Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Iyua i ipaan i Aôndo a ne se ve i lu u se fatyô u zuan a uma u tsôron ne, ka iyua i hemban doon a uiyua mbagenev cii

 ITINEKWAGH I TAMEN | KA HANMA IYUA I HEMBE DOON A UIYUA MBAGENEV CIILI?

Ka Hanma Iyua I Hembe Doon a Uiyua Mbagenev Ciili?

Ka Hanma Iyua I Hembe Doon a Uiyua Mbagenev Ciili?

“Hanma nagh ku dedoo man hanma iyua i vough kpaa ka Sha hen Ter u iwanger ve dugh, ve senen ye.” (Yakobu 1:17) Ivur Bibilo ne tese er Ter wase u sha, Yehova Aôndo, a ne kwagh wuee yô. Nahan kpa, ken uiyua kpishi mba Aôndo a ne uumace la, iyua igen ngi ker i i hembe uiyua mbagenev cii yô. Ka hanma iyua laa? Mkaanem ma Yesu ma ken Yohane 3:16 ma ior kpishi ve fe ne ma kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”

Iyua i Aôndo a ne se sha Wan na u môm môm la ka iyua i hemban cii i hanma wase nana zua a mi yô, sha ci u iyua ne na yô, a fatyô u paan se, se kera lu sha ikyev i isholibo man iyolbeen man ku ga. (Pasalmi 51:5; Yohane 8:34) Se tseegh yô, sea nôngo kwagh nan nan kpa, se fatyô u waren akaa ne ga. Nahan kpa, er se doo Aôndo ishima tsung yô, a er kwagh u i gbe u una er ve akaa ne aa kera ya tor sha a vese ga yô. Yehova Aôndo na Wan na u môm môm, Yesu Kristu ér a lu ipaan, nahan uumace hingir u lun a ishimaverenkeghen i zuan a uma u tsôron. Kpa ka nyi jim jim i lu ipaana? Gba u a paa se sha ci u nyi? Man ipaan la ia wase se nena?

Ipaan ka injar i i kimbi sha u paan kwagh u yange saa yô, sha u hiden lun a kwagh shon, shin duen a or ken uikyangen kera yô. Bibilo pase ér yange Aôndo gba mbamaren asev mba hiihii mbara, Adam man Ifa, ve lu a isholibo iyol ga, nahan lu u vea lu uma gbem sha won ken paradiso shin tar, vea ônov mba lu u vea va mar la imôngo. (Genese 1:​26-28) Kpa kwagh er vihi yô, ve hemba Aôndo ato, nahan ve hingir mbaasorabo, maa kwagh u dedoo la cii kar ve. Lu nyi i due kere? Bibilo na mlumun ér: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo.” (Mbaromanu 5:12) Adam na yô, ônov nav kera lu a uma u vough la ga; a tsar ve isholibo man kwagh u isholibo i ve a mi la, ku.

Nahan ka gbe u a na ipaan sha kwagh la yô, gba u a kimbi kwagh u lun vough er u Adam yange ta kera la nahan. Er Adam hemba Aôndo ato sha apera yô, lu isholibo je er ye, nahan kera lu vough ga; a hingir orumace u lun a isholibo iyol. Bibilo kaa ér, kwagh la na yô, ônov mba Adam va mar la cii hingir ikpan sha ikyev i isholibo man ku. Sha nahan yô, saa orumace u vough, Yesu, una na nagh sha uma na ve a paa ve sha ikyev i isholibo man ku kera ye. (Mbaromanu 5:19; Mbaefese 1:⁠7) Ka er Aôndo yange kimbi ipaan ne sha dooshima na ve uumace ve hingir u lun a ishimaverenkeghen i va lun a uma u vough u Adam man Ifa yange ve ta kera la ye​—⁠ka u lun uma gbem sha won ken paradiso shin tar je la.​—⁠Mpase 21:​3-5.

Kwagh ne na yô, iyua i ipaan i Aôndo a ne se ve i lu u se fatyô u zuan a uma u tsôron ne, ka iyua i hemban doon a uiyua mbagenev cii je ka u henen a hen ga. Kwagh u una wase se u fan er iyua ne i lu “iyua i vough” yô, de se nenge igbenda i hemban cii, i iyua shon i kure akaa a ka a wase se u nan or iyua i doon nan tsung, a se sember timen sha mi cii man ngeren ne la vough yô.

Iyua ne ia kure isharen yase. Se uumace cii, sha gbaaôndo wase je ka i sar se tsung u lun uma gbem sha won. (Orpasenkwagh 3:11) A lu se tseegh yô, ma se fetyô u kuren isharen ne ga, kpa iyua i ipaan la na yô, se fatyô u lun uma gbem sha won. Bibilo kaa ér: “Injar i  isholibo i kimbin yô, ka ku, kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.”​—⁠Mbaromanu 6:⁠23.

Iyua ne ia kure mgbe wase. Uumace fatyô u paan ayol a ve ga. Bibilo pase ér: “Or u nan fetyô u paan anngô u nan, nan ngu je ga, Shin u nan Aôndo kwagh u á paa nan a mi kpaa ga;​—⁠gadia mpaa u uma ve taver ishe tsô, mayange vea fatyô ga.” (Ps. 49:​7, 8, NW) Sha nahan yô, yange lu u saa Aôndo una wase se keng ve se due ken ikyangenev mbi isholibo man ku kera ye. Kpa Aôndo na kwagh u yange gba u a na la vough “sha mpaa u a lu ken ipaan i Kristu Yesu na la.”​—⁠Mbaromanu 3:​23, 24NW.

I na iyua ne sha shighe u vough. Bibilo kaa a vese ér: “Aôndo tese se dooshima Na sha ku u Kristu A kpe sha ci wase er se lu mbaasorabo her la” je. (Mbaromanu 5:⁠8) Er i na se iyua i paan se sha shighe u “se lu mbaasorabo her” la yô, kwagh la na se mba a vangertiôr ser mimi je se doo Aôndo ishima tsung, shin er se lu mbaasorabo nahan kpaa. Shi iyua shon na se ishimaverenkeghen sha akaa kpishi, shin er i gbe u se wa ishima a akaa a vihin tsung a isholibo i ve se a mi la nahan kpaa.

I na iyua ne a awashima u vough, ka sha ci u keren mtsera ga. Bibilo pase kwagh u yange na ve Aôndo na Wan na sha u paan se la kaa ér: “Ka sha kwagh ne man i pasen dooshima u se doo Aôndo ishima la ye, er Aôndo tindi Wan Na u môm môm shin tar, sha u se̱ lu uma sha a Na. Ka hen ape dooshima a lu ne: ka Aôndo man A doo se ishima ga, kpa ka se, se doo Aôndo ishima ye.”​—⁠1 Yohane 4:​9, 10.

U wuese iyua i hemban sha won cii ne nena? Umbur wer mkaanem ma Yesu ma ken Yohane 3:16 mara tese ér ka mba ve “ne Un jighjigh” la tseegh vea war ye. Bibilo pase ér jighjigh u nan ka “u fan kwagh u ishimaverenkeghen yase i lu sha mi la dedoo a akpelan a tan ga.” (Mbaheberu 11:⁠1) Kwagh u una wase u u lun a akpelan a tan sha ishimaverenkeghen la ga yô, saa u zua a mfe u mimi. Nahan yô, se mba taver we ishima ser tôô shighe hen kwagh u Yehova Aôndo, u a ne “iyua i vough” ne la, shi fa kwagh u i gbe u u er ve u zua a uma u tsôron u nagh ku Yesu kura ku bugh u gbenda u zuan a mi la.

U fatyô u zuan a mfe sha akaa ne cii sha u timen ken ngeren mba pasen Ruamabera mba ve lu sha Intanet hen ijiir yase i www.jw.org/tiv la. A saan Mbashiada mba Yehova iyol u wasen we. Se mba a vangertiôr ser u nguren henen kwagh u iyua i hemban cii ne kua mtsera u ia va u a mi la yô, u kaa wer: “I̱ wuese Aôndo sha Yesu Kristu Ter wase!”​—⁠Mbaromanu 7:25.