Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  4 2017

I nger icighanti u Aôndo u i yer ér Yehova la sha asangaabaacaa a ken zwa Heberu a anyiin, a i yer ér Tetragrammaton la, ka i hii u yilan ken iyan i hide ken imese

Ishangebaacaa i ken Zwa Heberu i Hemban Ndahar la Na Se Vangertiôr

Ishangebaacaa i ken Zwa Heberu i Hemban Ndahar la Na Se Vangertiôr

Se fatyô u lun a vangertiôr ser uityendezwa mba Aôndo a er la cii vea kure mimi kpa? Yesu yange lu a vangertiôr nahan, shi ityesen na la na yô, mba lu tesen ve la kpa na jighjigh nahan. Hen ase sha kwagh u yange tese ikyav sha mi ken Ityesen na i sha Uwo, u i nger ken Mateu 5:18 ne, ér: “Mimi je M kaan ne ne, zan zan Sha man tar kpaa vea kar kera je, kpa mayange ishangekwagh môm shin anikyav môm tsô kpaa una kogh ken atindiakaa kera ga, zan zan akaa cii aa kure sha mi vough.”

Ishangebaacaa i ken zwa Heberu i hemban ndahar ka י (yod). Ka ishangebaacaa i hiihii sha icighanti u Aôndo. Mba yer icighanti la ér Yehova. I nger i sha asangaabaacaa a ken zwa Heberu anyiin, a i yer ér Tetragrammaton la. * Dugh asangaabaacaa man asemberatii a ken Tindi u Aôndo la sha kpa, mbangeren kua Mbafarishi cii yange ve nenge ér hanma “anikyav” shin ishangebaacaa cii yô ngi hange hange.

Yesu lu ôron ér hemba kan zange u sha man tar karen kera, a u ankwagh u cuku u i nger ken atindi la a bunde u kuren sha mi. Nahan kpa, Ruamabera pase se wang ér sha man tar u se tem sha u ne cii mba lun gbem sha won. (Pasalmi 78:69) Sha nahan yô, kwagh u kpilighyol u Yesu ôr ne tese ér ankwagh u hemban ndahar u i ter ken Atindi a Aôndo la je kpa, una kure kpee a bunde ga.

Yehova Aôndo veren ishima sha akaa a kiriki a i nger ken Atindi laa? Een, veren ishima. Nenge ase ikyav ne: Yange kaa a Mbaiserael ér vea yaan waniyôngo u Paseka yô, ve̱ de sombon kuhe na ga. (Ekesodu 12:46) Alaghga kwagh ne kpa lu ankwagh u hemban ndahar ken atindi. Yange ve fa er hii ve i kaa ér ve de sombon kuhe ga kpa? Alaghga yange ve fa ga. Kpa Yehova Aôndo yô, gema fa er ankwagh u cuku ne kpa lu kwaghôron u profeti u tesen ér shighe u a va wua Mesiya sha u manden un sha kon la, kuhe na môm kpa a sombo ga yô.—Pasalmi 34:20; Yohane 19:31-33, 36.

Mkaanem ma Yesu man tese se nyi? Ma tese ér se fatyô u nan jighjigh vangertiôr ser uityendezwa mba Yehova Aôndo a er la cii vea va kure sha mi kpee, kwagh môm una gba inya ga. Nenge imba vangertiôr u doon tsung u ishangebaacaa i ken zwa Heberu la i ne se ne sha wono!

^ par. 3 Ishangebaacaa i ken zwa Grika i hemban ndahar yô ka iota, man ikyav tese ér ngi kwaghmôm a i י (yod), i ken zwa Heberu la. Er lu ken zwa Heberu i hii ngeren Tindi u Mose la i na Mbaiserael yô, a̱ shi nan kpa lu ishangebaacaa i ken zwa Heberu ne Yesu lu ôron ye.