Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  5 2016

 ITINEKWAGH I TAMEN | KA HAN U FATYÔ U ZUAN A ISHIMASURUNU?

Hanma Wase Nan Ngu Keren Ishimasurun

Hanma Wase Nan Ngu Keren Ishimasurun

U umbur ma shighe u yange u gba zum u u lu yev laa? Alaghga yange u ndivir shin u tôndo igbum. U umbur er ngôu yange kumbur we la kpa? Alaghga yange kire u ivav shon shi cir mou sha mi. U lu vaan, kpa ngôu kôr u lu kumbur we, maa fese je hii u kundun we iyol. Shighe u u lu iyev la, u ngôôr zuan a ishimasurun ga.

Kpa ka sea vesen yô, uma a seer taver. Shi mbamzeyol kpa ve seer, nahan u zuan a msurshima kpa i hingir ican. Nenge ase ikyav sha kwagh u iorov kpuaa.

  • I lu nahan i de u tom kpoo vee? Orgen mba yer un ér Julian, a kaa ér, yange i de un tom, nahan ishima ta un kwe je un kera fa kwagh u un lu sha mi jighilii ga. Nahan a pine iyol na ér: ‘Me er nan man me nenge sha tsombor wama? M er tom sha gbashima vea kômpeni ne anyom imôngo, man er nan ve hegen u va nengem a iwasen ga?’

  • Adooga ishima ngi vihin we tsung sha ci u ivese you kera kor ga. Kwase ugen iti na ér Rakel, a kaa wener, ‘Yange nomom kendem yem kwagh na, nahan ishima vihim ker tsung shi lum er ishima yam pav nahan. Kwagh la yange nam ishimavihin kua angev. Yange ishima nyian mo kpishi.’

  • Alaghga u gba icôronuange, mba sôron kpa u ngu zuan a guda ga. Adooga ashighe agen a lu u ken ishima er ngise lu tertamen Yobu nahan, yange vaa iyol kaa ér: “Uma wam ndôhôr mo ishima; kera kam ka lun uma zan zan ga.” (Yobu 7:16) Shin alaghga a lu u er orgen u lun anyom 80 kar, u i yer un ér Luis la nahan. Yange kaa ér: “Ashighe agen ka i lum er m ngu keghen ku nahan.”

  • Shin alaghga a lu ku u ma or wou u ne ve u lu keren ishimasurun ye. Orgen iti na ér Robert, a kaa ér, “Shighe u girgi za gba a wan wam ve kpe la, m ungwa sha hiihii la kpa lum er ka mimi ga nahan. Ica i gbe ga yô, hii u sôôn mo ken ishima, man lu msôô u Bibilo i kaa ér ngu er ka a kuma or sanker ve i lu nan la nahan.”—Luka 2:35.

Robert man Luis man Rakel kua Julian cii yange ve zua a ishimasurun, shin er ve lu ken mbamzeyol mba nan ve ishimanyian nahan kpaa. Yange ve fa Or u vea hemba zuan a ishimasurun hen a nan yô, lu orgen môm ga, kpa lu Aôndo Uhembanagee la. Ngu a sur se asema nena? Una fatyô u nan we ishimasurun i u keren la kpa?