan ior mba ve kimbi inyaregh ér i naan ve magazin la. Ape vea za cii, ior ve kegh ato a ve. Anmgbian Beulah Covey kaa ér: “Lu inja er, er ior yange ve ya ican kpishi shighe u i lu nôngon ityav la yô, hanmô ve nan lu veren ashe a shighe u doon tsung u mbamzeyol mba uumace cii vea bee la.” Anmgbian Arthur Claus kpa nger ér: “Ior kpishi yange ve kimbi inyaregh ér i va naan ve magazin u Golden Age la je yô, kpiligh tiônnongo cii iyol.” Yange mba dugh a mgber u hiihii u magazin u Golden Age ne, iwer ihiar ngi kar yô, i na ior ukôpi mba magazin ne nôngo u kuman 500,000, shi iorov 50,000 kimbi inyaregh ér i va naan ve un.

Anmgbian A. H. Macmillan yange va pase ken ngeren u lu a itinekwagh ér “Gospel of the Kingdom” (Ivangeli i Tartor La), ken Iyoukura i Julai 1, 1920 la ér, “lu kwa u hiihii u i taver anmgbianev ishima sha tar cii ér ve er tom u pasen kwagh, u i lu eren hegen ne je la.” Ngeren la yange taver Mbakristu mba i shighe mkurem la cii ishima ér ve “pase sha tar cii ér tartor u sha la mgbôghom.” Nyian ne, ior umiliôn imôngo kohol anmgbianev mba Kristu, “mba i ne ve tom u pasen kwagh” la, mba pasen loho la sha gbashima, keghen shighe u doon tsung, u Mesiya una bee a mbamzeyol mba uumace cii la.

^ par. 5 Nenge takerada u Jehovah’s Witnesses—Proclaimers of God’s Kingdom la, ityou. 6, sha itinekwagh i i kaa ér, “A Time of Testing (Shighe u I Ta Ior Ikyaren La) (1914-1918).”

^ par. 9 Yange i va gema yilan The Golden Age ken inyom i 1937 la ér Consolation, ken inyom i 1946 la di i gema yilan ér Awake!