Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  6 2017

 ITINEKWAGH I TAMEN | KA IYUA I HEMBAN DOON I NYI I NE SE?

“I Gbe Je Or Ngu a Nam Kwagh u Doon Mo Nahan Ga”

“I Gbe Je Or Ngu a Nam Kwagh u Doon Mo Nahan Ga”

Ka kwagh u wankwase ugen u lun anyom 13 yange ôr je la, zum u i na un an-wan iwa yô. Kwase ugen u a ze ikyura ken kpenga u eren yô wuese er kômputa u ter na yange na un shighe u un lu ken kôleeji la, yange gema uma na yô. Shi orgen u a sember eren ivese yô, wuese kaade u umbur iyange i ivesegh ve, u kwase na yange er sha uwegh nagh, na un yô; a kaa ér, i gbe je or ngu a na un kwagh u doon un er kaade la ga.

Hanma inyom yô, ior kpishi ka ve vihi shighe man agee a ve sha u keren kwagh u vea za na ma ijende ve, shin anmgbian ve sha iyange i ikyaa ve a lu nan iyua i “hemban doon” yô. Man mbagenev kpishi ka a wuese ve a ôr ambaakaa a se ter sha mhii u ngeren ne la nahan, i doo ve kpen kpen. We di ye? U soo wer ma u lu sha ian i u fatyô u nan ior uiyua shin zuan a uiyua mba ve doo u tsung yôô?

Aluer u ngu sha imba ian la yô, a doo u kpishi, sha ci u ka wea na or kwagh yô, i doo nan shi we kpa i saan we iyol. Ka vough er Bibilo i kaa nahan, ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Sha mimi yô, ka wea na or kwagh man kwagh shon una doo nan tsung nahan, i hemba saan we iyol.

Sha nahan yô, u er nan ve iyua you i nan ia va u a msaanyol u mimi kua or u u ne nan laa? Man aluer kwagh u u ne nan la ka u hemban doon nan ga kpa, u er nan ve iyua you la ia lu nan a inja?