Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITINEKWAGH I TAMEN | MBAMPASE MBA SHA KWAGH U IOR MBA SHA TAR U SHA

Mbampase mba shaKwagh u Ior mba sha Tar u Sha

Mbampase mba shaKwagh u Ior mba sha Tar u Sha

Mbampase mba sha mnenge mban pase se wang ér Yehova Aôndo man Wan na Yesu Kristu, man mbatyomov mba jighjigh, kua mba i yam ve shin tar la cii, kwagh wase gba ve ishima tsung shi ve soo ér i kpe se iyol. Wea soo u seer fan kwagh u vea va er la yô, lam a Mbashiada mba Yehova, gayô za hen ijiir yase i sha Intanet i www.jw.org/tiv la, za gber takerada ugen ngu a itinekwagh ér Bibilo Tese Se Nyi?

YEHOVA KA UHEMBANSHA

I ver ikyônough ki torough Sha man i tema sha ikyônough ki torough kira. Un u A tema sha mi la, mluashe Na lu er iwen i yasepi man i sardiu nahan, ikyume i sha aôndo kase ikyônough ki torough kira wa atô, mluashe u i lu er emeraldi nahan.”—Mpase 4:2, 3.

“Iwanger ningir [un] tser. Lu er mluashe u ikyume ken ibeen sha iyange i ura u nee yô, kape mluashe u iengem i i kase i tser la, i lu la. Kape m-ande u mluashe u icivir i TER a lu la.”—Esekiel 1:27, 28.

Mpase u sha mnenge u i na apostoli Yohane man u i na profeti Esekiel la, pase iengem i Yehova, Aôndo Uhembansha la, sha akaa a se fatyô u nengen a mi yô, er awen a injaa, a doonashe man ikyume man ikyônough ki torough nahan. Shi ve pase se er mlu u Yehova a te ihindi shi a kom ashe shi a lu Aôndo u bem yô.

Gbenda u i pase kwagh u Aôndo nahan ne zua sha kwagh u orngeren pasalmi ugen yange nger yô, ér: “TER hemba cii, A kuma iwuese kpishi je, A hemba cier iyol a mbaaôndo mbagenev cii. Gadia mbaaôndo mba iorov cii ka agbilinakaa tsô, kpa TER gba Usha. Icivir man iengem mba Un sha ishi, agee man mdooashe mba ken icighanjiir Na.”—Pasalmi 96:4-6.

Shin er Yehova a lu Aôndo Uhembansha nahan kpa, a kaa a vese ér se lamen a na ken msen, shi a pase se wang ér un ongo mbamsen asev kpaa. (Pasalmi 65:2) Se doo un ishima shi kwagh wase gba un ishima tsung je yô, apostoli Yohane nger kwagh na sha mimi kaa ér: “Aôndo ka dooshima je.”—1 Yohane 4:8.

YESU NGU VEA AÔNDO SHA

“Er [orhenen Sefanu] iv a Icighan Jijingi yô, a kende ashe Sha, a nenge a iengem i Aôndo man Yesu tile ken uwegh ku yanegh ku Aôndo, a kaa er: Nenge, m nenge i bugh Sha man Wan u or tile ken uwegh ku yanegh ku Aôndo.”—Aerenakaa 7:55, 56.

Yange i ôr Yesu ijir, i wua un ica lu a gba ga, maa i va tese Sefanu mpase u sha mnenge ne ye; man lu mbahemenev mba kwaghaôndo u Mbayuda mba ve wua Yesu la je Sefanu lu lamen a ve ye. Mpase u sha mnenge ne yange tese ér i nder Yesu ngu  uma shi i kende a na sha kpaa. Apostoli Paulu nger kwagh sha kwagh ne kaa ér: “[Yehova] nder [Yesu] shin mbakpenev . . . A ver Un er A̱ tema Un ken uwegh ku yanegh sha ajiir a Sha la, A̱ hemba taven sha a hanma tarkuran man tahav man agee man tor u yan cii man hanma iti cii i i yer i sha ayange ne kua a lu van ken hemen la kpaa.”—Mbaefese 1:20, 21.

Avur a Bibilo ne pase ian i vesen i Yesu a lu sha mi la tseegh tsô ga, kpa a tese ér uumace doo Yesu ishima tsung, er Yehova nahan. Shighe u Yesu lu eren tom u pasen kwagh shin tar la, lu been ior hanma inja i uange cii, shi nderen mbakpenev kpaa. Ku u yange kpe sha ci u paan se la tese ér Yehova man uumace doo un ishima tsung je. (Mbaefese 2:4, 5) Er Yesu a til ken uwegh ku yanegh ku Aôndo yô, una er tom a tahav mbu i ne un la sha u van uumace mba sha tar cii, mba ve ongo imo i Aôndo la, a averen a vesen.

MBATYOMOV MBA EREN AÔNDO TOM

“Er [profeti Daniel] lu kenger her yô, i ver mkônom ma torom; [Yehova,] or u tsan sha won kar za tema . . . ; ior udubu dubu lu eren Un tom, man dubu pue kwa dubu pue tile sha ishigh Nagh.”—Daniel 7:9, 10.

Ken mpase u sha mnenge ne, Daniel nenge a ortyom môm tseegh ga, kpa lu ikpela i mbatyomov. Mpase u sha mnenge ne yange una ta un ihindi iyol kpen kpen je! Mbatyomov ka ior mba ken jijingi, mba ve lu a iengem man mfe kua tahav kpishi yô. Mba sha aan a tom kposo kposo, mbagen ka userafim mbagenev di ka ucerubi. Bibilo ter mbatyomov hemba kwa 250.

Mbatyomov ka uumace mba yange ve vande lun shin tar ga. Aôndo yange gba mbatyomov ica i gba cii ve va mase gban orumace ye. Shighe u i tim imagh ki taregh la, mbatyomov nenge shi ger amo sha iember kpaa.—Yobu 38:4-7.

Gbenda môm u mbatyomov mbajighjigh mban ve eren Aôndo tom yô, mba suen tom u i lu eren sha tar nyian, u u hembe lun hange hange cii la; ka tom u yôôn loho u dedoo u Tartor u Aôndo je la. (Mateu 24:14) Mpase u sha mnenge u yange i na apostoli Yohane la pase er ve lu uwegh ken tom ne yô. Yohane nger ér: “M nenge ortyom u Sha ugen lu purugh sha kwavaôndo lu a Icôronloho u Dedoo  u yôôn hen mba ve tem shin tar cii, hen hanma ikyurior man hanma nongo man hanma zwa man hanma nongoior.” (Mpase 14:6) Shin er nyian ne mbatyomov ve kera lamen a ior er sha ashighe a tsuaa la ga nahan kpa, mba hemen mba ve lu pasen loho u dedoo la zan a ve hen mbaasemaamimi.

SATAN NGU TSUGHUN IOR UMILIÔN IMÔNGO

“Ityav gba Sha, Mikael kua mbatyomov nav lu nôngon a darakon. Darakon a mbatyomov nav kpaa lu nôngon, kpa a hemba ga, ian kera lu sha ci ve Sha kpaa ga. I gbihi zegedarakon la shin inya, ka tseyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa.”—Mpase 12:7-9.

Ka hanma shighe cii bem yange lu sha ga. Shighe u i gba orumace la, ortyom ugen lu, u hange un ken ishima u ior ve civir un yô. Nahan ortyom ne hemba Yehova ato, maa hingir Satan, inja na yô, ka “Orhendankwagh.” Mbatyomov mbagenev kpa va dondo un ken ihyembeato na ne, maa i hingir u yilan ve ér azôv. Er ve hingir mba wan afer kpishi yô, ve hendan a Yehova tsung, shi ve tsugh uumace kpishi undu hemen u Yehova u sha dooshima la.

Satan man azôv a na wa afer shi vihi tu kpishi. Ve kôr uumace ihyom, shi ka ve ve ne ve ior ve lu hemban yan ican sha tar nyian ye. U tesen ikyav yô, Satan yange wua uzendenya man mbatyomov mba orjighjigh Yobu. Shi wua ônov mba Yobu pue, a er “zegehiar” ta sha you i ve lu ker la. Ka been cii yô, Satan shi mough haa Yobu “avav a nyoon, hii shin akevangahar a na je, ar sha ihaghtyou na.”—Yobu 1:7-19; 2:7.

Nahan kpa, ica a gba ga tsô a tim Satan kera. Hii shighe u yange i daa un sha i gbihi shin tar la je, “a fa er shighe na a kera vese ga yô.” (Mpase 12:12) Mtim ngu keghen Satan, man kwagh ne ka loho u dedoo je zua ga!

MBA I YAM VE SHIN TAR LA

“[We Yesu,] U yam Aôndo ior sha awambe a Ou ken hanma nongo man hanma zwa man hanma nongoior man hanma ikyurior, U er ve, ve hingir tartor man upristi sha ci u Aôndo wase, vea tema tor sha tar.”—Mpase 5:9, 10.

Er yange i nder Yesu shin ku, hide yem sha ken iyol i ken jijingi nahan, kape mbagenev kpa a lu je la. Yesu yange kaa a mbaapostoli nav mba jighjigh mbara ér: “Me yem sha u Me za sôr ne ijiir. . . . Me shi Me hide, Me va kua a ven sha er ne kpaa né lu hen ape M lu yô.”—Yohane 14:2, 3.

Mba ve yemen sha la mba yemen ka sha ityôkyaa je. Vea za hemen vea Yesu imôngo sha Tartor, ka gomoti u una va hemen tar cii shi una ver mba ve tem sha u la doo doo yô. Ka Tartor shon je Yesu yange kaa a mbadondon un ér ve sônon, shighe u lu tesen ve msen u ter wase la ye. A kaa ér: “Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan.”—Mateu 6:9, 10.

TOM U MBA VE LU SHA MBARA VEA VA ER LA

“[Apostoli Yohane] ungwa zegeimo due ken ikyônough ki torough kira kaa er: Nenge, tenti u Aôndo ngu hen ior. . . . Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.

Kwaghôron u profeti u i na Yohane ken mpase u sha mnenge ne, ngu ôron kwagh u shighe u Tartor u Aôndo ua va kar a hemen u Satan kera, shi ua gema tar ua hingir paradiso la. Ka Yesu man mbagenev mba i nder ve shin ku, ve yam sha la vea za hemen sha Tartor ne ye. Akaa a a ne uumace ishimavihin man ijungwen la cii aa kera lu ga. Ku je kpa ua kera lu ga.

Kpa gema ior ubiliôn imôngo mba ve kpe, kpa i lu u a nder ve vea yem sha ga la di ye? Shighe ngu van u a va nder ve vea za hemen u lun uma gbem sha won ken Paradiso shin tar yô.—Luka 23:43.

Mbampase mba sha mnenge mban pase se wang ér Yehova Aôndo man Wan na Yesu Kristu, man mbatyomov mba jighjigh, kua mba i yam ve shin tar la cii, kwagh wase gba ve ishima tsung shi ve soo ér i kpe se iyol. Wea soo u seer fan kwagh u vea va er la yô, lam a Mbashiada mba Yehova, gayô za hen ijiir yase i sha Intanet i www.jw.org/tiv la, za gber takerada ugen ngu a itinekwagh ér Bibilo Tese Se Nyi?